Акафист
святому апостолу Андрею Первозванному
(празднование 20 июня/3 июля, 30 июня/13 июля, и 30 ноября/13 декабря)
Кондак 1
Первозва́ннаго апо́стола Христо́ва, Ева́нгелия Свята́го пропове́дника, Ру́сския страны́ богодухнове́ннаго просвети́теля Андре́я пресла́внаго, пе́сньми восхва́лим, стоя́ще на ве́рсе холма́, иде́же Крест водрузи́ десни́ца его́, и ему́, я́ко Це́ркве возсле́дователю верхо́вному, в след себе́ указа́вшему ей путь ко Христу́, во умиле́нии воззове́м: Ра́дуйся, Андре́е, апо́столе Христо́в Первозва́нный.
Икос 1
А́нгел благове́стник А́гнца Христа́, взе́млющаго грехи́ ми́ра, был еси́ Андре́е апо́столе, и с Ним во ве́ки пребыва́еши на небеси́; отону́дуже и при́зри на пе́ния, приноси́мая тебе́ во хра́ме твое́м, на ме́сте, иде́же стоя́сте но́зе твои́, и, я́ко бо́гат сый благода́тию Бо́жиею, пода́ждь нам сло́во бла́го, да зове́м ти: Ра́дуйся, денни́це от гра́да Вифсаи́ды нам возсия́вшая; ра́дуйся, равноче́стный бра́те верхо́внаго Петра́. Ра́дуйся, учениче́ вели́каго Предте́чи Христо́ва; ра́дуйся, пе́рвее про́чих апо́стол зва́нный ко апо́стольскому служе́нию от Самаго́ Го́спода. Ра́дуйся, я́ко и други́м с ра́достию воззва́л еси́: «Прииди́те, обрето́хом жела́емаго Месси́ю»; ра́дуйся, и нас к Нему́ же приводя́й. Ра́дуйся, Андре́е, апо́столе Христо́в Первозва́нный.
Кондак 2
Учи́телю, где живе́ши? – вопроси́л еси́, Андре́е, Спа́са душ на́ших и, с Ним пребы́в день еди́н, возлюби́л еси́ на все дни живота́ твоего́ обре́теннаго тобо́ю Месси́ю, и бра́та твоего́ старе́йшаго приве́л еси́ к Нему́. Те́мже и нас, я́ко ме́ньшую бра́тию твою́, к Нему́ же не преста́й влещи́, да и мы, после́дующе стопа́м твои́м, вопие́м Бо́гу: Аллилу́иа.
Икос 2
Прови́дя в тебе́, святы́й Андре́е, ве́ры и любве́ пла́мень, Госпо́дь па́ки тя обре́те на е́зере Геннисаре́тсте, я́ко ры́баря, ку́пно с бра́том твои́м, вмета́юща мре́жи во глубину́, и рече́ ва́ма: «Гряди́та по Мне, и Аз сотворю́ вы ловца́ челове́ком». Ты же а́бие после́довал еси́ Ему́ и богодухнове́нным сло́вом, я́ко мре́жею, челове́ки улови́л еси́ Христу́, с ни́миже и мы уловле́ннии тобо́ю во спасе́ние, веща́ем ти: Ра́дуйся, я́ко от Самаго́ Го́спода лови́тве духо́вней научи́лся еси́; ра́дуйся, я́ко на том же е́зере с про́чими апо́столы обурева́ем быв, ве́рою спа́слся еси́ в Го́спода, запреща́ющаго ве́тром и мо́рю. Ра́дуйся, стяжа́вый ве́лию ве́ру, егда́ ви́дел еси́ пречу́дное насыще́ние пяти́ ты́сящ пятию́ хле́бами; ра́дуйся, дар прия́вый от Го́спода цели́ти всяк неду́г и вся́ку боле́знь. Ра́дуйся, я́ко глас с небесе́ слы́шан бысть е́ллином, Христа́ тобо́ю узре́вшим; ра́дуйся, я́ко на горе́ Елео́нстей открове́на бы́ша и тебе́ гряду́щая при кончи́не ми́ра. Ра́дуйся, Андре́е, апо́столе Христо́в Первозва́нный.
Кондак 3
Стра́нствия Влады́чня и Безсме́ртныя Трапе́зы на Го́рнем ме́сте Сио́на наслади́вся, я́ко ве́рный друг Христо́в, вку́пе с про́чими апо́столы узре́л еси́ Го́спода и Бо́га твоего́, от Него́же и Дух Свят прия́л еси́, во е́же вяза́ти и реши́ти грехи́ людски́я. И па́ки, в то́йжде го́рнице Сио́нстей, оби́льное бысть на тя излия́ние обетова́ннаго Ду́ха во о́гненных язы́цех. Те́мже вся племена́ удиви́шася, ка́ко язы́ком их глаго́лал еси́ вели́чия Бо́жия, поя́: Аллилу́иа.
Икос 3
От Го́спода за́поведь прии́м пропове́дати Ева́нгелие всей тва́ри, обте́кл еси́ мно́гая гра́ды и страны́, апо́столе Андре́е, призыва́я лю́ди к позна́нию И́стиннаго Бо́га и крестя́ их во и́мя Отца́ и Сы́на и Свята́го Ду́ха; с ни́миже и мы сподо́бихомся благода́ти Креще́ния. Сего́ ра́ди благода́рственная воспису́ем ти: Ра́дуйся, чуде́с Христо́вых провозве́стниче ве́рный; ра́дуйся, Свята́го Ева́нгелия пропове́дниче громогла́сный. Ра́дуйся, и́дольскаго служе́ния потреби́телю; ра́дуйся, и́стиннаго благоче́стия насади́телю. Ра́дуйся, я́ко по сло́ву твоему́ лю́дие водо́ю и Ду́хом возрожда́ются; ра́дуйся, я́ко тобо́ю ве́рнии Безсме́ртныя Трапе́зы причаща́ются. Ра́дуйся, Андре́е, апо́столе Христо́в Первозва́нный.
Кондак 4
Си́ла Бо́жия осени́ тя, апо́столе Первозва́нный, во е́же благовести́ти си́лу и сла́ву Сы́на Бо́жия и утвержда́ти вся ве́ровати во Святу́ю Тро́ицу призва́нныя. Те́мже у́бо и нас, покланя́ющихся Еди́ному в Трие́х Ипоста́сех Бо́гу, на зла́чней па́жити ве́ры Христо́вы соблюди́, да благода́тию Свята́го Ду́ха вы́ну освяща́емии, велегла́сно пое́м Ему́: Аллилу́иа.
Икос 4
Приве́д ко Христу́ бра́та своего́ Си́мона Петра́, Первозва́нне, с ним изше́л еси́ и на апо́стольское служе́ние твое́, пе́рвее во Антиохи́ю и Сино́п, та́мо победи́в де́монов полки́, от уз темни́чных спу́тника твоего́ апо́стола Матфи́я свободи́л еси́, и ю́зники с ним бы́вшия крести́л, верхо́вному Петру́ отту́ду в за́падныя страны́ теку́щу, ты бра́тнее целова́ние дал еси́ ему́, сам же до́бре подвиза́лся еси́ на восто́цех. Те́мже и мы, лю́дие Це́ркве Восто́чныя, блажи́м тя: Ра́дуйся, си́ло Бо́жия, полки́ де́монов прогоня́ющая и у́зы темни́ц сокруша́ющая; ра́дуйся, прия́телище благода́ти апо́стольския, от а́довых уз тайноде́йственне нас свобожда́ющая. Радуйся за́пад и восто́к с бра́том твои́м богому́дрым, про́поведи ра́ди сло́ва Бо́жия, жре́бием раздели́вый; ра́дуйся, во гра́де Сино́пе неве́рие иуде́ев си́лою чуде́с твои́х обличи́вый. Радуйся я́ко та́мо от безбо́жных Христа́ ра́ди бие́н был еси́; ра́дуйся, я́ко от Самаго́ я́вльшагося ти Го́спода исцеле́ние язв тебе́ дарова́ся. Ра́дуйся, Андре́е, апо́столе Христо́в Первозва́нный.
Кондак 5
Двукра́ты возвра́щся во Святы́й град, да ку́пно со апо́столы пятидеся́тный день пра́зднуеши та́мо, двукра́ты па́ки ше́ствовал еси́ от свята́го Сио́на, во е́же Христа́ пропове́дати вселе́нней, пе́рвее со Иоа́нном напе́рсником Госпо́дним, посе́м же с Си́моном Канани́том и Матфи́ем, и́же жре́бием назна́менован бысть во апо́стола, и вся преде́лы Аси́и и По́нта обте́кл еси́, сло́вом спасе́ния всех оглаша́я, да Бо́гу пою́т: Аллилу́иа.
Икос 5
От мо́ря Галиле́йскаго до По́нта Евкси́нскаго апо́стольския мре́жи твоя́ распростры́й и все помо́рие о́крест огласи́вый благове́стием твои́м, восте́кл еси́, Первозва́нне, и в страны́ Ски́фии, Крест Христо́в всю́ду водружа́я в зна́мение на́шего спасе́ния. Сего́ ра́ди и мы, а́ще и по́зднии ро́ди, вне́млюще благове́стию твоему́ и воспомина́юще по́двиги твоя́, зове́м ти: Ра́дуйся, в Нике́и лю́тыя разбо́йники укроти́вый и люте́йшаго драко́на умертви́вый; ра́дуйся, Крест Христо́в посреде́ гра́да сего́ водрузи́вый, я́ко Предте́ча сый двукра́ты со́бранных та́мо оте́ц богоно́сных. Ра́дуйся, я́ко во Аси́и и По́нте тобо́ю свет Христо́в возсия́; ра́дуйся, я́ко апо́стольский жезл твой предго́рие Кавка́са све́ту Христо́ву отве́рзе. Ра́дуйся, и́мже мрак киммери́йский озари́ся; ра́дуйся, и́мже вселе́нная струя́ми воды́ жи́вы напои́ся. Ра́дуйся, Андре́е, апо́столе Христо́в Первозва́нный.
Кондак 6
Бу́рею страсте́й одержи́мая и, я́ко во́ды океа́на, волну́емая, племена́ челове́ков, я́же не ве́дяху Бо́га И́стиннаго, приве́л еси́, апо́столе, к ти́хому приста́нищу Христо́ву и тех сердца́, а́ки у́тлую ладию́ неве́рием обурева́емая, на я́кори ве́ры правосла́вныя утверди́л еси́. Те́мже и мы, я́ко ча́да правосла́вныя ве́ры, благода́рным се́рдцем и благода́рными усты́ вопие́м Бо́гу: Аллилу́иа.
Икос 6
На горе́ Елео́нстей Боже́ственного Учи́теля твоего́ иногда́ со про́чими апо́столы вопроси́л еси́, Андре́е: «Рцы нам, что есть зна́мение прише́ствия Твоего́?» На гора́х же Ки́евских, я́ко орга́н сый благода́ти Ду́ха Свята́го, ты предвозвести́л еси́ гряду́щую сла́ву ме́ста сего́; мы же, предрече́нныя нам ми́лости сея́ сподо́бльшеся, умиле́нно взыва́ем ти: Ра́дуйся, я́ко с горы́ Сио́на зако́н нам ева́нгельский прине́сл еси́; ра́дуйся, я́ко по вода́м Ворисфе́на апо́стол Бо́жий к нам восте́кл еси́. Ра́дуйся, благода́ть Иорда́нову, Креще́ния на́шего ра́ди, реце́ сей дарова́вый; ра́дуйся, на гора́х Ки́евских Kрест на́шего спасе́ния водрузи́вый. Ра́дуйся, и́мже оби́льное излия́ние благода́ти Бо́жией зде предрече́ся; ра́дуйся, и́мже бытие́ гра́да вели́ка и це́рквей мно́гих зде предвозвести́ся. Ра́дуйся, Андре́е, апо́столе Христо́в Первозва́нный.
Кондак 7
Днесь, во исполне́ние проро́ческаго гла́са твоего́, храм пресла́вный красу́ется на ме́сте, иде́же не су́щая я́ко су́щая прови́дел еси́ по да́ру Ду́ха Свята́го; о́крест же его́ град ве́лий с це́рквами златове́рхими и́стину слове́с твои́х свиде́тельствует, ему́же и доны́не ты, я́ко с го́рния ка́федры, мир благовеству́еши. Те́мже и мы, сбытие́ богодухнове́нных глаго́л твои́х зря́ще, ве́лиим гла́сом взыва́ем Бо́гу: Аллилу́иа.
Икос 7
От светоно́сныя зари́, Первозва́ннаго апо́стола свет богове́дения восприи́мши, свята́я О́льга возсия́ Ру́сской земли́ я́ко денни́ца на́шего спасе́ния, возводя́ вслед себе́, я́ко светоза́рное свети́ло, вну́ка своего́ Влади́мира, просвети́теля всея́ полу́нощныя страны́. Те́мже и мы, возве́дше о́чи на́ша к тебе́, Андре́е богому́дре, я́ко к нача́льному благове́стнику на́шего спасе́ния, воспису́ем ти похва́льная сия́: Ра́дуйся, я́ко денни́це на́шего спасе́ния, О́льге святе́й, све́та Боже́ственнаго позна́ние дарова́ся; ра́дуйся, я́ко благове́рию ея́ Христо́во Ца́рствие отве́рзеся. Ра́дуйся, я́ко благослове́нием твои́м пресла́вное свети́ло от сея́ денни́цы нам произы́де; ра́дуйся, я́ко по твоему́ предвозве́стию апо́стольскому равноапо́стольный князь нам яви́ся. Ра́дуйся, я́ко тобо́ю свята́го Влади́мира ца́рствие земно́е к Небе́сному приобщи́ся; ра́дуйся, я́ко Днепр и Поча́йна, ре́ки Ки́евския, спаси́тельною купе́лию нам бы́ша. Ра́дуйся, Андре́е, апо́столе Христо́в Первозва́нный.
Кондак 8
Пропове́дуют пресла́вного гра́да Ки́ева и всея́ Ру́сския страны́ па́стырие и пасо́мии па́мять дея́ний твои́х, богому́дре Андре́е апо́столе; в не́драх же пеще́рных нетле́нно почива́ющии уго́дницы Бо́жии, со Анто́нием и Феодо́сием, немо́лчными усты́, я́ко жи́ви су́ще, сла́ву твою́ веко́м и родо́м возглаша́ют, тобо́ю бо водруже́нный зде Крест, я́ко благосенноли́ственное дре́во, произрасте́, во е́же изнести́ нам плоды́ благоче́стия и святы́ни. Мы же ра́йскаго вертогра́да твоего́, а́ки птенцы́ духо́внии, тобо́ю науче́ни есмы́ воспева́ти Бо́гу: Аллилу́иа.
Икос 8
Не то́чию Руси́ еди́ныя был еси́ спасе́ния провозве́стник, Первозва́нный апо́столе Христо́в, но и вся слове́нская племена́, я́коже коко́ш, птенцы́ своя́ под криле́ собира́яй, приве́л еси́ я́ ко Христу́; ты бо от Херсони́са во мрак полу́нощныя страны́ прозира́я, су́щим та́мо лю́дем, да Бо́жию нау́чатся сло́ву, прему́дрыя учи́тели, Кири́лла и Мефо́дия, про́поведию твое́ю за мно́гие ве́ки предугото́вал еси́; мы же, а́ки уста́ми сих просвети́телей на́ших, велегла́сно вопие́м ти: Ра́дуйся, слове́нская племена́ искони́ благослови́вый; ра́дуйся, сло́во их разу́мное сло́вом Бо́жиим умудри́вый. Ра́дуйся, я́ко глаго́лу Бо́жию послушли́вии, Це́ркве ча́да слове́сная бы́ша; ра́дуйся, я́ко в Херсони́се, иде́же пропове́дал еси́, пе́рвая ро́сская пи́смена Кири́лл святы́й обре́те и прия́т я́. Ра́дуйся, я́ко те́ми А́лфу и Оме́гу, нача́ток и коне́ц – Христа́ Бо́жию прему́дрость возвести́л еси́ им; ра́дуйся, я́ко и вся богодухнове́нная Писа́ния учи́телие си́и на язы́к слове́нск нам преложи́ша. Ра́дуйся, Андре́е, апо́столе Христо́в Первозва́нный.
Кондак 9
Пусты́нныя Ски́фии не убоя́вся, во глуби́ну полу́нощныя страны́ просте́рл еси́ апо́стольская стра́нствия твоя́, Первозва́нне, отону́дуже и в ве́тхий Рим прише́л еси́, и́же тогда́ глава́ ми́ру язы́ческому бысть; оба́че тьмы ра́ди и́дольския оста́вль его́, и на кра́сный брег Воспо́ра прише́д, та́мо во гра́де Византи́и, и́же но́вый Рим и ма́терь христиа́ном бысть, апо́стольский престо́л твой утверди́л еси, да от него́ Восто́к и Се́вер весь све́том ве́ры озари́тся, ве́рнии же ча́да Це́ркве Христо́вы Бо́гу единомы́сленно зову́т: Аллилу́иа.
Икос 9
«Мати, Сио́н», – псало́мски рече́т челове́к, я́ко челове́к духо́вно роди́ся в нем, но́вый же Сио́н нам бысть Ки́ев: в нем бо свет и благода́ть Бо́жия яви́ся всем сыново́м ру́сским от кафе́дры, ю́же ты, Первозва́нне апо́столе, в Византи́и утверди́л еси́. Те́мже и мы, невече́рним све́том озаря́емии, благода́рне взыва́ем ти: Ра́дуйся, от горы́ Сио́нския снисше́дый и го́рним све́том Ки́ев многохо́лмный озари́вый; ра́дуйся, гра́ду сему́ многопло́дие духо́вное благослове́нием твои́м ниспосла́вый. Ра́дуйся, я́ко посреде́ вселе́нныя апо́стольский престо́л твой утверди́л еси́; ра́дуйся, я́ко под сень его́ (в но́вом Ри́ме) вся просвеще́нныя тобо́ю язы́ки собра́л еси́. Ра́дуйся, и́мже Правосла́вие в душа́х их утвержда́ется; ра́дуйся, и́мже от Восто́ка тьма За́пада отрева́ется. Ра́дуйся, Андре́е, апо́столе Христо́в Первозва́нный.
Кондак 10
Егда́ наста́ вре́мя преставле́ния твоего́, блаже́нне апо́столе, в дре́вния Па́тры Аха́йския прише́л еси́, да та́мо жрен бу́деши, тече́ние бо сконча́л еси́, по́двигом до́брым подвиза́лся еси́, всем пропове́дав Христа́ ра́спята, иуде́ем собла́зн, е́ллином же безу́мие, нам же, зва́нным и спаса́емым, – Христа́, Бо́жию Си́лу и Бо́жию Прему́дрость, от Нея́же и научи́хомся пе́ти Бо́гу: Аллилу́иа.
Икос 10
Всю́ду и́менем Го́спода Иису́са боля́щия исцеля́я, ме́ртвыя воскреша́я, бе́сы изгоня́я, и во Па́трах предсме́ртную про́поведь твою́ чудеса́ми утверди́л еси́, апо́столе Христо́в, и анфипа́та Ле́звия обрати́л еси́ к позна́нию и́стины, егда́ противле́ния ра́ди я́звою пораже́н быв, тобо́ю от одра́ боле́зни воздви́жен бысть; лю́дие же вси, ви́девше в тебе́ си́лу Бо́жию, и́долы своя́ сокруши́ша, посе́м и Госпо́дь яви́ся тебе́, я́коже Па́влу иногда́ в Кори́нфе, и повеле́ взя́ти Крест твой, назна́меновав сим твое́ в Па́трах, Его́ ра́ди, страда́ние. Те́мже и мы, дивя́щеся ве́лией благода́ти в тебе́, благогове́йно взыва́ем: Ра́дуйся, ве́лия Бо́га Всемогу́щаго си́ло; ра́дуйся, многоце́нное чуде́с сокро́вище. Ра́дуйся, дре́вних Патр просвеще́ние и украше́ние; ра́дуйся, неве́рие анфипа́та в ве́ру премени́вый. Ра́дуйся, я́ко та́мо па́ки яви́ся тебе́ Госпо́дь, на по́двиг кре́стный тя призва́вый; ра́дуйся, я́ко угото́вася тебе́ вене́ц пра́вды. Ра́дуйся, Андре́е, апо́столе Христо́в Первозва́нный.
Кондак 11
Неро́н ке́сарь, я́коже иногда́ И́род, гоне́ния на вся ве́рныя воздви́гнувый, в Ри́ме Па́вла мече́м усе́кну, Петра́ же на кресте́ распя́, подо́бне и тебе́ дости́же в Па́трах рука́ мучи́телева, егда́ вме́сто кро́ткаго Ле́звия судию́ поста́ви Егеа́та лю́таго, и́же не терпя́й креще́ния бра́та своего́, ниже́ исцеле́нием жены́ своея́ умягче́н быв, в темни́цу вве́рже тя и, я́коже верхо́вного Петра́, на крест осуди́. Ты же ю́зник сый, в темни́це мра́чней, я́ко во све́тлом хра́ме, бра́та анфипа́това Стратокли́са во епи́скопа Па́тром проручествова́л еси́, Бо́гу со все́ми ве́рными посреде́ узи́лища воспева́я: Аллилу́иа.
Икос 11
На ме́сте ло́бнем крест воздвиза́ем узре́в, на не́мже име́л еси́ ра́спят бы́ти, не убоя́лся еси́, апо́столе, да́же до сме́рти свиде́тельствовати возлю́бльшаго тя и возлю́бленнаго тобо́ю Христа́, и к сему́ зна́мению спасе́ния ру́це простира́я, умиле́нно взыва́л еси́: Ра́дуйся, Кре́сте Всечестны́й, пред ни́мже с весе́лием предстою́, ве́дая тя, упова́ние мое́; ра́дуйся, Кре́сте Животворя́щий, его́же глава́ до небе́с дости́же, подно́жие же врата́ а́да сокруши́. Ра́дуйся, Кре́сте достопокланя́емый, восприе́мый Влады́ку моего́, я́ко гро́здие сладча́йшее, источи́вшее нам спасе́ние; ра́дуйся, Кре́сте благослове́нный, разбо́йника спасы́й и тому́ плоды́ испове́дания дарова́вый. Ра́дуйся, я́ко и моея́ ра́дости исполне́ние был еси́; те́мже ра́дуйся и ты, страстоте́рпче, на Кресте́ ве́ру твою́ во Христа́ запечатле́вый. Ра́дуйся, Андре́е, апо́столе Христо́в Первозва́нный.
Кондак 12
«Прииди́те, свиде́телие ра́дости моея́! – воззва́л еси́ апо́столе к соверши́телем во́ли Егеа́та, – твори́те во́лю над мно́ю, распни́те мя и, я́ко а́гнца, принеси́те в же́ртву созда́вшему мя Творцу́». И сия́ рек, возше́л еси́ на крест, я́ко на го́рнюю кафе́дру, с нея́же три дни и три но́щи пропове́дал еси́ слово́ Бо́жие о́крест стоя́щим лю́дем, да не боя́тся сме́рти, испове́дающе Го́спода Иису́са. Егда́ же све́том небе́сным озари́ся лик твой, ужасе́ся мучи́тель и тя со креста́ взя́ти повеле́; оба́че ты, страстоте́рпче, не восхоте́л еси́ от кре́стных мук разреши́тися, до исхо́да твоего́ непреста́нно Бо́гу вопия́: Аллилу́иа.
Икос 12
Сла́вяще апо́стольския по́двиги твоя́, Андре́е Первозва́нне ублажа́ем святу́ю кончи́ну твою́, е́юже живоно́сную страсть Сы́на Бо́жия просла́вил еси́, и во умиле́нии се́рдца взыва́ем ти си́це: Ра́дуйся, дру́же Христо́в, с ра́достию кре́стная страда́ния за Него́ претерпе́вый; ра́дуйся, апо́столе ве́рный, со креста́ глаго́лы живота́ ве́чнаго лю́дем пропове́давый. Ра́дуйся, я́ко в час сня́тия со креста́ осени́ тя свет, а́ки мо́лния с небесе́; ра́дуйся, а́ки правосла́вно испове́дающим пропове́даннаго тобо́ю Христа́ Сы́на Бо́жия обеща́л еси́ благода́ть ве́лию. Ра́дуйся, Го́рняго Иерусали́ма апо́стольское основа́ние; ра́дуйся, седя́й со апо́столы на еди́ном от двоюна́десяте престо́лов, во е́же суди́ти вся коле́на Изра́илева. Ра́дуйся, Андре́е, апо́столе Христо́в Первозва́нный.
Кондак 13
О Первозва́нный апо́столе Христо́в Андре́е, при́зри на благохвале́ния сия́ всех чту́щих святу́ю па́мять твою́, и я́ко водрузи́л еси́ Кре́стное Дре́во на гора́х гра́да Ки́ева, при́сно осеня́й и нас спаси́тельным зна́мением сим, да, Кресто́м Го́спода Бо́га и Спа́са на́шего охраня́еми, дости́гнем в ме́ру во́зраста исполне́ния Христо́ва и сподо́бимся с тобо́ю и со все́ми святы́ми, во гла́се ра́дования, в безконе́чныя ве́ки пе́ти Бо́гу, Спаси́телю на́шему: Аллилу́иа.
Этот кондак читается трижды. Затем 1-й икос «А́нгел благове́стник…» и 1-й кондак «Первозва́ннаго апо́стола…»
Молитва
Первозва́нне апо́столе Бо́га и Спа́са на́шего Иису́са Христа́, Це́ркве после́дователю, всехва́льный Андре́е! Сла́вим и велича́ем апо́стольския труды́ твоя́, сла́дце помина́ем твое́ благослове́нное к нам прише́ствие, ублажа́ем честна́я страда́ния твоя́, я́же за Христа́ претерпе́л еси́, лобыза́ем свяще́нныя мо́щи твоя́, чтим святу́ю па́мять твою́ и ве́руем, я́ко жив Госпо́дь, жива́ же и душа́ твоя́ и с Ним во ве́ки пребыва́еши на небеси́, иде́же и лю́биши ны то́южде любо́вию, е́юже возлюби́л еси́ нас, егда́ Ду́хом Святы́м прозре́л еси́ на́ше, е́же ко Христу́ обраще́ние, и не то́чию лю́биши, но и мо́лиши о нас Бо́га, зря во све́те Его́ вся ну́жды на́ша. Та́ко ве́руем и та́ко сию́ ве́ру на́шу испове́дуем во хра́ме, и́же во и́мя твое́, святы́й Андре́е, пресла́вно созда́ся, иде́же святы́я мо́щи твоя́ почива́ют: ве́рующе же, про́сим и мо́лим Го́спода и Бо́га и Спа́са на́шего Иису́са Христа́, да моли́твами твои́ми, я́же при́сно послу́шает и прие́млет, пода́ст нам вся потре́бная ко спасе́нию нас гре́шных: да я́коже ты а́бие по гла́су Го́спода, оста́вль мре́жи своя́, неукло́нно Ему́ после́довал еси́, си́це и ки́йждо от нас да и́щет не свои́х си, но е́же к созида́нию бли́жняго и о го́рнем зва́нии да помышля́ет. Иму́ще же тя предста́теля и моли́твенника о нас, упова́ем, я́ко моли́тва твоя́ мно́го мо́жет пред Го́сподем и Спаси́телем на́шим Иису́сом Христо́м, Ему́же подоба́ет вся́кая сла́ва, честь и поклоне́ние со Отце́м и Святы́м Ду́хом и во ве́ки веко́в. Ами́нь.
