Сотница пятая
1. О Всепетая Мати, изнемогавшая от скорби у Креста Сына Своего и Бога, внемли воздыханием и слезам нашим и избави от скорби, болезней и вечныя смерти всех, уповающих на неизреченное Твое милосердие и вопиющих Богу: аллилуиа.
2. Умягчи наша злая сердца, Богородице, и напасти ненавидящих нас угаси, и всякую тесноту души нашея разреши: на Твой бо святый образ взирающе,
Твоим состраданием и милосердованием о нас умиляемся и раны Твоя лобызаем, стрел же наших, Тя терзающих, ужасаемся. Не даждь нам, Мати Благосердная, в жестокосердии нашем и от жестокосердия ближних погибнути, Ты бо еси воистину злых сердец умягчение.
3. Избранней от всех родов Божией Матери, небеси и земли Царице, врачевство духовное всему миру подающей, благодарственная пения приносим о даровании Божественнаго сокровища, чудотворныя иконы Ея, «Прибавление ума» нареченныя, еюже ограждаеми, радуемся светло и с любовию взываем: радуйся, Всемилостивая Владычице, премудрость и разум верным людем Твоим дарующая.
4. О Всепетая Мати Присносущнаго Света и Отчия Премудрости, Ты еси свет омраченных, прибавление ума и радость сердец наших; услыши и приими моление нас, грешных, умудри нас, неразумных, и настави на пение и молитву пред иконою Твоею, «Прибавление ума» нареченною. Не престай молити о нас, недостойных рабех Твоих, славящих Тя и поющих Сыну Твоему и Богу: аллилуиа.
5. О Преславная Мати Христа Бога нашего, благих Подателя, милостию Своею всю вселенную сохрани, даруй нам, рабом Твоим, премудрость и разум, светом Сына Твоего души наша просвети, едина Всепетая, от Херувим и Серафим славимая.
6. Яко Единицы умом нас просвещающую, хвалим Тя, Пречистая, Мати Разума, всю вселенную держащаго, Красото мира видимаго и невидимаго, лучами жизни нас озаряющая.
7. Взбранной Воеводе и Благой Воспитательнице рода христианского, яко избавльшеся от злых, благодарственная восписуем Ти раби Твои, Богородице, имущая державу непобедимую, от всяких бед чадо мое свободи, да со слезами зову Ти: воспитай, Владычице, чадо мое достойна Небеснаго Царствия и наследником вечных благ его сотвори.
8. О Всепетая Мати Иисуса Сладчайшаго, приими сие малое акафистное моление в воню благоухания духовного о чаде моем и возьми его под Твой милосердный покров. Еще же даруй ему мыслити, ведати, слышати, глаголати и творити токмо тое, еже приближает к Тебе и Сыну Твоему и споспешествует вечному спасению. И посли ему в жизни сей привременней все полезное ко спасению души его, да зовет Богу: аллилуиа.
9. Новоявленней Твоей иконе предстояще вернии умильно, воспеваем Ти, Всецарице, раби Твои: ниспосли цельбы к Тебе притекающим ныне рабом Твоим, да вси радостно зовем Ти: радуйся, Всецарице, недуги наша благодатию исцеляющая.
10. О Всецарице Мати, рождшая всех святых Святейшее Слово, нынешнее наше приявши песнопение, от всякой смертныя болезни исцели ны и будущаго избави осуждения вопиющих: аллилуиа.
11. Образом радостотворным честныя Всецарицы, желанием теплым взыскающих благодати Твоея спаси, Владычице; избави от обстояний к Тебе прибегающих, от всякия напасти огради стадо Твое, к заступлению Твоему взывающе присно.
12. Избранной Предвечным Царем в наше верных спасение, небесе и земли Царице, благодарственныя похвалы приносим Ти, Богородице! Ты же, яко имущая державу непобедимую и милосердие неизреченное, от всяких нас бед свободи и вся благая нам даруй, да зовем Ти: радуйся, Мати Дево, всепетая христиан похвало.
13. О Всеблагая Мати Дево, Богородице, присно благодеющая нам во святей иконе Твоей, нынешнее приемши Тебе единей прикладное приношение, от всяких нас бед, напастей и скорбей временных и вечных избави и сподоби нас, рабов Твоих, в селениих райских водворитися, да во вся веки поем: аллилуиа.
14. Избранной от всех родов Пресвятей Деве Марии Богородице, яко воистину плотию рождшей Иисуса Христа, Спаса и Бога нашего, Владычице всея вселенныя, избравшей вторым земным жребием своим гору Печерскую и обитель для иноков на ней создавшую, похвальная приносим пения. Ты же, о Всечестная наша Мати и Заступница, храни и спаси обитель Твою и всех нас от враг видимых и невидимых, да зовем Ти: радуйся, Пресвятая Богородице Дево, Печерская похвало и наше утешение.
15. О Всепетая наша Мати, Преславная Владычице Богородице! Приими сия похвалы и моления, от скверных устен и нечистаго сердца возносимыя; сохрани Твою обитель, нашими грехми оскверненную; собери нас, расточенных, и сподоби в чине ангельстем достигнута Небеснаго Царствия и вкупе с преподобными Антонием и Феодосием и всеми угодники Печерстими прославляти вечно Тебе, нашу Матерь, и Сына Твоего и Бога и пети песнь: аллилуиа.
16. Днесь светло торжествует Печерская обитель и радуется явлением образа Богоматере безмерный лик печерских отцев, с нимиже и мы непрестанно вопием: радуйся, Благодатная, Печерская похвало.
17. Взбранной Воеводе и усердней Заступнице рода христианского, Пресвятей Деве Богородице, град Любеч явлением святыя иконы Ея прославльшей и чудесы, от нея бываемыми, духовно ны утешившей, благодарственное приносим пение; Ты же, Всемилостивая Царице, яко имущая державу непобедимую и милосердие неисчетное, от всяких нас бед и скорбей присно свобождай, да зовем Ти: радуйся, Мати Божия, и спаси на Тя уповающия.
18. О Всепетая Мати, Любечская похвало и наше заступление, приими милостиво сие малое моление наше, пред пречистым образом Твоим приносимое, и умоли Сына Твоего и Бога нашего избавити нас муки вечныя и сподобити радости святых, выну поющих Ему: аллилуиа.
19. Преблагословенная Царице, Пречистая Дево Богородице, прославльшая град Любеч угодника Твоего преподобнаго Антония Печерскаго рождением и чудотворныя иконы Твоея явлением, молим Тя, Всеблагая: моли за ны рождшагося от Тебе Царя, Христа Бога нашего, и Матерним Твоим к Нему предстательством избави нас от всякаго зла, недуги наша исцели, печали наша утоли и наследники яви нас Царствия Небеснаго, яко Милосердна.
20. Взбранная Воеводо, всего мира Утешительнице и Надеждо спасения рода христианскаго, к Тебе припадаем во вся дни жизни нашея, яко к источнику всех духовных дарований, и молим Тя: услыши нас, вопиющих к Тебе в часы дневныя и нощныя, в болезнех и скорбех, в нуждах и напастех, всегда в радости зовущих: радуйся, Владычице мира, иконою Твоею Песчанскою сердца наша утешающая.
21. О Всепетая Мати, приими от нас благодарное пение сие, Тебе возносимое. Буди нам в жизни сей Ходатаица пред Богом о жизни вечной, да выну благодарно восхваляем Тя и Богу поем: аллилуиа.
22. Люди верни, со дерзновением притецем к чудотворному образу Богоматери Песчанской, ибо она дарует граду сему и стране нашей велию милость и спасение душам нашим.
23. Избранную от всех родов Божию Матерь и Царицу Небесную, непрестанно у Престола Сына Своего молящуюся о нас, с любовию благодарно восхвалим. Восхотев во всех концех земли видети прославление величия Божия, возблаговолила еси, Преблагословенная, воздвигнути спасительныя обители Своя; тако и воззрев на страдания православных страны Прибалтийския, посетила еси край сей Своею благодатию, да утешенные Тобою зовем Ти сице: радуйся, Любвеобильная, слезы сердец наших милостивно осушающая.
24. О Всепетая Мати, Любвеобильная Заступница православных людей Твоих, страждущих в безумнем мире сем, призри на скорби и нужды наша, услыши моления наша, во смирении из глубины усталых сердец Тебе возносимыя, очисти грехи наша и сподоби нас до конца дней наших нелицемерно взывати Воплотшемуся от Тебе Спасителю нашему: аллилуиа.
25. Утешение всех скорбящих, скорая Помощнице в туге сердечней к Тебе прибегающим, услыши нас, Владычице, и даждь нам на пути к жизни вечней душ и сердец от скверн очищение и яко елень на источники водныя к Царству Небесному неустанное стремление.
26. Пресвятая Богородице Дево, утоли жажду спасения страждущия души моея у Источника вод живых – Божественнаго Слова, Сына Твоего, Христа Бога нашего, призри на любящих и славящих Тя, Пречистая, и покрый нас покровом милосердия Твоего от всяких зол, тревог и бурь моря житейскаго.
27. Избранной Богом Владычице всей твари, благословенней Марии Деве Богородице, приносим смиренное поклонение святому Твоему образу. Ты же, о Пренепорочная, приими молитву недостойных раб Твоих, почитающих Крестныя страдания Сына Твоего и Бога нашего, со умилением зовущих Ти: радуйся, Невесто Неневестная.
28. О Всепетая Мати, приими недостойных раб Твоих молитву, призри на предстоящия люди пред чудотворной иконою Твоею и усердно поклоняющихся Пречистым Страстем Сына Твоего, просящих избавления от вечныя муки, вопиющих Тебе: аллилуиа.
29. Днесь возсия неизреченно царствующему граду нашему Москве икона Богоматере и, яко светозарным солнцем, пришествием тоя озарися весь мир, небесныя Силы и души праведных мысленно торжествуют, радующеся; мы же, на ню взирающе, к Богородице со слезами вопием: о Всемилостивая Госпоже, Владычице Богородице, молися из Тебе воплощенному Христу, Богу нашему, да подаст мир и здравие всем христианом по велицей и неизреченней Своей милости.
30. Днесь, яко солнце пресветло, просия в Российстей стране, в конце ея полуденнем, всечестная икона Твоя, Владычице, юже благоверный великий князь Димитрий в град Москву принесе. Светло празднуем, благовернии людие, честнаго образа пришествие, молящеся прилежно: Владычице Богородице, молися
Сыну Твоему, Христу Богу нашему, избавити град Москву, страну нашу и вся православный христианы от варварскаго пленения, и междоусобныя брани, и всех навет вражиих, Тебе бо Едину Заступницу имамы.
31. Возсия нам, яко солнце светозарное от востока в велелепии, Твоя, Владычице, икона, озаряющи чудес сиянием преславно всех, выну приходящих к ней с верою и любовию и молящихся усердно Твоему, еже о Сыне Твоем и Бозе, величию. Слава Богу, Арсением сию давшему нам, слава возвратившему от Новаграда, слава дающему тою всем исцеления.
32. Заступнице земли Российския от нашествия Свейскаго и непрестанная за нас Молитвеннице, мир земли и душам нашим у Господа испроси, да святится в нас имя Божие во веки.
33. Бысть чрево Твое святая трапеза, имущи Небеснаго Хлеба, Христа, от Негоже всяк ядый не умирает, якоже рече всяческих, Богородице, Питатель.
34. Предстательнице нератная, о Одигитрие готовая! Тверския земли и града Москвы красота и слава, днесь в кров Твой вси прибегаем и умильно вопием Твоему крепкому заступлению, просяще избавления от злых наветников Православия, присно борющих нас, и получити, Богородительнице Чистая, токи неисчерпаемых чудесных исцелений от Твоея пречудныя иконы молитвой предстоящего пред Тобою Мирликийского чудотворца Николая, да усердно вси Твое проповемы наше ограждение.
35. Яко стену необоримую, источник милосердия, упование земным и заступление, Мати всяческих Творца Всесветлая, Тя стяжавши, раби Твои, Богоотроковице, на мольбу нашу ныне умилосердися, иже от врагов Православия насилование скоро и невозвратно разори мечом Божественныя Твоея и святителя Николая молитвами и не остави прославляющия люди и стада Твоя погибнути, яко вся возможно Тебе, Чистая Богородице Неискусобрачная и Мати Зиждителя сущи и Всепетая, да усердно вси Твое проповемы наше ограждение.
36. Всепетая и всеславная Царице Богородице, Мати всея твари Содетеля, христианская Надеждо и Заступнице, печальных утешение, ненадеющихся и отчаявшихся скорое надеяние, молим Тя: милостива буди нам, грешным, и не остави раб Своих, и не отрини моления верных, в скорбех и бедах пред честным образом Твоим избавления требующих.
О Владычице, Благая Помощнице! Ризою Твоею честною нас защити и от всех зол избави, молящи Сына Твоего, Христа нашего, да спасет души наша, яко Милосерд.
37. Дева днесь предстоит Сыну, руце Свои к Нему простирающи, святый князь Андрей радуется и с ним Российская страна торжествует, нас бо ради молит Богородица Превечнаго Бога.
38. Ко источнику приснотекущему милосердия, Пречистей Деве Богородице, притецем, людие все, священницы же и иноцы, мужие, и жены, и чада, здравии и болящии, в покаянии вопиюще и умильно глаголюще: Владычице, помози грешным рабом Твоим, яви, яко Благая, славу Твою, присно потщися умилосердитися на ны, испросити очищение душ и телес наших от источника жизни нашея Бога, Егоже родила еси, едина Благословенная.
39. Днесь пресветло красуется славнейший град Москва, имея чудотворную икону Владычицы нашея Богородицы, та бо, верным являющи чудеса, низпосылает дары целебныя. Сего ради и мы, с верою припадающе, молимся, и на Тоя пречистый образ взирающе, яко истинную Самую зрим Владычицу нашу Приснодеву Богородицу и умильно глаголем: воззри, Мати Божия, оком милости, простри к нам руце Твои пречистыя, якоже на иконе Твоей сие зрится, и подаждь всем скорбящим радость, больным от всех недугов исцеление и от бед избавление, яко Ты еси скорая Предстательница о душах наших.
40. Веселятся православнии народи, видяще, Владычице Дево Богородице, твою пречудную и чудотворную икону, и приемлют врачевство душевное и телесное Твоею милостию всегда. Темже и мы, поклоняющеся оней, усердно Тебе вопием: помилуй, Благая Мати, смиренныя рабы Твоя и избави нас от всякаго зла и навета вражия, молящи Сына Твоего, Господа Иисуса, да, спасшеся зде, небесное жительство получим человеколюбием и благодатию Его.
41. В небесныя обители преселившаяся с плотию, сущия на земли никакоже оставила еси, Богородице, образ божественный и многочудесный пречистаго лица Твоего зрети любящим Тя и поклонятися даровала еси. Яко знамение Твоея благодати, чтим его, лобызающе.
42. Дерзость ненавидящих образ Господень и держава нечестивых безбожно в Никею прииде, и посланнии безчеловечно вдовицу, благочестно чтущую икону Богоматере, истязуют, но тая нощию с сыном икону в море пусти, вопиющи: слава Тебе, Чистая, яко непроходимое море плещи своя подаде, слава правошествию Твоему, Едина Нетленная.
43. Не имамы песней, ниже словес, как достойно восхваляти Тя, Мати Христа Бога нашего, явления ради чудотворныя иконы Твоея земли Калужстей, томко можем вопити Тебе: не отврати милости Твоея от нас и низпосли ко всем притекающим к цельбоносней иконе Твоей.
44. Совозсия днесь свету Воскресения свет чистыя иконы Твоея, обоя весело торжествующе, вопием: сохрани раб Твоих благодатию, Владычица.
45. Дева днесь невидимо предстоит в церкви и с лики печерских отцев молится о нас, благоговейно величающих Ея безмерную милость к роду нашему, явльшуюся в чудном образе Ея, обитель Печерскую украшающем.
46. На водах Свислочи явилася еси, Пренепорочная Отроковице, от Царьграда и Киева богоспасаемому граду Минску милость показа, просвети нас, грешных, сиянием Своим, яви, яко присно, силу Твою, спаси нас предстательством Своим и избави от навет вражиих, Тя бо Необориму Стену и едину надежду имамы.
47. Душ наших чувствия очистивше, узрим на иконе таинство преславное, Творца вселенныя и Господа Вышних Сил, во объятиих держима и от сосцу Твоею, яко Младенца, питаема, и, со страхом и радостию поклоняющеся Тебе и рождшемуся от Тебе Спасу нашему, воззовем: радуйся, Владычице, Жизни нашея Питательнице.
48. Благодатию Твоею, Владычице, умягчи сердца злодеев, низпосли благодетелей, соблюдающи их от всякаго зла, благомолящимся Ти усердно пред честными иконами Твоими.
49. Иже в купине, огнем горящей и несгораемей, показавый Моисеови Пречистую Твою Матерь, Христе Боже, огнь Божества неопальне во чреве приимшую и нетленну по рождестве пребывшую, Тоя молитвами от пламене страстей избави нас и от огненных запалений град Твой сохрани, яко многомилостив.
50. Чудное и богоприятное светоноснаго зрака Твоего явление, Пречистая Дево, с верою взирающим бывает известное чаяние спасения, столпом бо огненным являющи предстательство, неусыпное и теплое за ны к Богу возсылаеши моление, имже страну Российскую от всяких бед избави, молимся, да радостными усты вопием Ти вси: радуйся, Предводительнице вечнаго блаженства.
51. Яко звезда светозаряющая, из Сербии на Афон чудесно прииде всечестная икона Твоя «Троеручица», юже обитель Хиландарская благоговейно восприемши, яко Божественный дар свыше, прославляет Тя, Владычицу, и умильно вопиет: не остави милость Твою от нас, но пребуди с нами во веки.
52. К Богородице со умилением припадем, вси грехми обремененнии, чудотворную Ее икону «Умиления» облобызающе и вопиюще со слезами: Владычице, приими моление недостойных раб Твоих и подаждь нам, просящим, велию Твою милость.
53. Юже подражая неплодную смоковницу, аз, окаянный, умиления плода отнюдь не приношу и посечения страшуся, но, взирая к чудотворней иконе Твоей «Умиление», Владычице, стеню от сердца и вопию: умилися, Благодатная, и мне, окамененному сердцем, благоволи подати душевное и телесное умиление.
54. Днесь светло красуется преименитый град Кострома и вся Русская страна, созывающи к веселию вся боголюбивыя народы христианския на преславное торжество Божия Матере, пришествия ради чудотворнаго Ея и многоцелебнаго образа. Днесь бо явися нам пресветлое великое солнце. Приидите, вси богоизбраннии людие, новый Израиль, ко источнику цельбоносному, источает бо нам неоскудныя милости Пресвятая Богородица и избавляет вся грады и страны христианския невредимы от всех навет вражних. Но, о Всемилостивая Госпоже Дево Богородице, Владычице, спаси страну нашу, и архиереи, и вся люди Твоего достояния от всех бед по велицей Твоей милости, да зовем Ти: радуйся, Дево, христиан похвало.
55. В преславнем явлении Твоем, Дево Богородице, припаде к стопам Твоим преподобный авва Сергий и мольбу о святей обители изрядно сотвори, да Твоим Матерним ко Христу предстательством усердно присно ходатайствуеши о всех под священный покров Твой прибегающих, просящи нам оставления грехов и велия милости.
56. Радуйся, Владычице, знамение милости Твоея нам являющая. Радуйся,
Благодатная, непрестанно за нас Христу молящаяся. Радуйся, Мати Божия Державная, Заступнице Усердная рода христианскаго.
57. Радуйся, Богородице Дево, Млекопитательнице, милостию Твоею нас присно питающая. Радуйся, Владычице Милостивая, в напастях скорая Заступнице. Радуйся, Любвеобильная, слезы сердец наших милостивно осушающая.
58. Радуйся, Благодатная, Купина Неопалимая, огненнаго запаления нас избавляющая. Радуйся, Благодатная, Господь с Тобою, подаждь и нам, недостойным, росу благодати Твоея и яви милосердие Твое. Радуйся, Всеблагая Владычице, умиление и спасение наша.
59. Радуйся, Всеблагая Скоропослушнице, прошения наша во благо исполняющая. Радуйся, Мати Милосердия, страждущих от скорбей избавляющая. Радуйся, скорая Утешительнице и Целительнице, любовь Свою и милосердие нам являющая.
60. Радуйся, Богородице Одигитрие, христиан упование. Радуйся, похвало Почаевская и всего мира надеждо и утешение. Радуйся, Владычице, милость Свою нам и заступление являющая.
61. Радуйся, Премилосердная Владычице, предстательство наше и всерадостное заступление. Радуйся, грешным Споручнице, всегда о нас руце Свои в поручение Богу приносящая. Радуйся, Божия Мати, Невесто Нетленная, светлая наша Отрадо.
62. Радуйся, Пречистая, весь мир Рождеством Своим возвеселившая. Радуйся,
Матерь Божия, Предстательнице и Заступнице наша усердная. Радуйся, Обрадованная, во Успении Твоем нас не оставляющая.
63. Радуйся, Богоизбранная Отроковице, вхождением во храм двери райския нам отверзающая. Радуйся, Радосте наша, спаси нас от вечныя смерти преславным Твоим Рождеством. Радуйся, Благодатная, Господь с Тобою.
64. Радуйся, Избавительнице, от горя, бед и гибели спасающая нас, бедствующих. Радуйся, Помощнице наша, Троеручною иконою Твоею нам помогающая. Радуйся, Радосте наша, отраду и утешение верным дарующая.
65. Радуйся, Пресвятая Богородице Дево, Святой горы Афона и всея вселенныя православных обителей Всечестная
Игумения. Радуйся, Владычице, Неупиваемая Чаша, духовную жажду нашу утоляющая. Радуйся, Невесто Неневестная.
66. Радуйся, Радосте наша, во объятиях Своих Радость всего мира носившая. Радуйся, Солнца незаходимаго Мати, любовию Своею нас не оставляющая. Радуйся, Пречистая Дево, всемирная Славо и Радосте наша.
67. Радуйся, земли Холмския отрадо и всему миру прибежище и заступление. Радуйся, Пречудная Владычице, земли Муромския и Рязанския Милостивая Заступница. Радуйся, с верою молящихся пред честным образом Твоим от бед избавляющая.
68. Радуйся, Богородице, Стено Нерушимая, Заступнице наша и Утешение. Радуйся, Обрадованная, радость Твоего заступления всему миру дарующая. Радуйся, всем радостем Ты еси радость, Всеблаженная.
69. Радуйся, Богомати, в напастех Помощница скорая. О, Благодатная, помилуй нас и спаси и пачесолнечною теплотою любве Твоея грехми умерщвленный наш дух оживи. Радуйся, Живоносный Источниче, вся наша болезни исцеляющая.
70. Радуйся, Мати Дево, всепетая христиан похвало. Радуйся, Царице Преблагословенная, пределы Дальнероссийския земли милостию Своею не оставляющая. Радуйся, Пренепорочная Отроковице, градов наших Небесная Заступнице.
71. Радуйся, Пренепорочная Богородице Дево «Призри на смирение», с высоты небесной на смирение рабов Твоих призирающая. Радуйся, Богоматери величие и Приснодевы смирение в Себе сочетавшая. Радуйся, Мати Милосердия, Покровом Твоим нас не оставляющая.
72. Радуйся, Всемилостивая Владычице, премудрость и разум верным людям Твоим дарующая. Радуйся, Благая Воспитательнице, воспитанная во Святая святых. Радуйся, Мати Божия, Цвете Неувядаемый.
73. Радуйся, Пресвятая Богородице Дево, Печерская похвало и наше утешение. Радуйся, Владычице мира, иконою Твоею Песчанскою сердца наша утешающая. Радуйся, Мати Божия, и спаси на Тя уповающия.
74. Радуйся, Благодатное Небо, радость и спасение нам дарующая. Радуйся, Благодатная Богородице Дево, Всеблагая
Мати, взыскующая погибающих. Радуйся, Благодатная, с Тобою Господь, подаяй Тобою нам велию милость.
75. Не отврати от мене многия щедроты Твоя, не затвори утробу Твою человеколюбную, Чистая, но предстани ми ныне и в час судный помяни мя.
76. Тебе, Чистейшую Цареву палату, молю, Многопетая: ум мой очисти, оскверненный всякими грехами, и жилище красное Пребожественныя Троицы сотвори, яко да силу Твою и безмерную милость величаю, спасаемый, непотребный раб Твой.
77. Чудо превелие: како содержася Невместимый во чреве Твоем, и воплотися, и явися, яко человек, не претерпевый смешения или разделения Божественнаго и непреложнаго Божества,
Отроковице Всечистая: темже Богородицу Тя верно проповедуем присно и славим.
78. Никтоже притекаяй к Тебе посрамлен от Тебе исходит, Пречистая Богородице Дево, но просит благодати и приемлет дарование к полезному прошению.
79. Безпомощным крепость Ты воистину, Пресвятая Дево Мати, отсюду смиреннии Тобою возвышаемся, о Тебе высоце держимся: всем Ты еси покров и к Богу Ходатаица.
80. Мысленно прикасаяся Твоим стопам, Всенепорочная, молю Тя: приими рыдание мое, пение внуши и прегрешений разрешение подаждь ми, вопию Ти, молитвами Твоими, Дево, да любовию Тя величаю.
81. Паче естества Матерь и по естеству Деву, едину в женах благословенную, песньми вернии Богородицу величаем.
82. Благодарим Тя присно, Богородице, и величаем, Чистая, и поклоняемся, воспевающе Рождество Твое, Благодатная, вопиюще непрестанно: спаси нас, Дево Премилостивая, яко благая, в час испытания, да не посрамлени будем раби Твои.
83. Да Тебе вернии, «радуйся» зовем, Тобою радости причастницы бывше присносущныя; избави нас напастей, варварскаго пленения и всякия иныя раны, за множество, Отроковице, прегрешений находящия человеком согрешающим.
84. Дево Всенепорочная Марие, со Ангелом Хранителем моим прилежно Спаса моли даровати ми согрешений моих прощение и жития исправление, да Тя всегда, яко Матерь Божию, благодарственно величаю.
85. Владычице Дево Чистая и Препрославленная, с Предтечею Сына Твоего и Царя моли, от всякия нужды спасти верою Тя блажащия.
86. Простри длани Твоя, имиже всех Владыку яко Младенца прияла еси, за множество благости, не остави нас, всегда надеющихся на Тя, бодренною Твоею молитвою, и неизчетною простынею ущедри нас, и подаждь душам нашим милосердие Твое, во веки источающи, Тебе бо имамы грешнии Заступницу от находящих на ны бед и зол, но яко имущи милосердия щедроты, ускори на молитву и потщися на умоление, предстательствующи присно, Богородице, чтущих Тя.
87. Радуйся, Всеблагословенная Марие, из Тебе бо всеблагословенный Бог одеяся во всего мя человека и, одеявся, соедини Своему Божеству неизреченным соединением, Дево Одигитрие. Радуйся, Благодатная, Радосте всего мира.
88. Лето живота нашего прочее сохрани неврежденно, поможением Твоим, Дево Отроковице, и сподоби конец благий получити нам, воспевающим Тя и взывающим: радуйся, Всеблаженная Богородице Чистая, Одигитрие.
89. Преблагословенная Богородице, радуйся, яко еси Царя всех престол, Херувимов вышший, не закосни, моля Своего Сына и Бога нашего о чтущих Тя присно, с Николаем Блаженным.
90. Марие Госпоже, Мати Избавителя, приими мя, кающагося, и прибегающаго под кров Твой, яко да не престая вопию к Тебе: радуйся, Благодатная Богородице, Приснодево.
91. Царице, всех Царя рождшая и Носящаго всю тварь, спаси мя, величающаго Тя, Пресвятая Владычице.
92. Поем Тя, Благословенная, Чистая Дево, Еяже ради возсия нам сущим во тьме и сени смертней, Правды незаходимое Солнце, Ты бо еси со всеми святыми изрядная нашего спасения Ходатаица.
93. Велия и страшная есть тайна, Богомати, Твоего Рождества: Бога бо родила еси, Егоже смерть не претерпе и гроб не растли. Темже Тя, Пречистая, вси языцы славим.
94. Сладосте Ангелов, скорбящих радосте, христиан Предстательнице, Дево, Мати Господня, заступи нас и избави вечных мук.
95. Марие, Госпоже Богородице Безневестная, Надеждо верных, вражия возношения низложи, поющия же Тя возвесели.
96. Богородице Всепетая, Ты вся можеши у Превечнаго Сына Твоего, моли убо Его, яко Милосердая Мати, избавити ны от всех зол, да Тя непрестанно величаем.
97. Тебе и стену, и пристанище имамы, и Молитвенницу Благоприятную к Богу: Егоже родила еси, Богородице Безневестная, верных спасение.
98. От Девы возсиявый миру, Христе Боже, сыны света Тою показавый, помилуй нас.
99. Невесту Тя нарицаем, Пречистая, Отца Невидимаго и Матерь Сына, из Тебе Духом Святым воплощеннаго, и Молебницу Тя о пострадавших за Церковь Сына Твоего и Свое отечество предлагаем. Тебе бо Помощницу имамы земнии, и любовию поюще, Тя величаем.
100. Вси ублажаем Тя, Чистая, безсеменно бо родила еси плотию Бога и Царя Небеснаго.
