Стpастоте́pпче святы́й и целе́бниче Пантеле́имоне, моли́ ми́лостиваго Бо́га, да пpегpеше́ний оставле́ние пода́ст душа́м на́шим.

О пресла́вный му́чениче и до́блий во́ине Небе́cнаго Царя́, Пантеле́имоне всеблаже́нне, Ми́лостиваго Бо́га преизря́дный подража́телю, и́же Христа́ на земли́ дерзнове́нно испове́дав, и многообра́зныя за Него́ му́ки претерпе́в, неувядaе́мый при́ял еси́ вене́ц на небеси́, иде́же ве́чнаго наслаждaе́шися блаже́нства, и со дерзнове́нием Престо́лу трисо́лнечнаго Божества́ предсто́иши! К твоему христоподража́тельному сострада́нию по Бо́зе прибегaе́м вси мы гре́шнии, и всеусе́рдно мо́лим тя, те́плаго засту́пника и предста́теля на́шего: не преста́й призира́ти на нaс, су́щих в ну́ждах и ско́рбных обсто́яниих, и твое́ю моли́твенною по́мощию и цельбопода́тельною си́лою избавля́й нaс при́сно от лю́тых зол, всегуби́тельства и вся́кия ины́я беды́ и боле́зни. Ты бо при́ял еси́, свя́те, неоску́дную благода́ть исцеле́ний от Спа́са на́шего Иису́са Христа́ за тве́рдую твою́ к Нему́ ве́ру, при чи́стом и непоро́чном житии́ запечатле́нную му́ченичеством и многопобе́дною твое́ю кончи́ною, в не́йже по да́нной ти благода́ти и наимено́ван от Христа́ Пантелеи́моном, ми́лоcти тезоимени́тым, ми́лующим все́х притекaющих к тебе́ в ско́рбех и боле́знех. Сего́ ра́ди, ве́дуще тя́ ми́лостиваго ко все́м помо́щника и цели́теля, с ве́рою взыва́ем к тебе́: услы́ши нaс, и богоприя́тным хода́тайством твои́м подава́й нaм вся благопотре́бная в жити́и сeм и ну́жная к ве́чному спасе́нию. Му́ченическим же дерзнове́нием твои́м умоли́ ми́лостиваго Бо́га, да поми́лует нaс гре́шных и недосто́йных по вели́цей ми́лости Свое́й, да изба́вит от тру́са, пото́па, огня́, меча́, и вся́каго пра́веднаго гне́ва и преще́ния, благовре́менне подвиза́я нaс к очисти́тельному и умилостиви́тельному во гресе́х на́ших пока́янию, ра́ди мно́жества щедро́т Свои́х, да пода́ст все́м нaм безбе́дное, ти́хое и богоуго́дное житие́, правосла́вным же власте́м и во́инству на́шему на вся враги́ побе́ду и одоле́ние, и все́х нaс от враг ви́димых и неви́димых да сохрани́т благода́тию Свое́ю и непобеди́мым ополче́нием А́нгел Свои́х, и́миже огражда́еми и наставля́еми да поживе́м в ве́це сeм в покая́нии, чистоте́ и в творе́нии богоуго́дных де́л: да сподо́бимся же твои́м те́плым предста́тельством христиа́нскую кончи́ну улучи́ти безболе́зненну, ми́рну, непосты́дну, и изба́витися от ко́зней возду́шных князе́й тьмы́ и ве́чныя му́ки, и та́ко бы́ти насле́дниками безконе́чнаго, всеблаже́ннаго Ца́рствия. Ей, уго́дниче Бо́жий! Не преста́й моли́тися за ны гре́шныя, да твои́м хода́тайством вре́менных и ве́чных бед изба́влени, велича́ем тебе́ засту́пника на́шего и моли́твенника, и ве́чно прославля́ем о́бщаго Влады́ку и Го́спода на́шего Иису́са Христа́, Ему́же подобaе́т вся́кая сла́ва, чeсть и поклоне́ние со Безнача́льным Его́ Отце́м и Пресвяты́м Ду́хом, ны́не и при́сно, и во ве́ки веко́в. Ами́нь.