Молитвы о упокоении близких родственников
Молитва о упокоении родителя
Го́споди Иису́се Христе́, Бо́же наш! Ты – си́рых Храни́тель, скорбя́щих Прибе́жище и пла́чущих Уте́шитель. Прибега́ю к Тебе́ аз, си́рый, стеня́ и пла́ча, и молю́ся Тебе́: услы́ши моле́ние мое́ и не отврати́ лица́ Твоего́ от воздыха́ний се́рдца моего́ и от слез оче́й мои́х. Молю́ся Тебе́, милосе́рдый Го́споди, утоли́ скорбь мою́ о разлуче́нии с роди́вшим и воспита́вшим мя роди́телем мои́м (имя), ду́шу же его́, я́ко отше́дшую к Тебе́ с и́стинною ве́рою в Тя и тве́рдою наде́ждою на Твое́ человеколю́бие и ми́лость, приими́ в Ца́рство Твое́ Небе́сное. Преклоня́юсь пред Твое́ю свято́ю во́лею, е́юже отъя́т бысть у мене́, и прошу́ Тя, не отыми́ то́чию от него́ ми́лости и благосе́рдия Твоего́. Вем, Го́споди, я́ко Ты, Судия́ ми́ра сего́, грехи́ и нече́стия отце́в наказу́еши в де́тях, вну́ках и пра́внуках да́же до тре́тьяго и четве́ртаго ро́да: но и ми́луеши отце́в за моли́твы и доброде́тели чад их, вну́ков и пра́внуков. С сокруше́нием и умиле́нием се́рдца молю́ Тя, Ми́лостивый Судие́, не наказу́й ве́чным наказа́нием усо́пшаго незабве́ннаго для мене́ раба́ Твоего́, роди́теля моего́ (имя), но отпусти́ ему́ вся согреше́ния его́ во́льная и нево́льная, сло́вом и де́лом, ве́дением и неве́дением сотворе́нная им в житии́ его́ зде на земли́, и по милосе́рдию и человеколю́бию Твоему́, моли́тв ра́ди Пречи́стыя Богоро́дицы и всех святы́х, поми́луй его́ и ве́чныя му́ки изба́ви. Ты, милосе́рдный О́тче отце́в и чад! Да́руй мне во вся дни жи́зни моея́, до после́дняго издыха́ния моего́ не престава́ти па́мятовати о усо́пшем роди́теле мое́м в моли́твах свои́х и умоля́ти Тя, Пра́веднаго Судию́, да вчини́ши его́ в ме́сте све́тле, в ме́сте прохла́дне и в ме́сте поко́йне, со все́ми святы́ми, отню́дуже отбеже́ вся́ка боле́знь, печа́ль и воздыха́ние. Ми́лостиве Го́споди! Приими́ днесь о рабе́ Твое́м (имя) те́плую моли́тву мою́ сию́ и возда́й ему́ воздая́нием Твои́м за труды́ и попече́ния воспита́ния моего́ в ве́ре и христиа́нском благоче́стии, я́ко научи́вшему мя пе́рвее всего́ ве́дети Тя, своего́ Го́спода, в благогове́нии моли́тися Тебе́, на Тебе́ еди́ного упова́ти в беда́х, ско́рбех и боле́знех и храни́ти за́поведи Твоя́; за благопопече́ние его́ о мое́м духо́вном преуспе́янии, за те́пле приноси́мыя им о мне моле́ния пред Тобо́ю и за все да́ры, им испро́шенные мне от Тебе́, возда́й ему́ Свое́ю ми́лостию, Свои́ми небе́сными бла́гами и ра́достями в ве́чном Ца́рствии Твое́м. Ты бо еси́ Бог ми́лостей и щедро́т и человеколю́бия. Ты поко́й и ра́дость ве́рных рабо́в Твои́х, и Тебе́ сла́ву возсыла́ем со Отце́м и Святы́м Ду́хом, и ны́не и при́сно и во ве́ки веко́в. Ами́нь.
Молитва о упокоении детей
Го́споди Иису́се Христе́, Бо́же наш, Влады́ко живота́ и сме́рти, Уте́шителю скорбя́щих! С сокруше́нным и умиле́нным се́рдцем прибега́ю к Тебе́ и молю́ся Ти: помяни́, Го́споди, во Ца́рствии Твое́м усо́пшаго раба́ Твоего́ ча́до мое́ (имя) и сотвори́ ему́ ве́чную па́мять. Ты, Влады́ко живота́ и сме́рти, дарова́л еси́ мне ча́до сие́, Твое́й же благо́й и прему́дрой во́ле изво́лися и отъя́ти е́ у мене́. Бу́ди благослове́нно и́мя Твое́, Го́споди. Молю́ Тя, Судие́ не́ба и земли́, безконе́чною любо́вию Твое́ю к нам, гре́шным, прости́ усо́пшему ча́ду моему́ вся согреше́ния его́, во́льная и не во́льная, я́же сло́вом, я́же де́лом, я́же ве́дением и не ве́дением. Прости́, Ми́лостиве, и на́ша роди́тельская согреше́ния, да не пребу́дут они́ на ча́дех на́ших: вем, я́ко мно́жицею согреши́хом пред Тобо́ю, мно́жицею не соблюдо́хом, не сотвори́хом, я́коже запове́дал еси́ нам. А́ще же усо́пшее ча́до на́ше, на́шея или́ своея́ ра́ди вины́, бя́ше в житии́ сем, рабо́тая ми́ру и пло́ти своея́ и не па́че Тебе́, Го́споду и Бо́гу своему́; а́ще возлюби́ пре́лести ми́ра сего́, а не па́че сло́во Твое́ и за́поведи Твоя́, а́ще преда́вшеся сласте́м жите́йским, а не па́че сокруше́нию о гресе́х свои́х и в невоздержа́нии бде́ние, пост и моли́тву забве́нию преда́вше, – молю́ Тя усе́рдно, прости́, Преблаги́й О́тче, ча́ду моему́ вся такова́я прегреше́ния его́, прости́ и осла́би, а́ще и и́но зло́е сотвори́ в житии́ сем, Христе́ Иису́се! Ты воскреси́л еси́ дщерь Иаи́ра по ве́ре и моли́тве отца́ ея́. Ты исцели́л еси́ дщерь жены́ ханане́янки по ве́ре и проше́нию ма́тери ея́: услы́ши у́бо и моли́тву мою́, не пре́зри и моле́ния моего́ о ча́де мое́м. Прости́, Го́споди, прости́ вся согреше́ния его́ и, прости́в и очи́стив ду́шу его́, изми́ му́ки ве́чныя и всели́ ю́ со все́ми святы́ми Твои́ми, от ве́ка благоугоди́вшими Тебе́, иде́же несть боле́знь, ни печа́ль, ни воздыха́ние, но жизнь безконе́чная: я́ко несть челове́к, и́же жив бу́дет и не согреши́т. Ты еди́н еси́ кроме́ вся́каго греха́: да егда́ и́маши суди́ти ми́рови, услы́шит ча́до мое́ превожделе́нный глас Твой: прииди́те, благослове́ннии Отца́ Моего́, и насле́дуйте угото́ванное вам Ца́рствие от сложе́ния ми́ра. Я́ко Ты еси́ Оте́ц ми́лостей и щедро́т, Ты живо́т и воскреше́ние на́ше, и Тебе́ сла́ву возсыла́ем со Отце́м и Святы́м Ду́хом, ны́не и при́сно и во ве́ки веко́в. Ами́нь.
Канон о упокоении младенца
Глас 8-й
Песнь 1
Ирмо́с: Во́ду проше́д, я́ко су́шу, и еги́петскаго зла избежа́в, изра́ильтянин вопия́ше: Изба́вителю и Бо́гу на́шему пои́м.
Припе́в: Го́споди, упоко́й младе́нца.
Пло́тию обнища́вый, Сло́ве Бо́жий, и Младе́нец бы́ти благоволи́вый кроме́ премене́ния, в не́дрех Авраа́млих, мо́лим, его́же прия́л еси́, сочета́й младе́нца.
Го́споди, упоко́й младе́нца.
Отроча́ ви́ден был еси́ пре́жде всех веко́в Сый, и отроча́том я́ко Благ Твое́ обеща́л еси́ Ца́рство. Тому́ настоя́щаго причти́ младе́нца.
Сла́ва Отцу́ и Сы́ну и Свято́му Ду́ху.
Пре́жде иску́са земны́х сла́достей, прия́л еси́ Христе́ Спа́се, непоро́чнаго младе́нца, ве́чных сподобля́яй благи́х, я́ко Человеколю́бец.
И ны́не и при́сно и во ве́ки веко́в. Ами́нь.
Богоро́дичен: Прему́дрость и Сло́во О́тчее неизрече́нно Ро́ждшая, души́ моея́ лю́тую исцели́ я́зву, и серде́чную боле́знь укроти́.
Песнь 3
Ирмос: Небе́снаго кру́га Верхотво́рче Го́споди, и Це́ркве Зижди́телю, Ты мене́ утверди́ в любви́ Твое́й, жела́ний кра́ю, ве́рных утвержде́ние, Еди́не Человеколю́бче.
Го́споди, упоко́й младе́нца.
Пресоверше́нный Сло́ве, Младе́нец яви́выйся соверше́нный, младе́нца несоверше́нна во́зрастом к Себе́ преста́вил еси́: его́же упоко́й с пра́ведными все́ми благоугоди́вшими Тебе́, еди́не Человеколю́бче.
Го́споди, упоко́й младе́нца.
Мирски́х сла́достей не вкуси́вша восхище́на преми́рных, Ще́дре, благи́х прича́стника покажи́, мо́лимся, нерастле́ннаго младе́нца, его́же преложи́л еси́ Боже́ственным повеле́нием Твои́м.
Сла́ва Отцу́ и Сы́ну и Свято́му Ду́ху.
Небе́сных черто́гов, и све́тлаго поко́я, и свяще́ннейшаго ли́ка святы́х, Го́споди, прича́стника сотвори́ чисте́йшаго младе́нца, его́же я́ко благоволи́л еси́, Спа́се, преста́вил еси́.
И ны́не и при́сно и во ве́ки веко́в. Ами́нь.
Богоро́дичен: Лиши́выйся от всех, к Твоему́ Пречи́стая Влады́чице и еди́ному прибега́ю покро́ву, помози́ ми: мно́гое бо совокупи́х грехо́вное бога́тство, доброде́телей же нището́ю весь испо́лнихся.
Седален, глас 6-й
Вои́стинну суета́ вся́ческая, житие́ же сень и со́ние: и́бо всу́е мяте́тся всяк земноро́дный, я́коже рече́ Писа́ние: егда́ мир приобря́щем, тогда́ во гроб всели́мся, иде́же вку́пе ца́рие и ни́щии, ста́рцы и младе́нцы. Те́мже, Христе́ Бо́же, преста́вльшагося младе́нца упоко́й, я́ко Человеколю́бец.
Песнь 4
Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.
Го́споди, упоко́й младе́нца.
Не младе́нцы пла́чем, но са́ми себе́ наипа́че возрыда́им согреша́ющии всегда́, я́ко гее́нны изба́вимся.
Го́споди, упоко́й младе́нца.
Земны́х лиши́л еси́ Влады́ко младе́нца наслажде́ний, небе́сных благи́х сего́ я́ко Правосу́дец сподо́би.
Сла́ва Отцу́ и Сы́ну и Свято́му Ду́ху.
Рая́ жи́теля тя показу́ет, блаже́нный вои́стинну младе́нче, И́же от земли́ тя восприи́мый, и лико́м святы́х счиня́ет тя.
И ны́не и при́сно и во ве́ки веко́в. Ами́нь.
Богоро́дичен: Богоро́дицу Тя, Всечи́стая, просвеще́ннии вси ве́мы, Со́лнца бо родила́ еси́ пра́вды, Присноде́во.
Песнь 5
Ирмо́с: Вску́ю мя отри́нул еси́, от лица́ Твоего́ Све́те Незаходи́мый, и покры́ла мя есть чужда́я тьма окая́ннаго? но обрати мя, и к све́ту за́поведей Твои́х пути́ моя́ напра́ви, молю́ся.
Го́споди, упоко́й младе́нца.
Праве́дным Твои́м судо́м, пре́жде прозябе́ния, Соверше́нне, пожа́л еси́, я́коже млады́й злак, его́же преста́вил еси́, Го́споди, младе́нца: но сего́, Сло́ве, введ в боже́ственную го́ру благ ве́чных, насади́.
Го́споди, упоко́й младе́нца.
Я́коже мла́до ве́твие, меч наше́д сме́ртный тя посече́, не прии́мшаго иску́са мирски́х сласте́й, о блаже́нне: но се Христо́с тебе́ небе́сная врата́ отверза́ет, избра́нным сочетава́я тя, я́ко Благоутро́бен.
Сла́ва Отцу́ и Сы́ну и Свято́му Ду́ху.
О мне не рыда́йте, пла́ча бо ничто́же начина́х досто́йное, па́че же сами́х себе́ согреша́ющих пла́чите всегда́, сро́дницы и дру́зи, уме́рший зове́т младе́нец: я́ко да иску́са не возы́мете муче́ния.
И ны́не и при́сно и во ве́ки веко́в. Ами́нь.
Богоро́дичен: Самаго́ себе́ отча́яваю, егда́ на мно́жество дел мои́х взира́ю: егда́ же во ум Тя па́че ума́ ро́ждшую Го́спода Богома́ти прие́млю, прохлажда́юся наде́ждею: предста́тельство бо Тя еди́но и́мамы.
Песнь 6
Ирмо́с: Моли́тву пролию́ ко Го́споду, и Тому́ возвещу́ печа́ли моя́, я́ко зол душа́ моя́ испо́лнися и живо́т мой а́ду прибли́жися, и молю́ся, я́ко Ио́на: от тли, Бо́же, возведи́ мя.
Го́споди, упоко́й младе́нца.
Я́ко Младе́нец в я́слех положи́лся еси́, и объя́тием вда́лся еси́ ста́рца, младоде́яй во чре́ве младе́нцы, и пре́жде дости́гнути в соверше́нное возраще́ние, преве́л еси́ сего́ к животу́: те́мже Тя благода́рственно сла́вим.
Го́споди, упоко́й младе́нца.
Вопия́л еси́ апо́столом: оста́вите отроча́та ко Мне приходи́ти, Сло́ве, Ца́рство бо Мое́ таковы́м су́щим мудрова́нием подава́емо быва́ет. Младе́нца у́бо к Тебе́ преста́вленнаго све́та Твоего́ сподо́би.
Сла́ва Отцу́ и Сы́ну и Свято́му Ду́ху.
Лиши́л еси́ благ земны́х Твоего́ младе́нца, да небе́сных Твои́х благ сего́ прича́стника пока́жеши, не престу́пльшаго Боже́ственное Твое́ повеле́ние: сла́вим Твои́х, Бла́же, суде́б глубину́ безме́рную.
И ны́не и при́сно и во ве́ки веко́в. Ами́нь.
Богоро́дичен: Я́ко сте́ну прибе́жище и́мамы, и душа́м Тя всесоверше́нное спасе́ние, и простра́нство в ско́рбех, Отрокови́це, и све́том Твои́м при́сно ра́дуемся, и́мже, Влады́чице, и ны́не нас от страсте́й и бед спаса́й.
Кондак, глас 8-й
Со святы́ми упоко́й, Христе́, ду́шу раба́ Твоего́, иде́же несть боле́знь, ни печа́ль, ни воздыха́ние, но жизнь безконе́чная.
Икос
Сам Еди́н еси́ Безсме́ртный, сотвори́вый и созда́вый челове́ка: земни́и у́бо от земли́ созда́хомся и в зе́млю ту́южде по́йдем, я́коже повеле́л еси́, Созда́вый мя и реки́й ми: я́ко земля́ еси́ и в зе́млю отъи́деши, а́може вси челове́цы по́йдем, надгро́бное рыда́ние творя́ще песнь: Аллилу́иа, аллилу́иа, аллилу́иа.
Ничто́же есть ма́тере сострада́тельншее, ничто́же есть отца́ умиле́ншее: утро́бы бо их смуща́ются, егда́ младе́нцы отсю́ду предсыла́ют: ве́лию жа́лость ю́же и́мут сердца́ их, отроча́т ра́ди, наипа́че егда́ суть благоглаго́ливая, помина́юще словеса́ их с пе́снию: аллилу́иа.
Мно́гажды бо пред гро́бом сосцы́ бию́т и глаго́лют: о сы́не мой и ча́до сладча́йшее, не слы́шиши ли ма́тере твоея́, что веща́ет? Се и чре́во носи́вшее тя: чесо́ ра́ди не глаго́леши, я́ко глаго́лал еси́ нам? Но та́ко молчи́ши глаго́лати с на́ми: аллилу́иа.
Бо́же, Бо́же, призва́вый мя, утеше́ние ны́не бу́ди до́му моему́: плач бо ве́лий случи́ся им, на мя бо взира́ху вси, единоро́дна мя си́и иму́ще. Но Ты рожде́йся от Ма́тере Де́вы, ма́тере моея́ утро́бы прохлади́, и ороси́ се́рдце отца́, и́мже: аллилу́иа.
Таже кондак, глас 8-й
Со святы́ми упоко́й, Христе́, ду́шу раба́ Твоего́, иде́же несть боле́знь, ни печа́ль, ни воздыха́ние, но жизнь безконе́чная.
Песнь 7
Ирмо́с: О́троцы евре́йстии в пещи́, попра́ша пла́мень дерзнове́нно, и на ро́су огнь преложи́ша, вопию́ще: благослове́н еси́, Го́споди Бо́же, во ве́ки.
Го́споди, упоко́й младе́нца.
Напиши́ в кни́зе спаса́емых, я́ко Человеколю́бец ще́дрый, Твоего́ младе́нца, да ра́дуяся вопие́т держа́ве Твоея́ сла́вы: благослове́н еси́.
Го́споди, упоко́й младе́нца.
Све́том Твоего́, Слове́, лица́ просвети́ младе́нца Твоего́, ве́рою преста́вльшагося ны́не к Тебе́ незре́лым во́зрастом, и воспе́вшаго Тебе́: Го́споди Бо́же, благослове́н еси́.
Сла́ва Отцу́ и Сы́ну и Свято́му Ду́ху.
Ско́рби вино́вно показа́ся лю́бящим тя ны́не разлуче́ние твое́, но тебе́ вои́стинну ра́дости и весе́лия хода́тайственно: насле́диши бо, младе́нче, живо́т во ве́ки.
И ны́не и при́сно и во ве́ки веко́в. Ами́нь.
Богоро́дичен: Виждь скорбь мою́, Де́во, ю́же ми наведе́ мно́жество зол мои́х, и пре́жде исхо́да охла́ду ми пода́ждь ма́терними моли́твами, во е́же ми́лостиву ми бы́ти Бо́гу.
Песнь 8
Ирмо́с: Седмери́цею пещь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся ве́ки.
Го́споди, упоко́й младе́нца.
В не́дрех Авраа́млих тя, в селе́ниих поко́я, иде́же ра́дость пра́зднующих всегда́, в ме́стех осла́бы иде́же есть вода́ живу́щая, счини́т тя Христо́с нас ра́ди младе́нствовавый, пою́щих Ему́ непреста́нно: свяще́нницы, воспо́йте, лю́дие, превозноси́те Его́ во ве́ки.
Го́споди, упоко́й младе́нца.
Печа́ли нам всевино́вное, и слеза́м приснопа́мятное твое́ разлуче́ние вои́стинну бысть: пре́жде бо вкуше́ния в житии́ сем красо́тных, оста́вил еси́ зе́млю, и роди́телей не́дра, но у́бо Авраа́мле тя прия́т не́дро, я́ко младе́нца, и вся́кия неприча́стна скве́рны.
Сла́ва Отцу́ и Сы́ну и Свято́му Ду́ху.
Что мя пла́чете младе́нца преста́вльшагося? Лежа́й вопие́т неви́димо, несмь бо плаче́вный: младе́нцем бо определи́ся пра́ведных всех ра́дость, досто́йная слеза́м не соде́лавшим дела́. Христу́ бо воспева́ют: свяще́ннии по́йте, лю́дие превозноси́те Его́ во ве́ки.
И ны́не и при́сно и во ве́ки веко́в. Ами́нь.
Богоро́дичен: В по́мощь мою́, Богоро́дице, воста́ни, вонми́ моли́тве мое́й, и изба́ви мя лю́таго осужде́ния, тя́жкаго испыта́ния, тьмы и огня́, и скре́жета зу́бнаго, бесо́вскаго же нало́га, и вся́кия ну́жды, наде́ждо ненаде́жных, животе́ отча́янных.
Песнь 9
Ирмо́с: Ужасе́ся о сем не́бо, и земли́ удиви́шася концы́, я́ко Бог яви́ся челове́ком пло́тски и чре́во Твое́ бысть простра́ннейшее небе́с. Тем Тя, Богоро́дицу, а́нгелов и челове́к чинонача́лия велича́ют.
Го́споди, упоко́й младе́нца.
Христе́, младе́нствовавый кроме́ премене́ния, и кресту́ приобщи́выйся во́лею, и на ма́терния боле́зни ро́ждшия Тя воззре́вый, печа́ль облегчи́, и боле́знь лю́тую, младе́нца уме́ршаго ве́рных роди́телей: да сла́вим держа́ву Твою́.
Го́споди, упоко́й младе́нца.
Посла́вый с высо́ты, Всецарю́, и приимы́й блаже́ннаго мла́денца, я́ко чи́стую, Влады́ко, пти́цу в гне́зда небе́сная, спасл еси́ сего́ дух от се́тей многови́дных, и с пра́ведными ду́хи совокупи́, услажда́я Ца́рствия Твоего́.
Сла́ва Отцу́ и Сы́ну и Свято́му Ду́ху.
Ничто́же сотво́ршим, Сло́ве Бо́жий, младе́нцем по́дал еси́ селе́ние небе́сное: си́це бо благоволи́л еси́, Бла́же, с те́ми чи́слити созда́ние Твое́, младе́нцу приити́ ны́не к Тебе́. Боле́знь роди́телей Сам облегчи́, я́ко всеще́дрый и человеколюби́вый.
И ны́не и при́сно и во ве́ки веко́в. Ами́нь.
Богоро́дичен: О́ком серде́чным вы́ну взира́ю к Тебе́, ма́тернюю иму́щей моли́тву, ко из Тебе́ ро́ждшемуся, Тя бо пою́, Всечи́стая: успи́ стра́сти моея́ души́, ко у́тру покая́ния воздви́гни мя, Отрокови́це, и све́том Твои́м просвети́.
Ексапостиларий
Ны́не упоко́ихся, и обрето́х осла́бу мно́гу, я́ко преста́вихся от истле́ния, и преложи́хся к животу́: Го́споди, сла́ва Тебе́.
Святы́й Бо́же, Святы́й Кре́пкий, Святы́й Безсме́ртный, поми́луй нас (трижды).
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй (трижды).
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на небесе́х! Да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на небеси́ и на земли́. Хлеб наш насу́щный даждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Тропари, глас 4-й
Со ду́хи пра́ведных сконча́вшихся ду́шу раба́ Твоего́, Спа́се, упоко́й, сохраня́я ю́ во блаже́нной жи́зни, я́же у Тебе́, Человеколю́бче.
В поко́ищи Твое́м, Го́споди, иде́же вси святи́и Твои́ упокоева́ются, упоко́й и ду́шу раба́ Твоего́, я́ко Еди́н еси́ Человеколю́бец.
Сла́ва Отцу́ и Сы́ну и Свято́му Ду́ху.
Ты еси́ Бог, соше́дый во ад и узы окова́нных разреши́вый, Сам и ду́шу раба́ Твоего́ упоко́й.
И ны́не и при́сно и во ве́ки веко́в. Ами́нь.
Еди́на чи́стая и непоро́чная Де́во, Бо́га без се́мене ро́ждшая, моли́ спастися души́ его́.
Го́споди, поми́луй (12 раз).
Молитва
Храня́й младе́нцы, Го́споди, в ны́нешнем житии́, в бу́дущем же ве́це угото́вавый им простра́нство, Авраа́мово ло́но, и по чистоте́ а́нгельская светообра́зная места́, в ни́хже водворя́ются пра́ведных ду́си: Ты Сам, Влады́ко Христе́, ду́шу раба́ Твоего́ младе́нца (имя) приими́ с ми́ром. Ты бо рекл еси́: оста́вите де́ти приити́ ко Мне, таковы́х есть Ца́рство Небе́сное. Тебе́ бо подоба́ет вся́кая сла́ва, честь и поклоне́ние со Отце́м и Святы́м Ду́хом, ны́не и при́сно и во ве́ки веко́в. Ами́нь.
