Акафист
святому благоверному князю Даниилу Московскому
(празднование 4/17 марта и 30 августа/12 сентября)
Кондак 1
Избра́нный чудотво́рче и преди́вный уго́дниче Христо́в, гра́да Москвы́ и держа́вы Росси́йския кре́пкое огражде́ние, раздо́ров и нестрое́ний искорени́телю, благове́рный кня́же Дании́ле, похва́льная воспису́ем ти, к ра́це моще́й твои́х притека́юще. Ты же, я́ко име́яй дерзнове́ние ко Го́споду, от вся́ких нас бед свободи́, зову́щих: Ра́дуйся, преподо́бне кня́же Дании́ле, Моско́вский чудотво́рче.
Икос 1
А́нгелов Творе́ц и Госпо́дь во дни вели́ких бед и напа́стей, обыше́дших страну́ на́шу от нечести́ваго ца́рства ага́рянскаго, восхоте́в лю́дем стра́ждущим утеше́ние дарова́ти, я́ви тя, кня́же Дании́ле, я́ко плод кра́сен от чресл вели́каго кня́зя Алекса́ндра; лю́дие же о рожде́нии твое́м ра́дости испо́лнившеся, взыва́ху ти сицева́я: Ра́дуйся, ко́рене благочести́ваго прозябе́ние; ра́дуйся, доброде́телей отца́ твоего́ и ма́тере насле́дниче. Ра́дуйся, рожде́нием твои́м лю́ди гра́да Влади́мира возвесели́вый; ра́дуйся, гряду́щую сла́ву Москвы́ предвозвести́вый. Ра́дуйся, избра́нниче Бо́жий; ра́дуйся, пра́вило ве́ры благочести́выя. Ра́дуйся, о́бразе кро́тости духо́вныя; ра́дуйся, Бо́га, я́ко и́стиннаго Отца́ на́шего, изде́тска позна́вый. Ра́дуйся, я́ко Ио́сиф, от бра́тии твоея́ досажде́ния сла́дце претерпе́вый; ра́дуйся, последи́ и бра́тию свою́ в любо́вь себе́ призва́вый. Ра́дуйся, преподо́бне кня́же Дании́ле, Моско́вский чудотво́рче.
Кондак 2
Ви́дяще бли́жнии твои́, блаже́нне, день от дне во благоче́стии тя возраста́юща, и не то́чию млеко́м ма́терним, но па́че благода́тию Бо́жиею пита́ема, ра́довахуся и, Го́спода о сем хва́ляще, взыва́ху: Аллилу́иа.
Икос 2
Разу́м богопросвеще́н име́я, уразуме́л еси́, всехва́льне, по словеси́ апо́стольскому, я́ко ну́жнейши всего́ есть благоче́стие, и́мже и потща́лся еси́ обогати́ти ду́шу твою́, в моли́твах и науче́нии словеси́ Бо́жию всеусе́рдно пребыва́я. Того́ ра́ди лю́дие ублажа́ху тя си́це: Ра́дуйся, моли́твенниче тепле́йший; ра́дуйся, послу́шниче Ева́нгелия усе́рднейший. Ра́дуйся, доброде́тели высо́кия в се́рдце твое́м вкорени́вый; ра́дуйся, в за́поведех Госпо́дних вся дни живота́ твоего́ ходи́вый. Ра́дуйся, о́бразом жития́ твоего́ мир посреде́ бра́тии водвори́вый; ра́дуйся, Го́спода твоего́ па́че всех возлюби́вый. Ра́дуйся, положи́ти ду́шу свою́ за дру́ги своя́ непреста́нное жела́ние име́вый; ра́дуйся, благода́ть Госпо́дню в се́рдце свое́ заключи́вый. Ра́дуйся, и те́ло свое́ то́ю просвети́вый; ра́дуйся, о́ное и по сме́рти нетле́нно сохрани́вый. Ра́дуйся, преподо́бне кня́же Дании́ле, Моско́вский чудотво́рче.
Кондак 3
Си́ла Вы́шняго укрепля́ше тя, блаже́нне, егда́ в кро́тости и в смире́нии души́ твоея́ возраста́я, уготовля́л еси́ себе́ на служе́ние кня́жеское и о по́мощи небе́сней моли́лся еси́, взыва́я к Бо́гу: Аллилу́иа.
Икос 3
Име́я при́сно в души́ твое́й глаго́л Госпо́день, проро́ку рече́нный: «На кого́ воззрю́, то́кмо на кро́ткаго и смире́ннаго, и трепе́щущаго слове́с Мои́х», потща́лся еси́, свя́те, о́ными доброде́тельми себе́ укра́сити. Того́ ра́ди ублажа́ем тя си́це: Ра́дуйся, подви́жниче до́блий, на высоту́ доброде́телей возше́дый; ра́дуйся, нището́ю духо́вною Ца́рствие Небе́сное стяжа́вый. Ра́дуйся, кро́тости ра́ди зе́млю обетова́ния насле́дивый; ра́дуйся, пра́вды и и́стины па́че всего́ иска́вый. Ра́дуйся, чистото́ю се́рдца твоего́ Го́спода созерца́вый; ра́дуйся, миротво́рец наро́чит в житии́ свое́м яви́выйся. Ра́дуйся, изгна́ния пра́вды ра́ди смире́нно претерпе́вый; ра́дуйся, мзду ве́чную доброде́тельми стяжа́вый. Ра́дуйся, чистоты́ душе́вныя и теле́сныя сокро́вище; ра́дуйся, любве́ и кро́тости Христо́вы вмести́лище. Ра́дуйся, преподо́бне кня́же Дании́ле, Моско́вский чудотво́рче.
Кондак 4
Бу́рею ага́рянского наше́ствия лю́дие росси́йстии потряса́еми, на тя, всече́стне, я́ко на избра́нника Бо́жия, взира́ху и, под кров твой держа́вный прибега́юще, защище́ние и утеше́ние приима́ху, вку́пе с тобо́ю взыва́юще Бо́гу: Аллилу́иа.
Икос 4
Ви́дяще, свя́те, бра́тия твоя́ о́трока тя еще́ ма́ла су́ща, насле́дия о́тча лиши́ти тя умы́слиша и уде́л мале́йший, Моско́вский, то́чию вда́ти ти изво́лиша; ты же, кро́ток сый и незло́бив, ничто́же противовеща́л еси́ и за оби́дящих тя Го́сподеви моли́лся еси́. Сего́ ра́ди ублажа́ем тя си́це: Ра́дуйся, кро́тости Христо́вы подража́телю; ра́дуйся, преди́вный нестяжа́телю. Ра́дуйся, уде́л твой мале́йший возвели́чивый; ра́дуйся, всего́ себе́ во́ле Бо́жией преда́вый. Ра́дуйся, от Него́ то́кмо еди́наго по́мощи иска́вый; ра́дуйся, бога́тство тле́нное презре́вый. Ра́дуйся, сокро́вища духо́вная возлюби́вый; ра́дуйся, от ю́ности в благода́ти у Бо́га и челове́к возраста́вый. Ра́дуйся, и по сконча́нии земна́го жития́ твоего́ ту́ю же благода́ть сугу́бо восприя́вый; ра́дуйся, я́ко и мы благода́ти Бо́жия по моли́твам твои́м сподобля́емся. Ра́дуйся, преподо́бне кня́же Дании́ле, Моско́вский чудотво́рче.
Кондак 5
Боготе́чной звезде́ подо́бяся, на земли́ тече́ние твое́ све́тло соверши́л еси́, благове́рный кня́же Дании́ле, лучи́ свя́тости и пото́цы ми́лости всем излива́я; и́хже ра́ди и в со́нме святы́х пребыва́еши, поя́ с ни́ми: Аллилу́иа.
Икос 5
Слы́шавше бли́жнии и да́льнии, я́ко в ма́лем еще́ гра́де Москве́ на высоте́ стола́ кня́жеского возоблиста́л еси́, пресла́вне кня́же Дании́ле, под сень крилу́ твое́ю притека́ху, похвалы́ таковы́я ти принося́ще: Ра́дуйся, кня́же благосе́рдый, любо́вию свое́ю вся покрыва́яй; ра́дуйся, влады́ко прелюби́вый, бе́дствующия защища́яй. Ра́дуйся, му́дрость отца́ твоего́, кня́зя Алекса́ндра, восприя́вый; ра́дуйся, страны́ Моско́вския утвержде́ние. Ра́дуйся, держа́вы Росси́йския украше́ние; ра́дуйся, Це́ркве Христо́вы похвало́ высо́кая. Ра́дуйся, люде́й росси́йских упова́ние благонаде́жное; ра́дуйся, тобо́ю бо во еди́но бра́тство совокупля́емся. Ра́дуйся, я́ко твои́м науче́нием от ра́спрей свобожда́емся; ра́дуйся, за́поведей Бо́жиих ве́рный исполни́телю. Ра́дуйся, преподо́бне кня́же Дании́ле, Моско́вский чудотво́рче.
Кондак 6
Пропове́дник Ца́рствия Бо́жия яви́лся еси́, благове́рный кня́же Дании́ле: над людьми́ бо свои́ми ца́рствуя, слезу́ вся́ку от лица́ стра́ждущих отыма́л еси́, подвиза́я зва́ти всех: Аллилу́иа.
Икос 6
Воссия́л еси́, я́ко пресве́тлое со́лнце, на престо́ле Моско́встем, благове́рный кня́же Дании́ле, вели́чием души́ твоея́ и доброде́тельми всю зе́млю Росси́йскую озаря́я и подвиза́я всех ублажа́ти тя си́це: Ра́дуйся, му́жу жела́ний духо́вных; ра́дуйся, стяжа́телю даро́в небе́сных. Ра́дуйся, милосе́рдия сокро́вище неисчерпа́емое; ра́дуйся, кро́тости наста́вниче. Ра́дуйся, за́поведей ева́нгельских де́лателю неле́ностный; ра́дуйся, нищету́ во́льную Христа́ ра́ди возлюби́вый. Ра́дуйся, сирота́м и вдови́цам о́тче благосе́рдый; ра́дуйся, лю́дем твои́м помо́щниче богодарова́нный. Ра́дуйся, в чи́не власти́теля кро́тость де́тскую прояви́вый; ра́дуйся, ду́шу твою́ в храм Бо́жий до́бре претвори́вый. Ра́дуйся, преподо́бне кня́же Дании́ле, Моско́вский чудотво́рче.
Кондак 7
Хотя́й Всеви́дец Госпо́дь просла́вити тя, блаже́нне, поста́ви тя влады́ку пресла́вна во смире́нии лю́дем Свои́м, и́же и взира́юще на тя, и доброде́телей твои́х бога́тству чудя́щеся, поя́ху Ему́: Аллилу́иа.
Икос 7
Но́ваго и ди́внаго устрои́теля земли́ Росси́йския ве́мы тя, кня́же Дании́ле, кро́тостию бо, смиренному́дрием, братолю́бием, и му́дростию небе́сною княже́ние Моско́вское возвели́чил еси́ и си́льно сотвори́л еси́ е́. Сего́ ра́ди приими́ от нас сицева́я: Ра́дуйся, му́дрость Соломо́нову стяжа́вый; ра́дуйся, кро́тость Дави́дову восприя́вый и то́ю враги́ твоя́ победи́вый. Ра́дуйся, мно́гие дру́ги себе́ стяжа́вый; ра́дуйся, сто́льный град твой хра́мы Бо́жиими укра́сивый. Ра́дуйся, вели́чию Москвы́ тем послужи́вый; ра́дуйся, во́ине Христо́в неодоле́нный. Ра́дуйся, от бед и скорбе́й всем ско́рое прибе́жище; ра́дуйся, от всех зол тве́рдое защище́ние. Ра́дуйся, уныва́ющим до́брое вразумле́ние; ра́дуйся, всем братолю́бцем при́сное ободре́ние. Ра́дуйся, преподо́бне кня́же Дании́ле, Моско́вский чудотво́рче.
Кондак 8
Стра́нника и прише́льца себе́ на земли́ бы́ти помышля́я, час кончи́ны твоея́ пред очи́ма твои́ма при́сно име́л еси́ и сего́ ра́ди оби́тель и́ноком во сла́ву тезоимени́таго ти преподо́бнаго Дании́ла возгради́л еси́, иде́же моли́твы твоя́ Го́сподеви возсыла́л еси́, поя́ Ему́: Аллилу́иа.
Икос 8
Всего́ себе́ от ю́ности Го́споду возложи́в, вся дни живота́ твоего́, благове́рный кня́же, Тому́ усе́рдно рабо́тал еси́, и ко блаже́нному успе́нию дости́г, в ми́ре глубо́це дух свой Ему́ пре́дал еси́. Лю́дие же княже́ния твоего́, о́крест гро́ба твоего́ собра́вшеся, поя́ху ти сицева́я: Ра́дуйся, кня́же наш превожделе́нный, ко Го́споду отоше́дый; ра́дуйся, нетле́нное те́ло твое́ нам оста́вивый. Ра́дуйся, арома́ты доброде́телей твои́х нам благоуха́яй; ра́дуйся, сия́нием небе́снаго све́та озаре́нный. Ра́дуйся, оби́лием любве́ твоея́ вся удиви́вый; ра́дуйся, и враго́м твои́м благо́е упокое́ние у себе́ устроя́вый. Ра́дуйся, кре́пость держа́вы твоея́ тем созида́вый; ра́дуйся, насле́дником твои́м при́сное науче́ние. Ра́дуйся, гроб твой, а́ки краеуго́льный ка́мень, гра́ду Москве́ положи́вый; ра́дуйся, я́ко моли́тва твоя́ о лю́дех и по сме́рти не оскудева́ет. Ра́дуйся, преподо́бне кня́же Дании́ле, Моско́вский чудотво́рче.
Кондак 9
Вси небе́снии чи́ни и святы́х собо́ри ра́достно тя прия́ша, богому́дре, по́двиг земна́го тече́ния своего́ до́бре соверши́вша и к ве́чному животу́ пресе́льшася, иде́же с ни́ми пое́ши: Аллилу́иа.
Икос 9
Вети́й челове́ческих уста́ не возмо́гут изрещи́ пречу́днаго прославле́ния па́мяти твоея́, уго́дниче Бо́жий, егда́ бо гро́ба твоего́ ме́сто забве́нию предаде́ся, сам я́ве предста́л еси́ ю́ноше благочести́вому, господи́на ме́сту тому́ себе́ нарица́я, и кня́зя Иоа́нна облича́я, и глаго́ля: «Чесо́ ра́ди пре́дал мя еси́ забве́нию? А́ще же и забве́н аз тобо́ю, не забы́ мя Госпо́дь». Мы же, явле́ние твое́ благогове́йно почита́юще, си́це вопие́м: Ра́дуйся, гра́да на́шего Москвы́ Бо́гом да́нный покрови́телю; ра́дуйся, оби́тели твоея́ неусы́пный храни́телю. Ра́дуйся, я́ко и по успе́нии твое́м нас не оставля́еши; ра́дуйся, я́ко милосе́рдие Бо́жие о гресе́х на́ших умоля́еши. Ра́дуйся, мзду трудо́в твои́х восприя́вый; ра́дуйся, небе́сною сла́вою ду́шу твою́ осия́вый. Ра́дуйся, князе́й Росси́йских до́брый учи́телю; ра́дуйся, к доброде́тели тве́рдый тем наста́вниче. Ра́дуйся, и всем лю́дем благи́й пред Бо́гом предста́телю; ра́дуйся, моли́твы их ко Престо́лу Его́ вознося́й. Ра́дуйся, преподо́бне кня́же Дании́ле, Моско́вский чудотво́рче.
Кондак 10
Спасти́ся всем хотя́й Госпо́дь, вельмо́жу не́коего гроб твой, свя́те, попра́вша, неду́гом порази́, оба́че согреше́ние свое́ позна́вша и проще́ние от тебе́ прие́мша поми́лова, да и мы вси, досто́йно почита́юще тя, благода́рно вопие́м: Аллилу́иа.
Икос 10
Сте́ну необори́мую и забра́ло кре́пкое гра́ду Москве́ и всей держа́ве Росси́йстей Госпо́дь дарова́ тя, блаже́нне, ве́рным в ско́рбех и ну́ждах пребы́строе заступле́ние, да зове́м ти си́це: Ра́дуйся, призыва́ющим тя во благо́е ско́рый помо́щниче; ра́дуйся, чистоты́ душе́вныя и теле́сныя сокро́вище. Ра́дуйся, душе́вных и теле́сных неду́гов цели́телю; ра́дуйся, держа́вы на́шея утвержде́ние. Ра́дуйся, Це́ркве Росси́йския украше́ние; ра́дуйся, я́ко оте́ц чадолюби́вый, ча́да твоя́ назира́яй. Ра́дуйся, я́ко воево́да непобеди́мый, преде́лы земли́ на́шея огражда́яй; ра́дуйся, небрегу́щия о святы́не стра́хом вразумля́яй. Ра́дуйся, я́ко ка́ющимся ско́рое проще́ние испроша́еши; ра́дуйся, я́ко благи́м по́двигам тех науча́еши. Ра́дуйся, преподо́бне кня́же Дании́ле, Моско́вский чудотво́рче.
Кондак 11
Пе́ние всеумиле́нное приими́ от нас, прехва́льне, и моли́твы, приноси́мые тебе́ не пре́зри: к тебе́ бо в ско́рбех прибега́ем и пред гро́бом твои́м сле́зы пролива́ем, зову́ще: Аллилу́иа.
Икос 11
Светоза́рна свети́льника благода́ти яви́ тебе́ всех Творе́ц, си́лою бо, да́нною ти свы́ше, ю́ношу при гро́бе твое́м от одра́ сме́рти возста́вил еси́. Сего́ ра́ди ублажа́ем ти си́це: Ра́дуйся, ми́лостивый скорбя́щим помо́щниче; ра́дуйся, сосу́де, Свята́го Ду́ха испо́лненный. Ра́дуйся, дара́ми Того́ обогаще́нный; ра́дуйся, си́ми дара́ми и моля́щихся тебе́ обогаща́яй. Ра́дуйся, ко Святе́й Тро́ице дерзнове́ние ве́лие стяжа́вый; ра́дуйся, дерзнове́ние сие́ на по́мощь лю́дем направля́яй. Ра́дуйся, си́лу чуде́с от Бо́га прия́вый; ра́дуйся, за гре́шныя Го́спода умоля́яй. Ра́дуйся, любве́ и кро́тости Христо́вы вмести́лище; ра́дуйся, беспо́мощных ско́рый помо́щниче. Ра́дуйся, преподо́бне кня́же Дании́ле, Моско́вский чудотво́рче.
Кондак 12
Благода́тию, да́нною ти свы́ше, неду́ги исцеля́еши, враги́ и супоста́ты от нас отгоня́еши, жизнь на́шу умиря́еши и душа́м на́шим поле́зная подае́ши, да благода́рственно взыва́ем Бо́гу: Аллилу́иа.
Икос 12
Пое́м честны́е по́двиги твоя́, ублажа́ем чи́стое житие́ твое́, восхваля́ем свяще́нную па́мять твою́, Дании́ле благове́рне, и прославля́юще Го́спода всех, вопие́м ти си́це: Ра́дуйся, я́ко крест богоуго́днаго жития́ до конца́ поне́сл еси́; ра́дуйся, я́ко о ско́рбех твои́х Бо́га благодари́л еси́. Ра́дуйся, вся́ку доброде́тель в себе́ изобрази́вый; ра́дуйся, и́го Христо́во возлюби́вый. Ра́дуйся, не́мощи немощны́х на себе́ носи́вый; ра́дуйся, благоволе́ние Бо́жие лю́дем твои́м испроси́вый. Ра́дуйся, при́сно на небеси́ торжеству́яй; ра́дуйся, на земли́ пресла́вно чудоде́йствуяй. Ра́дуйся, лю́дем твои́м помо́щниче богодарова́нный; ра́дуйся, а́нгелом собесе́дниче досто́йный. Ра́дуйся, преподо́бне кня́же Дании́ле, Моско́вский чудотво́рче.
Кондак 13
О пресла́вный уго́дниче Христо́в и чудотво́рче, преподо́бне кня́же Дании́ле, отра́до и утеше́ние всех с ве́рою к тебе́ прибега́ющих! Приими́ от нас, недосто́йных, сие́ ма́лое моле́ние, с любо́вию тебе́ приноси́мое, и те́плым хода́тайством твои́м ко Го́споду огради́ святу́ю оби́тель твою́, умири́ жизнь на́шу и да́руй нам покая́ние соверше́нное, изба́ви нас от бед и ве́чныя му́ки, да ку́пно с тобо́ю благода́рственно вопие́м: Аллилу́иа.
Этот кондак читается трижды, затем 1-й икос «А́нгелов Творе́ц…» и 1-й кондак «Избра́нный чудотво́рче…»
Молитвы
Це́ркве Христо́вы похвало́ высо́кая, гра́да Москвы́ стено́ необори́мая, держа́вы Росси́йския боже́ственное утвержде́ние, преподо́бне кня́же Дании́ле! К ра́це моще́й твои́х притека́юще, усе́рдно мо́лим тя: при́зри на нас, па́мять твою́ воспева́ющих и с ве́рою под кров моли́тв твои́х прибега́ющих. Проле́й те́плое твое́ хода́тайство ко Спа́су всех, я́ко да утверди́т ми́ром страну́ на́шу, гра́ды и ве́си ея́ и оби́тель сию́ до́бре да сохрани́т, благоче́стие и любо́вь в лю́дех твои́х насажда́я, зло́бу же, и междоусо́бие и нра́вов развраще́ние искореня́я. Всем же нам вся блага́я ко вре́менному животу́ и ве́чному спасе́нию да́руй моли́твами твои́ми, я́ко да прославля́ем ди́внаго во святы́х Свои́х Христа́ Бо́га на́шего во ве́ки веко́в. Ами́нь.
О уго́дниче Бо́жий, святы́й благове́рный кня́же Дании́ле, са́да Христо́ва благово́нный цве́те, не́ба церко́внаго кро́ткая звездо́, земли́ на́шея небе́сный у́ме, гра́да Москвы́ и держа́вы на́шея му́дрый зда́телю, те́плый к Бо́гу моли́твенниче, ско́рый в по́мощи, ми́лостивый в ну́ждах! К тебе́ припа́даем и тебе́ мо́лимся: бу́ди предста́тель наш пред Престо́лом Бо́жия сла́вы неусы́пный. Собери́ нас друг ко дру́гу, да печа́ли бли́жняго своего́ ки́йждо любо́вию нелицеме́рною приобща́ется. Онебеси́ ум наш, да, и́го тя́жкое земны́х попече́ний отве́ргше, бре́мя ле́гкое Христо́ва Ева́нгелия возлю́бим. Откры́й о́чи на́ши, да у́зрим нетле́нную красоту́ Госпо́дню и да не отчужде́ни бу́дем жи́зни Бо́жия. Ти́хость Ду́ха Бо́жия да соблюде́т сердца́ на́ша. Весна́ покая́ния да украси́т дела́ на́ша. Кня́же ми́лостивый и ще́дрый, сохрани́ страну́ на́шу, град твой и зде моля́щихся тебе́ от вся́кия напа́сти, от враг ви́димых и неви́димых, от губи́тельства и гла́да, от междоусо́бныя ра́спри и внеза́пныя сме́рти. Отве́рзи нам две́ри милосе́рдия Бо́жия и изба́ви нас от вся́каго зла. Под кре́пкий покро́в благосты́ни твоея́ прибега́юще, мо́лим: бу́ди нам ти́хое приста́нище в ско́рбех. Остени́ нас моли́твами твои́ми. Соблюди́ нас от паде́ний грехо́вных и заблужде́ний, да се́рдцем сокруше́нным, ду́хом смире́нным в печа́ли и ра́дости при́сно зове́м: Го́споди, предста́тельством преподо́бнаго Твоего́ поми́луй нас. Ами́нь.
