Празднование в честь иконы 5/18 марта

Кондак 1

Взбранной Воеводе и благой Воспитательнице рода христианскаго, яко избавльшеся от злых, благодарственная восписуем Ти, раби Твои, но, яко имущая державу непобедимую, от всяких бед чада моя свободи, да со слезами зову Ти:

Воспита́й, Владычице, чада моя достойна Небеснаго Царствия и наследники вечных благ сотвори я.

Икос 1

А́нгела с небесе послати чадом моим исходатайствуй, Пресвятая, у Сы́на Твоего и Бо́га, якоже и Тебе послан бысть хранитель прекрепкий Гавриил архангел, и сподоби мя взывати Тебе сице:

Воспита́й чада моя, во еже быти им земным ангелом.

Воспита́й чада моя, во еже быти им небесным человеком.

Воспита́й чада моя, во еже быти им Твоим рабом.

Воспита́й чада моя выну зовуща Тебе:

Ра́дуйся, Благодатная, Го́сподь с Тобо́ю.

Воспита́й чада моя, да любят Тебе всем сердцем своим и всем помышлением.

Воспита́й, Владычице, чада моя достойна Небеснаго Царствия и наследники вечных благ сотвори я.

Кондак 2

Видящи мое матернее моление о чадех моих, к Тебе бо единей прибегаю, возьми я под Свой честный и милосердный покров, да воззовут Богу: Аллилуия.

Икос 2

Разум чадом моим посли, како добре Ти послужити, и исполни сердца их небесныя премудрости. Подаждь ю едину возлюбити, земная же паче презрети, и не возбрани устом моим вопити Ти таковая:

Воспита́й чада моя мудра, яко змии, и прости, яко голуби.

Воспита́й чада моя имуща разум на добрая и не имуща на грех.

Воспита́й чада моя премудра противу козней диавольских.

Воспита́й чада моя устрояюща мудре житие свое по образу святых.

Воспита́й чада моя, питающи я млеком сокровенныя премудрости Бо́жия, да взыскуют ю во всем житии своем.

Воспита́й, Владычице, чада моя достойна Небеснаго Царствия и наследники вечных благ сотвори я.

Кондак 3

Сила Вышняго да осенит чада моя Твоего ради неусыпнаго предстательства пред Сыном Твоим, сего ради, познавша Твое матернее милосердие ко всем, с верою к Богу притекающим, да воззовут к Нему: Аллилуия.

Икос 3

Имущи от Бо́га чада моя, не хощу узрети их в муце вечней, но паче в Книзе Живота написанных и живот вечный наследящих. Сего ради, Пречистая, приклони ухо Твое к молению рабы Твоея, взывающия:

Воспита́й чада моя, во еже избегнути им вечных мук.

Воспита́й чада моя, во еже наследовати им живот вечный.

Воспита́й чада моя, во еже тещи им путь жития своего в покаянии.

Воспита́й чада моя в трудех стяжающа благодать Ду́ха Свята́го.

Воспита́й чада моя употребляюща усилие восхитити Царствие Небе́сное.

Воспита́й чада моя, во еже быти им написанным в Книзе Животней.

Воспита́й, Владычице, чада моя достойна Небеснаго Царствия и наследники вечных благ сотвори я.

Кондак 4

Бурю внутрь имущи помышлений сумнительных и хотящи чадом моим живот вечный наследити, со слезами молю Тя, да воспомянувши Твоя́ милости пребогатыя, во уповании и умилении сердца пою Сыну Твоему: Аллилуия.

Икос 4

Слышащи глас Твой, глаголющий Сыну Твоему: ихже дал еси Ми в удел, во веки сохраняй; простираю руце мои и сердце к Твоему милосердию, да сотвориши чада моя рабы Твоя́ и вонмеши прошением моим таковым:

Воспита́й чада моя в уделе Твоем пресвятем.

Воспита́й чада моя со всеми святыми Твоими.

Воспита́й чада моя шествующа узким путем заповедей Сы́на Твоего во Иерусалим горний.

Воспита́й чада моя ищуща помощи у Тебе единыя.

Воспита́й чада моя, во еже живот вечный восприяти им.

Воспита́й, Владычице, чада моя достойна Небеснаго Царствия и наследники вечных благ сотвори я.

Кондак 5

Свет невечерний, сиречь Сын Твой, Пресвятая Дево, да воссияет в сердцах чад моих, во еже воззвати им Богу: Аллилуия.

Икос 5

Видящи мое прилежное моление, во славу Твою возносимое, аки фимиам благовонный, не отврати лица Твоего от моих чад, аще они отвратятся Тебе, но паче услыши глаголы уст моих, вопиющих Ти:

Воспита́й чада моя нища духом, яко тех есть Ца́рство Небе́сное.

Воспита́й чада моя плачуща, яко тии утешатся.

Воспита́й чада моя кротка, яко тии наследят землю.

Воспита́й чада моя алчуща и жаждуща правды, яко тии насытятся.

Воспита́й чада моя милостива, яко тии помиловани будут.

Воспита́й чада моя чиста сердцем, яко тии Бо́га узрят.

Воспита́й чада моя миротворцы, яко тии сынове Бо́жии нарекутся.

Воспита́й, Владычице, чада моя достойна Небеснаго Царствия и наследники вечных благ сотвори я.

Кондак 6

Проповедует мир весь христианский всегдашнее заступление Твое сирот, вдовиц и матерей, о чадех своих молящих и вопиющих Богу: Аллилуия.

Икос 6

Возрасти лучами благодати в души чад моих просвещение от Тебе свыше, да узрят путь, ведущий в живот вечный, и последуют по нем, окормляемыя Твоим всемогущим покровом, в Церковь Сы́на Твоего, и сего ради услыши мене, зовущу Тебе сице:

Воспита́й чада моя просвещением Сы́на Твоего, да во свете Его узрят свет и направят стопы своя к Нему.

Воспита́й чада моя, да будут свет миру, да светит свет их пред людьми, и вси, видяще их добрая дела, прославят Отца́ Небеснаго.

Воспита́й чада моя выну обращающа очи сердца своего к Создателю всяческих.

Воспита́й чада моя, путеводствующи Звездою утреннею, яже есть Сын Твой, в обители праведников.

Воспита́й чада моя кротка, молчалива и трепещуща словес Бо́жиих.

Воспита́й чада моя любяща Тя и Сы́на Твоего не токмо умом, но и сердцем.

Воспита́й, Владычице, чада моя достойна Небеснаго Царствия и наследники вечных благ сотвори я.

Кондак 7

Хотящи чадом моим вечнаго спасения, со слезами предстою пред честною Твое́ю иконою, Владычице, да не презриши моления моего и мене, к Сыну Твоему взывающия: Аллилуия.

Икос 7

Дивными и неисследимыми судьбами Сы́на Твоего привлецы чада моя милостивою рукою под Свой благодатный покров, да со усердием зову Ти:

Воспита́й чада моя ищуща прежде Царствия Бо́жия и правды Его.

Воспита́й чада моя ходяща тесными враты, ведущими в живот вечный.

Воспита́й чада моя на всяком месте творяща волю Сы́на Твоего и Бо́га нашего.

Воспита́й чада моя ищуща наследити Небеснаго Царствия.

Воспита́й чада моя не глаголюща, ниже помышляюща хулы на Ду́ха Свята́го.

Воспита́й чада моя, во еже быти им в малем числе избранных Твои́х.

Воспита́й, Владычице, чада моя достойна Небеснаго Царствия и наследники вечных благ сотвори я.

Кондак 8

Странствующа в юдоли сей земной и многомятежной, чада моя идеже обретут отраду и утешение, аще не в Тебе, Пречистая? Спутешествуй же им и настави их на путь истинный, да зовут Богу: Аллилуия.

Икос 8

Всем еси Мати милующая Ты, Владычице, и хощу, да пребудеши таковая и чадом моим. Се, вручаю их Тебе и во смирении молю Тя:

Воспита́й чада моя бодрствующа и молящася, да не впадут во искушение.

Воспита́й чада моя милосердна, якоже милосерд Отец наш Небесный.

Воспита́й чада моя во умилении младенчестем, яко таковых есть Царствие Бо́жие.

Воспита́й чада моя меньша всех, да будут велика пред Богом.

Воспита́й чада моя соблюдающа Слово Бо́жие, причастники блаженства райскаго их содеявающи.

Воспита́й чада моя благонадежна для Царствия Небеснаго.

Воспита́й, Владычице, чада моя достойна Небеснаго Царствия и наследники вечных благ сотвори я.

Кондак 9

Всякаго добра души и сердца их исполняющи, отжени от них духа злосмраднаго безбожия, подающи от щедрот Твои́х всем и коемуждо по потребе, да зовут Богу: Аллилуия.

Икос 9

Витий суемудренных общения, глаголющих лжу на Твое всемощное заступление, избави их и призри на мя, верно вопиющую:

Воспита́й чада моя зело противящася безбожником.

Воспита́й чада моя крепко стояща противу богоненавистных учений.

Воспита́й чада моя не приемлюща духа сынов противления.

Воспита́й чада моя бегающа утех мирских и прелести мира сего.

Воспита́й чада моя уклоняющася от зла и творяща благо.

Воспита́й чада моя любяща и молящася о вразех своих.

Воспита́й, Владычице, чада моя достойна Небеснаго Царствия и наследники вечных благ сотвори я.

Кондак 10

Спасти хотя мир, Сын Твой сниде с небесе призвати не праведныя, но грешныя на покаяние. Сего ради моли Сы́на Твоего о чадех моих, да спасенная Тобо́ю, воззовут Богу: Аллилуия.

Икос 10

Стена несокрушимая буди, Царице Небесная, чадом моим, да под Твоим благодатным покровом возмогут содеяти множество благих дел, да и с ними зову Ти сице:

Воспита́й чада моя ведуща творити волю Сы́на Твоего и Бо́га нашего.

Воспита́й чада моя ненавидяща грех и всякое беззаконие.

Воспита́й чада моя любяща добро и всяческую добродетель.

Воспита́й чада моя в чистоте непорочней.

Воспита́й чада моя обращающа в бедах очеса своя к Твоему милосердию.

Воспита́й чада моя служаща Тебе в послушании и целомудрии.

Воспита́й, Владычице, чада моя достойна Небеснаго Царствия и наследники вечных благ сотвори я.

Кондак 11

Пети Твое необоримое заступление выну сподоби чада моя и Твое́ю благодатию отверзи уста их вопити Богу: Аллилуия.

Икос 11

Светоприемную свещу свыше, истаявающу день и нощь от любве к Тебе и Сыну Твоему и ближнему, живот их сотвори и не презри мене, зовущу Ти:

Воспита́й чада моя выну взирающа на крест и страдания Сы́на Твоего.

Воспита́й чада моя отверзающа уста своя токмо к похвалению и прославлению благости Твоея.

Воспита́й чада моя в слезнем чаянии пришествия Сы́на Твоего.

Воспита́й чада моя в непрестанней молитве и трезвении.

Воспита́й чада моя выну Тебе предстояща в благоговении.

Воспита́й чада моя добрый плод творяща.

Воспита́й, Владычице, чада моя достойна Небеснаго Царствия и наследники вечных благ сотвори я.

Кондак 12

Благодатию неизреченною Ду́ха Свята́го напитай сердца чад моих, во еже возлюбити им Сы́на Твоего и Бо́га нашего и Тебе, Преблагая, да зовут Царю всяческих: Аллилуия.

Икос 12

Воспевающи милосердие Твое, имже милуеши и питаеши чада моя, вопию Ти, да не престанеши молити о них Сы́на Твоего, верую бо: вся Ты можеши, и да исполниши моления моя таковая:

Воспита́й чада моя исполнена Ду́ха Свята́го.

Воспита́й чада моя, яко да на Страшнем судищи Сы́на Твоего одесную поставлена будут.

Воспита́й чада моя живуща в святости.

Воспита́й чада моя благодатию Ду́ха Свята́го твердо на вернем пути пребывающа.

Воспита́й чада моя алчуща и жаждуща осенения Ду́ха Свята́го.

Воспита́й чада моя совершенна, яко совершен Отец наш Небесный.

Воспита́й, Владычице, чада моя достойна Небеснаго Царствия и наследники вечных благ сотвори я.

Кондак 13

О Всепетая Мати Иису́са Сладчайшаго!

Приими cиe малое акафистное моление о чадех моих в воню благоухания духовнаго, возми я под Твой благодатный покров, даруй им мыслити, ведати, слышати, глаголати и творити вся, яже к Тебе и Сыну Твоему влекущая и ко спасению содействующая. И посли им в житии сем привременнем вся ко спасению душ их наставляющая, да зовут Богу: Аллилуия.

 

Этот кондак читается трижды, затем 1-й икос «А́нгела с Небесе…» и 1-й кондак «Взбранной Воеводе…».

Молитва

О Пресвятая Владычице Дево Богородице, спаси и сохрани под кровом Твоим моих чад (имена), всех отроков, отроковиц и младенцев, крещеных и безымянных и во чреве матери носимых. Укрой их ризою Твоего материнства, соблюди их во страсе Бо́жием и послушании родителем, умоли Го́спода моего и Сы́на Твоего, да дарует им полезное ко спасению их. Вручаю их материнскому смотрению Твоему, яко Ты еси божественный Покров рабом Твоим. Ами́нь.