(26 августа/8 сентября)

О свяще́нная дво́ице, святи́и муче́ницы Христовы Адриа́не и Ната́лие, блаже́ннии супру́зи и до́блии страда́льцы! Услы́шите нас, моля́щихся вам со слеза́ми, и низпосли́те вся благопотре́бная душа́м и телесе́м нашим, и моли́те Христа Бога, да поми́лует нас и сотвори́т с нами по ми́лости Своей, да не поги́бнем во гресе́х наших.

Ей, святи́и му́ченицы! Приими́те глас моле́ния нашего и изба́вите нас моли́твами вашими от гла́да, губи́тельства, тру́са, пото́па, огня́, меча́, гра́да, наше́ствия иноплеме́нников и междоусо́бныя бра́ни, от внеза́пныя сме́рти и от всех бед, печа́лей и боле́зней, да при́сно вашими моли́твами и предста́тельством укрепля́еми, просла́вим Господа Иисуса Христа, Ему́же подоба́ет вся́кая слава, честь и поклоне́ние, со Безнача́льным Его Отце́м и Пресвяты́м Ду́хом, во веки веков. Аминь.