(празднование 20 июля/2 августа)

О прехва́льный и пречу́дный проро́че Бо́жий Илие́, просия́вый на земли́ равноа́нгельным житие́м твои́м, пламене́ющею же ре́вностию по Господе Бо́зе Вседержи́теле, та́же и зна́мении и чудесы́ пресла́вными просла́вившийся, и в конец жития́ твоего́ на о́гненней колесни́це с пло́тию преесте́ственно восхище́нный, сподо́бивыйся бесе́довати с преобрази́вшимся на Фаво́ре Спаси́телем мира, и ныне в райских селе́ниих вы́ну пребыва́яй и предстоя́й Престо́лу Небе́снаго Царя́! Услы́ши нас, гре́шных и непотре́бных, в час сей предстоя́щих пред свято́ю твое́ю ико́ною и усе́рдно прибега́ющих к хода́тайству твоему. Моли́ о нас Человеколю́бца Бога, да пода́ст нам дух покая́ния и сокруше́ния о гресе́х наших, и всеси́льною Своею благода́тию да помо́жет нам остави́ти пути́ нече́стия, преспева́ти же во вся́ком деле бла́зе, да укрепи́т нас в борьбе со страстьми́ и похотьми́ нашими; да всади́т в сердца́ наша дух смире́ния и кро́тости, дух братолю́бия и незло́бия, дух терпе́ния и целому́дрия, дух ре́вности к славе Божией и о спасе́нии своем и ближних до́брое попече́ние. Упраздни́ молитвами твоими, проро́че, злы́я обы́чаи мира, па́че же поги́бельный и тлетво́рный дух века сего, заража́ющий христиа́нский род неуваже́нием к Боже́ственней правосла́вней вере, к уста́вом Святы́я Це́ркве и к за́поведем Господним, непочте́нием к роди́телем и власте́м предержа́щим, и низверга́ющий люди в бе́здну нече́стия, развраще́ния и поги́бели. Отврати́ от нас, пречу́дне проро́че, предста́тельством твоим пра́ведный гнев Божий и изба́ви вся гра́ды и ве́си от бездо́ждия и гла́да, от страшных бурь и землетрясе́ний, от смертоно́сных язв и боле́зней, от наше́ствия враго́в и междоусо́бныя бра́ни. Испроси́, проро́че Божий, от Господа па́стырем нашим святу́ю ре́вность по Бозе, серде́чное попече́ние о спасе́нии пасо́мых, му́дрость в уче́нии и управле́нии, благоче́стие и во искуше́ниих крепость; судия́м испроси́ нелицеприя́тие и безкоры́стие, правоту́ и сострада́ние к оби́димым, всем же нача́льствующим попече́ние о подчине́нных, милость и правосу́дие, подчине́нным же поко́рность и послуша́ние ко власте́м и усе́рдие к исполне́нию своих обя́занностей; да та́ко в ми́ре и благоче́стии пожи́вше в сем ве́це, сподо́бимся прича́стия ве́чных благ в Царствии Господа и Спа́са нашего Иисуса Христа, Ему́же подоба́ет честь и поклоне́ние, со Безнача́льным Его Отцем и Пресвяты́м Духом, во веки веков. Аминь.

Тропарь, глас 4

Во пло́ти А́нгел, проро́ков основа́ние, вторы́й Предте́ча прише́ствия Христова Илия́ сла́вный, от А́нгела пи́щу прие́мый и Саре́птскую вдови́цу во дни гла́да препита́вый, и нам, почита́ющим тя, благода́тный пита́тель бу́ди.