(Во время чтения третьего и шестого часов священник в алтаре совершает проскомидию.)

Диакон: Благослови, владыко.

Иерей: Благослове́нно Ца́рство Отца́ и Сы́на и Свята́го Ду́ха, ны́не и при́сно и во ве́ки веко́в.

Хор: Аминь.

Ектения великая

Диакон: Ми́ром Господу помо́лимся.

Хор: Господи, помилуй. (На каждое прошение.)

Диакон: О свы́шнем ми́ре и спасе́нии душ наших Господу помо́лимся.

О ми́ре всего мира, благостоя́нии святы́х Бо́жиих Церкве́й и соедине́нии всех Господу помо́лимся.

О святе́м храме сем и с ве́рою, благогове́нием и стра́хом Бо́жиим входя́щих во́нь Господу помо́лимся.

О Вели́ком Господи́не и Отце́ нашем Святе́йшем Патриа́рхе (имя), и о господи́не на́шем преосвяще́ннейшем митрополи́те (или: архиепи́скопе, или: епи́скопе) (имя), честне́м пресви́терстве, во Христе́ диа́констве, о всем при́чте и лю́дех Господу помо́лимся.

О богохрани́мей стране́ на́шей, власте́х и во́инстве ея́ Господу помо́лимся.

О гра́де сем (или: о ве́си сей; если в монастыре́, то: о святе́й оби́тели сей), вся́ком гра́де, стране́ и ве́рою живу́щих в них Господу помо́лимся.

О благорастворе́нии возду́хов, о изоби́лии плодо́в земны́х и вре́менех ми́рных Господу помо́лимся.

О пла́вающих, путеше́ствующих, неду́гующих, стра́ждущих, плене́нных и о спасе́нии их Господу помо́лимся.

О изба́витися нам от вся́кия скорби, гнева и ну́жды Господу помо́лимся.

Заступи́, спаси́, поми́луй и сохрани́ нас, Боже, Твоею благода́тию.

Пресвяту́ю, Пречи́стую, Преблагослове́нную, сла́вную Влады́чицу нашу Богоро́дицу и Присноде́ву Мари́ю со все́ми святы́ми помяну́вше, са́ми себе́, и друг дру́га, и весь живо́т наш Христу Богу предади́м.

Хор: Тебе, Господи.

Иерей: Я́ко подоба́ет Тебе́ вся́кая сла́ва, честь и поклоне́ние, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Хор: Ами́нь.

Иерей читает тайную молитву первого антифона.

Возглашает: Я́ко подоба́ет Тебе́ вся́кая сла́ва, честь и поклоне́ние, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Хор: Аминь.

Антифоны изобразительные

Первый антифон

1-й лик: Благослови́, душе́ моя́, Го́спода. / Благослове́н еси́, Го́споди. / Благослови́, душе́ моя́, Го́спода, / и вся вну́тренняя моя́ и́мя свято́е Его́.

2-й лик: Благослови́, душе́ моя́, Го́спода, / и не забыва́й всех воздая́ний Его́.

1-й лик: Очища́ющаго вся беззако́ния твоя́, / исцеля́ющаго вся неду́ги твоя́.

2-й лик: Избавля́ющаго от истле́ния живо́т твой³, / венча́ющаго тя ми́лостию и щедро́тами.

1-й лик: Исполня́ющаго во благи́х жела́ние твое́, / обнови́тся, я́ко о́рля, ю́ность твоя́.

2-й лик: Творя́й ми́лостыни Госпо́дь / и судьбу́ всем оби́димым.

1-й лик: Сказа́ пути́ Своя́ Моисе́ови, / сыново́м Изра́илевым хоте́ния Своя́.

2-й лик: Щедр и ми́лостив Госпо́дь, / долготерпели́в и многоми́лостив.

1-й лик: Не до конца́ прогне́вается, / ниже́ в век вражду́ет.

2-й лик: Не по беззако́ниeм на́шим сотвори́л есть нам, / ниже́ по грехо́м на́шим возда́л есть нам.

1-й лик: Я́ко по высоте́ небе́сней от земли́, / утверди́л есть Госпо́дь ми́лость Свою́ на боя́щихся Его́.

2-й лик: Ели́ко отстоя́т восто́цы от за́пад, / уда́лил есть от нас беззако́ния на́ша.

1-й лик: Я́коже ще́дрит оте́ц сы́ны, / уще́дри Госпо́дь боя́щихся Его.

2-й лик: Я́ко Той позна́ созда́ние на́ше, / помяну́, я́ко персть есмы́.

1-й лик: Челове́к, я́ко трава́ дни́е его́, / я́ко цвет се́льный, та́ко оцвете́т.

2-й лик: Я́ко дух про́йде в нем, и не бу́дет, / и не позна́ет ктому́ ме́ста своего́.

1-й лик: Ми́лость же Госпо́дня от ве́ка и до ве́ка / на боя́щихся Его́.

2-й лик: И пра́вда Его́ на сыне́х сыно́в, / храня́щих заве́т Его́, и по́мнящих за́поведи Его́ твори́ти я́.

1-й лик: Госпо́дь на небеси́ угото́ва Престо́л Свой, / и Ца́рство Его́ все́ми облада́ет.

2-й лик: Благослови́те Го́спода, вси а́нгели Его́, / си́льнии кре́постию, творя́щии сло́во Его́, услы́шати глас слове́с Его́.

1-й лик: Благослови́те Го́спода, вся силы́ Его́, / слуги́ Его́, творя́щии во́лю Его́.

2-й лик: Благослови́те Го́спода, вся дела́ Его́, / на вся́ком ме́сте влады́чества Его.

1-й лик: Сла́ва Отцу́ и Сы́ну и Свято́му Ду́ху.

2-й лик: И ны́не и при́сно и во ве́ки веко́в. Ами́нь.

1-й лик: Благослови́, душе́ моя́, Го́спода, / и вся вну́тренняя моя́, и́мя свято́е Его́. / Благослове́н еси́, Го́споди.

Ектения малая

Диакон: Па́ки и па́ки ми́ром Господу помо́лимся.

Хор: Господи, помилуй.

Заступи́, спаси́, поми́луй и сохрани́ нас, Боже, Твое́ю благода́тию.

Хор: Господи, помилуй.

Диакон: Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю со все́ми святы́ми помяну́вше, са́ми себе́ и друг дру́га и весь живо́т наш Христу Богу предади́м.

Хор: Тебе, Господи.

Иерей: Я́ко Твоя́ держа́ва, и Твое́ есть Царство, и сила, и слава, Отца и Сына и Святаго Духа, ны́не и при́сно и во ве́ки веко́в.

Хор: Аминь.

Иерей по прочтении молитвы второго антифона возглашает:

Я́ко Твоя́ держа́ва и Твое́ есть Ца́рство, и си́ла, и сла́ва, Отца́ и Сы́на и Свята́го Ду́ха, ны́не и при́сно и во ве́ки веко́в.

Хор: Аминь. Слава Отцу и Сыну и Святому Духу.

Второй антифон

1-й лик: Хвали́, душе́ моя́, Го́спода. / Восхвалю́ Го́спода в животе́ мое́м, / пою́ Бо́гу моему́, до́ндеже есмь².

2-й лик: Не наде́йтеся на кня́зи, на сы́ны челове́ческия, / в ни́хже несть³ спасе́ния.

1-й лик: Изы́дет дух его́, и возврати́тся в зе́млю свою́: / в той день поги́бнут вся помы́шления его́.

2-й лик: Блаже́н, ему́же Бог Иаковль помо́щник его́, / упова́ние его́ на Го́спода Бо́га своего́.

1-й лик: Сотво́ршаго не́бо и зе́млю, / мо́ре и вся, я́же⁴ в них.

2-й лик: Храня́щаго и́стину в век, / творя́щаго суд оби́димым, / даю́щаго пи́щу а́лчущим.

1-й лик: Госпо́дь реши́т окова́нныя^5, / Госпо́дь умудря́ет слепцы́.

2-й лик: Госпо́дь возво́дит низве́рженныя, / Госпо́дь лю́бит пра́ведники.

1-й лик: Госпо́дь храни́т прише́льцы, / си́ра и вдову́ прии́мет, / и путь гре́шных погуби́т.

2-й лик: Воцари́тся Госпо́дь во век, / Бог твой, Сио́не, в род и род.

И ныне и присно и во веки веков. Аминь.

Песнь Господу Иисусу Христу

Единоро́дный Сы́не и Сло́ве Бо́жий, Безсме́ртен Сый, / и изво́ливый спасе́ния на́шего ра́ди / воплоти́тися от Святы́я Богоро́дицы и Присноде́вы Мари́и, / непрело́жно вочелове́чивыйся; / распны́йся же, Христе́ Бо́же, сме́ртию смерть попра́вый, еди́н Сый Святы́я Тро́ицы, / спрославля́емый Отцу́ и Свято́му Ду́ху, спаси́ нас.

Ектения малая

Диакон: Па́ки и па́ки ми́ром Господу помо́лимся.

Хор: Господи, помилуй.

Заступи́, спаси́, поми́луй и сохрани́ нас, Боже, Твое́ю благода́тию.

Хор: Господи, помилуй.

Диакон: Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю со все́ми святы́ми помяну́вше, са́ми себе́ и друг дру́га и весь живо́т наш Христу Богу предади́м.

Хор: Тебе, Господи.

Иерей: Я́ко Твоя́ держа́ва, и Твое́ есть Царство, и сила, и слава, Отца и Сына и Святаго Духа, ны́не и при́сно и во ве́ки веко́в.

Хор: Аминь.

Иерей по прочтении молитвы третьего антифона возглашает:

Я́ко Благ и Человеколю́бец Бог еси́, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Хор: Аминь.

Третий антифон. Блаженны

Хор ²: Во Ца́рствии Твое́м помяни́ нас, Го́споди, / егда́³ прии́деши во Ца́рствии Твое́м.

На 12

Блаже́ни ни́щии ду́хом², / я́ко тех есть Ца́рство Небе́сное.

Блаже́ни пла́чущии, / я́ко ти́и уте́шатся.

На 10

Блаже́ни кро́тцыи, / я́ко ти́и³ насле́дят зе́млю.

Блаже́ни а́лчущии и жа́ждущии пра́вды, / я́ко ти́и насы́тятся.

На 8

Блаже́ни ми́лостивии, / я́ко ти́и поми́ловани бу́дут.

Блаже́ни чи́стии се́рдцем, /я́ко ти́и Бо́га у́зрят.

На 6

Блаже́ни миротво́рцы, / я́ко ти́и сы́нове Бо́жии нареку́тся.

Блаже́ни изгна́ни пра́вды ра́ди, / я́ко тех есть Ца́рство Небе́сное.

На 4

Блаже́ни есте́, егда́ поно́сят вам, / и изжену́т и реку́т всяк зол глаго́л, на вы лжу́ще Мене́ ра́ди².

Ра́дуйтеся и весели́теся, / я́ко мзда ва́ша мно́га³ на небесе́х.

Слава Отцу и Сыну и Святому Духу.

И ныне и присно и во веки веков. Аминь.

АНТИФОНЫ ВСЕДНЕВНЫЕ (БУДНИЧНЫЕ)

Первый антифон

1-й лик: Бла́го есть испове́датися Го́сподеви.

Молитвами Богоро́дицы, Спа́се, спаси́ нас.

2-й лик: Бла́го есть испове́датися Го́сподеви / и пе́ти и́мени Твоему́, Вы́шний. Моли́твами Богоро́дицы…

1-й лик: Возвеща́ти зау́тра ми́лость Твою́ / и и́стину Твою́ на вся́ку нощь. Моли́твами Богоро́дицы…

2-й лик: Я́ко прав Го́сподь Бог наш, / и несть непра́вды в Нем. Моли́твами Богоро́дицы…

1-й лик: Сла́ва: Моли́твами Богоро́дицы…

2-й лик: И ны́не: Моли́твами Богоро́дицы…

Второй антифон

1-й лик: Господь воцари́ся, в ле́поту облече́ся.

Моли́твами святы́х Твои́х, Спа́се, спаси́ нас.

2-й лик: Госпо́дь воцари́ся, в ле́поту облече́ся, / облече́ся Госпо́дь в си́лу и препоя́сася. Молитвами святых Твоих…

1-й лик: Ибо утверди́ вселе́нную, / я́же не подви́жится. Моли́твами святы́х Твои́х…

2-й лик: Свиде́ния² Твоя́ уве́ришася³ зело́; / до́му Твоему́ подоба́ет святы́ня, Го́споди, в долготу́ дний. Молитвами святых Твоих…

Слава, и ныне: Единородный Сыне…

Третий антифон

1-й лик: Прииди́те, возра́дуемся Го́сподеви, / воскли́кнем Бо́гу Спаси́телю на́шему.

Спаси́ ны, Сы́не Бо́жий, / во святы́х ди́вен cый, пою́щия Ти: аллилу́иа.

2-й лик: Предвари́м лице́ Его́² во испове́дании³, / и во псалме́х воскли́кнем Ему́. / Спаси́ ны, Сы́не Бо́жий…

1-й лик: Я́ко Бог Ве́лий⁴ Господь, / и Царь Ве́лий по всей земли́. / Спаси́ ны, Сы́не Бо́жий…

2-й лик: Я́ко в руце́⁵ Его вси концы́ земли́, / и высоты́ гор Того́ суть⁶. / Спаси́ ны, Сыне Божий…

1-й лик: Я́ко Того́ есть мо́ре, и Той сотвори́ е́⁷, / и су́шу ру́це Его́ созда́сте. Спаси́ ны / Сыне Божий…

Вход с Евангелием

Диакон: Благослови́, влады́ко, святы́й вход.

Иерей (благословляя): Благослове́н вход святы́х Твои́х, всегда́, ны́не и при́сно и во ве́ки веко́в.

Диакон (возглашает): Прему́дрость, про́сти.

Входное

Хор: Приидите, поклонимся и припадем ко Христу. Спаси ны, Сыне Божий, воскресы́й из мертвых, поющия Ти: аллилуиа.

Следуют тропари и кондаки.

[При архиерейском служении: когда архиерей кадит, хор поет:

Ис полла́ э́ти дэ́спота³.

При хиротонии:

Святи́и му́ченицы, / и́же до́бре страда́вше и венча́вшеся, / моли́теся ко Го́споду / спасти́ся душа́м на́шим.

Сла́ва Тебе́, Христе́ Бо́же, / апо́столов похвало́ / и му́чеников ра́дование, / и́хже про́поведь Тро́ица Единосу́щная.

Иса́ие, лику́й, / Дева име́ во чре́ве, / и роди́ Сы́на Емману́ила, / Бога же и человека, / Восто́к и́мя Ему́; / Его́же велича́юще, / Де́ву ублажа́ем.

А́ксиос, а́ксиос, а́ксиос².

Ки́рие, эле́йсон (или: Господи, помилуй). (Трижды)]

Во время пения тропарей и кондаков иерей читает тайную молитву Трисвятого пения.

Иерей: Я́ко Свят еси́, Бо́же на́ш, и Тебе́ сла́ву возсыла́ем, Отцу и Сы́ну и Свято́му Ду́ху, ны́не и при́сно.

Диакон: Господи, спаси благочестивыя и услыши ны.

Хор: Господи, спаси благочестивыя и услыши ны.

Диакон: И во ве́ки веко́в.

Хор: Аминь.

Трисвятое

Святы́й Бо́же, Святы́й Кре́пкий, Святы́й Безсме́ртный, поми́луй на́с. (Трижды)

Сла́ва Отцу и Сы́ну и Свято́му Ду́ху, и ны́не и при́сно и во ве́ки веко́в. Святы́й Безсме́ртный, поми́луй на́с.

Святы́й Бо́же, Святы́й Кре́пкий, Святы́й Безсме́ртный, поми́луй на́с.

Во время пения Трисвятого священнослужители также читают Трисвятое, затем отходят на горнее место.

Диакон: Во́нмем.

Иерей: Мир всем.

Чтец Апостола: И ду́хови твоему́.

Диакон: Премудрость.

Чтец Апостола: Проки́мен, глас…

ПРОКИМНЫ И АЛЛИЛУИАРИИ ВОСКРЕСНЫЕ НА ЛИТУРГИИ

Глас 1-й

Бу́ди, Го́споди, ми́лость Твоя́ на нас, / я́коже упова́хом на Тя.

Стих: Ра́дуйтеся, пра́веднии, о Го́споде, пра́вым подоба́ет похвала́.

Аллилуиа: Бог дая́й отмще́ние мне и покори́вый люди под мя.

Стих: Велича́яй спасе́ния царе́ва и творя́й ми́лость христу́ Своему́ Дави́ду и се́мени его́ до ве́ка.

Глас 2-й

Кре́пость моя́ и пе́ние мое́ Госпо́дь, / и бысть мне во спасе́ние.

Стих: Наказу́я наказа́ мя Господь, сме́рти же не предаде́ мя.

Аллилуия: Услы́шит тя Госпо́дь в день печа́ли, защи́тит тя и́мя Бо́га Иа́ковля.

Стих: Господи, спаси́ царя́ и услы́ши ны, во́ньже а́ще день призове́м Тя.

Глас 3-й

По́йте Бо́гу на́шему, по́йте, / по́йте Царе́ви на́шему, по́йте.

Стих: Вси язы́цы, восплещи́те рука́ми, воскли́кните Богу гла́сом ра́дования.

Аллилуиа: На Тя, Господи, упова́х, да не постыжу́ся во век.

Стих: Бу́ди ми в Бо́га Защи́тителя и в дом прибе́жища, е́же спасти́ мя́.

Глас 4-й

Я́ко возвели́чишася дела́ Твоя́, Го́споди, / вся прему́дростию сотвори́л еси́.

Стих: Благослови́, душе́ моя́, Го́спода, Го́споди Бо́же мой, возвели́чился еси́ зело́.

Аллилуиа: Наляцы́ и успева́й и ца́рствуй, и́стины ра́ди и кро́тости и пра́вды.

Стих: Возлюби́л еси́ пра́вду и возненави́дел еси́ беззако́ние.

Глас 5

Ты, Го́споди, сохрани́ши ны / и соблюде́ши ны от ро́да сего́ и во век.

Стих: Спаси́ мя, Го́споди, я́ко оскуде́ преподо́бный.

Аллилуиа: Ми́лости Твоя́, Го́споди, во век воспою́, в род и род возвещу́ и́стину Твою́ усты́ мои́ми.

Стих: Зане́ рекл еси́: в век ми́лость сози́ждется, на небесе́х угото́вится и́стина Твоя́.

Глас 6-й

Спаси́, Го́споди, лю́ди Твоя́ / и благослови́ достоя́ние Твое́.

Стих: К Тебе́, Го́споди, воззову́, Бо́же мой, да не премолчи́ши от мене́.

Аллилуиа: Живы́й в по́мощи Вы́шняго в кро́ве Бо́га Небе́снаго водвори́тся.

Стих: Рече́т Го́сподеви: Засту́пник мой еси́ и Прибе́жище мое́, Бог мой, и упова́ю на Него́.

Глас 7-й

Го́сподь кре́пость лю́дем Свои́м даст, / Госпо́дь благослови́т лю́ди Своя́ ми́ром.

Стих: Принеси́те Го́сподеви, сы́нове Бо́жии, принеси́те Го́сподеви сы́ны о́вни.

Аллилуиа: Бла́го есть испове́датися Го́сподеви и пе́ти и́мени Твоему́, Вы́шний.

Стих: Возвеща́ти зау́тра ми́лость Твою́ и и́стину Твою́ на вся́ку нощь.

Глас 8-й

Помоли́теся и воздади́те / Го́сподеви Бо́гу на́шему.

Стих: Ве́дом во Иуде́и Бог, во Изра́или ве́лие и́мя Его́.

Аллилуиа: Прииди́те, возра́дуемся Го́сподеви, воскли́кнем Бо́гу Спаси́телю на́шему.

Стих: Предвари́м лице́ Его́ во испове́дании и во псалме́х воскли́кнем Ему́.

ПРОКИМНЫ И АЛЛИЛУИАРИИ ДНЕВНЫЕ (БУДНИЧНЫЕ)

В понедельник, гл. 4-й

Творя́й а́нгелы Своя́ ду́хи, / и слуги́ Своя́ пла́мень о́гненный.

Стих: Благослови́, душе́ моя, Го́спода, Го́споди Бо́же мой, возвели́чился еси́ зело́.

Аллилуиа, гл. 5-й: Хвали́те Го́спода, вси а́нгели Его́, хвали́те Его́, вся́ си́лы Его́.

Стих: Я́ко Той рече́, и бы́ша; Той повеле́, и созда́шася.

Во вторник, гл. 7-й

Возвесели́тся пра́ведник о Го́споде / и упова́ет на Него́.

Стих: Услы́ши, Бо́же, гла́с мой, внегда́ моли́ти ми ся к Тебе́.

Аллилуиа, гл. 4-й: Пра́ведник я́ко фи́никс процвете́т, я́ко кедр, и́же в Лива́не, умно́жится.

Стих: Насажде́ни в дому́ Госпо́дни во дво́рех Бо́га на́шего процвету́т.

В среду, гл. 3-й

Вели́чит душа́ Моя́ Го́спода, / и возра́довася дух Мой о Бо́зе Спа́се Мое́м.

Стих: Я́ко призре́ на смире́ние Рабы́ Своея́, се бо от ны́не ублажа́т Мя вси ро́ди.

Аллилуиа, гл. 8-й: Слы́ши, Дщи, и виждь, и приклони́ у́хо Твое́.

Стих: Лицу́ Твоему́ помо́лятся бога́тии лю́дстии.

В четверг, гл. 8-й

Во всю зе́млю изы́де веща́ние их, / и в концы́ вселе́нныя глаго́лы их.

Стих: Небеса́ пове́дают сла́ву Бо́жию, творе́ние же руку́ Его́ возвеща́ет твердь.

Аллилуиа, гл. 1-й: Испове́дят небеса́ чудеса́ Твоя́, Го́споди, и́бо и́стину Твою́ в Це́ркви святы́х.

Стих: Бог прославля́ем в сове́те святы́х.

В пятницу, гл. 7-й

Возноси́те Го́спода Бо́га на́шего / и покланя́йтеся подно́жию но́гу Его́, я́ко свя́то есть.

Стих: Госпо́дь воцари́ся, да гне́ваются лю́дие.

Аллилуиа, гл. 1-й: Помяни́ сонм Твой, его́же стяжа́л еси́ испе́рва.

Стих: Бог же Царь наш пре́жде ве́ка, соде́ла спасе́ние посреде́ земли́.

В субботу, гл. 8-й

Весели́теся о Го́споде, / и ра́дуйтеся, пра́веднии.

Стих: Блаже́ни, и́хже оста́вишася беззако́ния и и́хже прикры́шася греси́.

Заупокойный, гл. 6-й: Ду́ши их / во благи́х водворя́тся.

Аллилуиа, гл. 4-й: Воззва́ша пра́веднии, и Госпо́дь услы́ша их, и от всех скорбе́й их изба́ви их.

Стих: Мно́ги ско́рби пра́ведным, и от всех их изба́вит я́ Госпо́дь.

Стих: Блаже́ни, я́же избра́л и прия́л еси́, Го́споди, и па́мять их в род и род.

Диакон: Прему́дрость.

Чтец: Дея́ний святы́х апо́стол чте́ние. Или: Собо́рнаго посла́ния Петро́ва (Иоаннова и т. д., причем не принято говорить, какое это послание — первое, второе или третье) чте́ние. Или: к Ри́мляном (к Кори́нфяном, к Гала́том, к Тимофе́ю и т. д.) послания святаго апостола Павла чтение.

Диакон: Во́нмем.

Чтение Апостола. Когда чтение закончится

Иерей говорит чтецу: Мир ти.

Чтец: И духови твоему.

Диакон: Премудрость.

Чтец: Аллилуиа, глас…

Хор поет «Аллилуиа» трижды на указанный глас. Чтец произносит аллилуиарий, хор: «Аллилуиа». Чтец — второй стих аллилуиария, хор поет в третий раз «Аллилуиа».

Диакон: Благослови́, влады́ко, благовести́теля свята́го апо́стола и евангели́ста (имя евангелиста).

Священник, благословляя, произносит:

Бог, моли́твами свята́го сла́внаго, всехва́льнаго апо́стола и евангели́ста (имя), да даст тебе́ глаго́л, благовеству́ющему си́лою мно́гою, во исполне́ние Ева́нгелиа возлю́бленнаго Сы́на Своего́, Го́спода на́шего Иису́са Христа́.

Диакон: Аминь.

Иерей: Прему́дрость, про́сти, услы́шим Свята́го Ева́нгелиа. Мир всем.

Хор: И ду́хови твоему.

Диакон: От (имя) Свята́го Ева́нгелиа чте́ние.

Хор: Слава Тебе, Господи, слава Тебе.

Иерей: Во́нмем.

Читается Евангелие. По окончании чтения

Хор: Слава Тебе, Господи, слава Тебе.

Ектения сугубая

Диакон: Рцем вси от всея́ души́, и от всего помышле́ния на́шего рцем.

Хор: Господи, помилуй.

Диакон: Го́споди Вседержи́телю, Бо́же оте́ц на́ших, мо́лим Ти ся, услы́ши и поми́луй.

Хор: Господи, помилуй.

Диакон: Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.

Хор: Го́споди, поми́луй, Го́споди, поми́луй, Го́споди, поми́луй (на каждое прошение).

Диакон: Еще́ мо́лимся о Вели́ком Господи́не и Отце́ на́шем Святе́йшем Патриа́рхе (имя), и о господи́не на́шем преосвяще́ннейшем митрополи́те (или: архиепи́скопе, или: епи́скопе) (имя), и всей во Христе́ бра́тии на́шей.

Еще́ мо́лимся о богохрани́мей стране́ нашей, власте́х и во́инстве ея́, да ти́хое и безмо́лвное житие́ поживе́м во вся́ком благоче́стии и чистоте́.

Еще́ мо́лимся о бра́тиях наших, свяще́нницех, священномона́сех, и всем во Христе́ бра́тстве нашем.

Еще́ мо́лимся о блаже́нных и приснопа́мятных святе́йших патриа́рсех правосла́вных, и созда́телех свята́го хра́ма сего́ (если в монастыре: святы́я оби́тели сея́), и о всех преждепочи́вших отце́х и бра́тиях, зде лежа́щих и повсю́ду, правосла́вных.

Еще́ мо́лимся о ми́лости, жи́зни, ми́ре, здра́вии, спасе́нии, посеще́нии и оставле́нии грехо́в рабо́в Бо́жиих, бра́тии свята́го хра́ма сего́ (если в монастыре: святыя обители сея).

Еще́ мо́лимся о плодонося́щих и доброде́ющих во святе́м и всечестне́м хра́ме сем, тружда́ющихся, пою́щих и предстоя́щих лю́дех, ожида́ющих от Тебе́ вели́кия и бога́тыя ми́лости.

Иерей: Я́ко Ми́лостив и Человеколю́бец Бог еси́, и Тебе славу возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Хор: Ами́нь.

[В некоторые дни церковного года (кроме двунадесятых и храмовых праздников) за сугубой ектенией читается следующая ектения об усопших, при открытых царских вратах и с кадильницей:

Диакон: Поми́луй нас, Бо́же, по вели́цей ми́лости Твоей, мо́лим Ти ся, услы́ши и поми́луй.

Хор: Господи, помилуй, Господи, помилуй, Господи, помилуй (на каждое прошение).

Диакон: Еще́ мо́лимся о упокое́нии душ усо́пших рабо́в Бо́жиих (имена) и о е́же прости́тися им вся́кому прегреше́нию, во́льному же и нево́льному.

Я́ко да Госпо́дь Бог учини́т ду́ши их, иде́же пра́веднии упокоя́ются.

Ми́лости Бо́жия, Ца́рства Небе́снаго и оставле́ния грехо́в их у Христа́, Безсме́ртнаго Царя́ и Бо́га на́шего, про́сим.

Хор: Пода́й, Го́споди.

Диакон: Господу помо́лимся.

Хор: Господи, поми́луй.

Иерей (возглас): Я́ко Ты еси́ воскресе́ние, и живо́т, и поко́й усо́пших раб Твои́х (имена), Христе́ Бо́же наш, и Тебе́ сла́ву возсыла́ем, со Безнача́льным Твои́м Отце́м и Пресвяты́м и Благи́м и Животворя́щим Твои́м Ду́хом, ны́не и при́сно и во ве́ки веко́в.

Хор: Ами́нь.

Царские врата закрываются.]

Ектения об оглашенных

Диакон: Помоли́теся, оглаше́нии, Го́сподеви.

Хор: Господи, помилуй. (На каждое прошение).

Диакон: Ве́рнии², о оглаше́нных помо́лимся, да Госпо́дь поми́лует их.

Огласи́т их сло́вом и́стины.

Откры́ет³ им Ева́нгелие пра́вды.

Соедини́т их Святе́й Свое́й, Собо́рней и Апо́стольстей Це́ркви.

Спаси́, поми́луй, заступи́ и сохрани́ их, Бо́же, Твое́ю благода́тию.

Оглаше́ннии, главы́ ва́ша Го́сподеви приклони́те.

Хор: Тебе, Господи.

Иерей (возглашение): Да и ти́и⁴ с нами сла́вят пречестно́е и великоле́пое и́мя Твое́, Отца́ и Сы́на и Свята́го Ду́ха, ны́не и при́сно и во ве́ки веко́в.

Хор: Ами́нь.

Диакон: Ели́цы оглаше́ннии, изыди́те²,

Оглаше́ннии, изыди́те.

Елицы оглашеннии, изыдите.

Да никто́ от оглаше́нных, ели́цы ве́рнии, па́ки и па́ки ми́ром Го́споду помо́лимся.

Хор: Господи, помилуй.

Диакон: Заступи́, спаси́, поми́луй и сохрани́ нас, Боже, Твоею благода́тию.

Хор: Господи, помилуй.

Диакон: Прему́дрость.

Иерей: Я́ко подоба́ет Тебе́ вся́кая сла́ва, честь и поклоне́ние, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Хор: Аминь.

Диакон: Па́ки и па́ки ми́ром Го́споду помо́лимся.

Хор: Господи, помилуй. (На каждое прошение)

Диакон: О свы́шнем ми́ре и спасе́нии душ на́ших Го́споду помо́лимся.

О ми́ре всего́ ми́ра, благостоя́нии святы́х Бо́жиих Церкве́й и соедине́нии всех Го́споду помо́лимся.

О святе́м хра́ме сем и с ве́рою, благогове́нием и стра́хом Бо́жиим входя́щих вонь Господу помолимся.

О изба́витися нам от вся́кия ско́рби, гне́ва и ну́жды Го́споду помолимся.

Заступи́, спаси́, поми́луй и сохрани́ нас, Бо́же, Твое́ю благода́тию.

Диакон: Прему́дрость.

Иерей: Я́ко да под держа́вою Твое́ю всегда́ храни́ми, Тебе́ сла́ву возсыла́ем, Отцу́ и Сы́ну и Свято́му Духу, ны́не и при́сно и во ве́ки веко́в.

(Открываются царские врата.)

Хор: Аминь, и поет

Херувимская песнь

Иже Херуви́мы та́йно³ образу́юще⁴ и Животворя́щей Тро́ице Трисвяту́ю пе́снь припева́юще⁵, вся́кое ны́не жите́йское отложи́м⁶ попече́ние⁷.

Священник и диакон перед престолом трижды тихо произносят Херувимскую песнь и отходят к жертвеннику. Иерей кадит святые дары, молясь: Боже, очи́сти мя, гре́шнаго.

Диакон: Возми́, влады́ко.

Иерей, возлагая на его плечо воздух: Возми́те ру́ки ва́ша во свята́я и благослови́те Господа. И, взяв святые дары, выходят из алтаря на солею.

Великий вход

Диакон: Вели́каго Господи́на и Отца́ на́шего (имя), Святе́йшаго Патриа́рха Моско́вскаго и всея́ Руси́, и господи́на на́шего преосвяще́ннейшаго (имя епархиального архиерея), да помяне́т Госпо́дь Бог во Ца́рствии Свое́м, всегда́, ны́не и при́сно и во ве́ки веко́в.

Иерей: Преосвященныя митрополиты, архиепископы и епископы, и весь священнический и монашеский чин, и причет церковный, братию святаго храма сего, вас и всех правосла́вных христиа́н да помяне́т Госпо́дь Бог во Ца́рствии Свое́м всегда́, ны́не и при́сно и во ве́ки веко́в.

Хор: Аминь. Я́ко да Царя́ всех поды́мем, а́нгельскими неви́димо дориноси́ма чи́нми. Аллилуиа, аллилуиа, аллилуиа.

Ектения просительная

Диакон: Испо́лним моли́тву на́шу Го́сподеви.

Хор: Го́споди, поми́луй. (На каждое прошение)

Диакон: О предложе́нных Честны́х Даре́х Го́споду помо́лимся.

О святе́м хра́ме сем и с ве́рою, благогове́нием и стра́хом Бо́жиим входя́щих вонь Го́споду помо́лимся.

О изба́витися нам от вся́кия ско́рби, гне́ва и ну́жды Го́споду помо́лимся.

Заступи́, спаси́, поми́луй и сохрани́ нас, Бо́же, Твое́ю благода́тию.

Дне всего́ соверше́нна, свя́та, ми́рна и безгре́шна у Го́спода про́сим.

Хор: Пода́й, Го́споди. (На каждое прошение)

Диакон: А́нгела ми́рна, ве́рна наста́вника, храни́теля душ и теле́с на́ших у Го́спода про́сим.

Проще́ния и оставле́ния грехо́в и прегреше́ний на́ших у Го́спода про́сим.

До́брых и поле́зных душа́м на́шим и ми́ра ми́рови у Го́спода про́сим.

Про́чее вре́мя живота́ на́шего в ми́ре и покая́нии сконча́ти у Го́спода про́сим.

Христиа́нския кончи́ны живота́ на́шего, безболе́знены, непосты́дны, ми́рны и до́браго отве́та на Стра́шнем Суди́щи Христо́ве про́сим.

Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю со все́ми святы́ми помяну́вше, са́ми себе́, и друг дру́га, и весь живо́т наш Христу́ Бо́гу предади́м.

Хор: Тебе́, Го́споди.

Иерей: Щедро́тами Единоро́днаго Сы́на Твоего́, с Ни́мже благослове́н еси́, со Пресвяты́м и Благи́м и Животворя́щим Твои́м Ду́хом, ны́не и при́сно и во ве́ки веко́в.

Хор: Ами́нь.

Иерей: Мир всем.

Хор: И ду́хови твоему́.

Диакон: Возлю́бим друг дру́га, да единомы́слием испове́мы.

Хор: Отца́ и Сы́на и Свята́го Ду́ха, Тро́ицу Единосу́щную и Неразде́льную.

Диакон: Две́ри, две́ри, прему́дростию во́нмем.

(Открывается завеса царских врат)

Символ веры

Ве́рую во Еди́наго Бо́га Отца́, Вседержи́теля, Творца́ не́бу и земли́, ви́димым же всем и неви́димым. И во Еди́наго Го́спода Иису́са Христа́, Сы́на Бо́жия, Единоро́днаго, Иже от Отца́ рожде́ннаго пре́жде всех век; Све́та от Све́та, Бо́га и́стинна от Бо́га и́стинна, рожде́нна, несотворе́нна, Единосу́щна Отцу́, Имже вся бы́ша. Нас ра́ди челове́к и на́шего ра́ди спасе́ния сше́дшаго с Небе́с, и воплоти́вшагося от Ду́ха Свя́та и Мари́и Де́вы, и вочелове́чшася³. Распя́таго же за ны при Понти́йстем Пила́те, и страда́вша, и погребе́нна. И воскре́сшаго в тре́тий день по Писа́нием. И возше́дшаго на Небеса́, и седя́ща одесну́ю Отца́. И па́ки² гряду́щаго со сла́вою суди́ти живы́м и ме́ртвым, Его́же Ца́рствию не бу́дет конца́. И в Ду́ха Свята́го, Го́спода, Животворя́щаго, Иже от Отца́ исходя́щаго, Иже со Отце́м и Сы́ном спокланя́ема и ссла́вима, глаго́лавшаго проро́ки. Во еди́ну Святу́ю, Собо́рную и Апо́стольскую Це́рковь. Испове́дую еди́но Креще́ние во оставле́ние грехо́в. Ча́ю³ воскресе́ния ме́ртвых и жи́зни бу́дущаго ве́ка. Ами́нь.

Диакон: Ста́нем до́бре⁴, ста́нем со стра́хом⁵, во́нмем, Свято́е Возноше́ние в ми́ре приноси́ти.

Хор: Ми́лость ми́ра, же́ртву хвале́ния.

Иерей: Благода́ть Го́спода на́шего Иису́са Христа́, и любы́⁶ Бо́га и Отца́, и прича́стие Свята́го Ду́ха бу́ди со все́ми ва́ми.

Хор: И со ду́хом твои́м.

Иерей: Горе́⁷ име́им⁸ сердца́.

Хор: Имамы⁹ ко Го́споду.

Иерей: Благодари́м Го́спода.

Хор: До́стойно и пра́ведно есть покланя́тися Отцу́ и Сы́ну и Свято́му Ду́ху, Тро́ице Единосу́щней и Неразде́льней.

Иерей: Побе́дную песнь пою́ще, вопию́ще, взыва́юще и глаго́люще.

Хор: Свят, Свят, Свят Господь Савао́ф, испо́лнь не́бо и земля́ славы Твоея́; оса́нна² в вы́шних, благослове́н Гряды́й³ во и́мя Госпо́дне, оса́нна в вы́шних.

Иерей: Приими́те, яди́те, сие́ есть Те́ло Мое́, е́же за вы ломи́мое во оставле́ние грехо́в.

Хор: Аминь.

Иерей: Пи́йте от нея́ вси, сия́ есть Кровь Моя́ Но́ваго Заве́та, я́же за вы и за мно́ги излива́емая во оставле́ние грехо́в⁴.

Хор: Аминь.

Иерей: Твоя́ от Твои́х Тебе́ принося́ще о всех и за вся.

Хор: Тебе́ пое́м, Тебе́ благослови́м, Тебе́ благодари́м, Го́споди, и мо́лим Ти ся, Бо́же наш⁵.

Иерей: Изря́дно о Пресвяте́й, Пречи́стей, Преблагослове́нней, Сла́вней Влады́чице на́шей Богоро́дице и Присноде́ве Мари́и.

Хор: Досто́йно есть, я́ко вои́стинну блажи́ти Тя Богородицу, Присноблаже́нную и Пренепоро́чную, и Ма́терь Бога нашего. Честне́йшую Херуви́м и сла́внейшую без сравне́ния Серафи́м, без истле́ния Бога Сло́ва ро́ждшую, су́щую Богоро́дицу Тя велича́ем.

[На литургии святителя Василия Великого вместо «Достойно есть…» поется:

О Тебе́ ра́дуется, Благода́тная, вся́кая тварь³, а́нгельский собо́р и челове́ческий род, освяще́нный хра́ме и раю́ слове́сный, де́вственная похвало, из Нея́же⁴ Бог воплоти́ся и Младе́нец бысть, прежде век сый Бог наш; ложесна́ бо Твоя́ престо́л сотвори́ и чре́во Твое простра́ннее небе́с соде́ла. О Тебе́ ра́дуется, Благода́тная, вся́кая тварь, сла́ва Тебе́.]

Иерей: В пе́рвых помяни́, Го́споди, Вели́каго Господи́на и Отца́ на́шего (имя) Святе́йшаго Патриа́рха Моско́вскаго и всея́ Руси́, и господи́на на́шего преосвяще́ннейшаго (чин и имя епархиального архиерея), и́хже да́руй святы́м Твои́м Це́рквам в ми́ре, це́лых, че́стных, здра́вых, долгоде́нствующих, пра́во пра́вящих сло́во Твоея́ и́стины.

Хор: И всех и вся.

Иерей: И даждь нам еди́неми усты́ и еди́нем се́рдцем сла́вити и воспева́ти пречестно́е и великоле́пое и́мя Твое́, Отца́ и Сы́на и Свята́го Ду́ха, ны́не и при́сно и во ве́ки веко́в.

Хор: Аминь.

Иерей: И да бу́дут ми́лости Вели́каго Бо́га и Спа́са на́шего Иису́са Христа́ со все́ми ва́ми.

Хор: И со ду́хом твои́м.

Ектения просительная

Диакон: Вся святы́я помяну́вше, па́ки и па́ки ми́ром Го́споду помо́лимся.

Хор: Го́споди, поми́луй. (На каждое прошение)

Диакон: О принесе́нных и освяще́нных Честны́х Даре́х Го́споду помо́лимся.

Я́ко да Человеколю́бец Бог наш прие́мь я́ во святы́й и пренебе́сный и мы́сленный Сво́й Же́ртвенник, в воню́² благоуха́ния духо́внаго, возниспо́слет нам Боже́ственную благода́ть и дар Свята́го Ду́ха, помо́лимся.

О изба́витися нам от вся́кия ско́рби, гне́ва и ну́жды Го́споду помо́лимся.

Заступи́, спаси́, поми́луй и сохрани́ нас, Бо́же, Твое́ю благода́тию.

Дне всего́ соверше́нна, свя́та, ми́рна и безгре́шна у Го́спода про́сим.

Хор: Пода́й, Го́споди. (На каждое прошение)

Диакон: А́нгела ми́рна, ве́рна наста́вника, храни́теля душ и теле́с на́ших у Го́спода про́сим.

Проще́ния и оставле́ния грехо́в и прегреше́ний на́ших у Го́спода про́сим.

До́брых и поле́зных душа́м на́шим и ми́ра ми́рови у Го́спода про́сим.

Про́чее вре́мя живота́ на́шего в ми́ре и покая́нии сконча́ти у Го́спода про́сим.

Христиа́нския кончи́ны живота́ на́шего, безболе́знены, непосты́дны, ми́рны, и до́браго отве́та на Стра́шнем Суди́щи Христо́ве про́сим.

Соедине́ние ве́ры и прича́стие Свята́го Ду́ха испроси́вше, са́ми себе́, и друг друга, и весь живо́т наш Христу Бо́гу предади́м.

Хор: Тебе, Господи.

Иерей: И сподоби² нас, Владыко, со дерзнове́нием, неосужде́нно сме́ти³ призыва́ти Тебе, Небе́снаго Бо́га Отца́, и глаго́лати:

Хор (или все молящиеся): Отче наш, Иже еси́ на небесе́х⁴! Да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на небеси́, и на земли́. Хлеб наш насу́щный даждь нам днесь, и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Иерей: Я́ко Твое́ есть Ца́рство, и си́ла, и сла́ва, Отца́ и Сы́на и Свята́го Ду́ха, ны́не и при́сно и во ве́ки веко́в.

Хор: Ами́нь.

Иерей: Мир всем.

Хор: И ду́хови твоему.

Диакон: Главы́ ва́ша Го́сподеви приклони́те.

Хор: Тебе́, Го́споди.

Иерей: Благода́тию и щедро́тами и человеколю́бием Единоро́днаго Сы́на Твоего́, с Ни́мже благослове́н еси́, со Пресвяты́м и Благи́м и Животворя́щим Твои́м Ду́хом, ны́не и при́сно и во ве́ки веко́в.

Хор: Аминь.

Закрываются царские врата и завеса.

Диакон: Во́нмем.

Иерей: Святая святы́м.

Хор: Еди́н Свят, еди́н Госпо́дь, Иису́с Христо́с, во сла́ву Бо́га Отца́. Аминь.

ПРИЧАСТНЫ

В воскресенье

Хвали́те Го́спода с небе́с, хвали́те Его́ в вы́шних. Аллилу́иа, аллилу́иа, аллилу́иа.

В понедельник

Творя́й А́нгелы Своя́ ду́хи, и слуги́ Своя́ пла́мень о́гненный.

Во вторник

В па́мять ве́чную бу́дет пра́ведник, от слу́ха зла не убои́тся.

В среду

Ча́шу спасе́ния прииму́ и и́мя Госпо́дне призову́.

В четверг

Во всю зе́млю изы́де веща́ние³ их, и в концы́ вселе́нныя глаго́лы их.

В пятницу

Спасе́ние соде́лал еси́ посреде́ земли́, Бо́же.

В субботу

Ра́дуйтеся, пра́веднии, о Го́споде, пра́вым подоба́ет похвала́.

Заупокойный

Блаже́ни, я́же избра́л и прия́л еси́, Го́споди, и па́мять их в род и род.

В праздники Богородицы

Ча́шу спасе́ния прииму́ и и́мя Госпо́дне призову́.

В праздники апостолов

Во всю́ зе́млю изы́де веща́ние их, и в концы́ вселе́нныя глаго́лы их.

В дни памяти святых

В па́мять ве́чную буде́т пра́ведник, от слу́ха зла не убои́тся.

Открываются царские врата. Диакон, вынося Святую Чашу, возглашает:

Со стра́хом Бо́жиим и ве́рою приступи́те.

(Передает чашу священнику.)

Хор: Благослове́н Гряды́й во и́мя Госпо́дне, Бог Госпо́дь и яви́ся нам.

Иерей и с ним все, желающие причаститься: Ве́рую, Го́споди, и испове́дую, я́ко Ты еси́ вои́стинну Христос, Сын Бога Жива́го, прише́дый в мир гре́шныя спасти́, от нихже пе́рвый есмь аз. Еще́ ве́рую, я́ко сие́ са́мое е́сть Пречи́стое Те́ло Твое́, и сия́ са́мая е́сть Честна́я Кро́вь Твоя́. Молю́ся убо Тебе́: поми́луй мя, и прости́ ми прегреше́ния моя́, во́льная и нево́льная, я́же сло́вом, я́же де́лом, я́же ве́дением и неве́дением, и сподо́би мя неосужде́нно причасти́тися Пречи́стых Твои́х Та́инств, во оставле́ние грехо́в и в жизнь ве́чную. Аминь.

Ве́чери Твоея́ Та́йныя днесь, Сы́не Бо́жий, прича́стника мя приими́: не бо враго́м Твои́м та́йну пове́м, ни лобза́ния Ти дам, я́ко Иу́да, но я́ко разбо́йник, испове́даю Тя: помяни́ мя, Го́споди, во Ца́рствии Твое́м.

Да не в суд или́ во осужде́ние бу́дет мне причаще́ние Святы́х Твои́х Та́ин, Господи, но во исцеле́ние души́ и те́ла. Аминь.

Причащая мирян, иерей говорит: Причаща́ется раб Бо́жий (имя), Честна́го и Свята́го Те́ла и Кро́ве Господа и Бога и Спаса нашего Иисуса Христа, во оставле́ние грехо́в свои́х и в жизнь вечную.

Хор (во время причащения): Тело Христо́во приими́те, Исто́чника безсме́ртнаго вкуси́те.

По причащении мирян священник опускает в Потир частицы, вынутые из просфор, произнося: Омы́й, Го́споди, грехи́ помина́вшихся зде Кро́вию Твое́ю Честно́ю, моли́твами святы́х Твои́х.

Иерей: Спаси́, Бо́же, лю́ди Твоя́ и благослови́ достоя́ние Твое́.

Хор: Ви́дехом Свет Истинный, / прия́хом⁵ Ду́ха Небе́снаго, / обрето́хом⁶ ве́ру и́стинную, / Неразде́льней Тро́ице покланя́емся: / Та бо нас спасла́ есть.

Иерей (тайно): Благослове́н Бог наш…

Возглас: Всегда́, ны́не и при́сно и во ве́ки веко́в.

Хор: Аминь.

Да испо́лнятся уста́ на́ша / хвале́ния Твоего́, Го́споди, / я́ко да пое́м сла́ву Твою́, / я́ко сподо́бил еси́ нас причасти́тися / Святы́м Твои́м, Боже́ственным, Безсме́ртным и Животворя́щим Та́йнам; / соблюди́ нас во Твоей святы́ни, / весь день поуча́тися пра́вде Твое́й. / Аллилу́иа, аллилу́иа, аллилу́иа.

Диакон: Про́сти прии́мше Боже́ственных, Святы́х, Пречи́стых, Безсме́ртных, Небе́сных и Животворя́щих, Стра́шных Христо́вых Та́ин, досто́йно благодари́м Го́спода.

Хор: Господи, помилуй.

Диакон: Заступи́, спаси́, поми́луй и сохрани́ нас, Бо́же, Твое́ю благода́тию.

Хор: Господи, помилуй.

Диакон: День весь соверше́н, свят, ми́рен и безгре́шен испроси́вше, са́ми себе́ и друг дру́га и весь живо́т наш Христу́ Бо́гу предади́м.

Хор: Тебе, Господи.

Иерей: Я́ко Ты еси́ освяще́ние на́ше, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Хор: Аминь.

Иерей: С ми́ром изы́дем.

Хор: О и́мени Госпо́дни.

Диакон: Господу помолимся.

Хор: Господи, помилуй.

Молитва заамво́нная

Иерей (стоя перед амвоном): Благословля́яй благословя́щия Тя, Го́споди, и освяща́яй на Тя упова́ющия, спаси́ люди Твоя и благослови́ достоя́ние Твое, исполне́ние² Це́ркве Твоея́ сохрани́, освяти́ лю́бящия благоле́пие до́му Твоего́; Ты тех возпросла́ви Боже́ственною Твое́ю си́лою, и не оста́ви нас, упова́ющих на Тя. Мир ми́рови Твоему́ да́руй, Це́рквам Твои́м, свяще́нником, во́инству и всем лю́дем Твои́м. Я́ко вся́кое дая́ние бла́го и всяк дар соверше́н свы́ше есть, сходя́й² от Тебе́, Отца́ Све́тов; и Тебе́ сла́ву, и благодаре́ние, и поклоне́ние возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Хор: Аминь. Бу́ди и́мя Госпо́дне благослове́нно от ны́не и до ве́ка. (Трижды)³

Псалом 33

Хор: Благословлю́ Го́спода на вся́кое вре́мя, / вы́ну хвала́ Его́ во усте́х мои́х. / О Го́споде похва́лится душа́ моя́, / да услы́шат кро́тцыи и возвеселя́тся./ Возвели́чите Го́спода со мно́ю, / и вознесе́м и́мя Его́ вку́пе. / Взыска́х Го́спода, и услы́ша мя, / и от всех скорбе́й мои́х изба́ви мя. / Приступи́те к Нему́ и просвети́теся, / и ли́ца ва́ша не постыдя́тся. / Сей ни́щий воззва́, и Госпо́дь услы́ша и́, / и от всех скорбе́й его́ спасе́ и́. / Ополчи́тся А́нгел Госпо́день о́крест боя́щихся Его́ / и изба́вит их. / Вкуси́те и ви́дите, я́ко благ Госпо́дь; / блаже́н муж, и́же упова́ет Нань. / Бо́йтеся Го́спода, вси святи́и Его́, / я́ко несть лише́ния боя́щымся Его́. / Бога́тии обнища́ша и взалка́ша, / взыска́ющии же Го́спода не лиша́тся вся́каго бла́га. / Прииди́те, ча́да, послу́шайте мене́, / стра́ху Госпо́дню научу́ вас. / Кто есть челове́к, хотя́й живо́т, /любя́й дни ви́дети бла́ги? / Удержи́ язы́к твой от зла, / и устне́ твои́, е́же не глаго́лати льсти². / Уклони́ся от зла и сотвори́ бла́го; / взыщи́ ми́ра, и пожени́ и́³. / Очи Госпо́дни на пра́ведныя, / и у́ши Его́ в моли́тву их. / Лице́ же Госпо́дне на творя́щия зла́я, / е́же потреби́ти от земли́ па́мять их. / Воззва́ша пра́веднии, и Госпо́дь услы́ша их,/ и от всех скорбе́й их изба́ви их. / Близ Госпо́дь сокруше́нных се́рдцем, / и смире́нныя ду́хом спасе́т. / Мно́ги ско́рби пра́ведным, / и от всех их изба́вит я́ Госпо́дь. / Храни́т Госпо́дь вся ко́сти их, / ни еди́на от них сокруши́тся. / Смерть гре́шников люта́, / и ненави́дящии пра́веднаго прегреша́т. / Изба́вит Госпо́дь ду́ши раб Свои́х, / и не прегреша́т вси упова́ющии на Него́.

Иерей: Благослове́ние Госпо́дне на вас, Того́ благода́тию и человеколю́бием, всегда́, ны́не и при́сно и во ве́ки веко́в.

Хор: Аминь.

Иерей: Слава Тебе, Христе́ Бо́же, упова́ние на́ше, сла́ва Тебе́.

Хор: Слава, и ныне. Господи, помилуй. (Трижды) Благослови́.

Иерей произносит отпуст (в воскресенье): Воскресы́й из ме́ртвых, Христо́с, и́стинный Бог наш, моли́твами Пречи́стыя Своея́ Ма́терe, святы́х сла́вных и всехва́льных апо́стол, и́же во святы́х отца́ на́шего Иоа́нна, архиепи́скопа Константи́ня гра́да, Златоу́стаго (или: святителя Васи́лия Вели́каго, архиепи́скопа Кесари́и Каппадоки́йския), и свята́го (имена святого храма и святого, чья память празднуется в этот день), святы́х пра́ведных Богооте́ц Иоаки́ма и Анны и всех святы́х, поми́лует и спасе́т нас, я́ко Благ и Человеколю́бец.

Многолетие

Вели́каго Господи́на и Отца́ нашего (имя), Святе́йшаго Патриа́рха Моско́вскаго и всея́ Руси́, и господи́на на́шего преосвяще́ннейшаго (имя), митрополи́та (или: архиепи́скопа, или: епи́скопа) (его епархиа́льный ти́тул), бра́тию свята́го хра́ма сего́ и вся правосла́вныя христиа́ны, Го́споди, сохрани́ их на мно́гая ле́та.

По обычаю перед отпустом священник берет крест с престола и после отпуста, осенив крестом народ и сам поцеловав крест, дает его для целования молящимся, а чтец читает благодарственные молитвы; затем священник опять осеняет крестом народ и возвращается в алтарь, причем царские врата и завеса закрываются.