(празднование 15/28 июля)

Ка́ко похвалим тебе, в земных владыках прему́жественный, Владимире? Како ти благодаре́ние воздади́м, я́ко тобою Господа позна́хом и лести и́дольския избы́хом, я́ко твоим повелением по всей земли нашей Христос сла́вится? Како ве́ровал еси́? Како Христа взыска́л еси́? Пове́ждь нам, ча́дом твоим, откуду облагоуха́ тя воня́ Свята́го Духа? Не видел еси́ Христа, ни ходил еси́ по Нем, како ученик Его обре́лся еси́? Не видел еси́ апостола, прише́дша в землю твою, не видел бесы изгоня́юща именем Христовым, боля́щих исцеля́юща, мертвых воскреша́юща. Дивное чудо! Ини́и ца́рие и власти́телие, ви́дяще вся сия, быва́юща от святых муже́й, не ве́роваша, но паче на страсти и муки преда́ша их, ты же, о блаженне, не видя и не слыша всех сих, ко Христу прите́кл еси́, разуме́в, я́ко Един есть Творец неви́димым и ви́димым, небесным и земным, и я́ко посла́ в мир, нашего ради спасения, возлю́бленнаго Сына Своего. И сия помыслив, вшел еси́ во святую купель.

И ныне, проте́кшим ты́сящам ле́том от Крещения Руси, призри на землю твою, виждь чада твоя. Виждь люди твоя, како живут, како храни́ми суть Го́сподем, како благове́рие хранят по преда́нию твоему, како сла́вят Христа, како покланя́ются имени Его. Виждь и грады величеством сия́ющия, виждь це́ркви цвету́щия, виждь христианство расту́щее, виждь и град твой Киев толи́кими уго́дники Божиими, в нетле́нии почива́ющими, блиста́ющийся, и фимиа́мом облагоуха́ем, и хвала́ми и боже́ственными пе́нии святыми оглаша́ем.

Видя же, я́ко твое верное се́яние твоим хода́тайством и заступлением не изсу́шено бысть зно́ем неве́рия, но дожде́м Бо́жия поспеше́ния плод изобильный принесе́, радуйся духом, во влады́ках апо́столе, не ме́ртвая телеса́ возста́вивый, но душе́ю ны, ме́ртвыя, воскреси́вый! Радуйся, уте́шителю наш и наста́вниче благове́рия!

Ты был еси́, о честна́я главо́, нагим одея́ние, а́лчущим корми́тель, вдови́цам помощник, странным поко́ище, оби́димым засту́пник, убо́гим обогаще́ние. Сим благи́м де́лом на небесе́х возме́здие прие́мля и зре́ния сладкаго лица Божия насыща́яся, не преста́й моля́ся о земли́ твоей и о ча́дех, в нихже благове́рно влады́чествовал еси́, да при́сно сла́вится в земли́ нашей правове́рие, и да не оста́вит нас Господь, а́ще и еще блужда́ем, толи́ким веко́м проте́кшим, а́ще и еще́ согреша́ем Господу и Влады́це нашему, а́ки новоку́плении раби́, во всем неугодя́ще господину своему. К тебе руки на́ша воздева́ем и мо́лим тя: помоли́ся Влады́це всех, да продли́т, доне́леже стоит мир, милость Свою на оте́чествии нашем и людех Своих, враги прогоня́я, мир утвержда́я, от гла́да избавля́я, гра́ды устроя́я, Церковь Свою возраща́я, достоя́ние Свое соблюда́я, му́жи и жены́ и младенцы спаса́я, да ми́лостию Его храни́ми, в едине́нии ве́ры вку́пе весело и радостно сла́вим Господа на́шего Иису́са Христа со Отцем и со Пресвяты́м Ду́хом, Тро́ицу Неразде́льну и Единобоже́ственну, ца́рствующу на небесе́х и на земли́, ны́не и при́сно и во ве́ки веко́в. Аминь.