(27 июля/9 августа)

О вели́кий уго́дниче Христов, страстоте́рпче и врачу́ многоми́лостивый Пантелеи́моне! Умилосе́рдися надо мно́ю, гре́шным, услы́ши стена́ние и вопль мой, уми́лостиви небе́снаго, верхо́внаго Врача́ душ и теле́с наших, Христа Бога нашего, да да́рует ми исцеле́ние от неду́га, мя гнету́щаго. Приими́ недосто́йное моле́ние грешне́йшаго па́че всех челове́к. Посети́ мя благода́тным посеще́нием. Не возгнуша́йся грехо́вных язв моих, пома́жи их еле́ем ми́лости твоея́ и исцели́ мя, да здрав сый душе́ю и те́лом, оста́ток дней моих, благода́тию Божиею, возмогу́ провести́ в покая́нии и угожде́нии Богу и сподо́блюся восприя́ти благи́й коне́ц жития́ моего.

Ей, уго́дниче Божий! Умоли́ Христа Бога, да предста́тельством твоим да́рует здра́вие те́лу моему и спасе́ние души́ моей. Аминь.