Шестопсалмие

Чтец: Сла́ва в вы́шних Бо́гу, и на земли́ мир, в челове́цех благоволе́ние. (Трижды)

Го́споди, устне́ мои́ отве́рзеши, и уста́ моя́ возвестя́т хвалу́ Твою́. (Дважды)

Псалом 3

Го́споди, что ся умно́жиша стужа́ющии ми²; мно́зи³ востаю́т на мя, мно́зи глаго́лют души́ мое́й: несть спасе́ния ему́ в Бо́зе его́. Ты же, Го́споди, Засту́пник мой еси́, сла́ва моя́, и вознося́й⁴ главу́ мою́. Гла́сом мои́м ко Го́споду воззва́х, и услы́ша мя от горы́ святы́я Своея́. Аз усну́х⁵ и спах, воста́х, я́ко Госпо́дь засту́пит мя⁶. Не убою́ся от тем⁷ люде́й, о́крест⁸ напа́дающих на мя. Воскресни́, Го́споди, спаси́ мя, Бо́же мой, я́ко Ты порази́л еси́ вся вражду́ющия ми всу́е², зу́бы³ гре́шников сокруши́л еси́. Госпо́дне есть спасе́ние, и на лю́дех Твои́х благослове́ние Твое́.

Аз усну́х, и спах, воста́х, я́ко Госпо́дь засту́пит мя.

Псалом 37

Господи, да не я́ростию Твое́ю обличи́ши мене́, ниже́ гне́вом Твои́м⁴ нака́жеши мене́. Я́ко стре́лы Твоя́ унзо́ша⁵ во мне, и утверди́л еси́ на мне ру́ку Твою́. Несть исцеле́ния в пло́ти мое́й от лица́ гне́ва Твоего́, несть ми́ра в косте́х мои́х от лица́ грех мои́х. Я́ко беззако́ния моя превзыдо́ша⁶ главу́ мою́, я́ко бре́мя тя́жкое отяготе́ша на мне. Возсмерде́ша и согни́ша ра́ны моя от лица́ безу́мия моего́. Пострада́х и сляко́хся до конца́⁷, весь день се́туя хожда́х⁸. Я́ко ля́двия⁹ моя́ напо́лнишася поруга́ний¹⁰, и несть исцеле́ния в пло́ти мое́й. Озло́блен бых¹¹ и смири́хся до зела́, рыка́х² от воздыха́ния се́рдца моего́. Го́споди, пред Тобо́ю все жела́ние мое́, и воздыха́ние мое́ от Тебе́ не утаи́ся³. Се́рдце мое́ смяте́ся, оста́ви мя си́ла моя́, и свет о́чию мое́ю⁴, и той несть⁵ со мно́ю. Дру́зи⁶ мои́ и и́скреннии⁷ мои́ пря́мо мне⁸ прибли́жишася и ста́ша. И бли́жнии мои́ отдале́че мене́ ста́ша⁹, и нужда́хуся¹⁰ и́щущии ду́шу мою́; и и́щущии зла́я мне, глаго́лаху су́етная¹¹ и льсти́вным¹² весь день поуча́хуся. Аз же я́ко глух¹³ не слы́шах и яко нем не отверза́яй уст свои́х. И бых я́ко¹⁴ челове́к не слы́шай и не имы́й во усте́х свои́х обличе́ния¹⁵. Я́ко на Тя, Го́споди, упова́х, Ты услы́шиши, Го́споди Бо́же мой. Я́ко рех¹⁶: да не когда́ пора́дуют ми ся¹⁷ врази́ мои́, и внегда́ подвижа́тися¹⁸ нога́м мои́м, на мя велере́чеваша¹⁹. Я́ко аз на ра́ны гото́в, и боле́знь моя́ предо мно́ю есть вы́ну²⁰. Я́ко беззако́ние мое́ аз возвещу́ и попеку́ся о гресе́ мое́м. Врази́ же мои́ живу́т, и укрепи́шася па́че² мене́, и умно́жишася ненави́дящии мя без пра́вды. Воздаю́щии ми зла́я воз блага́я³ оболга́ху мя, зане́ гоня́х благосты́ню⁴. Не оста́ви мене́, Го́споди Бо́же мой, не отступи́ от мене́. Вонми́ в по́мощь мою́, Го́споди спасе́ния моего́.

Не оста́ви мене́, Го́споди Бо́же мой, не отступи́ от мене́. Вонми́ в по́мощь мою́, Господи спасе́ния моего́.

Псалом 62

Бо́же, Бо́же мой, к Тебе́ у́тренюю⁵: возжада́ Тебе́⁶ душа́ моя́, коль мно́жицею Тебе́ плоть моя́ в земли́ пу́сте и непрохо́дне и безво́дне⁷. Та́ко во святе́м яви́хся Тебе́, ви́дети си́лу Твою́ и сла́ву Твою́. Я́ко лу́чши ми́лость Твоя́ па́че живо́т⁸, устне́ мои́ похвали́те Тя. Та́ко благословлю́ Тя в животе́ мое́м, о и́мени Твое́м воздежу́ ру́це мои́. Я́ко от ту́ка и ма́сти⁹ да испо́лнится душа́ моя́, и устна́ма ра́дости восхва́лят Тя уста́ моя́. Аще помина́х Тя на посте́ли мое́й, на у́тренних поуча́хся в Тя, я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́² душа́ моя́ по Тебе́, мене́ же прия́т десни́ца³ Твоя́. Ти́и⁴ же всу́е иска́ша⁵ ду́шу мою́, вни́дут⁶ в преиспо́дняя земли́⁷. Предадя́тся в ру́ки ору́жия⁸, ча́сти ли́совом⁹ бу́дут. Царь же возвесели́тся о Бо́зе, похва́лится всяк клены́йся Им¹⁰: я́ко загради́шася уста́ глаго́лющих непра́ведная.

На у́тренних поуча́хся в Тя, я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе, мене́ же прия́т десни́ца Твоя́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилуи́а, сла́ва Тебе́, Бо́же. (Трижды)

Го́споди, поми́луй. (Трижды) Слава, и ныне.

Священик становится пред царскими вратами и тихо читает светильничные молитвы.

Псалом 87

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́, приклони́ у́хо Твое́ к моле́нию моему́. Я́ко испо́лнися зол² душа́ моя́, и живо́т мой а́ду³ прибли́жися. Привмене́н бых⁴ с низходя́щими в ров⁵, бых я́ко челове́к без по́мощи, в ме́ртвых свобо́дь⁶. Я́ко я́звеннии спя́щии⁷ во гро́бе, и́хже не помяну́л еси́ ктому́⁸, и ти́и от руки́ Твоея́ отринове́ни бы́ша. Положи́ша мя в ро́ве преиспо́днем, в те́мных⁹ и се́ни сме́ртней¹⁰. На мне утверди́ся я́рость Твоя́, и вся во́лны¹¹ Твоя́ наве́л еси́ на мя. Уда́лил еси́ зна́емых мои́х от мене́, положи́ша¹² мя ме́рзость себе́. Пре́дан бых и не исхожда́х¹³. Очи мои́ изнемого́сте¹⁴ от нищеты́; воззва́х к Тебе́, Го́споди, весь день, возде́х к Тебе́ ру́це мои́. Еда́ ме́ртвыми твори́ши чудеса́, или́ вра́чеве воскреся́т, и испове́дятся² Тебе́? Еда́ пове́сть³ кто во гро́бе ми́лость Твою́ и и́стину Твою́ в поги́бели⁴? Еда́ позна́на бу́дут во тьме чудеса́ Твоя, и пра́вда Твоя́ в земли́ забве́нней? И аз к Тебе́, Го́споди, воззва́х, и у́тро моли́тва моя́ предвари́т Тя. Вску́ю⁵, Го́споди, отре́еши⁶ ду́шу мою́, отвраща́еши⁷ лице́ Твое́ от мене́? Нищ есмь аз, и в труде́х от ю́ности моея́, возне́с же ся, смири́хся и изнемого́х. На мне преидо́ша гне́ви Твои́, устраше́ния Твоя́ возмути́ша мя. Обыдо́ша мя я́ко вода́, весь день одержа́ша мя вку́пе⁸. Уда́лил еси́ от мене́ дру́га и и́скренняго, и зна́емых мои́х от страсте́й⁹.

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́, приклони́ у́хо Твое́ к моле́нию моему́.

Псалом 102

Благослови́, душе́ моя́, Го́спода, и вся вну́тренняя моя́, и́мя свято́е Его́. Благослови́, душе́ моя́, Го́спода, и не забыва́й всех воздая́ний² Его́, очища́ющаго вся беззако́ния твоя́, исцеля́ющаго вся неду́ги твоя́, избавля́ющаго от истле́ния³ живо́т твой⁴, венча́ющаго тя ми́лостию и щедро́тами, исполня́ющаго во благи́х⁵ жела́ние твое́, обнови́тся я́ко о́рля⁶ ю́ность твоя́. Творя́й ми́лостыни Госпо́дь, и судьбу́⁷ всем оби́димым. Сказа́⁸ пути́ Своя́ Моисе́ови, сыново́м Изра́илевым хоте́ния⁹ Своя́. Щедр и ми́лостив Госпо́дь, долготерпели́в и многоми́лостив. Не до конца́ прогне́вается, ниже́ во век вражду́ет¹⁰. Не по беззако́нием на́шим сотвори́л есть нам, ниже́ по грехо́м на́шим возда́л есть нам. Я́ко по высоте́ небе́сней от земли́¹¹, утверди́л есть Госпо́дь ми́лость Свою́¹² на боя́щихся Его́. Ели́ко отстоя́т¹³ восто́цы от за́пад, уда́лил есть от нас беззако́ния на́ша. Я́коже ще́дрит оте́ц сы́ны, уще́дри Госпо́дь боя́щихся Его́. Я́ко Той позна́² созда́ние на́ше, помяну́³, я́ко персть есмы́⁴. Челове́к, я́ко трава́ дни́е его́, я́ко цвет се́льный⁵, та́ко оцвете́т. Я́ко дух про́йде в нем⁶, и не бу́дет, и не позна́ет ктому́⁷ ме́ста своего́. Ми́лость же Госпо́дня от ве́ка и до ве́ка на боя́щихся Его́, и пра́вда Его́ на сыне́х сыно́в, храня́щих заве́т Его́, и по́мнящих за́поведи Его́ твори́ти я́⁸. Госпо́дь на небеси́ угото́ва⁹ Престо́л Свой, и Ца́рство Его́ все́ми облада́ет. Благослови́те Го́спода, вси а́нгели Его́, си́льнии кре́постию, творя́щии сло́во Его́, услы́шати глас¹⁰ слове́с Его́. Благослови́те Го́спода, вся си́лы¹¹ Его́, слуги́ Его́, творя́щии во́лю Его́. Благослови́те Го́спода, вся дела́ Его́. На вся́ком ме́сте влады́чествия Его́ благослови́, душе́ моя́, Го́спода.

На вся́ком ме́сте влады́чествия Его́ благослови́, душе́ моя́, Го́спода.

Псалом 142

Господи, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твоей и не вни́ди² в суд с рабо́м Твои́м, я́ко не оправди́тся пред Тобо́ю вся́к живы́й³. Я́ко погна́⁴ враг ду́шу мою́, смири́л есть в зе́млю живо́т мой⁵. Посади́л мя есть⁶ в те́мных⁷, я́ко ме́ртвыя ве́ка⁸, и уны́⁹ во мне дух мой, во мне смяте́ся се́рдце мое́. Помяну́х дни дре́вния, поучи́хся во всех¹⁰ де́лех Твои́х, в творе́ниих руку́ Твое́ю поуча́хся¹¹. Возде́х к Тебе́ ру́це¹² мои́, душа́ моя́, я́ко земля́ безво́дная Тебе́. Ско́ро услы́ши мя, Господи, исчезе́¹³ дух мой, не отврати́ лица́ Твоего́ от мене́, и уподо́блюся низходя́щим в ров¹⁴. Слы́шану сотвори́¹⁵ мне зау́тра¹⁶ ми́лость Твою́, я́ко на Тя упова́х. Скажи́¹⁷ мне, Господи, путь, во́ньже пойду́, я́ко к Тебе́ взях² ду́шу мою́. Изми́³ мя от враг мои́х, Го́споди, к Тебе́ прибего́х⁴. Научи́ мя твори́ти во́лю Твою́, я́ко Ты еси́ Бог мой. Дух Твой Благи́й наста́вит⁵ мя на зе́млю пра́ву⁶. Имене Твоего́ ра́ди, Го́споди, живи́ши⁷ мя, пра́вдою Твое́ю изведе́ши от печа́ли ду́шу мою́; и ми́лостию Твое́ю потреби́ши⁸ враги́ моя́, и погуби́ши вся стужа́ющыя⁹ души́ мое́й, я́ко аз раб Твой есмь.

Услы́ши мя, Го́споди, в пра́вде Твое́й, и не вни́ди в суд с рабо́м Твои́м.

Услы́ши мя, Го́споди, в пра́вде Твое́й, и не вни́ди в суд с рабо́м Твои́м.

Дух Твой Благи́й наста́вит мя на зе́млю пра́ву.

Сла́ва, и ны́не: Аллилу́иа, аллилу́иа, аллилу́иа, сла́ва Тебе́, Бо́же. (Трижды)

Ектения великая

Диакон: Ми́ром Господу помо́лимся.

Хор: Господи, помилуй. (На каждое прошение.)

Диакон: О свы́шнем ми́ре и спасе́нии душ наших Господу помо́лимся.

О ми́ре всего мира, благостоя́нии святы́х Бо́жиих Церкве́й и соедине́нии всех Господу помо́лимся.

О святе́м храме сем и с ве́рою, благогове́нием и стра́хом Бо́жиим входя́щих во́нь Господу помо́лимся.

О Вели́ком Господи́не и Отце́ нашем Святе́йшем Патриа́рхе (имя), и о господи́не на́шем преосвяще́ннейшем митрополи́те (или: архиепи́скопе, или: епи́скопе) (имя), честне́м пресви́терстве, во Христе́ диа́констве, о всем при́чте и лю́дех Господу помо́лимся.

О богохрани́мей стране́ на́шей, власте́х и во́инстве ея́ Господу помо́лимся.

О гра́де сем (или: о ве́си сей; если в монастыре́, то: о святе́й оби́тели сей), вся́ком гра́де, стране́ и ве́рою живу́щих в них Господу помо́лимся.

О благорастворе́нии возду́хов, о изоби́лии плодо́в земны́х и вре́менех ми́рных Господу помо́лимся.

О пла́вающих, путеше́ствующих, неду́гующих, стра́ждущих, плене́нных и о спасе́нии их Господу помо́лимся.

О изба́витися нам от вся́кия скорби, гнева и ну́жды Господу помо́лимся.

Заступи́, спаси́, поми́луй и сохрани́ нас, Боже, Твоею благода́тию.

Пресвяту́ю, Пречи́стую, Преблагослове́нную, сла́вную Влады́чицу нашу Богоро́дицу и Присноде́ву Мари́ю со все́ми святы́ми помяну́вше, са́ми себе́, и друг дру́га, и весь живо́т наш Христу Богу предади́м.

Хор: Тебе, Господи.

Иерей: Я́ко подоба́ет Тебе́ вся́кая сла́ва, честь и поклоне́ние, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Хор: Ами́нь.

Бог Господь

Диакон: Бог Госпо́дь, и яви́ся нам, благослове́н Гряды́й во и́мя Госпо́дне.

Хор: Бог Госпо́дь, и яви́ся нам, благослове́н Гряды́й во и́мя Госпо́дне. (И далее то же на каждый стих)

Стих 1: Испове́дайтеся Го́сподеви, я́ко благ, я́ко в век ми́лость Его́.

Стих 2: Обыше́дше обыдо́ша мя², и и́менем Госпо́дним противля́хся³ им.

Стих 3: Не умру́, но жив бу́ду, и пове́м⁴ дела́ Госпо́дня.

Стих 4: Ка́мень, его́же небрего́ша зи́ждущии⁵, сей бысть во главу́ у́гла⁶, от Го́спода бысть сей, и есть ди́вен во очесе́х на́ших.

Тропари, кафисмы, малая ектения, седален.

Полиелей

Хор: Хвали́те и́мя Госпо́дне, хвали́те, раби́ Го́спода.

Аллилуиа, аллилуиа, аллилуиа⁷.

Благослове́н Госпо́дь от Сио́на, живы́й во Иерусали́ме.

Аллилуиа, аллилуиа, аллилуиа.

Испове́дайтеся Го́сподеви, я́ко Благ, я́ко в век ми́лость Его́.

Аллилуиа, аллилуиа, аллилуиа.

(Перед Великим постом, в Недели о блудном сыне, мясопустную и сыропустную, добавляется псалом 136 «На реках Вавилонских…» с припевом «Аллилуиа» к каждому стиху.)

Поется величание, если есть ².

Тропари воскресные, глас 5³

Хор: Благослове́н еси́, Го́споди, научи́ мя оправда́нием Твои́м.

А́нгельский собо́р⁴ удиви́ся, зря⁵ Тебе́ в ме́ртвых вмени́вшася⁶, сме́ртную же, Спа́се, кре́пость разори́вша⁷, и с Собо́ю Ада́ма воздви́гша, и от а́да вся свобо́ждша.

Благослове́н еси́, Го́споди, научи́ мя оправда́нием Твои́м.

Почто́ ми́ра с ми́лостивными слеза́ми, о учени́цы, растворя́ете? блиста́яйся во гро́бе А́нгел мироно́сицам веща́ше²: ви́дите вы гроб и уразуме́йте, Спас бо воскре́се от гро́ба.

Благослове́н еси́, Го́споди, научи́ мя оправда́нием Твои́м.

Зело́ ра́но³ мироно́сицы теча́ху⁴ ко гро́бу Твоему́ рыда́юща, но предста́ к ним а́нгел и рече́: рыда́ния вре́мя преста́⁵, не пла́чите, воскресе́ние же апо́столом рцы́те⁶.

Благослове́н еси́, Го́споди, научи́ мя оправда́нием Твои́м.

Мироно́сицы жены́, с ми́ры прише́дша ко гро́бу Твоему́ Спа́се, рыда́ху, а́нгел же к ним рече́, глаго́ля: что с ме́ртвыми Жива́го помышля́ете? Я́ко Бог бо воскре́се от гро́ба.

Сла́ва Отцу́ и Сы́ну и Свято́му Ду́ху.

Поклони́мся Отцу́ и Его́ Сы́нови и Свято́му Ду́ху, Святе́й Тро́ице во еди́ном существе́, с Серафи́мы зову́ще: Свят, Свят, Свят еси́, Го́споди.

И ны́не и при́сно и во ве́ки веко́в. Ами́нь.

Жизнода́вца ро́ждши, греха́, Де́во, Ада́ма изба́вила еси́, ра́дость же Еве в печа́ли ме́сто подала́ еси́; па́дшыя же от жи́зни к сей напра́ви² из Тебе́ воплоти́выйся Бог и Челове́к.

Аллилу́иа, аллилу́иа, аллилу́иа, сла́ва Тебе́, Бо́же. (Трижды)

Следуют малая ектения, ипакои и седальны

Антифон 4 гласа

Хор: От ю́ности моея́ мно́зи³ бо́рют мя стра́сти, но Сам мя заступи́ и спаси́, Спа́се мой.

Ненави́дящии Сио́на, посрами́теся от Го́спода, я́ко трава́ бо огне́м⁴ бу́дете изсо́хше⁵.

Слава, и ныне: Святы́м Ду́хом вся́ка душа́ живи́тся, и чистото́ю возвыша́ется, светле́ется Тро́ическим еди́нством священнота́йне.

Прокимен и чтение Евангелия

Прокимны воскресные на утрене

Глас 1

Ны́не воскресну́, глаго́лет Госпо́дь, положу́ся во спасе́ние, не обиню́ся о нем.

Стих: Словеса́ Госпо́дня, словеса́ чи́ста.

Глас 2

Воста́ни, Го́споди Бо́же мой, повеле́нием, и́мже запове́дал еси́, и сонм люде́й обы́дет Тя.

Стих: Го́споди Бо́же мой, на Тя упова́х, спаси́ мя.

Глас 3

Рцы́те во язы́цех, я́ко Госпо́дь воцари́ся, и́бо испра́ви вселе́нную, я́же не подви́жится.

Стих: Воспо́йте Го́сподеви песнь но́ву, воспо́йте Го́сподеви, вся земля́.

Глас 4

Воскресни́, Го́споди, помози́ нам, и изба́ви нас и́мене Твоего́ ра́ди.

Стих: Боже, уши́ма на́шима услы́шахом, и отцы наши возвести́ша нам.

Глас 5

Воскресни́, Го́споди Бо́же мо́й, да вознесе́тся рука́ Твоя́, я́ко Ты ца́рствуеши во ве́ки.

Стих: Испове́мся Тебе́, Го́споди, всем се́рдцем мои́м, пове́м вся чудеса́ Твоя́.

Глас 6

Го́споди, воздви́гни си́лу Твою́ и прииди́ во е́же спасти́ нас.

Стих: Пасы́й Изра́иля, вонми́, наставля́яй я́ко овча́ Ио́сифа.

Глас 7

Воскресни́, Го́споди Бо́же мой, да вознесе́тся рука́ Твоя́, не забу́ди убо́гих Твои́х до конца́.

Стих: Испове́мся Тебе, Господи, всем сердцем моим, пове́м вся чудеса́ Твоя.

Глас 8

Воцари́тся Госпо́дь во век, Бог твой, Сио́не, в род и род.

Стих: Хвали́, душе моя, Го́спода, восхвалю́ Господа в животе́ моем.

Воскресная песнь по Евангелии, глас 6

Хор или народ: Воскресе́ние Христо́во ви́девше, поклони́мся Свято́му Го́споду Иису́су, Еди́ному Безгре́шному. Кресту́ Твоему́ покланя́емся, Христе́, и свято́е Воскресе́ние Твое́ пое́м и сла́вим: Ты бо еси́ Бог наш, ра́зве Тебе́ ино́го² не зна́ем, и́мя Твое́ имену́ем³. Прииди́те, вси ве́рнии, поклони́мся свято́му Христо́ву Воскресе́нию: се бо прии́де⁴ Кресто́м ра́дость всему́ ми́ру. Всегда́ благословя́ще Го́спода, пое́м Воскресе́ние Его́: распя́тие бо претерпе́в, сме́ртию смерть разруши́⁵.

Псалом 50⁶

Поми́луй мя, Бо́же, по вели́цей ми́лости Твое́й, и по мно́жеству щедро́т Твоих очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое аз зна́ю, и грех мой предо мно́ю есть вы́ну. Тебе еди́ному согреши́х и лука́вое пред Тобою сотвори́х; я́ко да оправди́шися во словесе́х Твоих, и победи́ши внегда́ суди́ти Ти. Се́ бо, в беззако́ниих зача́т есмь, и во гресе́х роди́ мя ма́ти моя. Се́ бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя очи́сти. Се́рдце чи́сто сози́жди во мне́, Бо́же, и дух прав обнови́ во утро́бе моей. Не отве́ржи мене́ от лица́ Твоего́ и Ду́ха Твоего Свята́го не отыми́ от мене. Возда́ждь ми ра́дость спасе́ния Твоего и Ду́хом Влады́чним утверди́ мя. Научу́ беззако́нныя путе́м Твоим, и нечести́вии к Тебе обратя́тся. Изба́ви мя от крове́й, Боже, Боже спасе́ния моего; возра́дуется язык мой правде Твоей. Господи, устне́ мои отве́рзеши, и уста моя возвестя́т хвалу́ Твою. Я́ко а́ще бы восхоте́л еси́ же́ртвы, да́л бых у́бо: всесожже́ния не благоволи́ши. Жертва Богу дух сокруше́н; сердце сокруше́нно и смире́нно Бог не уничижи́т. Ублажи́, Господи, благоволе́нием Твоим Сио́на, и да сози́ждутся стены Иерусали́мския. Тогда благоволи́ши жертву пра́вды, возноше́ние и всесожега́емая; тогда́ возложа́т на олта́рь Твой тельцы́.

Хор: Слава: Моли́твами апо́столов, Ми́лостиве, очи́сти, мно́жество согреше́ний на́ших.

И ныне: Моли́твами Богоро́дицы, Ми́лостиве, очи́сти, мно́жество согреше́ний на́ших.

Поми́луй мя́, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́.

Стихира воскресная или праздника

Хор: Воскре́с Иису́с от гро́ба, я́коже прорече́, даде́² нам живо́т ве́чный³, и ве́лию⁴ ми́лость.

(С Недели о мытаре и фарисее в воскресные дни Великого поста вместо «Молитвами апостолов…» и прочего поется «Покаяния отверзи ми двери…»).

Покая́ния отве́рзи ми две́ри, Жизнода́вче, у́тренюет бо дух мой ко хра́му свято́му Твоему́, храм нося́й теле́сный весь оскверне́н; но я́ко Щедр, очи́сти благоутро́бною Твое́ю ми́лостию.

Диакон: Спаси́, Боже, лю́ди Твоя и благослови́ достоя́ние Твое, посети́ мир Твой ми́лостию и щедро́тами, возвы́си рог христиа́н правосла́вных и низпосли́ на ны ми́лости Твоя́ бога́тыя; моли́твами Всепречи́стыя Влады́чицы на́шея Богоро́дицы и Присноде́вы Марии́; си́лою Честна́го и Животворя́щаго Креста́; предста́тельствы³ честны́х Небе́сных Сил безпло́тных; честна́го сла́внаго Проро́ка, Предте́чи и Крести́теля Иоа́нна; святы́х сла́вных и всехва́льных апо́стол; и́же во святы́х оте́ц наших и вселе́нских вели́ких учи́телей и святи́телей Васи́лия Вели́каго, Григо́рия Богосло́ва и Иоа́нна Златоу́стаго; и́же во святы́х отца́ на́шего Николая, архиепи́скопа Мирлики́йскаго, Чудотво́рца; святы́х равноапо́стольных Мефо́дия и Кири́лла, учи́телей Слове́нских, святы́х равноапо́стольных вели́каго кня́зя Влади́мира и вели́кия княги́ни Ольги, и́же во святы́х отец наших всея́ Росси́и чудотво́рцев Михаи́ла, Петра́, Алекси́я, Ио́ны, Фили́ппа и Ермоге́на; святы́х сла́вных и добропобе́дных му́чеников, преподо́бных и богоно́сных оте́ц на́ших, святы́х и пра́ведных Богооте́ц Иоаки́ма и Анны (и святого, которому посвящен храм и святого, память которого празднуется в этот день) и всех святы́х; мо́лим Тя, Многоми́лостиве Го́споди, услы́ши нас, грешных, моля́щихся Тебе, и поми́луй нас.

Хор: Го́споди, поми́луй. (12 раз)

Иерей: Ми́лостию и щедро́тами и человеколю́бием Единоро́днаго Твоего́ Сы́на, с Ни́мже благослове́н еси́, со Пресвяты́м и Благи́м и Животворя́щим Твои́м Ду́хом, ны́не и при́сно и во ве́ки веко́в. Аминь.

Канон

Читается канон, ирмосы которого поются на соответствующий глас. По третьей песни — малая ектения и кондак, икос, седален, Богородичен, ипакои, — по Уставу. По шестой песни — малая ектения, кондак и икос. После каждой песни канона (или только после 3-й, 6-й, 8-й и 9-й) поется катавасия.

На воскресной утрене обычно поется катавасия «Отверзу уста моя» — ирмосы из канона Богородице, глас 4.

Песнь 1

Отве́рзу уста́ моя́, и напо́лнятся ду́ха, и сло́во отры́гну Цари́це Ма́тери, и явлю́ся све́тло торжеству́я, и воспою́ ра́дуяся Тоя́ чудеса́.

Песнь 3

Твоя́ песносло́вцы², Богоро́дице, живы́й и незави́стный³ Исто́чниче, лик себе́ совоку́пльшия⁴ духо́вно утверди́ в Боже́ственней Твое́й сла́ве, венце́в сла́вы сподо́би.

Песнь 4

Седя́й в сла́ве на Престо́ле Божества́, во о́блаце ле́гце, прии́де Иису́с Пребоже́ственный, нетле́нною дла́нию^5, и спасе́ зову́щия: сла́ва, Христе́, си́ле Твое́й.

Песнь 5

Ужасо́шася⁶ вся́ческая о Боже́ственней сла́ве Твое́й: Ты бо, Неискусобра́чная Де́во, име́ла еси́ во утро́бе над все́ми Бо́га, и родила́ еси́ Безле́тнаго Сы́на, всем воспева́ющим Тя мир подава́ющая.

Песнь 6

Боже́ственное сие́ и всечестно́е соверша́юще пра́зднество, богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.

Песнь 7

Не послужи́ша тва́ри богому́дрии па́че² Созда́вшаго, но о́гненное преще́ние³ му́жески попра́вше⁴, ра́довахуся пою́ще: препе́тый отце́в Госпо́дь и Бог, благослове́н еси́.

После чтения тропарей восьмой песни канона, перед катавасией, поется:

Хва́лим, благослови́м, покланя́емся Го́сподеви, пою́ще и превознося́ще во вся ве́ки.

Песнь 8

Отроки благочести́выя в пещи́ рождество́ Богоро́дично спасло́ есть, тогда́ у́бо образу́емое⁵, ны́не же де́йствуемое, вселе́нную всю воздвиза́ет пе́ти Тебе́: Го́спода по́йте дела́, и превозноси́те Его́ во вся ве́ки.

Диакон: Богоро́дицу и Ма́терь Све́та в пе́снех возвели́чим.

Песнь Пресвятой Богородицы

1. Вели́чит душа́ Моя́ Го́спода, и возра́довася дух Мой о Бо́зе Спа́се Мое́м.

Честне́йшую Херуви́м и сла́внейшую без сравне́ния Серафи́м, бе́з истле́ния² Бо́га Сло́ва ро́ждшую, су́щую Богоро́дицу Тя велича́ем.

2. Я́ко призре́ на смире́ние рабы́ Своея́, се бо от ны́не ублажа́т Мя вси ро́ди.

Честне́йшую Херуви́м и сла́внейшую без сравне́ния Серафи́м, бе́з истле́ния Бо́га Сло́ва ро́ждшую, су́щую Богоро́дицу Тя велича́ем.

3. Я́ко сотвори́ Мне вели́чие Си́льный, и свя́то и́мя Его́, и ми́лость Его́ в ро́ды родо́в³ боя́щимся Его́.

Честне́йшую Херуви́м и сла́внейшую без сравне́ния Серафи́м, бе́з истле́ния Бо́га Сло́ва ро́ждшую, су́щую Богоро́дицу Тя велича́ем.

4. Сотвори́ держа́ву мы́шцею⁴ Свое́ю, расточи́ го́рдыя мы́слию се́рдца их⁵.

Честне́йшую Херуви́м и сла́внейшую без сравне́ния Серафи́м, бе́з истле́ния Бо́га Сло́ва ро́ждшую, су́щую Богоро́дицу Тя велича́ем.

5. Низложи́ си́льныя со престо́л, и вознесе́ смире́нныя; а́лчущия испо́лни благ, и богатя́щияся отпусти́ тщи.

Честне́йшую Херуви́м и сла́внейшую без сравне́ния Серафи́м, бе́з истле́ния Бо́га Сло́ва ро́ждшую, су́щую Богоро́дицу Тя велича́ем.

6. Восприя́т² Изра́иля о́трока Своего́, помяну́ти³ ми́лости, я́коже глаго́ла⁴ ко отце́м на́шим, Авраа́му и се́мени⁵ его́, да́же до ве́ка⁶.

Честне́йшую Херуви́м и сла́внейшую без сравне́ния Серафи́м, бе́з истле́ния Бо́га Сло́ва ро́ждшую, су́щую Богоро́дицу Тя велича́ем.

Песнь 9

Всяк земноро́дный да взыгра́ется⁷, ду́хом просвеща́емь, да торжеству́ет же безпло́тных умо́в⁸ естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная, Богоро́дице Чи́стая Присноде́во.

Ектения малая

Диакон: Па́ки и па́ки ми́ром Господу помо́лимся.

Хор: Господи, помилуй.

Заступи́, спаси́, поми́луй и сохрани́ нас, Боже, Твое́ю благода́тию.

Хор: Господи, помилуй.

Диакон: Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю со все́ми святы́ми помяну́вше, са́ми себе́ и друг дру́га и весь живо́т наш Христу Богу предади́м.

Хор: Тебе, Господи.

Иерей: Я́ко Твоя́ держа́ва, и Твое́ есть Царство, и сила, и слава, Отца и Сына и Святаго Духа, ны́не и при́сно и во ве́ки веко́в.

Хор: Аминь.

Диакон: Свят Господь Бог наш⁹.

Хор: Свят Господь Бог наш.

Диакон: Я́ко Свят Господь Бог наш.

Хор: Свят Господь Бог наш.

Диакон: Над всеми людьми Бог наш.

Хор: Свят Господь Бог наш.

Эксапостиларий

Хвалитные псалмы

1-й лик: Вся́кое дыха́ние да хва́лит Го́спода. Хвали́те Го́спода с небе́с, хвали́те Его́ в вы́шних. Тебе́ подоба́ет песнь Бо́гу.

2-й лик: Хвали́те Его́ вси а́нгели Его́, хвали́те Его́ вся си́лы Его́. Тебе́ подоба́ет песнь Бо́гу.

На 6

Сотвори́ти в них суд напи́сан. Сла́ва сия́ бу́дет всем преподо́бным Его́.

Хвали́те Бога во святы́х Его́, хвали́те Его́ во утверже́нии си́лы Его́.

На 4

Хвали́те Его́ на си́лах Его́, хвали́те Его́ по мно́жеству вели́чествия Его.

Хвали́те Его́ во гла́се тру́бнем², хвали́те Его́ во псалти́ри² и гу́слех².

Хвали́те Его́ в тимпа́не и ли́це, хвали́те Его́ во стру́нах¹ и орга́не¹.

Хвали́те Его́ в кимва́лех¹ доброгла́сных, хвали́те Его́ в кимва́лех восклица́ния. Вся́кое дыха́ние да хва́лит Го́спода.

Стихи к воскресным стихирам

Стих 1: Воскресни́, Го́споди Бо́же мой, да вознесе́тся рука́ Твоя́, не забу́ди убо́гих Твои́х до конца́.

Стих 2: Испове́мся Тебе́, Го́споди, всем се́рдцем мои́м, пове́м вся чудеса́ Твоя́.

Слава: Стихира евангельская.

И ныне: Богородичен, глас 2:

Преблагослове́нна еси́, Богоро́дице Де́во, Вопло́щшим бо ся из Тебе́ ад плени́ся³, Ада́м воззва́ся, кля́тва потреби́ся⁴, Ева свободи́ся, смерть умертви́ся, и мы ожи́хом⁵. Тем воспева́юще вопие́м: благослове́н Христо́с Бог, благоволи́вый та́ко, сла́ва Тебе́.

Иерей: Слава Тебе, показавшему нам свет.

Славословие великое

Хор: Сла́ва в вы́шних Бо́гу, и на земли́ мир, в челове́цех благоволе́ние. Хва́лим Тя, благослови́м Тя, кла́няем Ти ся, славосло́вим Тя, благодари́м Тя, вели́кия ра́ди сла́вы Твоея́. Го́споди, Царю́ Небе́сный, Бо́же Отче Вседержи́телю, Го́споди, Сы́не Единоро́дный, Иису́се Христе́, и Святы́й Ду́ше. Го́споди Бо́же, Агнче Бо́жий, Сы́не Оте́чь, взе́мляй грех ми́ра, поми́луй нас; взе́мляй грехи́ ми́ра, приими́ моли́тву на́шу. Седя́й одесну́ю Отца́, поми́луй нас. Я́ко Ты еси́ еди́н Свят, Ты еси́ еди́н Госпо́дь, Иису́с Христо́с, во сла́ву Бо́га Отца́, ами́нь.

На всяк день благословлю́ Тя и восхвалю́ и́мя Твое́ во ве́ки, и в век ве́ка.

Сподо́би, Го́споди, в день сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено и́мя Твое́ во ве́ки, ами́нь.

Бу́ди, Го́споди, ми́лость Твоя́ на нас, я́коже упова́хом на Тя.

Благослове́н еси́, Го́споди, научи́ мя оправда́нием Твои́м. (Трижды)

Го́споди, прибе́жище был еси́ нам в род и род. Аз рех: Го́споди, поми́луй мя, исцели́ ду́шу мою́, я́ко согреши́х Тебе́.

Го́споди, к Тебе́ прибего́х, научи́ мя твори́ти во́лю Твою́, я́ко Ты еси́ Бог мой: я́ко у Тебе́ исто́чник живота́, во све́те Твое́м у́зрим свет. Проба́ви ми́лость Твою́ ве́дущим² Тя.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Трижды)

Слава, и ныне: Святы́й Безсме́ртный, поми́луй нас.

Святы́й Бо́же, Святы́й Кре́пкий, Святы́й Безсме́ртный, поми́луй нас.

Тропари воскресные по славословии великом

Если глас 1, 3, 5, 7:

Днесь³ спасе́ние ми́ру бысть, пое́м Воскре́сшему из гро́ба и Нача́льнику жи́зни на́шея: разруши́в бо сме́ртию смерть, побе́ду даде́ нам и ве́лию ми́лость.

Если глас 2, 4, 6, 8:

Воскре́с из гро́ба и у́зы растерза́л еси́ а́да, разруши́л еси́ осужде́ние сме́рти, Го́споди, вся от сете́й врага́ изба́вивый, яви́вый же Себе́ апо́столом Твои́м, посла́л еси́ я́ на про́поведь, и те́ми мир Твой по́дал еси́ вселе́нней, Еди́не Многоми́лостиве.

Ектения сугубая

Диакон: Поми́луй нас, Боже, по вели́цей ми́лости Твое́й, мо́лим Ти ся, услы́ши и поми́луй.

Хор: Господи, помилуй; Господи, помилуй; Господи, помилуй (на каждое последующее прошение).

Диакон: Еще́ мо́лимся о Вели́ком Господи́не и Отце́ на́шем Святе́йшем Патриа́рхе (имя), и о господи́не на́шем преосвяще́ннейшем митрополи́те (или: архиепи́скопе, или: епи́скопе) (имя), и всей во Христе́ бра́тии на́шей.

Еще́ мо́лимся о богохрани́мей стране́ на́шей, власте́х и во́инстве ея́, да ти́хое и безмо́лвное житие́ поживе́м во вся́ком благоче́стии и чистоте́.

Еще́ мо́лимся о блаже́нных и приснопа́мятных созда́телех свята́го хра́ма сего́ (если в монастыре: святы́я оби́тели сея́), и о всех преждепочи́вших отце́х и бра́тиях, зде лежа́щих и повсю́ду, правосла́вных.

Еще́ мо́лимся о ми́лости, жи́зни, ми́ре, здра́вии, спасе́нии, посеще́нии и оставле́нии грехо́в рабо́в Бо́жиих, бра́тии свята́го хра́ма сего́ (если в монастыре: святы́я оби́тели сея́).

Еще́ мо́лимся о плодонося́щих и доброде́ющих во святе́м и всечестне́м хра́ме сем, тружда́ющихся, пою́щих и предстоя́щих лю́дех, ожида́ющих от Тебе́ вели́кия и бога́тыя ми́лости.

Иерей: Я́ко Ми́лостив и Человеколю́бец Бог еси́, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Хор: Аминь.

Ектения просительная

Диакон: Испо́лним у́треннюю моли́тву на́шу Го́сподеви.

Хор: Господи, помилуй.

Диакон: Заступи́, спаси́, поми́луй и сохрани́ нас, Боже, Твое́ю благода́тию.

Ве́чера всего́ соверше́нна, свя́та, ми́рна и безгре́шна у Го́спода про́сим.

Хор: Пода́й, Господи (на каждое прошение).

Диакон: А́нгела ми́рна, ве́рна наста́вника, храни́теля душ и теле́с на́ших, у Го́спода про́сим.

Проще́ния и оставле́ния грехо́в и прегреше́ний на́ших у Господа про́сим.

До́брых и поле́зных душа́м на́шим и ми́ра ми́рови у Го́спода про́сим.

Про́чее вре́мя живота́ на́шего в ми́ре и покая́нии сконча́ти у Го́спода про́сим.

Христиа́нския кончи́ны живота́ на́шего, безболе́знены, непосты́дны, ми́рны и до́браго отве́та на Стра́шнем Суди́щи Христо́ве про́сим.

Пресвяту́ю, Пречи́стую, Преблагослове́нную, сла́вную Влады́чицу на́шу Богоро́дицу и Присноде́ву Мари́ю со все́ми святы́ми помяну́вше, сами себе́ и друг дру́га и весь живо́т наш Христу́ Бо́гу предади́м.

Хор: Тебе, Господи.

Иерей: Я́ко Благ и Человеколю́бец Бог еси́, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Хор: Аминь.

Иерей: Мир всем.

Хор: И ду́хови твоему́.

Диакон: Главы́ на́ша Го́сподеви прикло́ним.

Хор: Тебе, Господи.

Подобна ектении на вечерне: «Исполним вечернюю молитву…» Все прошения повторяются, кроме третьего, где просим: «Дне всего совершенна, свята, мирна и безгрешна…»

Иерей: Я́ко Бог милости и щедрот и человеколюбия еси́, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Хор: Аминь.

Иерей: Мир всем.

Хор: И ду́хови твоему́.

Диакон: Главы́ наша Го́сподеви прикло́ним.

Хор: Тебе, Господи.

Иерей в это время в алтаре читает тихо молитву.

Возглас: Твое́ бо есть, е́же ми́ловати и спаса́ти ны, Бо́же наш, и Тебе́ сла́ву возсыла́ем, Отцу́ и Сыну́ и Свято́му Ду́ху, ны́не и при́сно и во ве́ки веко́в.

Хор: Аминь.

Диакон: Прему́дрость.

Хор: Благослови́.

Иерей: Сый благослове́н Христо́с Бог наш, всегда́, ныне и присно и во веки веков.

Хор: Аминь. Утверди́, Бо́же, святу́ю правосла́вную ве́ру, правосла́вных христиа́н во век ве́ка.

Иерей: Пресвята́я Богоро́дице, спаси́ нас.

Хор: Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Иерей: Слава Тебе, Христе́ Бо́же, упова́ние наше, слава Тебе.

Хор: Слава, и ныне: Господи, помилуй. (Трижды) Благослови.

Иерей произносит отпуст, в воскресенье:

Воскресы́й из ме́ртвых, Христо́с Истинный Бог наш, моли́твами Пречи́стыя Своея́ Ма́тере, святы́х сла́вных и всехва́льных апо́стол, свята́го (поминаются святой, во имя которого освящен храм и святой, память которого празднуется в этот день), святы́х пра́ведных Богооте́ц Иоаки́ма и Анны и всех святы́х, поми́лует и спасе́т нас, я́ко Благ и Человеколю́бец.

Многолетие

Хор: Вели́каго Господи́на и Отца́ на́шего (имя), Святе́йшаго Патриа́рха Моско́вскаго и всея́ Руси́, и господи́на на́шего преосвяще́ннейшаго (имя), митрополи́та (или: архиепископа, или: епископа) (его епархиальный титул), бра́тию свята́го хра́ма сего́ и вся правосла́вныя христиа́ны, Го́споди, сохрани́ их на мно́гая ле́та.

(Читается первый час)