(празднование в Неделю по Рождестве Христовом)

О святы́й пра́ведный Ио́сифе! Ты, еще на земли́ сый, ве́лие име́л еси́ дерзнове́ние к Сыну Божию, Иже благоизво́ли именова́ти тя отца Своего, я́ко обру́чника Своея Ма́тере, и послу́шати тя. Ве́руем, я́ко и ны́не с ли́ки пра́ведных в оби́телех небе́сных водворя́яся, услы́шан бу́деши во вся́ком твое́м проше́нии к Богу и Спасителю на́шему. Те́мже, к твоему покро́ву и заступле́нию прибега́юще, смире́нно мо́лим тя: я́коже сам от бу́ри сумни́тельных помышле́ний изба́влен был еси́, си́це изба́ви и нас, волна́ми смуще́ния и страсте́й обурева́емых. Я́коже огражда́л еси́ Всенепоро́чную Де́ву от клеветы́ челове́ческия, огради́ и нас та́кожде от вся́кия клеветы́ напра́сныя. Я́коже храни́л еси́ от вся́каго вре́да и озлобле́ния воплоти́вшагося Господа, си́це сохраня́й твои́м заступле́нием Церковь Его Правосла́вную и всех нас от вся́каго озлобле́ния и вре́да. Ве́си, свя́тче Бо́жий, я́ко и Сын Божий во днех пло́ти Своея́ в теле́сных потре́бах нужду́ име́яше, и ты послужи́л еси́ им; того ради мо́лим тя: и нашим вре́менным ну́ждам благопоспеши́ твоим хода́тайством, подая́ нам вся блага́я, в житии́ сем потре́бная. Изря́днее же про́сим тя, исхода́тайствуй нам оставле́ние грехо́в прия́ти от нарече́ннаго ти Сына, Единоро́днаго же Сына Божия, Господа нашего Иисуса Христа, и досто́йны бы́ти насле́дия Царства Небеснаго нас предста́тельством твоим сотвори́, да и мы в го́рних селе́ниих с тобою водворя́ющеся, просла́вим Еди́наго Триипоста́снаго Бога, Отца и Сына и Свята́го Духа, ныне и присно и во веки веков. Аминь.