Канон бываемый на разлучение души от тела, внегда человек долго страждет (и умереть не может), глас 6-й
Песнь 1
Ирмос: Яко по суху пешешествовав Израиль, по бездне стопами, гонителя фараона видя потопляема, Богу победную песнь поим вопияше.
Помилуй мя, Боже, помилуй мя.
Приидите, соберитися вси, иже благочестно в житии пожившии, и восплачите о души отчужденней славы Божия, и работавшей студным демоном всяким тщанием.
Помилуй мя, Боже, помилуй мя.
Ныне убо время все моего живота, яко дым претече, и предсташа прочее ангели посланнии от Бога, окаянную мою душу ищуще немилостивно.
Слава Отцу, и Сыну, и Святому Духу.
Се, предсташа множество лукавых духов, держаще моих грехов написание, и зовут зело, ищуще безстудно смиренныя моея души.
И ныне и присно, и во веки веков. Аминь.
Прочее к кому возопию? Кто мой плач от болезни приимет, и сердца воздыхание? Токмо Ты Пренепорочная, Чистая, надежда христиан и всех грешных.
Песнь 3
Ирмос: Несть свят, якоже Ты, Господи Боже мой, вознесый рог верных Твоих, Блаже, и утвердивый нас на камени исповедания Твоего.
Помилуй мя, Боже, помилуй мя.
Добрии мои друзи и знаемии, почто не плачете? Почто не рыдаете, иже иногда любимаго друга и брата, ныне же странна Бога и всех вас?
Помилуй мя, Боже, помилуй мя.
Возлюбленная моя братия, зряще моя деяния обличаема мерилом праведным, Христа всех Бога молите, милостива быти мне.
Слава Отцу, и Сыну, и Святому Духу.
Помянувше моея, возлюбленнии, еже к вам дружбы, Христа молите призрети на мя, злополучна, живота лишившагося, и мучима.
И ныне и присно, и во веки веков. Аминь.
Приклони ухо Твое ко мне, Бога моего Мати, с высоты славы многия Твоея, Благая, услыши стенание последнее, и руку подаждь ми.
Песнь 4
Ирмос: Христос моя сила, Бог и Господь, честная Церковь боголепно поет, взывающи, от смысла чиста о Господе празднующи.
Помилуй мя, Боже, помилуй мя.
Увы мне блудному, увы мне окаянному: яко руце простираю к моим другом, и слезы от очию проливаю, но никтоже милуяй мя.
Помилуй мя, Боже, помилуй мя.
Подвиг наста мне души всегубителен, и очима взираяй к Божиим светлым Ангелом, вопию: мало оставите мя пожити, — но никтоже послушаяй мене.
Слава Отцу, и Сыну, и Святому Духу.
О мне плачите, о мне рыдайте, ангельстии собори, и человецы вси христолюбцы: немилостивно бо душа моя от тела разлучается.
И ныне и присно, и во веки веков. Аминь.
Владычице, Владычице, ныне помилуй душу недоумевающую, и к Твоему покрову единому зрящую, и не презри, Благая, демоном отдану быти ми.
Песнь 5
Ирмос: Божиим светом Твоим, Блаже, утренюющих Ти души любовию озари, молюся, Тя ведети, Слове Божий, Истиннаго Бога, от мрака греховнаго взывающа.
Помилуй мя, Боже, помилуй мя.
Свет умный возсияй на мя, да вижу Тя Христе, поне вмале: ктому бо не узрю Тебе; облак бо демонов внезапу нападе на мя, и тьма студных моих дел покрывает мя.
Помилуй мя, Боже, помилуй мя.
Спаситеся [прощайте] вси возлюбленнии, благоутробнии о мне явльшеся злочастнем и всеокаяннем: вси бо аще единым гласом провещали бысте к моему Владыце, тьмы избавили мя бысте.
Слава Отцу, и Сыну, и Святому Духу.
Спасайся [прощай], великий княже Божий Михаиле, Ангелов начальниче: ктому бо твое святое имя не призову, еже помощи мне: молчита бо мои устне, и язык связася.
И ныне и присно, и во веки веков. Аминь.
Спасайся и Ты, нескверная Чистая Мати Христа моего и Бога: ктому бо образа Твоего от моих согрешений не узрю окаянный: угасе бо свет мой, и нощь покры мя.
Песнь 6
Ирмос: Житейское море воздвизаемое зря напастей бурею, к тихому пристанищу Твоему притек, вопию Ти: возведи от тли живот мой, Многомилостиве.
Помилуй мя, Боже, помилуй мя.
Приклоните ухо ваше, братия моя, ко мне, и кротко услышите умиленных глагол малое вещание, и не преслушайте, и мзду от Господа вси восприимете.
Помилуй мя, Боже, помилуй мя.
Се ныне разлучается с болезнью душа от окаяннаго моего телесе: не убо тело мое погребете в земли, несть бо достойно: но извлекше вон, псом поверзите.
Слава Отцу, и Сыну, и Святому Духу.
Кая бо мне польза, души моей в страшныя муки ввержене быти, телу же пету быти от вас; оставите непогребено, яко да снедят пси сердце мое.
И ныне и присно, и во веки веков. Аминь.
Негли мимоходящии, странии, видяще кости от псов влекомыя, умилившеся воззовут от души: помози, Владычице, души окаяннаго сего тела.
Песнь 7
Ирмос: Росодательну убо пещь содела Ангел, преподобным отроком, халдеи же опаляющее веление Божие, мучителя увеща вопити: благословен еси, Боже отец наших.
Помилуй мя, Боже, помилуй мя.
Се, привлекше отторгоша от телесе люте внезапу окаянную душу, и отводят к Судии грозному и страшному: помянувше убо возлюбленнии, еже к вам моея беседы, память творите мне.
Помилуй мя, Боже, помилуй мя.
Помилуйте мя Ангели всесвятии Бога Вседержителя, и избавите мытарств всех лукавых: не имам бо дела блага, возмерити мерилу злых моих деяний.
Слава Отцу, и Сыну, и Святому Духу.
Егда взыдете, всесвятии мои Ангели, предстати судищу Христову, колена преклонше плачевно возопийте Ему: помилуй всех Творче, дело руку Твоею, Блаже, и не отрини от Тебе.
И ныне и присно, и во веки веков. Аминь.
Поклоньшеся Владычице и Пречистей Матери Бога моего, помолитеся, яко да преклонится с вами, и преклонит Его на милость: Мати сущи и Питательница, услышана будет.
Песнь 8
Ирмос: Из пламене преподобным росу источил еси, и праведнаго жертву водою попалил еси: вся бо твориши, Христе, токмо еже хотети. Тя превозносим во вся веки.
Помилуй мя, Боже, помилуй мя.
Ныне совоздохните вси земнии концы о мне окаяннем, и сплачите: прииде бо лютое свыше изречение, рукама моима связатися, и ногама изринутися.
Помилуй мя, Боже, помилуй мя.
Недоумев от всех, к тебе Хранителю окаяннаго живота моего, стеня зову горько: виждь моих уз вечных озлобление, и не оскудей о мне моляся.
Слава Отцу, и Сыну, и Святому Духу.
Понеже бых демоном издан, и во адово дно нуждею низводят, вем, яко ныне вси мене забыша; ты же помяни мене, о Ангеле Господень.
И ныне и присно, и во веки веков. Аминь.
Христа моего Мати, како забыла еси мене? Како не преклонила еси на милосердие Источившаго кровь от ребра, да спасет, яже созда? Увы мне, како заключися милосердие Христа моего!
Песнь 9
Ирмос: Бога человеком невозможно видети, на Негоже не смеют чини Ангельстии взирати. Тобою же, Всечистая, явися человеком Слово Воплощенно, Егоже величающе, с Небесными вои, Тя ублажаем.
Помилуй мя, Боже, помилуй мя.
Бога не ктому аз помяну, не ктому бо во аде поминати Господа: но во тьме люте покрываемь сежу, ожидая Воскресения всех человек, да судився во огнь ввергуся.
Помилуй мя, Боже, помилуй мя.
Бог не ктому мене помянет, ниже множество Ангелов, Архангелов собор, пророков, апостолов собрание, множества же мучеников, всех же праведных: един убо почерплю злая, яже собрах.
Слава Отцу, и Сыну, и Святому Духу.
Плачите о мне ныне и рыдайте, адово дно и бездна, и червь и тартар; муки убо вся о мне возстоните: един бо от христиан ведохся, вам предан бых, еже мучитися горько.
И ныне и присно, и во веки веков. Аминь.
Божия Мати, виждь в бездну, виждь душу мукам преданную мучитися, и колена преклонши прослези, да преклонится Твоими мольбами, Иже кровь Свою давый за мене, воззвати мя.
