Акафист
Пресвятой Богородице в честь иконы Ея «Достойно есть» («Милующая»)
(празднование 11/24 июня)
Кондак 1
Избра́нней Бо́гом от челове́ческаго ро́да послужи́ти воплоще́нию Предве́чнаго Сло́ва, Преблагослове́нней Де́ве Богоро́дице, досто́йно воспева́емой от а́нгел на небеси́, мы гре́шнии на земли́ дерза́ем приноси́ти хвале́бное пе́ние; е́же ми́лостиво от нас прие́мши, Всеми́лующая Цари́це Богоро́дице, от вся́ких бед нас спаси́ и ве́чных мук свободи́, да зове́м Ти: Ра́дуйся, христиа́ном Помо́щнице и милосе́рдая о гре́шных Предста́тельнице.
Икос 1
Арха́нгел Гаврии́л с небесе́ по́слан бысть от Тебе́, Богоро́дице, к смире́нному послу́шнику Горы́ Афо́нския, в пусты́нней ке́лии воспева́вшему Ти хвале́бныя пе́сни пред свято́ю Твое́ю ико́ною, да научи́т его́ пе́ти песнь небе́сную, е́юже славосло́вят Тя а́нгели в Сио́не Го́рнем. Те́мже и мы до́льнии, воспомина́я таково́е Твое́ о лю́дех благопромышле́ние, со благодаре́нием вопие́м Ти си́це: Ра́дуйся, досто́йно восхваля́емая от арха́нгел и а́нгел; ра́дуйся, ублажа́емая от всех Небе́сных Сил. Ра́дуйся, Присноблаже́нная и Пренепоро́чная; ра́дуйся, Ма́ти Бо́га на́шего. Ра́дуйся, честне́йшая херуви́м; ра́дуйся, сла́внейшая без сравне́ния серафи́м. Ра́дуйся, без истле́ния Бо́га Сло́ва ро́ждшая; ра́дуйся, вои́стину су́щая Богоро́дице. Ра́дуйся, велича́емая на небеси́ и на земли́; ра́дуйся, воспева́емая го́рними и до́льними. Ра́дуйся, еди́на благослове́нная в жена́х; ра́дуйся, израсти́вшая нам плод живота́. Ра́дуйся, христиа́ном Помо́щнице и милосе́рдая о гре́шных Предста́тельнице.
Кондак 2
Ви́дев послу́шник пусты́нный ди́внаго прише́льца, в ке́лию его́ прише́дшаго и песнь пресла́дкую Тебе́, Влады́чице, воспе́вшаго, не уразуме́ в нем а́нгела бы́ти, но зело́ услади́ся пе́нием его́ небе́сным и проси́, да напи́шет ему́ словеса́ пое́мыя пе́сни; егда́ же узре́, я́ко под пе́рстом его́ ка́менная дска умягчи́ся, и пи́шемая словеса́ на ней углуби́шася, я́ко на песце́, позна́ в сем чуде́сное де́йство и возопи́ к ро́ждшемуся от Тебе́ Бо́гу Сло́ву: Аллилу́иа.
Икос 2
Ра́зумом богоозаре́нным но́вую песнь открыва́я, рече́ арха́нгел послу́шнику, я́ко та́ко воспева́ют Тя, Богоро́дице, а́нгелов ли́цы в оби́телех го́рних, и повеле́ ему́, да возвести́т челове́ком словеса́ пе́сни небе́сныя и научи́т их ангелоподо́бно пе́ти Тебе́: Ра́дуйся, благода́тная Мари́е; ра́дуйся, я́ко Госпо́дь с Тобо́ю. Ра́дуйся, благослове́нная в жена́х; ра́дуйся, Неискусобра́чная Роди́тельнице Бо́га Сло́ва. Ра́дуйся, непоро́чное селе́ние Ду́ха Свята́го; ра́дуйся, зача́тие несказа́нное яви́вшая. Ра́дуйся, рождество́ нетле́нное показа́вшая; ра́дуйся, Ма́терью и Де́вою пребы́вшая. Ра́дуйся, во обою́ непоро́чно и свя́то Себе́ сохра́ньшая; ра́дуйся, а́нгелов чистото́ю Твое́ю превозше́дшая. Ра́дуйся, го́рних умо́в непрестаю́щее удивле́ние; ра́дуйся, челове́ческаго ро́да возвышение. Ра́дуйся, христиа́ном Помо́щнице и милосе́рдая о гре́шных Предста́тельнице.
Кондак 3
Си́лою Бо́жиею Гаврии́л арха́нгел тве́рдый ка́мень в мя́гкий воск претвори́ и на нем пе́рстом свои́м написа́ словеса́ пе́сни хвале́бныя Тебе́, Богоро́дице, да вси позна́ют вели́кое чу́до и несомне́нно уве́руют, я́ко та́ко вои́стину воспева́ют Тя горе́ Си́лы Небе́сныя, и́мже подража́юще, и мы пое́м вели́чия Твоя́, Де́во, и в ра́дости духо́вней вопие́м просла́вльшему Тя Бо́гу: Аллилу́иа.
Икос 3
Име́я простоту́ душе́вную и непоро́чное се́рдце, послу́шник смире́нный сподо́бися а́нгельския бесе́ды и лицезре́ния чинонача́льника го́рних сил, мы же, лука́вством и зло́бою потемне́ннии, со тре́петом взира́юще на святу́ю ико́ну Твою́, Влады́чице, мо́лим Ти ся приле́жно, обрати́ ны от злоб на́ших и научи́ нас во смире́нии и кро́тости ду́ха глаго́лати Тебе́: Ра́дуйся, Го́ру Афо́нскую освяти́вшая Твои́м благода́тным прису́тствием; ра́дуйся, хо́лмы и де́бри ея́ испо́лнившая сла́вою Твои́х чуде́с. Ра́дуйся, а́нгельскаго явле́ния сподо́бльшая пустынножи́тельство Афо́нское; ра́дуйся, оби́тели и́ноческия в нем умно́жившая во спасе́ние душ челове́ческих. Ра́дуйся, и всем, в посте́ и моли́тве пребыва́ющим, обеща́вшая Твое́ заступле́ние; ра́дуйся, от треволне́ния мо́ря жите́йскаго спаса́ющая ка́ющихся. Ра́дуйся, благода́ть Сы́на Твоего́ и Бо́га низводя́щая на места́, Тебе́ посвяща́емыя; ра́дуйся, рай мы́сленный показа́вшая хра́мы Бо́жия. Ра́дуйся, приста́нище небу́рное содева́ющая в о́нех и́щущим спасе́ния; ра́дуйся, всем потре́бным ко благоче́стию нас снабдева́ющая. Ра́дуйся, жи́тельствующим богоуго́дно пода́тельнице благ вре́менных и ве́чных; ра́дуйся, хода́таице нам Ца́рствия Небе́снаго. Ра́дуйся, христиа́ном Помо́щнице и милосе́рдая о гре́шных Предста́тельнице.
Кондак 4
Бу́ря недоуме́ния смути́ ста́рца и́нока, егда́ услы́ша песнь но́ву и чу́дну из уст своего́ ученика́ и узре́ дску ка́менну, я́ко воск, начерта́ние прии́мшу; егда́ же уве́да о посеще́нии ди́внаго посети́теля, Гаврии́лом наре́кшагося, уразуме́, я́ко той есть, и́же дре́вле благовести́ Тебе́, Де́во, безсе́менное зача́тие Бо́га Сло́ва. Те́мже велича́я вели́чия Твоя́, Цари́це го́рних и до́льних, воспева́ше ра́достно а́нгелов и челове́ков Творцу́: Аллилу́иа.
Икос 4
Слы́шавше о посеще́нии арха́нгелове и́ноцы Горы́ Афо́нския, стека́хуся ви́дети дску, на не́йже преесте́ственно начерта́на бы́ша письмена́ пе́сни небе́сныя, и воспева́ху Тя благогове́йно пред свято́ю ико́ною Твое́ю, Влады́чице, пред не́юже воспе́ Тя арха́нгел. Приими́ у́бо и на́ша приноси́мыя Тебе́ моли́твы с пе́нием таковы́м: Ра́дуйся, я́ко о Тебе́ ра́дуется а́нгельский собо́р; ра́дуйся, я́ко о Тебе́ торжеству́ет челове́ческий род. Ра́дуйся, на руку́ Твое́ю носи́вшая Нося́щего вся́ческая; ра́дуйся, вмести́вшая во чре́ве Твое́м Невмести́маго всем ми́ром. Ра́дуйся, Созда́телю Твоему́ плоть заимода́вшая; ра́дуйся, Красне́йшаго па́че всех сыно́в челове́ческих ро́ждшая. Ра́дуйся, млеко́м пита́вшая Пита́ющаго вся́ческая; ра́дуйся, попече́ние име́вшая о Сы́не Твое́м, Су́щем Промысли́теле всея́ тва́ри. Ра́дуйся, похвало́ де́вства; ра́дуйся, ма́терей сла́во. Ра́дуйся, в рождестве́ де́вство сохра́ньшая; ра́дуйся, рождество́ с де́вством сочета́вшая. Ра́дуйся, христиа́ном Помо́щнице и милосе́рдая о гре́шных Предста́тельнице.
Кондак 5
Богови́дец Моисе́й иногда́ на ка́менных скрижа́лех зако́н Бо́жий, начерта́нный пе́рстом Бо́жиим, получи́, и́ноцы же Горы́ Афо́нския песнь небе́сную во сла́ву Богома́тере, на дске ка́менней начерта́нную, от арха́нгела прия́ша, и сим науче́ннии а́нгельское славосло́вие Тебе́ приноси́ти, воспе́ша та́ко благоволи́вшему о них Бо́гу: Аллилу́иа.
Икос 5
Ви́девше нача́льницы Горы́ Афо́нския чу́до ве́лие в явле́нии арха́нгелове и пе́сни но́вей, дску с начерта́нными от а́нгела письмены́ препроводи́ша к царю́ и патриа́рху Царягра́да, во увере́ние и́стины пресла́внаго сего́ чудесе́; ти́и же ра́достно прия́ша ю́, я́ко зало́г благоволе́ния Бо́жия, во всей Це́ркви Правосла́вней узако́ниша воспева́ти песнь а́нгельскую в похвалу́ Тебе́, Богоро́дице, и взыва́ху Ти во умиле́нии си́це: Ра́дуйся, преукраше́нная ле́потами всех доброде́телей, Де́во; ра́дуйся, Неве́сто Неневе́стная. Ра́дуйся, возрасти́вшая цвет неувяда́емый, Христа́; ра́дуйся, раю́ слове́сный, дре́во жи́зни нам прозя́бшая. Ра́дуйся, се́не небе́сная, от зно́я страсте́й нас сохраня́ющая; ра́дуйся, покро́ве ми́ру, ши́рший о́блака. Ра́дуйся, дре́во благосенноли́ственное, прохла́ду спаси́тельную ве́рным подаю́щее; ра́дуйся, исто́чниче воды́ живы́я, от нея́же пия́й ктому́ не умира́ет. Ра́дуйся, Судии́ пра́веднаго умоле́ние; ра́дуйся, грехо́в на́ших проще́ние. Ра́дуйся, во сла́ве небе́сней одесну́ю Бо́га пребыва́ющая; ра́дуйся, земноро́дных милосе́рдием Твои́м не оставля́ющая. Ра́дуйся, христиа́ном Помо́щнице и милосе́рдая о гре́шных Предста́тельнице.
Кондак 6
Пропове́дует Свята́я Це́рковь вели́чие чуде́с Твои́х, Мари́е Богоро́дице, и све́тло красу́ется, воспева́я Ти песнь а́нгельскую, от небе́с на зе́млю принесе́нную чинонача́льником го́рних сил Гаврии́лом; с ни́мже помоли́ся, Госпоже́ Пречи́стая, к Сы́ну Твоему́ и Бо́гу, да незы́блему во благоче́стии сохрани́т Це́рковь Свою́ и посрами́т вся воста́ния ерети́ческая и раско́льническая, нас же, чад ея́, сподо́бит неосужде́нно воспева́ти Ему́: Аллилу́иа.
Икос 6
Возсия́ла еси́ мно́гими луча́ми чуде́с, о Ми́лостивая Богома́ти, чрез святу́ю ико́ну Твою́, Влады́чице, и си́ми не то́чию Го́ру Афо́нскую, но и мно́жайшая места́ озари́ла еси́, да научи́мся зва́ти Тебе́: Ра́дуйся, ра́досте на́ша, услажда́ющая ско́рбныя сердца́, к Тебе́ отве́рстыя; ра́дуйся, блага́я Засту́пнице, на по́мощь к нам ускоря́ющая. Ра́дуйся, зало́г спаси́тельный нам в ико́не Твое́й дарова́вшая; ра́дуйся, Афо́нскую Го́ру и мно́гия стра́ны е́ю просла́вльшая. Ра́дуйся, наде́ждо на́ша изве́стная; ра́дуйся, упова́ние на́ше непосты́дное. Ра́дуйся, скорбе́й на́ших разреше́ние; ра́дуйся, печа́лей на́ших утоле́ние. Ра́дуйся, ве́ры правосла́вныя утвержде́ние; ра́дуйся, неве́рия и злове́рия посрамле́ние. Ра́дуйся, любве́ Боже́ственныя явле́ние; ра́дуйся, чуде́с пресла́вных соверше́ние. Ра́дуйся, христиа́ном Помо́щнице и милосе́рдая о гре́шных Предста́тельнице.
Кондак 7
Хотя́щим жа́ти спасе́ние ми́лостивая Покрови́тельница и Помо́щница явля́ешися, Ма́ти Бо́жия, и при́сно хода́тайствуеши за них к Сы́ну Твоему́ и Бо́гу, а́ще бо кто и па́дает в не́кое согреше́ние, не́мощию пло́ти обложе́н, оба́че Тобо́ю возста́ние получа́ет во спасе́ние, я́ко всем хо́щеши спасти́ся и в ра́зум и́стины приити́ воспева́ющим Христу́ Бо́гу: Аллилу́иа.
Икос 7
Но́во не́бо и нова́ земля́ угото́ваны от Сы́на Твоего́ и Бо́га лю́бящим Его́, Госпоже́ Всеблага́я, к ни́мже стяжа́хом Тя путеводи́тельницу изря́дну. Те́мже мо́лим Тя, не попусти́ нас поги́бнути в де́брех грехо́вных, но приведи́ нас стезе́ю пра́вою в страну́ све́та и ра́дости ве́чныя, да Тебе́ вопие́м хвале́бно: Ра́дуйся, Сио́на Го́рняго перве́йшее украше́ние; ра́дуйся, оби́телей до́льних присногото́вое заступле́ние. Ра́дуйся, земле́ блага́я, клас спаси́тельный ми́ру израсти́вшая; ра́дуйся, ни́во неора́нная, оплодотворе́нная Ду́хом Святы́м. Ра́дуйся, Огнь Божества́ во чре́во Твое́ прие́мшая; ра́дуйся, глад па́дшаго челове́чества хле́бом жи́зни утоли́вшая. Ра́дуйся, престо́ле Царя́ сла́вы; ра́дуйся, пала́то преукраше́нная Вседержи́теля. Ра́дуйся, хра́ме одушевле́нный Триипоста́снаго Бо́га; ра́дуйся, две́ре Госпо́дня, е́юже Сын Бо́жий про́йде к нам. Ра́дуйся, христиа́ном Помо́щнице и милосе́рдая о гре́шных Предста́тельнице.
Кондак 8
Стра́нное явле́ние арха́нгела, на Горе́ Афо́нстей иногда́ бы́вшее, смотре́ние бысть Боже́ственное, и́мже просла́вися всепе́тое и́мя Твое́, Мари́е Богоро́дице, и вси ве́рнии научи́шася ангелоподо́бно воспева́ти Тя, херуви́мов честне́йшую и серафи́мов славне́йшую Ма́терь Бо́га на́шего, о Не́йже ра́дуется вся́кая тварь и род челове́ческий благода́рно взыва́ет ко Го́споду: Аллилу́иа.
Икос 8
Все упова́ние на́ше на Тя возлага́ем, Ма́ти Бо́жия, и в ско́рбех на́ших к святе́й ико́не Твое́й усе́рдно притека́ем, ча́юще от нея́ утеше́ние благода́тное получи́ти. Помози́ у́бо нам, Влады́чице, с терпе́нием и благодаре́нием вся́кия ско́рби переноси́ти и вме́сто ро́пота малоду́шнаго благоумиле́нно взыва́ти Тебе́: Ра́дуйся, всех скорбя́щих ра́досте; ра́дуйся, всех печа́льных утеше́ние. Ра́дуйся, тружда́ющихся и обремене́нных сла́дкий поко́е; ра́дуйся, боле́знующих и огорче́нных живи́тельная отра́до. Ра́дуйся, в час ско́рбных недоуме́ний мысль благу́ю на се́рдце полага́ющая; ра́дуйся, во дни уны́ния наде́ждою ве́чных благ воодушевля́ющая. Ра́дуйся, искуша́емым ру́ку по́мощи простира́ющая; ра́дуйся, гнев Бо́жий от глав на́ших отводя́щая. Ра́дуйся, ми́рное устрое́ние обурева́емым напа́стьми подаю́щая; ра́дуйся, во благи́х жела́ния на́ша ди́вно исполня́ющая. Ра́дуйся, терпели́вых страда́льцев дара́ми благода́тными увенчава́ющая; ра́дуйся, всех благоподвиза́ющихся блаже́нства ра́йскаго сподобля́ющая. Ра́дуйся, христиа́ном Помо́щнице и милосе́рдая о гре́шных Предста́тельнице.
Кондак 9
Вси а́нгели небе́снии немо́лчными похвала́ми Тя ублажа́ют, Цари́це и Влады́чице всея́ тва́ри, мы же земни́и и пе́рстнии ку́ю похвалу́ досто́йную принесе́м Ти, Всепе́тая? Оба́че, наде́ющеся на милосе́рдие Твое́ неисче́тное, любо́вию к Тебе́ понужда́еми, пое́м чудеса́ Твоя́, пропове́дуем благодея́ния Твоя́, славосло́вим и́мя Твое́ и, усе́рдно припа́дая ко святе́й ико́не Твое́й, ра́бски вопие́м изображе́нному на ней вку́пе с Тобо́ю Богомладе́нцу Христу́: Аллилу́иа.
Икос 9
Вети́й ри́торския глаго́лы не дово́льни к пе́нию чуде́с Твои́х, Богоро́дице, оба́че блага́я су́щи, ве́ру на́шу вме́сто ри́торскаго благослове́сия ми́лостиво приими́, ве́си бо и любо́вь на́шу, е́юже сердца́ на́ша к Тебе́ испо́лнены. Те́мже благоутро́бно услы́ши нехи́тростныя на́ша пе́сни, и́миже дерза́ем благохвали́ти Тя си́це: Ра́дуйся, сопресто́льное Отцу́ Сло́во в ложесна́х Твои́х вмести́вшая; ра́дуйся, Свет незаходи́мый ро́ждшая. Ра́дуйся, жизнь ве́чную ми́ру дарова́вшая рождество́м Твои́м; ра́дуйся, Преве́чнаго, я́ко Младе́нца, на руку́ Твое́ю носи́вшая. Ра́дуйся, гра́де одушевле́нный Всецаря́; ра́дуйся, ски́ние освяще́нная жива́го Бо́га. Ра́дуйся, ни́жняя сочета́вшая с вы́шними; ра́дуйся, миротво́рице, боже́ственнаго ми́ра преиспо́лненная. Ра́дуйся, до́брых вино́вная; ра́дуйся, злых премене́ние. Ра́дуйся, ору́жие на враги́ всекре́пкое; ра́дуйся, щи́те ве́рных несокруши́мый. Ра́дуйся, христиа́ном Помо́щнице и милосе́рдая о гре́шных Предста́тельнице.
Кондак 10
Спаси́тельное прибе́жище от суе́т ми́ра преле́стнаго яви́ся жре́бий Твой земны́й, Свята́я вои́стину Гора́ Афо́нская, Богоро́дице Де́во, ознаменова́нная мно́гими Твои́ми чудесы́. Но и на вся́ком ме́сте с любо́вию призыва́ющих Тя услы́ши и заступи́, Сы́на же Твоего́ умоля́ти не преста́й, Всеблага́я, да не отсту́пна пребыва́ет благода́ть Его́ от мест, иде́же в собра́нии ве́рных пое́тся Ему́ хвале́бная песнь: Аллилу́иа.
Икос 10
Стена́ еси́ де́вственником, Преблагослове́нная Де́во, и столп кре́пок от лица́ вра́жия всем подви́жником благоче́стия: Тебе́ бо даде́ся ве́лия си́ла те́мныя а́дския си́лы побежда́ти и от искуше́ний их душепа́губных челове́ки избавля́ти, наипа́че же тех, и́же целому́дренно и свя́то на земли́ пребыва́ют. Сего́ ра́ди де́вства и целому́дрия рачи́тели согла́сно Тебе́ зову́т: Ра́дуйся, чистото́ю сия́ющая па́че со́лнца; ра́дуйся, де́вства нача́ло и освяще́ние. Ра́дуйся, кри́не, облагоуха́вший па́дшее челове́чество; ра́дуйся, во смире́нии Твое́м осене́нная благоволе́нием Всевы́шняго. Ра́дуйся, ве́рная Рабо́ Госпо́дня; ра́дуйся, я́ко Тя блажа́т вси ро́ди. Ра́дуйся, я́ко сотвори́ Ти вели́чие Си́льный; ра́дуйся, я́ко соца́рствуеши с Сы́ном Твои́м во сла́ве ве́чней. Ра́дуйся, хода́таице Бо́жия к лю́дем благоволе́ния; ра́дуйся, гре́шных к Бо́гу дерзнове́ние окриля́ющая. Ра́дуйся, неистощи́мый исто́чниче ми́лостей и щедро́т; ра́дуйся, преиспо́лненная сострада́ния к стра́ждущим. Ра́дуйся, христиа́ном Помо́щнице и милосе́рдая о гре́шных Предста́тельнице.
Кондак 11
Пе́ние на́ше, а́ще бы́ло бы и тьмочи́сленное, не довле́ло бы к досто́йному прославле́нию ми́лостей Твои́х, Преблагослове́нная Ма́ти Бо́жия, я́же непреста́нно излива́еши ро́ду на́шему; оба́че да не неблагода́рни яви́мся пред Тобо́ю, по си́ле на́шей похва́льная воспису́ем Ти с ве́рою и любо́вию и, воспомина́я неисче́тная чудотворе́ния Твоя́, вопие́м верхо́вному Творцу́ чуде́с Бо́гу: Аллилу́иа.
Икос 11
Светопода́тельными луча́ми чуде́с ико́на Твоя́, о Всеми́лостивая Влады́чице, на Святе́й Горе́ Афо́нстей и повсю́ду немерца́емо сия́ет и весь мир правосла́вный благода́тно просвеща́ет. Сего́ ра́ди гряду́т к ней от лет дре́вних на поклоне́ние правосла́вных собо́ри, умиле́нно воспева́я пред не́ю благохвале́ния Ти такова́я: Ра́дуйся, Царя́ Христа́ ми́ру яви́вшая; ра́дуйся, на ико́не Твое́й вку́пе с Ним изображе́нная. Ра́дуйся, клеще́ таи́нственная, Иса́иею прови́денная; ра́дуйся, купино́ неопали́мая, богови́дцем Моисе́ем предзри́мая. Ра́дуйся, руно́ ороше́нное Гедео́на; ра́дуйся, ча́ще приосене́нная, Авваку́мом воспе́тая. Ра́дуйся, две́ре затворе́нная, Иезеки́илю показа́нная; ра́дуйся, горо́ несеко́мая, Дании́лу явле́нная. Ра́дуйся, многообра́зне от проро́к предвозвеще́нная; ра́дуйся, проро́ческих рече́ний сбытие́ яви́вшая. Ра́дуйся, христиа́ном Помо́щнице и милосе́рдая о гре́шных Предста́тельнице.
Кондак 12
Благода́ти прича́стная Твоя́ ико́на, Богоро́дице Де́во, я́ко сокро́вище драгоце́нное, Це́ркви Христо́вой от Тебе́ подаде́ся, в ней бо обеща́лася еси́ с на́ми бы́ти до сконча́ния ве́ка, ре́кши о первонапи́санней Твое́й ико́не: «С не́ю благода́ть Моя́ и си́ла!» Ве́руем, Всепе́тая, я́ко не оскуде́ет глаго́л Твой сей, и я́ко во ико́не Твое́й святе́й на вся́цем ме́сте и зде с на́ми пребыва́еши, иде́же ве́рно пое́тся Сы́ну Твоему́ и Бо́гу хвале́бная песнь: Аллилу́иа.
Икос 12
Пою́ще чудеса́ Твоя́, Богоро́дице, припа́даем усе́рдно ко святе́й ико́не Твое́й, лобыза́ем ю́ с серде́чною любо́вию и, я́ко при́сно су́щей с на́ми, мо́лим Ти ся: воззри́ на ны милосе́рдием Твои́м, Ма́ти Бо́жия и, я́коже Тя зрим ны́не на ико́не изображе́нную, та́ко сподо́би нас узре́ти Тя в час гро́зный сме́ртный, от руки́ диа́воли нас исхища́ющую и в Ца́рствие Христо́во приводя́щую ны держа́вною десни́цею Твое́ю, да Тебе́ благода́рственно взыва́ем: Ра́дуйся, по Бо́зе пе́рвое на́ше прибе́жище и покро́ве; ра́дуйся, Ма́тернею любо́вию Твое́ю весь мир христиа́нский объе́млющая. Ра́дуйся, во свято́м житии́ ве́рныя утвержда́ющая; ра́дуйся, благу́ю христиа́нскую кончи́ну им подаю́щая. Ра́дуйся, от вла́сти лю́таго мироде́ржца упова́ющия на Тя избавля́ющая; ра́дуйся, на мыта́рствах возду́шных заступа́ющая сла́вящих Тя. Ра́дуйся, врата́ ра́йская нам отверза́ющая; ра́дуйся, Ца́рствие Небе́сное лю́бящим Тя хода́тайствующая. Ра́дуйся, во сла́ве небе́сней приседя́щая Сы́ну Твоему́ и Бо́гу; ра́дуйся, во обще́ние сла́вы Его́ и чту́щия Тя вводя́щая. Ра́дуйся, теле́с на́ших здра́вие; ра́дуйся, душ на́ших спасе́ние. Ра́дуйся, христиа́ном Помо́щнице и милосе́рдая о гре́шных Предста́тельнице.
Кондак 13
О Всепе́тая Ма́ти, ро́ждшая святы́х Святе́йшее Сло́во, от а́нгел воспева́емая на небеси́ и от челове́к сла́вимая на земли́! Приими́ ми́лостиво сие́ ма́лое моле́ние на́ше, и да́руй душе́вное спасе́ние и теле́сное здра́вие всем, ве́рно чту́щим Тя и пою́щим Бо́гу: Аллилу́иа.
Этот кондак читается трижды, затем икос 1-й «Арха́нгел Гаврии́л…» и кондак 1-й «Избра́нней Бо́гом…»
Молитва
О Пресвята́я и Преми́лостивая Влады́чице Богоро́дице! Припа́дая к святе́й ико́не Твое́й, смире́нно мо́лимся Тебе́: вонми́ гла́су моле́ния на́шего, виждь ско́рби, виждь беды́ на́ша и, я́ко любвеоби́льная Ма́ти, потщи́ся на по́мощь нам безпомо́щным, умоли́ Сы́на Твоего́ и Бо́га на́шего, да не погуби́т нас за беззако́ния на́ша, но яви́т нам человеколю́бно Свою́ ми́лость. Испроси́ нам, Влады́чице, у бла́гости Его́ теле́сное здра́вие и душе́вное спасе́ние, и ми́рное житие́, земли́ плодоно́сие, возду́ха благорастворе́ние, и благослове́ние свы́ше на вся блага́я дела́ и начина́ния на́ша, правосла́вному во́инству на́шему на вся враги́ побе́ду и одоле́ние. И я́коже дре́вле призре́ла еси́ ми́лостиво на смире́нное славосло́вие послу́шника афо́нскаго, воспева́вшего Тя пред пречи́стою ико́ною Твое́ю, и посла́ла еси́ к нему́ а́нгела научи́ти его́ пе́ти песнь небе́сную, е́юже славосло́вят Тя а́нгели, та́ко и ны́не приими́ на́ше усе́рдное молитвосло́вие, Тебе́ приноси́мое. О Цари́це Всепе́тая! Простри́ ко Го́споду Богоно́сныя Твоя́ ру́це, и́миже Богомладе́нца Иису́са Христа́ носи́ла еси́, и умоли́ Его́ изба́вити нас от вся́каго зла. Яви́, Влады́чице, Твою́ ми́лость к нам: боля́щия исцели́, скорбя́щия уте́ши, бе́дствующим помози́ и сподо́би нас благоче́стно житие́ сие́ земно́е соверши́ти, христиа́нскую непосты́дную кончи́ну получи́ти и Небе́сное Ца́рствие насле́дити Ма́терним хода́тайством Твои́м к ро́ждшемуся от Тебе́ Христу́ Бо́гу на́шему, Ему́же со Безнача́льным Его́ Отце́м и Пресвяты́м Ду́хом подоба́ет вся́кая сла́ва, честь и поклоне́ние, ны́не и при́сно, и во ве́ки веко́в. Ами́нь.
