(4/17 декабря)

Свята́я сла́вная и всехва́льная великому́ченице Христова Варва́ро! Со́браннии днесь во хра́ме твоем Боже́ственнем лю́дие, ра́це моще́й твоих покланя́ющиися и с любо́вию целу́ющии, страда́ния же твоя му́ченическая и в них Самого́ Страстополо́жника Христа, да́вшаго тебе не то́чию е́же в Него ве́ровати, но и е́же по Нем страда́ти, похвала́ми ублажа́юще, мо́лим тя, изве́стная жела́ния нашего хода́таице: моли́ с нами и о нас умоля́емаго от Своего благоутро́бия Бога, да ми́лостивно услы́шит нас, прося́щих Его благосты́ню, и не отста́вит от нас вся ко спасе́нию и житию́ ну́ждная проше́ния, и да́рует христиа́нскую кончи́ну живота́ нашего безболе́зненну, непосты́дну, ми́рну, Боже́ственных Та́ин прича́стну, и всем на вся́ком ме́сте, во вся́кой ско́рби и обстоя́нии тре́бующим Его человеколю́бия и по́мощи, вели́кую Свою пода́ст ми́лость, да благода́тию Божиею и твоим те́плым предста́тельством, душе́ю и те́лом всегда здра́ви пребыва́юще, сла́вим ди́внаго во святы́х Своих Бога Изра́илева, не удаля́ющаго по́мощи Своея́ от нас всегда, ныне и присно и во веки веков. Аминь.