Моление верных

Диакон: Ели́цы оглаше́ннии, изыди́те, оглаше́ннии, изыди́те, ели́цы оглаше́ннии изыди́те. Да никто от оглаше́нных, ели́цы ве́рнии, па́ки и па́ки ми́ром Го́споду помо́лимся.

Хор: Го́споди, поми́луй.

Диакон: Заступи́, спаси́, поми́луй и сохрани́ нас, Бо́же, Твое́ю благода́тию.

Хор: Го́споди, поми́луй.

Диакон: Прему́дрость.

Священник читает первую молитву верных:

Благодари́м Тя, Го́споди Бо́же Сил, сподо́бившаго нас предста́ти и ны́не свято́му Твоему́ же́ртвеннику и припа́сти ко щедро́там Твои́м о на́ших гресе́х и о людски́х неве́дениих. Приими́, Бо́же, моле́ние на́ше, сотвори́ ны досто́йны бы́ти, е́же приноси́ти Тебе́ моле́ния и мольбы́, и же́ртвы безкро́вныя о всех лю́дех Твои́х. И удовли́ нас, и́хже положи́л еси́ в слу́жбу Твою́ сию́, си́лою Ду́ха Твоего́ Свята́го, неосужде́нно и непреткнове́нно в чи́стем свиде́тельстве со́вести на́шея, призыва́ти Тя на вся́кое вре́мя и ме́сто. Да послу́шая нас, ми́лостив нам бу́деши, во мно́жестве Твоея́ бла́гости.

Возглас: Я́ко подоба́ет Тебе́ вся́кая сла́ва, честь и поклоне́ние, Отцу́ и Сы́ну и Свято́му Ду́ху, ны́не и при́сно, и во ве́ки веко́в.

Хор: Ами́нь.

Диакон: Па́ки и па́ки ми́ром Го́споду помо́лимся.

Хор: Го́споди, поми́луй. (На каждое прошение)

[Если священник служит без диакона, то следующие прошения не произносятся:

Диакон: О свы́шнем ми́ре и спасе́нии душ на́ших, Го́споду помо́лимся.

Диакон: О ми́ре всего́ мира, благостоя́нии святы́х Бо́жиих церкве́й и соедине́нии всех, Го́споду помо́лимся.

Диакон: О святе́м хра́ме сем и с ве́рою, благогове́нием и стра́хом Бо́жиим входя́щих в онь, Го́споду помо́лимся.

Диакон: О изба́витися нам от вся́кия ско́рби, гне́ва и ну́жды, Го́споду помо́лимся.]

Диакон: Заступи́, спаси́, поми́луй и сохрани́ нас, Бо́же, Твое́ю благода́тию.

Хор: Го́споди, поми́луй.

Диакон: Прему́дрость.

Священник читает вторую молитву верных:

Па́ки и мно́гажды Тебе́ припа́даем, Тебе́ мо́лимся, благи́й и Человеколю́бче, я́ко да призре́в на моле́ние на́ше, очи́стиши на́ша ду́ши и телеса́ от вся́кия скве́рны пло́ти и ду́ха, и да́си нам непови́нное и неосужде́нное предстоя́ние свята́го Твоего́ же́ртвенника. Да́руй же, Бо́же, и моля́щимся с на́ми преспе́яние жития́ и ве́ры и ра́зума духо́внаго. Да́ждь им всегда́, со стра́хом и любо́вию служа́щим Тебе́, непови́нно и неосужде́нно причасти́тися Святы́х Твои́х Та́ин и Небе́снаго Твоего́ Ца́рствия сподо́битися.

Возглас: Я́ко да под держа́вою Твое́ю всегда́ храни́ми, Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно, и во ве́ки веко́в.

Хор: Ами́нь.

Херувимская песнь

Хор: И́же Херуви́мы та́йно образу́юще и животворя́щей Тро́ице Трисвяту́ю песнь припева́юще, вся́кое ны́не жите́йское отложи́м попече́ние.

Диакон совершает каждение, а священник читает молитву:

Никто́же досто́ин от связа́вшихся плотски́ми похотьми́ и сластьми́ приходи́ти, или́ прибли́житися, или́ служи́ти Тебе́, Царю́ Сла́вы: е́же бо служи́ти Тебе́ вели́ко и стра́шно и саме́м Небе́сным Си́лам. Но оба́че неизрече́ннаго ра́ди и безме́рнаго Твоего́ человеколю́бия, непрело́жно и неизме́нно был еси́ Челове́к, и Архиере́й нам был еси́, и служе́бныя сея́ и безкро́вныя же́ртвы священноде́йствие пре́дал еси́ нам, я́ко Влады́ка всех. Ты бо Еди́н, Го́споди Бо́же наш, влады́чествуеши небе́сными и земны́ми, И́же же на престо́ле Херуви́мсте носи́мый, И́же же Серафи́мов Госпо́дь и Ца́рь Изра́илев, И́же же Еди́н свят и во святы́х почива́яй. Тя у́бо молю́, Еди́наго блага́го и благопослушли́ваго: при́зри на мя, гре́шнаго и непотре́бнаго раба́ Твоего́, и очи́сти мою́ ду́шу и се́рдце от со́вести лука́выя, и удовли́ мя, си́лою Свята́го Твоего́ Ду́ха, облече́на благода́тию свяще́нства, предста́ти святе́й Твое́й сей трапе́зе и священноде́йствовати Свято́е и Пречи́стое Твое́ Те́ло и Честну́ю Кровь.

К Тебе́ бо прихожду́, прикло́нь мою́ вы́ю, и молю́ Ти ся, да не отврати́ши лица́ Твоего́ от мене́, ниже́ отри́неши мене́ от о́трок Твои́х, но сподо́би принесе́нным Тебе́ бы́ти, мно́ю гре́шным и недосто́йным рабо́м Твои́м, даро́м сим. Ты бо еси́ принося́й и приноси́мый, и прие́мляй и раздава́емый, Христе́ Бо́же наш, и Тебе́ сла́ву возсыла́ем, со безнача́льным Твои́м Отце́м и Пресвяты́м и Благи́м и Животворя́щим Твои́м Ду́хом, ны́не и при́сно, и во ве́ки веко́в. Ами́нь.

Священник и диакон трижды читают Херувимскую песнь, а затем отходят к жертвеннику — столу, на котором священник совершал проскомидию и приготовил в богослужебных сосудах хлеб и вино для литургии.

Великий вход

Во время великого входа священник и диакон переносят с жертвенника на престол Святые Дары — хлеб и вино.

Диакон, обращаясь к священнику: Возми́, влады́ко.

Священник, возлагая диакону на левое плечо возду́х — плат, которым покрыты богослужебные сосуды: Возми́те ру́ки ва́ша во свя́тая и благослови́те Го́спода.

Священник подает диакону дискос — блюдо, на котором находится хлеб для литургии. Сам же священник берет святый потир — чашу с вином.

Святые Дары в сопровождении свещеносцев выносят из алтаря через боковые двери и вносят обратно в алтарь через царские врата.

Диакон: Вели́каго господи́на и отца́ на́шего (имя), Святе́йшаго Патриа́рха Моско́вскаго и всея́ Ру́си, и господи́на на́шего Высокопреосвяще́ннейшаго митрополи́та (или: архиепи́скопа, или: Преосвяще́ннейшаго епи́скопа имя епархиального архиерея), да помяне́т Госпо́дь Бог во Ца́рствии Свое́м всегда́, ны́не и при́сно, и во ве́ки веко́в.

Священник: Преосвяще́нныя митрополи́ты, архиепи́скопы и епи́скопы, и весь свяще́ннический и мона́шеский чин, бра́тию и прихо́жан свята́го хра́ма сего́ (или: святы́я оби́тели сея́), вас и всех правосла́вных христиа́н, да помяне́т Госпо́дь Бог во Ца́рствии Свое́м всегда́, ны́не и при́сно, и во ве́ки веко́в.

Хор: Аминь.

Я́ко да Царя́ всех поды́мем, а́нгельскими неви́димо дориноси́ма чи́нми. Аллилу́иа, аллилу́иа, аллилу́иа.

Священник ставит Святые Дары на престол и читает тропари:

Благообра́зный Ио́сиф, с дре́ва снем Пречи́стое Те́ло Твое́, плащани́цею чи́стою обви́в и благоуха́ньми во гро́бе но́ве покры́в, положи́.

Во гро́бе пло́тски, во а́де же с душе́ю я́ко Бог, в раи́ же с разбо́йником, и на престо́ле был еси́, Христе́, со Отце́м и Ду́хом, вся исполня́яй, Неопи́санный.

Я́ко живоно́сец, я́ко рая́ красне́йший, вои́стинну и черто́га вся́каго ца́рскаго показа́ся светле́йший, Христе́, гроб Твой, исто́чник на́шего воскресе́ния.

Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая, тогда́ возложа́т на олта́рь Твой тельцы́.

Священник, обращаясь к диакону: Помоли́ся о мне́, бра́те и сослужи́телю.

Диакон: Дух Святы́й на́йдет на тя, и Си́ла Вы́шняго осени́т тя.

Священник: То́йже Дух соде́йствует нам вся дни живота́ на́шего.

Диакон: Помяни́ мя, влады́ко святы́й.

Священник: Да помяне́т тя Госпо́дь Бог во Ца́рствии Свое́м всегда́, ны́не и при́сно, и во ве́ки веко́в.

Диакон: Ами́нь.

Просительная ектения

Диакон: Испо́лним моли́тву на́шу Го́сподеви.

Хор: Го́споди, поми́луй. (На каждое прошение)

Диакон: О предложе́нных честны́х Даре́х, Го́споду помо́лимся.

Диакон: О святе́м хра́ме сем и с ве́рою, благогове́нием и стра́хом Бо́жиим входя́щих в онь, Го́споду помо́лимся.

Диакон: О изба́витися нам от вся́кия ско́рби, гне́ва и ну́жды, Го́споду помо́лимся.

Диакон: Заступи́, спаси́, поми́луй и сохрани́ нас, Бо́же, Твое́ю благода́тию.

Диакон: Дне всего́ соверше́нна, свя́та, ми́рна и безгре́шна у Го́спода про́сим.

Хор: Пода́й, Го́споди. (На каждое прошение)

Диакон: А́нгела ми́рна, ве́рна наста́вника, храни́теля душ и теле́с на́ших у Го́спода про́сим.

Диакон: Проще́ния и оставле́ния грехо́в и прегреше́ний на́ших у Го́спода про́сим.

Диакон: До́брых и поле́зных душа́м нашим, и ми́ра мирови у Го́спода про́сим.

Диакон: Про́чее вре́мя живота́ на́шего в ми́ре и покая́нии сконча́ти у Го́спода про́сим.

Диакон: Христиа́нския кончи́ны живота́ на́шего, безболе́зненны, непосты́дны, ми́рны и до́браго отве́та на стра́шнем суди́щи Христо́ве про́сим.

Диакон: Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.

Хор: Тебе́, Го́споди.

Священник читает молитву приношения:

Го́споди Бо́же Вседержи́телю, Еди́не Свя́те, прие́мляй же́ртву хвале́ния от призыва́ющих Тя всем се́рдцем!

Приими́ и нас, гре́шных, моле́ния и принеси́ ко свято́му Твоему́ же́ртвеннику, и удовли́ нас приноси́ти Тебе́ да́ры же и же́ртвы духо́вныя о на́ших гресе́х и о людски́х неве́дениих, и сподо́би нас обрести́ благода́ть пред Тобо́ю, е́же бы́ти Тебе́ благоприя́тней же́ртве на́шей, и всели́тися Ду́ху благода́ти Твоея́ благо́му в нас, и на предлежа́щих Даре́х сих, и на всех лю́дех Твои́х.

Возглас: Щедро́тами Единоро́днаго Сы́на Твоего́, с Ни́мже благослове́н еси́, со Пресвяты́м и Благи́м и Животворя́щим Твои́м Ду́хом, ны́не и при́сно, и во ве́ки веко́в.

Хор: Ами́нь.

Священник: Мир всем.

Хор: И ду́хови твоему́.

Лобзание мира

Диакон: Возлю́бим друг дру́га, да единомы́слием испове́мы:

Хор: Отца́ и Сы́на и Свята́го Духа, Тро́ицу Единосу́щную и Неразде́льную.

Священник трижды кланяется перед святым престолом, говоря: Возлюблю́ Тя, Го́споди, кре́посте моя́, Госпо́дь утвержде́ние мое́ и прибе́жище мое́. (Трижды)

Если священников двое или больше, то все они целуют друг друга в плечи. Настоятель, обращаясь к сослужителям: Христо́с посреде́ нас. И сослужители отвечают: И есть, и бу́дет.

Символ веры

Диакон: Две́ри, две́ри, прему́дростию во́нмем.

Хор или весь народ:

Ве́рую во еди́наго Бо́га Отца́ Вседержи́теля, Творца́ не́бу и земли́, ви́димым же всем и неви́димым.

И во еди́наго Го́спода Иису́са Христа́, Сы́на Бо́жия, Единоро́днаго, И́же от Отца́ рожде́ннаго пре́жде всех век. Све́та от Све́та, Бо́га и́стинна от Бо́га и́стинна, рожде́нна, несотворе́нна, единосу́щна Отцу́, И́мже вся бы́ша.

Нас ра́ди челове́к и на́шего ра́ди спасе́ния сше́дшаго с небе́с и воплоти́вшагося от Ду́ха Свя́та и Мари́и Де́вы и вочелове́чшася.

Распя́таго же за ны при Понти́йстем Пила́те, и страда́вша, и погребе́нна.

И воскре́сшаго в тре́тий день по Писа́нием.

И возше́дшаго на небеса́ и седя́ща одесну́ю Отца́.

И па́ки гряду́щаго со сла́вою суди́ти живы́м и ме́ртвым, Его́же Ца́рствию не бу́дет конца́.

И в Ду́ха Свята́го, Го́спода, Животворя́щаго, И́же от Отца́ исходя́щаго, И́же со Отце́м и Сы́ном спокланя́ема и ссла́вима, глаго́лавшаго проро́ки.

Во еди́ну Святу́ю, Собо́рную и Апо́стольскую Це́рковь.

Испове́дую еди́но Креще́ние во оставле́ние грехо́в.

Ча́ю воскресе́ния ме́ртвых и жи́зни бу́дущаго ве́ка. Ами́нь.

Анафора (Евхаристическая молитва)

Диакон: Ста́нем до́бре, ста́нем со стра́хом, во́нмем, свято́е возноше́ние в ми́ре приноси́ти.

Хор: Ми́лость ми́ра, же́ртву хвале́ния.

Священник: Благода́ть Го́спода на́шего Иису́са Христа́, и любы́ Бо́га и Отца́, и прича́стие Свята́го Ду́ха бу́ди со все́ми ва́ми.

Хор: И со ду́хом твои́м.

Священник: Горе́ име́им сердца́.

Хор: И́мамы ко Го́споду.

Священник: Благодари́м Го́спода.

Хор: Досто́йно и пра́ведно есть покланя́тися Отцу́ и Сы́ну и Свято́му Ду́ху, Тро́ице Единосу́щней и Неразде́льней.

Священник читает молитву:

Досто́йно и пра́ведно Тя пе́ти, Тя благослови́ти, Тя хвали́ти, Тя благодари́ти, Тебе́ покланя́тися на вся́ком ме́сте влады́чествия Твоего́.

Ты бо еси́ Бог неизрече́нен, недове́дом, неви́дим, непостижи́м, при́сно сый, та́кожде сый, Ты и Единоро́дный Твой Сын и Дух Твой Святы́й.

Ты от небытия́ в бытие́ нас приве́л еси́, и отпа́дшия возста́вил еси́ па́ки, и не отступи́л еси́, вся творя́, до́ндеже нас на не́бо возве́л еси́, и Ца́рство Твое́ дарова́л еси́ бу́дущее.

О сих всех благодари́м Тя и Единоро́днаго Твоего́ Сы́на и Ду́ха Твоего́ Свята́го, о всех, и́хже ве́мы, и и́хже не ве́мы, явле́нных и нея́вленных благодея́ниих, бы́вших на нас.

Благодари́м Тя и о слу́жбе сей, ю́же от рук на́ших прия́ти изво́лил еси́. А́ще и предстоя́т Тебе́ ты́сящи Арха́нгелов и тьмы А́нгелов, Херуви́ми и Серафи́ми шестокрила́тии, многоочи́тии, возвыша́щиися перна́тии, Возглас: Побе́дную песнь пою́ще, вопию́ще, взыва́юще и глаго́люще:

Хор: «Свят, Свят, Свят Госпо́дь Савао́ф, испо́лнь не́бо и земля́ сла́вы Твоея́; оса́нна в вы́шних, благослове́н Гряды́й во и́мя Госпо́дне, оса́нна в вы́шних!»

Священник: С си́ми и мы блаже́нными Си́лами, Влады́ко Человеколю́бче, вопие́м и глаго́лем: Свят еси́ и Пресвя́т, Ты и Единоро́дный Твой Сын и Дух Твой Святы́й.

Свят еси́ и Пресвя́т, и великоле́пна сла́ва Твоя́.

И́же мир Твой та́ко возлюби́л еси́, я́коже Сы́на Твоего́ Единоро́днаго да́ти: да вся́к ве́руяй в Него́ не поги́бнет, но и́мать живо́т ве́чный.

И́же прише́д и все е́же о нас смотре́ние испо́лнив, в нощь, в ню́же предая́шеся, па́че же Сам Себе́ предая́ше за мирски́й живо́т, прие́м хлеб во свя́тыя Своя́ и пречи́стыя и непорочныя ру́ки, благодари́в и благослови́в, освяти́в, преломи́в, даде́ святы́м Свои́м ученико́м и Апо́столом, рек:

Возглас: «Приими́те, яди́те, сие́ есть Те́ло Мое́, е́же за вы ломи́мое во оставле́ние грехо́в».

Хор: Ами́нь.

Священник: Подо́бне и ча́шу по ве́чери, глаго́ля:

Возглас: «Пи́йте от нея́ вси, сия́ есть Кровь Моя́ Но́ваго Заве́та, я́же за вы и за мно́ги излива́емая, во оставле́ние грехо́в».

Хор: Ами́нь.

Священник: Помина́юще у́бо спаси́тельную сию́ за́поведь, и вся я́же о нас бы́вшая: Крест, гроб, тридне́вное воскресе́ние, на небеса́ восхожде́ние, одесну́ю седе́ние, Второ́е и сла́вное па́ки Прише́ствие, Возглас: Твоя́ от Твои́х Тебе́ принося́ще, о всех и за вся.

Хор: Тебе́ пое́м, Тебе́ благослови́м, Тебе́ благодари́м, Го́споди, и мо́лим Ти ся, Бо́же наш.

Священник: Еще́ прино́сим Ти слове́сную сию́ и безкро́вную слу́жбу, и про́сим, и мо́лим, и ми́ли ся де́ем, низпосли́ Ду́ха Твоего́ Свята́го на ны́, и на предлежа́щия Да́ры сия́.

Го́споди, И́же Пресвята́го Твоего́ Ду́ха в тре́тий час Апо́столом Твои́м низпосла́вый, Того́, Благи́й, не отыми́ от нас, но обнови́ нас, моля́щих Ти ся.

Диакон: Се́рдце чи́сто сози́жди во мне, Бо́же, и дух прав обнови́ во утро́бе мое́й.

Священник: Го́споди, И́же Пресвята́го Твоего́ Ду́ха в тре́тий час Апо́столом Твои́м низпосла́вый, Того́, Благи́й, не отыми́ от нас, но обнови́ нас, моля́щих Ти ся.

Диакон: Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́.

Священник: Го́споди, И́же Пресвята́го Твоего́ Ду́ха в тре́тий час Апо́столом Твои́м низпосла́вый, Того́, Благи́й, не отыми́ от нас, но обнови́ нас, моля́щих Ти ся.

Диакон, указывая на хлеб, говорит: Благослови́, влады́ко, святы́й хлеб.

Священник благословляет хлеб со словами: И сотвори́ у́бо хлеб сей Честно́е Те́ло Христа́ Твоего́.

Диакон: Ами́нь. (Указывая на чашу:) Благослови́, влады́ко, святу́ю ча́шу.

Священник благословляет чашу со словами: А е́же в ча́ши сей, Честну́ю Кровь Христа́ Твоего́.

Диакон: Ами́нь. (Указывая на Святые Дары:) Благослови́, влады́ко, обоя́.

Священник благословляет хлеб и чашу со словами: Преложи́в Ду́хом Твои́м Святы́м.

Диакон: Ами́нь, ами́нь, ами́нь.

Священнослужители делают земной поклон.

Диакон: Помяни́ мя, святы́й влады́ко, гре́шнаго.

Священник: Да помяне́т тя Госпо́дь Бог во Ца́рствии Свое́м всегда́, ны́не и при́сно, и во ве́ки веко́в.

Диакон: Ами́нь.

Священник: Я́коже бы́ти причаща́ющимся во трезве́ние души́, во оставле́ние грехо́в, в приобще́ние Свята́го Твоего́ Ду́ха, во исполне́ние Ца́рствия Небе́снаго, в дерзнове́ние е́же к Тебе́, не в суд или́ во осужде́ние.

Еще́ прино́сим Ти слове́сную сию́ слу́жбу, о и́же в ве́ре почи́вших, пра́отцех, отце́х, патриа́рсех, проро́цех, Апо́столех, пропове́дницех, евангели́стех, му́ченицех, испове́дницех, возде́ржницех и о вся́ком ду́се пра́веднем, в ве́ре сконча́вшемся.

Священник кадит Святые Дары и возглашает: Изря́дно о Пресвяте́й, Пречи́стей, Преблагослове́нней, Сла́вней Влады́чице на́шей Богоро́дице и Присноде́ве Мари́и.

Хор поет вместо «Достойно есть»: А́нгел вопия́ше Благода́тней: Чи́стая Де́во, ра́дуйся! И па́ки реку́: ра́дуйся! Твой Сын воскре́се тридне́вен от гро́ба и ме́ртвыя воздви́гнувый: лю́дие, весели́теся.

Свети́ся, свети́ся, но́вый Иерусали́ме: сла́ва бо Госпо́дня на тебе́ возсия́. Лику́й ны́не и весели́ся, Сио́не. Ты же, Чи́стая, красу́йся, Богоро́дице, о воста́нии Рождества́ Твоего́.

Священник: О святе́м Иоа́нне Проро́це, Предте́чи и Крести́тели, о святых сла́вных и всехва́льных Апо́столех (и поминается святой, память которого совершается в этот день), его́же и па́мять соверша́ем, и о всех святы́х Твои́х, и́хже моли́твами посети́ нас, Бо́же.

И помяни́ всех усо́пших о наде́жди воскре́сения жи́зни ве́чныя (имена). И упоко́й их, иде́же присеща́ет свет лица́ Твоего́.

Еще́ мо́лим Тя, помяни́, Го́споди, вся́кое епи́скопство правосла́вных, пра́во пра́вящих сло́во Твоея́ и́стины, вся́кое пресви́терство, во Христе́ диа́конство и вся́кий свяще́ннический чин.

Еще́ прино́сим Ти слове́сную сию́ слу́жбу о вселе́нней, о Святе́й, Собо́рней и Апо́стольстей Це́ркви, о и́же в чистоте́ и честне́м жи́тельстве пребыва́ющих, о Богохрани́мей стране́ на́шей, власте́х и во́инстве ея́. Да́ждь им, Го́споди, ми́рное правле́ние, да и мы в тишине́ их ти́хое и безмо́лвное житие́ поживе́м, во вся́ком благоче́стии и чистоте́.

Возглас: В пе́рвых помяни́, Го́споди, вели́каго господи́на и отца́ на́шего (имя), Святе́йшаго Патриа́рха Моско́вскаго и всея́ Ру́си, и господи́на на́шего Высокопреосвяще́ннейшаго митрополи́та (или: архиепи́скопа, или: Преосвяще́ннейшаго епи́скопа имя епархиального архиерея), и́хже да́руй святы́м Твои́м це́рквам, в ми́ре, це́лых, честны́х, здра́вых, долгоде́нствующих, пра́во пра́вящих сло́во Твоея́ и́стины.

Хор: И всех, и вся.

Священник: Помяни́, Го́споди, град сей, в не́мже живе́м (или: весь сию́, в не́йже живе́м, или: оби́тель сию́, в не́йже живе́м), и вся́кий град и страну́, и ве́рою живу́щих в них. Помяни́, Го́споди, пла́вающих, путеше́ствующих, неду́гующих, стра́ждущих, плене́нных и спасе́ние их. Помяни́, Го́споди, плодонося́щих и добротворя́щих во святы́х Твои́х це́рквах и помина́ющих убо́гия, и на вся ны ми́лости Твоя́ низпосли́.

Возглас: И даждь нам еди́неми усты и еди́нем се́рдцем сла́вити и воспева́ти пречестно́е и великоле́пое и́мя Твое́, Отца́ и Сы́на и Свята́го Ду́ха, ны́не и при́сно, и во ве́ки веко́в.

Хор: Ами́нь.

Священник: И да бу́дут ми́лости вели́каго Бо́га и Спа́са на́шего Иису́са Христа́ со все́ми ва́ми.

Хор: И со ду́хом твои́м.

Просительная ектения

Диакон: Вся святы́я помяну́вше, па́ки и па́ки ми́ром Го́споду помо́лимся.

Хор: Го́споди, поми́луй. (На каждое прошение)

Диакон: О принесе́нных и освяще́нных Честны́х Даре́х, Го́споду помо́лимся.

Диакон: Я́ко да Человеколю́бец Бог наш, прие́м я́ во святы́й и пренебе́сный и мы́сленный Свой же́ртвенник, в воню́ благоуха́ния духо́внаго, возниспо́слет нам Боже́ственную благода́ть и дар Свята́го Ду́ха, помо́лимся.

Диакон: О изба́витися нам от вся́кия ско́рби, гне́ва и ну́жды, Го́споду помо́лимся.

Диакон: Заступи́, спаси́, поми́луй и сохрани́ нас, Бо́же, Твое́ю благода́тию.

Диакон: Дне всего́ соверше́нна, свя́та, ми́рна и безгре́шна у Го́спода про́сим.

Хор: Пода́й, Го́споди. (На каждое прошение)

Диакон: А́нгела ми́рна, ве́рна наста́вника, храни́теля душ и теле́с на́ших у Го́спода про́сим.

Диакон: Проще́ния и оставле́ния грехо́в и прегреше́ний на́ших у Го́спода про́сим.

Диакон: До́брых и поле́зных душа́м нашим и ми́ра мирови у Го́спода про́сим.

Диакон: Про́чее вре́мя живота́ на́шего в ми́ре и покая́нии сконча́ти у Го́спода про́сим.

Диакон: Христиа́нския кончи́ны живота́ на́шего, безболе́знены, непосты́дны, ми́рны и до́браго отве́та на стра́шнем суди́щи Христо́ве про́сим.

Диакон: Соедине́ние ве́ры и прича́стие Свята́го Ду́ха испроси́вше, са́ми себе́, и друг дру́га, и весь живо́т наш Христу́ Бо́гу предади́м.

Хор: Тебе́, Го́споди.

Священник читает молитву перед причастием:

Тебе́ предлага́ем живо́т наш весь и наде́жду, Влады́ко Человеколю́бче, и про́сим, и мо́лим, и ми́ли ся де́ем: сподо́би нас причасти́тися Небе́сных Твои́х и стра́шных Та́ин, сея́ свяще́нныя и духо́вныя Трапе́зы, с чи́стою со́вестию, во оставле́ние грехо́в, в проще́ние согреше́ний, во обще́ние Ду́ха Свята́го, в насле́дие Ца́рствия Небе́снаго, в дерзнове́ние е́же к Тебе́, не в суд или́ во осужде́ние.

Молитва Господня

Возглас: И сподо́би нас, Влады́ко, со дерзнове́нием, неосужде́нно сме́ти призыва́ти Тебе́, Небе́снаго Бо́га Отца́, и глаго́лати:

Хор или весь народ: О́тче наш, И́же еси́ на небесе́х! Да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на небеси́ и на земли́.

Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Священник: Я́ко Твое́ есть Ца́рство и сила и сла́ва, Отца́ и Сы́на и Свята́го Ду́ха, ны́не и при́сно, и во ве́ки веко́в.

Хор: Ами́нь.

Главопреклонная молитва

Священник: Мир всем.

Хор: И ду́хови твоему́.

Диакон: Главы́ ва́ша Го́сподеви приклони́те.

Хор: Тебе́, Го́споди.

Священник читает главопреклонную молитву:

Благодари́м Тя, Царю́ неви́димый, И́же неисче́тною Твое́ю си́лою вся соде́тельствовал еси́ и мно́жеством ми́лости Твоея́ от небытия́ в бытие́ вся приве́л еси́. Сам, Влады́ко, с небесе́ при́зри на подкло́ньшия Тебе́ главы́ своя́, не бо подклони́ша пло́ти и кро́ви, но Тебе́, стра́шному Бо́гу. Ты у́бо, Влады́ко, предлежа́щая всем нам во благо́е изравня́й, по коего́ждо свое́й потре́бе: пла́вающим спла́вай, путеше́ствующим спутеше́ствуй, неду́гующия исцели́, Врачу́ душ и теле́с.

Возглас: Благода́тию, и щедро́тами, и человеколю́бием Единоро́днаго Сы́на Твоего́, с Ни́мже благослове́н еси́, со Пресвяты́м и Благи́м и Животворя́щим Твои́м Ду́хом, ны́не и при́сно, и во ве́ки веко́в.

Хор: Ами́нь.

Возношение Даров и причастен

Священник: Вонми́, Го́споди Иису́се Христе́, Бо́же наш, от свята́го жили́ща Твоего́, и от престо́ла сла́вы Ца́рствия Твоего́, и прииди́ во е́же освяти́ти нас, И́же горе́ со Отце́м седя́й, и зде нам неви́димо спребыва́яй. И сподо́би держа́вною Твое́ю руко́ю препода́ти нам Пречи́стое Те́ло Твое́ и Честну́ю Кровь, и на́ми всем лю́дем.

Диакон: Во́нмем.

Священник произносит, приподнимая Святой Хлеб над дискосом: Свята́я святы́м.

Хор: Еди́н свят, Еди́н Госпо́дь Иису́с Христо́с, во сла́ву Бо́га Отца́. Ами́нь.

Те́ло Христо́во приими́те, исто́чника безсме́ртнаго вкуси́те. Аллилу́иа, аллилу́иа, аллилу́иа.

Священнослужители в алтаре причащаются сами и раздробляют Святые Дары для причащения мирян.

Причащение мирян

Диакон выносит Святую Чашу и возглашает: Со стра́хом Бо́жиим и ве́рою приступи́те!

Хор: Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в.

Священник: Ве́рую, Го́споди, и испове́дую, я́ко Ты еси́ вои́стинну Христо́с, Сын Бо́га жива́го, прише́дый в мир гре́шныя спасти́, от ни́хже пе́рвый есмь аз. Еще́ ве́рую, я́ко сие́ есть са́мое Пречи́стое Те́ло Твое́, и сия́ есть са́мая Честна́я Кровь Твоя́. Молю́ся у́бо Тебе́: поми́луй мя и прости́ ми прегреше́ния моя́, во́льная и нево́льная, я́же сло́вом, я́же де́лом, я́же ве́дением и неве́дением, и сподо́би мя неосужде́нно причастити́ся Пречи́стых Твои́х Та́инств, во оставле́ние грехо́в и в жизнь ве́чную. Ами́нь.

Ве́чери Твоея́ та́йныя днесь, Сы́не Бо́жий, прича́стника мя приими́; не бо враго́м Твои́м та́йну пове́м, ни лобза́ния Ти дам, я́ко Иу́да, но я́ко разбо́йник испове́даю Тя: помяни́ мя, Го́споди, во Ца́рствии Твое́м.

Да не в суд или́ во осужде́ние бу́дет мне причаще́ние Святы́х Твои́х Та́ин, Го́споди, но во исцеле́ние души́ и те́ла.

Причащая мирян, священник произносит: Причаща́ется раб Бо́жий (имярек) Честна́го и Свята́го Те́ла и Кро́ве Го́спода и Бо́га и Спа́са на́шего Иису́са Христа́, во оставле́ние грехо́в свои́х и в жизнь ве́чную.

Хор в это время поет: Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в.

Завершение причащения и перенесение Святых Даров на жертвенник

Причастив мирян, священник опускает в Потир частицы, вынутые из просфор, произнося: Отмы́й, Го́споди, грехи́ помина́вшихся зде Кро́вию Твое́ю Честно́ю, моли́твами святы́х Твои́х.

Священник: Спаси́, Бо́же, лю́ди Твоя́ и благослови́ достоя́ние Твое́.

Хор: Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в.

Священник кадит Святые Дары на престоле.

Священник: Благослове́н Бог наш

Всегда́, ны́не и при́сно, и во ве́ки веко́в.

Затем священник несет Святую Чашу на жертвенник, тихо произнося: Вознеси́ся на Небеса́, Бо́же, и по всей земли́ сла́ва Твоя́.

Хор: Ами́нь.

Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в.

Благодарение

Диакон: Про́сти, прии́мше Боже́ственных, Святы́х, пречи́стых, безсме́ртных, небе́сных и животворя́щих, Стра́шных Христо́вых Та́ин, досто́йно благодари́м Го́спода.

Хор: Го́споди, поми́луй.

Диакон: Заступи́, спаси́, поми́луй и сохрани́ нас, Бо́же, Твое́ю благода́тию.

Хор: Го́споди, поми́луй.

Диакон: День весь соверше́н, свят, ми́рен и безгре́шен испроси́вше, са́ми себе́ и друг дру́га, и весь живо́т наш Христу́ Бо́гу предади́м.

Хор: Тебе́, Го́споди.

Священник: Я́ко Ты еси́ освяще́ние на́ше, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно, и во ве́ки веко́в.

Хор: Ами́нь.

Заамвонная молитва

Священник: С ми́ром изы́дем.

Хор: О и́мени Госпо́дни.

Диакон: Го́споду помо́лимся.

Хор: Го́споди, поми́луй.

Священник, выйдя из алтаря, читает заамвонную молитву:

Благословля́яй благословя́щия Тя, Го́споди, и освяща́яй на Тя упова́ющия, спаси́ лю́ди Твоя́ и благослови́ достоя́ние Твое́, исполне́ние Це́ркве Твоея́ сохрани́, освяти́ лю́бящия благоле́пие до́му Твоего́: Ты тех возпросла́ви Боже́ственною Твое́ю си́лою и не оста́ви нас, упова́ющих на Тя. Мир мирови Твоему́ да́руй, це́рквам Твои́м, свяще́нником, во́инству и всем лю́дем Твои́м. Я́ко вся́кое дая́ние бла́го, и всяк дар соверше́н свы́ше есть, сходя́й от Тебе́, Отца́ све́тов, и Тебе́ сла́ву, и благодаре́ние, и поклоне́ние возсыла́ем, Отцу́ и Сы́ну и Свято́му Ду́ху, ны́не и при́сно, и во ве́ки веко́в.

Хор: Ами́нь.

Молитва на освящение артоса

Диакон: Го́споду помо́лимся.

Хор: Го́споди, поми́луй.

Священник: Бо́же всеси́льный и Го́споди Вседержи́телю, И́же рабо́м Твои́м Моисе́ом во исхо́де Изра́илеве от Еги́пта и в освобожде́нии люде́й Твои́х от го́рькия рабо́ты фарао́новы, а́гнца закла́ти повеле́л еси́, прообразу́я на кресте́ закла́ннаго во́лею нас ра́ди А́гнца, взе́млющаго всего́ мира грехи́, возлю́бленнаго Сы́на Твоего́, Го́спода на́шего Иису́са Христа́. Ты и ны́не, смире́нно мо́лим Тя, при́зри на хлеб сей, и благослови́, и освяти́ его́. И́бо и мы, раби́ Твои́, в честь и сла́ву, и в воспомина́ние сла́внаго воскресе́ния того́жде Сы́на Твоего́ Го́спода на́шего Иису́са Христа́, И́мже от ве́чныя рабо́ты вра́жия и от а́довых нереши́мых уз разреше́ние, свобо́ду и преведе́ние улучи́хом, пред Твои́м вели́чеством ны́не во всесве́тлый сей, пресла́вный и спаси́тельный день Па́схи сей прино́сим; нас же, сего́ принося́щих, и того́ лобза́ющих, и от него́ вкуша́ющих, Твоему́ небе́сному благослове́нию прича́стники бы́ти сотвори́ и вся́кую боле́знь и неду́г от нас Твое́ю си́лою отжени́, здра́вие всем подава́я. Ты бо еси́ исто́чник благослове́ния и цельба́м пода́тель, и Тебе́ сла́ву возсыла́ем, Безнача́льному Отцу́ со Единоро́дным Твои́м Сы́ном и Пресвяты́м и Благи́м и Животворя́щим Твои́м Ду́хом, ны́не и при́сно, и во ве́ки веко́в.

Хор: Ами́нь.

Священник кропит артос святой водой, говоря: Благословля́ется и освяща́ется а́ртос сей, окропле́нием воды́ сея́ свяще́нныя, во и́мя Отца́ и Сы́на и Свята́го Ду́ха. Ами́нь. (Трижды)

Хор: Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в. (12 раз)

Священник: Благослове́ние Госпо́дне на ва́с, Того́ благода́тию и человеколю́бием, всегда́, ны́не и при́сно, и во ве́ки веко́в.

Хор: Ами́нь.

Священник: Христо́с воскре́се из ме́ртвых, сме́ртию смерть попра́в

Хор: И су́щим во гробе́х живо́т дарова́в.

Пасхальный отпуст

Священник, выйдя на амвон с крестом и трисвечником: Христо́с, воскресы́й из ме́ртвых, сме́ртию смерть попра́вый и су́щим во гробе́х живо́т дарова́вый, и́стинный Бог наш, моли́твами Пречи́стыя Своея́ Ма́тере и всех святы́х, поми́лует и спасе́т нас, я́ко Благ и Человеколю́бец.

И осеняет предстоящих крестом и трисвещником на три стороны, восклицая: Христо́с воскре́се!

Люди: Воистину воскресе!

Хор: Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в. (Трижды)

И нам дарова́ живо́т ве́чный, покланя́емся Его́ тридне́вному Воскресе́нию.