Празднование в честь иконы 5/18 мая

Кондак 1

Взбранное и дивное нам избавление даровася Твой образ честный, Владычице Богородице: яко избавльшеся явлением его от недугов душевных и телесных и скорбных обстояний, благодарственная благохваления приносим Ти, всемилосердная Заступнице. Ты же, Владычице, Неупиваемою Чашею нами именуемая, приклонися благоутробно к нашим воздыханием и воплем сердечным и избави страждущих недугом пианства, да с верою воззовем Ти:

Ра́дуйся, Владычице, Неупиваемая Чаше, духовную жажду нашу утоляющая.

Икос 1

А́нгельскии чины и праведников сонмы непрестанно славят царицу всех Богородицу, ходатайствующую бо о многогрешнем роде христианстем, погрязшем в беззаконии, пребывающем во гресех, и во утешение и спасение даруеши ему милость Свою чрез многоименныя чудотворныя иконы Твоя́, ихже, яко звезды небесныя, по всей земли нашей зрим. К единому же из сих образу, Неупиваемой Чашей именуемому, припадающе из глубины сердца, взываем Ти:

Ра́дуйся, неприступнаго Бо́жества селение.

Ра́дуйся, непрестанное людей удивление.

Ра́дуйся, скорбьми немощи наша очищающая.

Ра́дуйся, печальми наша немощи врачующая.

Ра́дуйся, милость Свою чрез чудотворныя иконы Твоя́ нам ниспосылающая.

Ра́дуйся, явлением тех скорбныя сердца наша возвеселяющая.

Ра́дуйся, пречудное всех к Богу примирение.

Ра́дуйся, геенны вечныя избавление.

Ра́дуйся, Владычице, Неупиваемая Чаше, духовную жажду нашу утоляющая.

Кондак 2

Видяще, Пресвятая Владычице, сердечныя скорби, душевныя муки и искреннее покаяние людей, одержимых недугом, губительною болезнию пианства, Ты благоволила еси явити богоспасаемому граду Серпухову милость Свою явлением пречуднаго образа Твоего, именуемаго Неупиваемая Чаша, да вси к нему припадающе с верою и сокрушенным сердцем, получив исцеление от тяжкаго недуга своего, из глубины души вопиют: Аллилу́иа.

Икос 2

Разум трикратнаго явления преподобнаго Варлаама и повеление его в путь шествовати в богоспасаемый град Серпухов разумети ища, человек некий, страждущий недугом пианства, отыде во град Серпухов, и обрете тамо во владычнем монастыре икону Твою святую, Неупиваемой Чашей именуемую. Мы же, видяще таковое Твое о нас грешных попечение, с благоговением вопием Ти:

Ра́дуйся, чрез благочестивых людей славу чудес Твои́х грешником открывающая.

Ра́дуйся, Путеводительнице прозорливая, путь спасения им показующая.

Ра́дуйся, всеблагая наша Наставнице, любовию Твое́ю нас привлекающая.

Ра́дуйся, за вся благодеяния Твоя́ благодарению нас научающая.

Ра́дуйся, скорбь нашу в радость претворяющая.

Ра́дуйся, несумненною надеждою нас увеселяющая.

Ра́дуйся, губительныя страсти наша разрушающая.

Ра́дуйся, благим намерением способствующая.

Ра́дуйся, Владычице, Неупиваемая Чаше, духовную жажду нашу утоляющая.

Кондак 3

Сила Вышняго благодатию Владычицы укрепляше некоего человека, страждущаго недугом пианства, егда он, нози разслабленныя имый, иде во град Серпухов, повеление Богоматери, чрез преподобнаго Варлаама реченное, исполняя, пришед и обрете Пречистыя Богоматери икону, абие исцеле от недуга своего душевнаго и телеснаго и из глубины души воззва Богу: Аллилу́иа.

Икос 3

Имуще источник неоскудный и неупиваемую чашу небесных дарований, не токмо люди града Серпухова, но и вси православнии христиане иных градов и весей, к Твоему пречудному образу притекающии и пред ним получающе исцеление, припадающии благодарственными устами вопиют Ти:

Ра́дуйся, купеле, в нейже вся наша скорби погружаются.

Ра́дуйся, чаше, еюже радость спасения нашего восприимем.

Ра́дуйся, немощи наша душевныя и телесныя врачующая.

Ра́дуйся, страсти наша силою молитв Твои́х укрощающая.

Ра́дуйся, коемуждо по своей потребе просящим, полезная дарующая.

Ра́дуйся, безчисленныя щедроты подающая.

Ра́дуйся, милостей сокровище нам открывающая.

Ра́дуйся, едина Мати, милосердие нам являющая.

Ра́дуйся, Владычице, Неупиваемая Чаше, духовную жажду нашу утоляющая.

Кондак 4

Бурю внутрь имуще помышлений сумнительных, но с искренним покаянием притекающе к Твоему неизреченному милосердию, одержимии пианственною страстию получают исцеление и из глубины сердца вопиют Ти: Аллилу́иа.

Икос 4

Слыша Го́сподь тяжкия скорби жен, стариц и детей, сродницы коих обуреваеми суть пианственною страстию, дарова им Твою, Владычице, икону. У неяже вси притекающии обретают утешение и радость духовную и вопиют Ти со слезами:

Ра́дуйся, Агнице, рождшая Агнца, вземлющаго грехи мира.

Ра́дуйся, Чаше, черплющая нам радость от источника безсмертия.

Ра́дуйся, скорбных матерей утешение.

Ра́дуйся, безнадежных надеждо.

Ра́дуйся, притекающих к Тебе благодатное охранение.

Ра́дуйся, скорбящих отрадо и увеселение.

Ра́дуйся, волнение страстей утишающая.

Ра́дуйся, руку помощи Твоея требующим простирающая.

Ра́дуйся, Владычице, Неупиваемая Чаше, духовную жажду нашу утоляющая.

Кондак 5

Яко Боготечную звезду, честную икону Твою Ты нам показала еси, Владычице, юже зряще и с верою сердечною молящеся Тебе, Богородице, глаголем: исцели пианственною и иною болезнию души и тела страждущих, верных же научи воспевати хвалу Богу: Аллилу́иа.

Икос 5

Видяще чудеса преславныя и знамения пречудныя, бываемыя не токмо от иконы Твоея, Богомати, во граде Серпухове явленныя, но и от всех по подобию сея иконы списанных изображений, припадающе к ним смиренно, вопием Ти:

Ра́дуйся, скоропредстательная помощнице усердно к Тебе притекающих.

Ра́дуйся, благосердная, услышательнице молений наших.

Ра́дуйся, град Серпухов благословением Твоим осенившая.

Ра́дуйся, и в пределах Московских славу чудес Твои́х показавшая.

Ра́дуйся, Серпуховская Владычице, сокровище исцелений неоскудное.

Ра́дуйся, инокинь тамо благо подвизающихся всемощная покровительнице.

Ра́дуйся, ведущим брань противу мира, плоти и диавола добрая споспешнице.

Ра́дуйся, и в мире благочестно живущих усердная Заступнице.

Ра́дуйся, Владычице, Неупиваемая Чаше, духовную жажду нашу утоляющая.

Кондак 6

Проповедующе чудеса Твоя́, Богородительнице, от иконы Твоея «Неупиваемая Чаша» именуемыя бываемая, молим Тя, Пречистая, со слезами: избави всех нас от падений греховных, научающи воспевати Богу: Аллилу́иа.

Икос 6

Воссияла еси в светлости Бо́жественной славы, Дево Богородице, на Младенца предвечнаго Го́спода нашего Иису́са Христа́ зрящая, Еже в сосуде, аки в неупиваемой чаше предстоит. Якоже Тя увидим изображенную на иконе Твое́й, Неупиваемой Чашей таинственно пронареченной. От неяже избавление пианственной болезни притекающим с верою даруеши во еже пети Тебе гласы немолчными сице:

Ра́дуйся, о Нейже радуется и торжествует ангельский собор и человеческий род.

Ра́дуйся, Еяже слава превосходит похвалы земныя и небесныя.

Ра́дуйся, таинственным изображением Сы́на в сосуде тайну Бо́жественныя Евхаристии нам открывающая.

Ра́дуйся, рожденнаго Тобо́ю Агнца, всегда ядомаго и никогда иждиваемаго, нам указующая.

Ра́дуйся, чашею жизни и безсмертия ко вратам вечной жизни нас приводящая.

Ра́дуйся, источником нетления и радости жаждущия души напояющая.

Ра́дуйся, неиссчетною благостынею не оставляющая самых презренных и отверженных.

Ра́дуйся, от рова погибели сердоболием Твоим исхищающая безнадежных.

Ра́дуйся, Владычице, Неупиваемая Чаше, духовную жажду нашу утоляющая.

Кондак 7

Хотя некий человек возблагодарити Тя, Владычице, за исцеление от пианственнаго недуга, украси Твою пречудную, Богомати, икону, во граде Серпухове пребывающую, из глубины сердца воспевая Богу: Аллилу́иа.

Икос 7

Новое чудо видим, Владычице, от иконы Твоея святыя: страждущий бо пианственным недугом некий раб Бо́жий Стефан, прибегая к Твоему матернему предстательству, от тяжкаго недуга своего избавися и, благодаря Тя, благолепными дарами икону Твою украси и, припадая к ней, со слезами возопи Тебе тако:

Ра́дуйся, живоносный источниче исцелений.

Ра́дуйся, чаше небесная божественных дарований.

Ра́дуйся, реко исцелений приснотекущая.

Ра́дуйся, море, всех наших страстей потопление.

Ра́дуйся, под тяжестью греха пианства падающих матернима рукама Твоима восставляющая.

Ра́дуйся, благодарственныя дары не отвергающая.

Ра́дуйся, сердца благочестивых людей возвеселяющая.

Ра́дуйся, всех благих деяний наших Исполнительнице.

Ра́дуйся, Владычице, Неупиваемая Чаше, духовную жажду нашу утоляющая.

Кондак 8

Странно и сумнительно неверующим слышати, како икона Твоя́ святая, Неупиваемая Чаша, божественных исцелений источает чудо. Мы же, верующе слову Твоему, Владычице, реченному к первописанней иконе: «С тобой Моя благодать и сила», — веруем, яко из сея иконы Твоея благодать Твоя́ выну истекает. Те́мже благоговейно покланяющеся лобызаем ю, вопиюще Богу: Аллилу́иа.

Икос 8

Все упование людие, страждущии болезнию пианства, на Тя, Владычице, возлагают, преклоняешися бо немощем и страстем нашим. Кто бо нас, грешных, изведет из рова погибели и нищеты духовныя и телесныя, аще не Ты, Владычице.

Сего ради преклоняем колена пред Твоим пречудным образом и вопием Ти тако:

Ра́дуйся, по молитве грешных людей, призывающих Тя в помощь свою, небесную благодать ниспосылающая.

Ра́дуйся, глубину милосердия Твоего грешным показующая.

Ра́дуйся, отчаявшихся и безнадежных ободряющая.

Ра́дуйся, искушенным болезнию пианства руку помощи простирающая.

Ра́дуйся, терпеливых страдальцев дарами благодатными утешающая.

Ра́дуйся, недуги наша душевныя и телесныя врачующая.

Ра́дуйся, суетныя радости мира сего презирати нас научающая.

Ра́дуйся, Владычице, Неупиваемая Чаше, духовную жажду нашу утоляющая.

Кондак 9

Всякое естество ангельское удивися делу Твоего милосердия, Го́споди, яко даровал еси грешному роду человеческому Заступницу и Помощницу, к нашим немощем преклоняющуюся, от недуга пианства свобождающую, верныя же научающую пети Ти: Аллилу́иа.

Икос 9

Витии человечестии недоумеют хвалити, славная Владычице, Твоея иконы праздник, ниже от скверных устен наших приносимые Тебе похвалы достойные, обаче несчетная благодеяния, иконою Твое́ю являемыя, видевше, душею и сердцем радующеся, Ти глаголем:

Ра́дуйся, яко от лика Твоего чудеса источающая.

Ра́дуйся, от бед и скорбей скоро избавляющая.

Ра́дуйся, отвергающих Тя посрамляющая.

Ра́дуйся, от всякаго зла прибегающих к Тебе сохраняющая.

Ра́дуйся, кротким сиянием Твоим мрак греха и мглу страстей наших разгоняющая.

Ра́дуйся, яко души православных любовию к Тебе и Сыну Твоему исполняющая.

Ра́дуйся, на стезю покаяния нас премудре наставляющая.

Ра́дуйся, добраго ответа нам пред Судией праведным усердная ходатаице.

Ра́дуйся, Владычице, Неупиваемая Чаше, духовную жажду нашу утоляющая.

Кондак 10

Спасти хотя люди многи, страждущия недугом пианства, чудную Твою, Богомати, икону даровала еси. Еяже ради одержимии сим недугом к чудотворному образу Твоему притекают, и, получив исцеление, умильно Богу зовут: Аллилу́иа.

Икос 10

Стена еси и щит, Богомати, людем, пианственною болезнию страждущим и всем усердно к Тебе притекающим, икону Твою благоговейно чтущим, ибо сию дарова нам благих податель Го́сподь в помощь и врачевание и сим внушает нам пети:

Ра́дуйся, отчаянных надеждо, печали их утоляющая.

Ра́дуйся, болезней душевных и телесных исцеление.

Ра́дуйся, нашу скверну чистотою Твое́ю очищающая.

Ра́дуйся, Своею благодатию наше недостоинство просвещающая.

Ра́дуйся, брение наше тленное в нетление облекающая.

Ра́дуйся, в неможении нашем нас утверждающая.

Ра́дуйся, облегающий нас облак страстей скоро разгоняющая.

Ра́дуйся, Владычице, Неупиваемая Чаше, духовную жажду нашу утоляющая.

Кондак 11

Пение наше смиренное, от полноты любви и усердия Тебе приносимое, не презри, Чистая, и не отвергнися отчаявшихся и страждущих недугом пианства людей, но помози им же и нам очиститися от всякия скверны греховныя, да возможем достойно и праведно пети Богу: Аллилу́иа.

Икос 11

Светоприемную свещу зрим Тя, Пресвятая Дево, ибо образ Твой лучами благодати Твоея мглу греховную прогоняет и на светлую стезю добродетелей наставляет, с верою зовущих Ти таковая:

Ра́дуйся, заступлением Твоим от суеты мира сего многомятежнаго нас избавляющая.

Ра́дуйся, приражения страстей плотских отражати нам помогающая.

Ра́дуйся, мысль благу в сердце наше полагающая.

Ра́дуйся, нечистую совесть нашу просвещающая.

Ра́дуйся, от мучительнаго недуга пианства страждущих избавляющая.

Ра́дуйся, к искреннему покаянию и вразумлению призывающая.

Ра́дуйся, души всех умягчающая.

Ра́дуйся, на помощь Тя призывающих и имя Твое славящих спасающая.

Ра́дуйся, Владычице, Неупиваемая Чаше, духовную жажду нашу утоляющая.

Кондак 12

Благодать Бо́жия присуща святей иконе, Неупиваемой Чашей именуемой, влечет к ней, Владычице, всех скорбящих, плачущих, обездоленных, вдов и сирот, а наипаче всех страждущих недугом пианства, и не тщи отходят, Владычице, от неупиваемой чаши Твои́х Бо́жественных дарований, но, неоскудно получающе цельбу от чудотворнаго образа Твоего, Всеблагая, благодарственно поют Богу: Аллилу́иа.

Икос 12

Поющим Твоя́ чудеса и велию милость людем, одержимым пианственною страстию, явленныя, молим Тя, Владычице: спаси и помилуй и настави нас на стезю праву, и не остави нас, покрова Твоего ищущих и зовущих Ти:

Ра́дуйся, к воздержанию от греха пианства всех подвизающая.

Ра́дуйся, от пристрастия к вину росою милости Твоея свобождающая.

Ра́дуйся, страждущим от тяжкого греха пианства присное врачевство.

Ра́дуйся, бедствующим в страстех скорая Помощнице.

Ра́дуйся, малодушных дивное ободрение.

Ра́дуйся, благодушных велия радость.

Ра́дуйся, гордых смиряющая.

Ра́дуйся, смиренныя возвышающая и всем спасения желающая.

Ра́дуйся, Владычице, Неупиваемая Чаше, духовную жажду нашу утоляющая.

Кондак 13

О премилостивая Мати сладчайшаго Го́спода нашего Иису́са Христа́! Нынешнее наше услыши моление и избави нас от всех недугов душевных и телесных, наипаче же свободи страждущих недугом пианства рабов Твои́х (имена), да не во зле погибнут, но, спасенные Тобо́ю, присно вопиют Богу: Аллилу́иа.

 

Этот кондак читается трижды, затем 1-й икос «А́нгельскии чины…» и 1-й кондак «Взбранное и дивное…».

Молитва

О Премилосердная Владычице! К Твоему заступлению ныне прибегаем, молений наших не презри, но милостиво услыши нас, жен, детей, матерей и рабов Твои́х, тяжким недугом пианства одержимых и того ради от матере своея — Церкви Христовой и спасения отпадающих братьев, и сестер, и сродников наших исцели. О милостивая Мати Бо́жия, коснись сердец их и скоро восстави от падений греховных, и ко спасительному воздержанию приведи их. Умоли Сы́на Своего, Христа́ Бо́га нашего, да простит нам согрешения наша и не отвратит милости Своея от людей Своих, но да укрепит нас в трезвении и целомудрии. Приими, Пресвятая Богородице, молитвы матерей, о чадах своих слезы проливающих, жен, о мужех своих рыдающих, чад, сирых и убогих, заблуждшими оставленных, и всех нас, к иконе Твое́й припадающих. И да приидет сей вопль наш, молитвами Твоими, ко престолу Всевышняго. Покрый и соблюди нас от лукаваго ловления и всех козней вражиих, в страшный же час исхода нашего помоги пройти непреткновенно воздушные мытарства, молитвами Твоими избави нас вечнаго осуждения, да покрыет нас милость Бо́жия в нескончаемые века. Ами́нь.