Акафист
Пресвятой Богородице в честь иконы Ея «Троеручица»
(празднование 28 июня/11 июля и 12/25 июля)
Кондак 1
Взбра́нной Воево́де, Богообра́дованной Присноде́ве Богоро́дице, посети́вшей Го́ру Афо́нскую явле́нием чудотво́рныя ико́ны Своея́ и мно́гия ми́лости е́ю да́рующей ро́ду христиа́нскому, похва́льное возглаша́ем ны́не пе́ние: Ты же, о Богома́ти, я́ко иму́щая держа́ву непобеди́мую и ма́тернее о нас попече́ние, предвари́ на по́мощь к нам и от вся́ких бед изба́ви зову́щих Ти: Ра́дуйся, Помо́щнице на́ша, Троеру́чною ико́ною Твое́ю нам помога́ющая.
Икос 1
А́нгел земны́й и челове́к небе́сный преподо́бный Ио́анн Дамаски́н от любве́ те́плыя к Тебе́, Богома́ти Влады́чице, ико́ну Твою́ святу́ю сооруди́ти потща́ся и сию́ в ке́ллии свое́й благогове́йно поста́вив, пред не́ю си́це Тебе́ в моли́твах усе́рдных глаго́лаше: Ра́дуйся, ра́дость ве́чную, Спаси́теля ми́ру ро́ждшая; ра́дуйся, всегуби́тельнаго а́да си́лу рождество́м Твои́м попра́вшая. Ра́дуйся, проро́ческих глаго́лов исполне́ние прине́сшая; ра́дуйся Ада́ма и Е́вы преступле́ние загла́дившая. Ра́дуйся, Еди́наго от Тро́ицы на руку́ Твое́ю нетру́дно носи́вшая; ра́дуйся, Огнь Божества́ неопа́льно во чре́ве Твое́м вмести́вшая. Ра́дуйся, Помо́щнице на́ша, Троеру́чною ико́ною Твое́ю нам помога́ющая.
Кондак 2
Ви́дя преподо́бный Иоа́нн Дамаски́н десни́цу свою́, мно́го писа́вшую в защи́ту че́сти и поклоне́ния святы́х ико́н, по наве́ту царя́ иконобо́рца неми́лостиво отсече́нную, испроси́ ю́ от неве́рнаго мучи́теля и, приложи́в к усече́нному е́я соста́ву, пред честно́ю ико́ною Твое́ю, Пречи́стая Де́во, сле́зно моля́шеся Ти, о е́же исцели́тися ей. Ты же, Всеблага́я и Всемо́щная ро́да на́шего Засту́пнице, моли́тву его́ ско́ро услы́шала еси́ и, во сне́ предста́вши ему́, исцеле́ние усече́нной руце́ его́ дарова́ла еси́, да благода́рственно пое́т Бо́гу: Аллилу́иа.
Икос 2
Ра́зум челове́ческий не мо́жет пости́гнути си́лу исцеле́ний благода́тных, ико́ною Твое́ю, о Богома́ти, чуде́сно явля́емых, не мо́жет изъясни́ти и чу́до ве́лие, ка́ко отсече́нная десни́ца преподо́бнаго во еди́ну нощь це́ла и здра́ва обре́теся, на ней же то́кмо червле́нный знак бы́вшия я́звы оста́влен бысть Враче́бницею Благо́ю, слы́шащею от нас сия́ похвалы́: Ра́дуйся, ско́ро явля́ющаяся уте́шительнице скорбя́щих душ; ра́дуйся, радостотво́рная посети́тельнице боле́знующих серде́ц. Ра́дуйся, безнаде́жных стра́дальцев наде́ждою исцеле́ния ободря́ющая; ра́дуйся, врача́ми оста́вленных боле́знующих на Свои́ ру́це прие́млющая. Ра́дуйся, усече́нную десни́цу Бо́жия избра́нника це́лу и здра́ву вышеесте́ственно соде́лавшая; ра́дуйся, я́ко ничто́же невозмо́жно Тебе́, Милосе́рдая Предста́тельнице, нам всегда́ заступле́ние показу́ющая. Ра́дуйся, Помо́щнице на́ша, Троеру́чною ико́ною Твое́ю нам помога́ющая.
Кондак 3
Си́лу десни́цы Всевы́шняго в исцеле́нии усече́нныя десни́цы своея́ позна́в богоглаго́ливый Ио́анн, пе́сньми кра́сными воспе́ Тя, Влады́чице Всеблага́я, и подо́бие усече́нныя руки́ своея́ приложи́ к целе́бному Твоему́ о́бразу ра́ди па́мяти всегда́шния о вели́ком чудеси́. Тем ны́не ви́дима есть и имену́ется сия́ свята́я ико́на Твоя́ Троеру́чица, тремя́ рука́ми, на ней опи́санными, проявля́ющая та́инство Святы́я Тро́ицы, чудесы́ же, от Нея́ быва́ющими, всех приводя́щая хвале́бно взыва́ти ко Го́споду: Аллилу́иа.
Икос 3
Име́яй ве́лию ре́вность по Бо́зе, духоно́сный песнопи́сец Святы́я Це́ркве и боже́ственный сла́витель ея́, сла́дкий преподо́бный Иоа́нн, хвале́бными пе́нии до конца́ жи́зни своея́ прославля́ше Твою́ к нему́ ди́вную ми́лость, Богороди́тельнице, в па́мять же бы́вшаго чудесе́ плат, и́мже усече́нная рука́ его́ обве́рнута бе, на главе́ свое́й ноша́ше, ико́ну же Твою́ многоцеле́бную, я́ко насле́дие бога́тое, святе́й Ла́вре преподо́бнаго Са́ввы Освяще́ннаго по себе́ оста́ви, да вси ве́рнии зову́т к изображе́нней на ней Цели́тельнице душ и теле́с си́це: Ра́дуйся, враго́в святы́я правосла́вныя ве́ры кре́пкая Побо́рнице; ра́дуйся, пропове́дников ева́нгельскаго уче́ния Покрови́тельнице. Ра́дуйся, благочести́вых христи́ан защи́то и похвало́; ра́дуйся, боголюби́вых и́ноков утеше́ние. Ра́дуйся, веду́щим брань проти́ву ми́ра, пло́ти и диа́вола до́брая Споспе́шнице; ра́дуйся, ревну́ющим о целому́дрии и чистоте́ изря́дная Посо́бнице. Ра́дуйся, Помо́щнице на́ша, Троеру́чною ико́ною Твое́ю нам помога́ющая.
Кондак 4
Бу́ря недоуме́ния смуща́ет ми ум, ка́ко возмогу́ недосто́йными усты́ воспе́ти сла́ву Твою́, Пречи́стая Де́во, ю́же во ико́не Твое́й святе́й яви́ла еси́, дарова́вши ю́ нам в по́мощь и защи́ту от враг ви́димых и неви́димых. Те́мже, велича́я неисче́тныя ми́лости Твоя́ к ро́ду христиа́нскому, испове́дую чудеса́ Твоя́ и смиренному́дренно пою́ Вседержи́телю: Аллилу́иа.
Икос 4
Слы́шавше и́ноцы свя́тыя Ла́вры Са́ввы Освяще́ннаго о вели́ких доброде́телях прише́дшаго в Ла́вру на поклоне́ние первосвяти́теля се́рбскаго Са́ввы, по внуше́нию Твоему́, Богома́ти, дарова́ша ему́ на благослове́ние святу́ю ико́ну Твою́ Троеру́чицу, ю́же он со благогове́нием, я́ко дар многоце́нен, в страну́ Се́рбскую принесе́, поуча́я па́ству свою́ зва́ти Тебе́: Ра́дуйся, от восто́ка и до за́пада си́лу всемогу́щества Христо́ва ико́ною Твое́ю возвеща́ющая; ра́дуйся, боле́зни душе́вныя и теле́сныя ико́ною Твое́ю ско́ро врачу́ющая. Ра́дуйся, Се́рбстей стране́ ико́ну Твою́ в зало́г благоволе́ния дарова́вшая; ра́дуйся, чудесы́ Твои́ми Правосла́вие в ней кре́пко утверди́вшая. Ра́дуйся, Симео́на Мироточи́ваго о́бласть благода́тно посети́вшая; ра́дуйся, Са́ввы первопресто́льнаго па́ству ма́терним покро́вом Твои́м приосени́вшая. Ра́дуйся, Помо́щнице на́ша, Троеру́чною ико́ною Твое́ю нам помога́ющая.
Кондак 5
Боготе́чней звезде́ подо́бна яви́ся ико́на Твоя́, Богороди́тельнице, по во́ли Твое́й святе́й на осля́ поста́вленная и отпуще́нная из Се́рбии, осля́ти ники́мже води́му, принесе́ся им на Го́ру Афо́нскую ко врато́м оби́тели Хиленда́рския, ю́же я́ко дар небе́сный восприи́мше и́ноцы, поста́виша в алтари́ собо́рныя це́ркве оби́тели, зову́ще во умиле́нии глубо́цем благи́х Пода́телю Бо́гу: Аллилу́иа.
Икос 5
Ви́девше и́ноцы хиленда́рстии Твое́ к ним благоволе́ние, Преблагослове́нная Де́во, в чуде́снем прише́ствии к ним святы́я ико́ны Твоея́ Троеру́чицы явле́нное, с ра́достию и любо́вию Ей поклоня́хуся, целу́юще и пе́сненно возглаша́юще Ти благохвале́ния сицева́я: Ра́дуйся, Путеводи́тельнице подви́жников благоче́стия к го́рнему Сио́ну; ра́дуйся, пустыннолюби́вых и́ноков приводя́щая к небе́сному Иерусали́му. Ра́дуйся, безслове́сное осля́ во́ли Твое́й святе́й чуде́сно покори́вшая; ра́дуйся, на осли́ ико́ну Твою́ благода́тную от Се́рбии на Афо́н ди́вно прине́сшая. Ра́дуйся, пусты́ню Афо́на благоуха́нием святы́ни испо́лнившая; ра́дуйся, Хиленда́рскую оби́тель благоволе́нием Твои́м облагода́тствовавшая. Ра́дуйся, Помо́щнице на́ша, Троеру́чною ико́ною Твое́ю нам помога́ющая.
Кондак 6
Пропове́дует оби́тель Хиленда́рская на Афо́не бога́тство ми́лостей и щедро́т Твои́х, Богоро́дице Де́во, и све́тло красу́ется, иму́щи святу́ю ико́ну Твою́ Троеру́чицу во игу́мена себе́, и́бо такова́я бысть во́ля Твоя́, е́же пребыва́ти ико́не Твое́й та́мо на игу́менстем ме́сте во хра́ме Бо́жием и в душа́х бра́тии, от Тебе́ еди́ныя благослове́ние на вся́кое послуша́ние прие́млющей и хвале́бно зову́щей та́ко благоволи́вшему о них Творцу́: Аллилу́иа.
Икос 6
Возвести́ла еси́ во́лю Твою́, Богома́ти, и́ноком хиленда́рским, разногла́сием во избра́нии игу́мена смуще́нным, чуде́сно поста́вивши святу́ю ико́ну Твою́ на игу́менстем ме́сте во хра́ме Бо́жием и откры́вши еди́ному от них в виде́нии, я́ко Сама́ Ты хо́щеши пребыва́ти настоя́тельствующею в оби́тели их ико́ною Твое́ю честно́ю, и да про́чее не избира́ют себе́ игу́мена. Они́ же во умиле́нии душ и серде́ц обра́дованнии возопи́ша к Тебе́: Ра́дуйся, и́ноков благоподвиза́ющихся изве́стная и всемо́щная Покрови́тельнице; ра́дуйся, к Сы́ну Твоему́ и Бо́гу те́плая о них Предста́тельнице. Ра́дуйся, жезл игу́менский в Хиленда́рстей оби́тели неви́димо прие́мшая; ра́дуйся, оби́тель сию́ досе́ле це́лу и благоустро́ену сохраня́ющая. Ра́дуйся, стра́хом и благогове́нием сердца́ бра́тии, благослове́ние от ико́ны Твоея́ прие́млющих, исполня́ющая; ра́дуйся, неблагогове́йныя и де́рзостныя гро́зно наказу́ющая. Ра́дуйся, Помо́щнице на́ша, Троеру́чною ико́ною Твое́ю нам помога́ющая.
Кондак 7
Хотя́ соде́лати не то́кмо Афо́н, но и все ины́я стра́ны правосла́вныя прича́стными благода́ти вели́ких чуде́с, ико́ною Твое́ю Троеру́чною излива́емых и быва́емых, Пречи́стая Влады́чице, ту́ю во всех граде́х, ве́сех, це́рквах и оби́телех и́ноческих распространи́ла и ди́вными чудесы́ просла́вила еси́. Те́мже вся ве́рная ча́да святу́ю ико́ну Твою́ Троеру́чицу любо́вию че́ствуют и на ней вку́пе с Тобо́ю изображе́нному Христу́ усе́рдно зову́т: Аллилу́иа.
Икос 7
Ди́вно явля́еши, Преблагослове́нная Де́во, ми́лости ве́рным лю́дем и свято́ю ико́ною Твое́ю Троеру́чицею пресла́вныя чудеса́ содева́еши си́лою благода́ти Христо́вы: слепы́я просвеща́еши, разсла́бленныя укрепля́еши, неду́жныя вра́чуеши и всем прибега́ющим к целе́бному Твоему́ о́бразу ско́рую по́мощь Твою́ при́сно явля́еши, подвиза́ющи зва́ти к Тебе́: Ра́дуйся, Святу́ю Го́ру Афо́нскую в жре́бий Себе́ избра́вшая; ра́дуйся, и вся стра́ны правосла́вныя покро́вом ми́лости Твоея́ осени́вшая. Ра́дуйся, Хиленда́рския оби́тели Настоя́тельнице неизме́нная; ра́дуйся, мно́гих мест и пусты́нь сокро́вище исцеле́ний неоску́дное. Ра́дуйся, на Афо́не, в Росси́и, Се́рбии и ины́х стра́нах ико́ною Твое́ю пресла́вно чудоде́йствующая; ра́дуйся, лю́бящия и чту́щия Тя от вся́ких бед избавля́ющая. Ра́дуйся, Помо́щнице на́ша, Троеру́чною ико́ною Твое́ю нам помога́ющая.
Кондак 8
Стра́нно есть ви́дети и́ноки хиленда́рския, к ико́не Твое́й я́ко к игу́мену приходя́щия и от Нея́ благослове́ния на послуша́ния своя́ прие́млющия. Но, о Всеблага́я, я́коже прие́млеши их ми́лостивно и благословля́еши, та́ко и нас недосто́йных не лиши́ ма́терняго Твоего́ милосе́рдия и попече́ния, приими́ благоутро́бно моли́твы на́ша пред свято́ю ико́ною Твое́ю возноси́мыя, осени́ нас благослове́нием Твои́м благода́тным, изба́ви от вся́ких бед и скорбе́й и научи́ богоуго́дно пе́ти Триеди́ному Бо́гу: Аллилу́иа.
Икос 8
Весь мир преиспо́лнен, я́ко звезда́ми Богосве́тлыми, чудотво́рными ико́нами Твои́ми, Богоро́дице Де́во, в ни́хже я́ко денни́ца лучеза́рная, ико́на Твоя́ Троеру́чица преди́вными чудесы́ благода́тно сия́ет и согрева́ет хла́дныя сердца́ на́ша зна́меньми Твоего́ к нам ми́лостиваго призре́ния. Сего́ ра́ди че́ствуем пречи́стаго ли́ка Твоего́ свято́е изображе́ние и Тебе́ пред ним вопие́м: Ра́дуйся, Богообра́дованная и Пренепоро́чная Присноде́во; ра́дуйся, еди́на Чи́стая и благослове́нная в жена́х. Ра́дуйся, нетле́нная и неискусобра́чная А́гнца и Па́стыря Ма́ти; ра́дуйся, прекра́сная и светоно́сная пала́то святы́х Святе́йшаго Сло́ва. Ра́дуйся, кри́не белосне́жный и благово́нный де́вства и чистоты́; ра́дуйся Цари́це и Влады́чице небесе́ и земли́. Ра́дуйся, Помо́щнице на́ша, Троеру́чною ико́ною Твое́ю нам помога́ющая.
Кондак 9
Всяк во́зраст ве́рных благопо́льзуется Твои́м ма́терним попече́нием, Всебла́гая Влады́чице. Младе́нцы милосе́рдно окормля́еши, о́троки неви́димо руково́дствуеши, му́жи во благоче́стии утвержда́еши, ста́рцы в не́мощех укрепля́еши, всем же вся блага́я и душеполе́зная да́руеши всеси́льным хода́тайством Твои́м у Престо́ла Пресвяты́я Тро́ицы, Е́йже благода́рно пое́м: Аллилу́иа.
Икос 9
Вети́и челове́честии не мо́гут досто́йно восхвали́ти Тя, Богоро́дице, честне́йшую херуви́м и славне́йшую серафи́м, ро́ждшую Еди́наго от Тро́ицы Христа́ Жизнода́вца. Мы же, любо́вию к Тебе́ воодушевле́ннии, смиренному́дренно дерза́ем приноси́ти Тебе́ пе́сни таковы́я: Ра́дуйся, держа́вная Засту́пнице ро́да христиа́нскаго; ра́дуйся, благосе́рдая Ма́ти всех скорбя́щих и обремене́нных. Ра́дуйся, кро́тким сия́нием Твои́м мрак грехо́в и страсте́й на́ших разгоня́ющая; ра́дуйся, на стези́ покая́ния нас прему́дро наставля́ющая. Ра́дуйся, в гро́зный час сме́рти всем нам кре́пкая Защи́тнице; ра́дуйся, до́браго отве́та нам пред Судие́ю Пра́ведным усе́рдная Хода́таице. Ра́дуйся, Помо́щнице на́ша, Троеру́чною ико́ною Твое́ю нам помога́ющая.
Кондак 10
Спасе́ния зало́г дарова́ся нам свята́я и всечестна́я ико́на Твоя́, Богороди́тельнице Де́во, и́бо, я́коже дре́вле прорекла́ еси́ боже́ственному евангели́сту Луце́, с не́ю и доны́не си́ла Твоя́ благода́тно пребыва́ет, чудесы́ пресла́вными ве́ру в нас утвержда́ет, неду́жныя безме́здно врачу́ет и на путь спасе́ния ду́ши на́ша приво́дит, да зове́м просла́вльшему и́мя Твое́ во вселе́нней Царю́ небесе́ и земли́: Аллилу́иа.
Икос 10
Стена́ еси́ де́вам и лико́м и́ноческим, Богоневе́стная Де́во, всем усе́рдно к Тебе́ прибега́ющим, ико́ну же Твою́ святу́ю благогове́йно че́ствующим, и́бо сию́ дарова́ нам благи́х пода́тель Госпо́дь в по́мощь и врачевство́ неду́гом душе́вным и теле́сным и сим внуша́ет пе́ти Тебе́: Ра́дуйся, до́брая младопита́тельнице дев и безма́терних сиро́т; ра́дуйся, и́ноков и и́нокинь благоскорбя́щих Предводи́тельнице к гра́дам небе́сным. Ра́дуйся, в у́зах и темни́це седя́щих посеща́ющая утеше́нием благода́тным; ра́дуйся, благослове́ние домо́в и супру́жеств благочести́вых. Ра́дуйся, ю́ных наста́внице целому́дрия и воздержа́ния. Ра́дуйся, ста́рцев приводя́щая к благо́му житию́ и ми́рней кончи́не. Ра́дуйся, Помо́щнице на́ша, Троеру́чною ико́ною Твое́ю нам помога́ющая.
Кондак 11
Пе́ние моле́бное на́ше, Тебе́ пред пречи́стым о́бразом Твои́м с ве́рою и любо́вию возноси́мое, ми́лостивно услы́ши, Госпоже́ Всеми́лостивая, и сохрани́ нас от тлетво́рных уче́ний неве́рия и суеве́рия, и́ми же наве́туется в нас святооте́ческая правосла́вная ве́ра, изба́ви нас от лука́вых совраще́ний, сохрани́ нас и Оте́чество на́ше от вся́ких крамо́л и от вся́ких нестрое́ний и злых развраще́ний врага́ми ве́ры и Отече́ства на́шего воздвиза́емых, и сподо́би в любви́ и единомы́слии со все́ми ве́рными ча́дами Святы́я Христо́вы Це́ркве богоприя́тно пе́ти Созда́телю на́шему: Аллилу́иа.
Икос 11
Светоприе́млемая свеща́ ико́на Твоя́ свята́я, Богоро́дице Де́во, мир весь сия́нием чуде́с просвеща́ет, сердца́ же на́ша любо́вию воспламеня́ет к Тебе́, Пречи́стей и Преблагослове́нней Ма́тери Сладча́йшаго Го́спода на́шего Иису́са Христа́, дарова́вшаго нам Тебе́ в покро́в и защи́ту проти́ву по́лчищ сатани́нских, и́же боя́тся и трепе́щут са́маго и́мене Твоего́, ве́дающе си́лу Твою́, ю́же велича́ем и Тебе́ зове́м: Ра́дуйся, враги́ на́ша ви́димыя и неви́димыя прему́дро запина́ющая; ра́дуйся, хули́телей святы́я правосла́вныя ве́ры неви́димо кара́ющая. Ра́дуйся, ду́хов зло́бы от нас держа́вно отгоня́ющая; ра́дуйся, преоблада́ти им над на́ми не попуска́ющая. Ра́дуйся, любо́вию к Бо́гу и бли́жним нас воодушевля́ющая; ра́дуйся, вся блага́я проше́ния на́ша ско́ро исполня́ющая. Ра́дуйся, Помо́щнице на́ша, Троеру́чною ико́ною Твое́ю нам помога́ющая.
Кондак 12
Благода́ть свы́ше дарова́ся святе́й ико́не Твое́й Троеру́чице, Влады́чице Преблага́я: скорбя́щия утеша́ти, боля́щия исцеля́ти, слепы́я просвеща́ти, разсла́бленныя укрепля́ти, ве́рныя во благоче́стии утвержда́ти, неве́рныя к позна́нию и́стины приводи́ти, зна́меньми и чудесы́ от нея́ быва́емыми, я́же воисти́ну превосхо́дят разуме́ние челове́ческое и то́кмо ве́рою постига́ются, приводя́ща ве́рныя ду́ши к немо́лчному славосло́вию Творца́, богокра́сною пе́снию: Аллилу́иа.
Икос 12
Пое́м чудеса́ Твоя́, Благода́тная Богороди́тельнице, не таи́м щедро́т Твои́х, испове́дуем благодея́ния Твоя́, прославля́ем неисче́тную ми́лость Твою́ к ро́ду христиа́нскому, ю́же ве́дят вси концы́ земли́, и́бо от восто́ка до за́пада хва́льно и́мя Твое́ свято́е, благословля́емое от всех родо́в и в моли́твах призыва́емое во всех стра́нах. Тебе́ у́бо, си́це просла́вленней и превознесе́нной Сы́ном Твои́м и Бо́гом, и мы хвале́бно вопие́м: Ра́дуйся, ти́хое приста́нище пла́вающих в пучи́не жите́йскаго мо́ря; ра́дуйся, треволне́ние страсте́й умиротворя́ющая Свои́м сердобо́льным уча́стием. Ра́дуйся, во уны́ние и отча́яние впа́дших подъе́млющая наде́ждою спасе́ния; ра́дуйся, сомне́ниями в ве́ре коле́блющихся вразумля́ющая зна́меньми и чудесы́. Ра́дуйся, в оби́телех и́ноческих подвиза́ющимся богоуго́дно пода́тельнице блаже́ннаго упокое́ния; ра́дуйся, и в ми́ре благоче́стно живу́щия не лиша́ющая Твоего́ заступле́ния. Ра́дуйся, Помо́щнице на́ша, Троеру́чною ико́ною Твое́ю нам помога́ющая.
Кондак 13
О Всепе́тая Ма́ти Сладчайшаго Искупи́теля на́шего Го́спода Иису́са Христа́! Вонми́ гла́су моле́бному, Тебе́ пред свято́ю ико́ною Твое́ю на́ми смире́нно возноси́мому, и ма́тернею моли́твою Твое́ю к ро́ждшемуся от Тебе́ святы́х Святе́йшему Сло́ву от вся́кия изба́ви напа́сти и ве́чныя му́ки всех и́мя Твое́ моли́твенно призыва́ющих и о Тебе́ благода́рно зову́щих Бо́гу: Аллилу́иа.
Этот кондак читается трижды, затем 1-й икос «А́нгел земны́й…» и 1-й кондак «Взбра́нней Воево́де…»
Молитва
О Пресвята́я и Преблагослове́нная Де́во Богоро́дице Мари́е! Припа́даем и поклоня́емся Ти пред свято́ю Троеру́чною ико́ною Твое́ю, воспомина́юще пресла́вное чу́до Твое́ исцеле́нием усече́нныя десни́цы преподо́бнаго Иоа́нна Дамаски́на от ико́ны сея́ явле́нное, его́же зна́мение доны́не ви́димо есть на ней во о́бразе тре́тия руки́, к изображе́нию Твоему́ приложе́нныя. Мо́лимся Ти и про́сим Тя, всеблагу́ю и всеще́друю ро́да на́шего Засту́пницу: услы́ши нас, моля́щих Ти ся, и, я́коже блаже́ннаго Иоа́нна, в ско́рби и боле́зни к Тебе́ возопи́вшаго, услы́шала еси́, так и нас не пре́зри, скорбя́щих и боле́знующих ра́нами страсте́й многоразли́чных и к Тебе́ от души́ сокруше́нныя и смире́нныя усе́рдно прибега́ющих. Ты зри́ши, Госпоже́ Всеми́лостивая, не́мощи на́ша, озлобле́ние на́ше, нужду́, потре́бу на́шу в Твое́й по́мощи и заступле́нии, я́ко отвсю́ду врага́ми окруже́ни есмы́ и несть помога́ющаго, ни́же заступа́ющаго, а́ще не Ты умилосе́рдишися о нас, Влады́чице. Ей, мо́лим Ти ся, вонми́ гла́су боле́зненному на́шему и помози́ нам святоотече́скую правосла́вную ве́ру до конца́ дней на́ших непоро́чно сохрани́ти, во всех за́поведех Госпо́дних неукло́нно ходи́ти, покая́ние и́стинное о гресе́х на́ших всегда́ Бо́гу приноси́ти и сподо́битися ми́рныя христиа́нския кончи́ны и до́браго отве́та на Стра́шнем Суде́ Сы́на Твоего́ и Бо́га на́шего, Его́же умоли́ за нас ма́тернею моли́твою Твое́ю, да не осу́дит нас по беззако́нием на́шим, но да поми́лует нас по вели́цей и неизрече́нной ми́лости Свое́й. О Всеблага́я! Услы́ши нас и не лиши́ нас по́мощи Твоея́ держа́вныя, да, Тобо́ю спасе́ние получи́вше, воспое́м и просла́вим Тя на земли́ живы́х и ро́ждшагося от Тебе́ Искупи́теля на́шего Го́спода Иису́са Христа́, Ему́же подоба́ет сла́ва и держа́ва, честь и поклоне́ние, ку́пно со Отце́м и Святы́м Ду́хом всегда́, ны́не и при́сно, и во ве́ки веко́в. Ами́нь.
