Сотница третья

1. О Всепетая Мати, рождшая всех святых Святейшее Слово! Нынешнее приемши приношение, от всяких избави напастей всех и будущия изми муки о Тебе вопиющих: аллилуиа.

2. Избранней от всех родов Божией Матери и Царице, предивно цельбоносную икону Свою явившей, на нейже у Креста Христова стоящую Заступницу нашу видяще, похвальное Той возглашаем пение: Ты же, Госпоже Всемилостивая, яко имущая милосердие неизреченное, теплым Твоим предстательством и заступлением от всяких нас бед и недугов свобождай, во умилении Тебе зовущих: Радуйся, Благодатная, непрестанно за нас Христу молящаяся.

3. О Всепетая Мати, Сладчайшаго Господа нашего Иисуса Христа нетленно рождшая и спасительным страданием Его многоболезненно спострадавшая, приими милостиво сие малое моление наше, пред многоцелебным Твоим образом с любовию Тебе приносимое, и всемощным Твоим предстательством и заступлением избави нас от временныя напасти и муки вечныя, да сподобимся, по кончине жития нашего, со всеми святыми взывати Спасителю Богу: аллилуиа.

4. Преблагословенная Дево, Богородительнице Чистая, у Креста Сына Твоего и Бога нашего предстоящи, скорбь велию претерпела еси и благодать от Него прияла еси сущия в скорбех утешати. Темже на пречистый образ Твой благоговейно взирающе и изображенную Тя на нем пред Крестом Спаса нашего видяще, умиленно к Тебе вопием: Заступнице усердная, благая и милостивая! Ускори избавити ны от всякия скорби, нужды и болезни и спаси души наша, да Тя со благодарением славим во веки.

5. Притецем, вернии, к благодатному милостей и щедрот источнику — чудотворному Пречистыя Девы образу: сей бо нам свыше даровася, душам и телесем во спасение, емуже поклоняющеся с любовию, возопием к Богородице: о Всепетая Мати, о Царице Всемилостивая, покрый и соблюди нас от всякаго зла Твоим к Богу Матерним предстательством.

6. Взбранной Воеводе, Боголюбивей Царице, превысшей всякаго создания, Деве и Матери Христа Бога, похвальная восписуем Ти раби Твои, Богородице! Ты же, яко Боголюбивая и Всемилостивая Мати, благоизволившая явити пресветлый Свой лик благоверному нашему князю Андрею, от бед и скорбей сохрани ны и храм сей, да зовем Ти: Радуйся, Боголюбивая Царице Богородице, Надеждо и Прибежище наше.

7. О Мати Боголюбивая, Царице Небесная, Всемощная наша Предстательнице! Малыя сия услышавши смиренныя мольбы наша, призри на ны милостивым Твоим оком; буди нам скорая Заступница в день кончины нашея и в час смертный явися нам Сама, Пречистая, простирающи руку помощи, отгоняющи духов злобы, ищущих поглотити душу нашу при разлучении от тела, и сподоби нас в будущей жизни в веселии и радовании возвеличити и прославити Тя, яко Преблагую Покровительницу нашу, да спасении Тобою в безконечном веце вопием Богу: аллилуиа.

8. Взбранней Воеводе победительная, яко избавльшеся от вечныя смерти благодатию от Тебе рождшагося Христа Бога нашего и Твоим Матерним пред Ним ходатайством, благодарственная восписуем Ти, раби Твои: яко имущая державу непобедимую, от всяких нас бед и скорбных обстояний свободи, зовущих: радуйся, Благодатная Богородице Дево, погибших Взыскание и всех скорбящих Радосте.

9. О Всепетая Богообрадованная Мати, рождшая на радость небу и земли Царя Христа, Бога нашего! Услыши глас скорбящих раб Твоих и, приемши сие малое моление наше, избави нас от всяких бед, скорбей и напастей; недуги наша исцели, клеветы потреби, всяку злобу и вражду отжени от нас и будущия изми муки о Тебе вопиющих: аллилуиа.

10. Радуйся, Благодатная Богородице Дево, во объятиях Своих Превечнаго Младенца и Бога носившая, проси Его дати миру умирение и душам нашим спасение. Сын бо Тебе, Богомати, вещает, яко вся прошения Твоя во благое исполнит. Сего ради и мы, припадающе, молимся и, надеющиися на Тя, да не погибнем, имя Твое именуем: Ты бо еси, Владычице, Взыскание погибших.

11. Взыщи нас, погибающих, Пресвятая Дево, не по грехом бо нашим наказуеши нас, но по человеколюбию милуеши, избави нас от ада, болезни и нужды и спаси нас.

12. Взбранной Воеводе, Заступнице нашей, взирающе на первописанный образ Твой, хвалебное пение воспеваем Ти раби Твои, Богомати. Ты же, яко имущая державу непобедимую, сохрани и спаси благодарне Тебе вопиющия: Радуйся, Пречистая, от иконы Твоея милости нам источающая.

13. О Всепетая Мати, Заступнице Всемилостивая, Дево Богородице, обычным Твоим милосердием малое моление сие наше приемлющи, якоже древле, тако и ныне помилуй землю нашу Русскую и от всяких бед раби Твоя избави, о Тебе вопиющия: аллилуиа.

14. Днесь светло красуется славнейший град Москва, яко зарю солнечную восприимши, Владычице, чудотворную Твою икону, к нейже ныне мы притекающе и молящеся, Тебе взываем сице: о, Пречудная Владычице Богородице, молися из Тебе воплощенному Христу Богу нашему, да избавит град сей и вся грады и страны христианския невредимы от всех навет вражиих, и спасет души наша, яко Милосерд.

15. Взбранной Воеводе победительная, яко избавльшеся от злых пришествием Твоего честнаго образа, Владычице Богородице, светло сотворяем празднество сретения Твоего и обычно зовем Ти: радуйся, Невесто Неневестная.

16. Избранней от всех родов Заступнице рода христианскаго, покровом Своея благости покрывающей страну нашу православную, благодарственная пения приносим Ти, Владычице, о явлении нам чудныя иконы Твоея Державныя. Ты же, яко Всемилостивая Заступница всех с верою к Тебе притекающих, от всяких нас бед свободи, да зовем Ти: Радуйся, Матерь Божия Державная, Заступнице усердная рода христианскаго.

17. О Всепетая Мати, Державная Владычице! Приими ныне сие малое моление наше, и величия ради благости Твоея и неизреченных щедрот Твоих, не помяни множества грехов наших, но исполни во благих прошения наша: даруй нам вся потребная к животу и благочестию, избави нас от глада, болезней и печали и Царствия Небеснаго наследники всех сотвори, верно вопиющих Богу: аллилуиа.

18. Града Сионска взыскующе, под Твой покров, Дева Чистая, днесь притекаем, и никтоже возможет на ны, яко несть град силен, аще не Сущаго Бога, и несть ина крепость, аще не милость Владычицы Девы.

19. Ангелов лицы благоговейно Тебе служат и вся Небесныя силы немолчными гласы Тя ублажают, Богородице Дево; усердно молим Тя, Владычице, да пребудет Божественная благодать на честней иконе Твоей «Державней» и светозарный луч славы чудес Твоих да нисходит от Нея на всех с верою Тебе молящихся и вопиющих Богу: аллилуиа.

20. Взбранной Воеводе победительныя песни приносим, яко даровася нам Держава Твоя, и ничесоже устрашимся, не от мира бо спасение наше, но Превознесенныя Владычицы милосердием ограждаемся и тому днесь радуемся, яко прииде Заступница на стражу земли Своея.

21. О Всемилостивая Владычице Богородице, Российской страны дивная Заступнице, обидимых прибежище, грешных спасение! Отечество наше от враг защити, вселенную всю миром благослови, веру православную укрепи, скорби и крест со упованием понести помози, в любви и согласии всех нас соблюди и в радость Господа внити сподоби поющих Ему: аллилуиа.

22. Заступнице верных преблагая и скорая, Пречистая Богородице Дево, молим Тя пред святым и чудотворным образом Твоим, да якоже древле от него заступление Твое граду Москве даровала еси, тако и ныне нас от всяких бед и напастей милостиво избави и спаси души наша яко Милосердая.

23. Избранней Богом от человеческаго рода послужити воплощению предвечнаго Слова, преблагословенней Деве Богородице, достойно воспеваемой от Ангел на небеси, мы, грешнии, на земли дерзаем приносити хвалебное пение; еже милостиво от нас приемши, всемилующая Царице Богородице, от всяких бед нас спаси и вечных мук свободи, да зовем Ти: радуйся, христианом Помощнице и милосердая о грешных Предстательнице.

24. О Всепетая Мати, рождшая святых Святейшее Слово, от Ангел воспеваемая на небеси и от человек славимая на земли! Приими милостиво сие малое моление наше и даруй душевное спасение и телесное здравие всем, верно чтущим Тя и поющим Богу: аллилуиа.

25. Притецем, вернии, со дерзновением к Милующей Царице, Богородице, и умиленно воззовем к Ней: ниспосли на ны милости Твоя богатыя, град сей избави от всякаго обстояния, мир даруй мирови и спасение душам нашим.

26. Архангельский глас вопиет Ти, Всецарице: достойно есть, яко воистину блажити Тя, Богородицу, Присноблаженную и Пренепорочную и Матерь Бога нашего.

27. Отцев соберитеся всеафонское множество, верно празднующе, днесь радующеся, и светло восклицающе вси в веселии: Божия бо Мати ныне от Ангела преславно воспевается, темже яко Богородицу присно Сию славим.

28. Празднует днесь весь Афон, яко песнь прият от Ангела чудно Тебе, Чистей Богоматери, Юже вся тварь чтит славящи.

29. Взбранной Воеводе, Владычице нашей Богородице, знамением иконы Ея святыя дивную победу людем Новаграда даровавшей, благодарственное возглашаем пение: Ты же, Всеблагая Заступнице наша, яко имущая державу непобедимую, от всяких нас бед свободи и от враг видимых и невидимых защити, да зовем Ти: радуйся, Владычице, знамение милости Твоея нам являющая.

30. О Всепетая Мати Сладчайшаго Спасителя нашего Господа Иисуса Христа! Нынешнее наше приемши приношение, от всякия избави нас напасти и скорби и вечныя изми муки всех пред святою иконою Твоею с верою и любовию поклоняющихся и о Тебе благодарно зовущих Богу: аллилуиа.

31. Яко необоримую стену и источник чудес, стяжавше Тя раби Твои, Богородице Пречистая, сопротивных ополчения низлагаем, темже молим Тя: мир отечеству нашему даруй и душам нашим велию милость.

32. Честнаго образа Твоего знамение празднующе людие Твои, Богородительнице, имже дивную победу на сопротивных граду Твоему даровала еси, темже Тебе верою взываем: радуйся, Дево, христиан похвало.

33. Взбранной Воеводе, Владычице нашей Богородице, похвальная пения приносим Ти раби Твои, яко пришествием честнаго образа Твоего стяжавши щит крепкий, стену необоримую и стражу неусыпну. Ты же, яко имущая державу непобедимую, покрый и защити нас, Владычице, от всех врагов видимых и невидимых и избави от всякого вреда, душевнаго и телеснаго, да зовем Ти: радуйся, благая Вратарнице, двери райския верным отверзающая.

34. О Всепетая Мати, Пресвятая Госпоже Дево Богородице! Призри на нас, приносящих смиренно со слезами малыя сия молитвы пред пречистым Твоим образом и все упование и надежду возложивших на Тя, и избави нас всех бед и напастей в животе сем и будущия изми муки, да спасаемии Тобою вопием выну: аллилуиа.

35. Аще и в море ввержена бысть святая икона Твоя, Богородице, от вдовицы не могущия спасти сию от врагов, но явилася есть хранительница Афона и вратарница обители Иверския, враги устрашающая и в православней Российстей стране чтущия Тя от всех бед и напастей набавляющая.

36. Избранней от всех родов Заступнице рода христианскаго, покровом Своея благости покрывающей страну нашу православную, благодарственная пения приносим Ти, Богородице, о явлении чудныя Твоея иконы. Ты же, яко Всемилостивая, всех притекающих к Тебе Помощнице, заступай нас во всех скорбех и нуждах, бедах и напастех, да зовем Ти: радуйся, Заступнице Усердная рода христианскаго.

37. О Всепетая Мати, рождшая всех святых Святейшее Слово, приими ныне малое сие моление и, величия ради благости Твоея и бездны щедрот Твоих, не помяни множества грехов наших, но исполни во благих прошения наша, подавающи телу здравие, душе спасение, избавляющи от всякия нужды и печали и Царствия Небеснаго наследники сотворяющи всех верно вопиющих Богу: аллилуиа.

38. Притецем, людие, к тихому сему и доброму пристанищу, скорой Помощнице, готовому и теплому спасению, покрову Девы; ускорим на молитву и потщимся на покаяние: источает бо нам неоскудныя милости Пречистая Богородица, предваряет на помощь и избавляет от великих бед и зол благонравныя и богобоящиеся раби Своя.

39. Взбранной Воеводе, Пренепорочней Деве Богородице, земли Калужской Избавительнице, хвалебные песни приносим Ти, раби Твои, яко иконы Твоея явлением даровавшей нам стража неусыпна. Ты же моления нашего, пред иконою Твоею возносимаго, не отвержи, но защити ны, Владычице, от всех врагов видимых и невидимых и избави ны от всяких болезней душевных и телесных, да во умилении сердец зовем Ти: радуйся, Владычице, милость Свою нам и заступление являющая.

40. О Всепетая Мати Христа Бога нашего! Приими милостиво сие моление наше, еже принесохом пред Твоею иконою, и в час смертный явися нам Сама, Пречистая, простирающе руку помощи, отгоняюще духи злобы, ищущии поглотити души наша при разлучении от телесе, и умоли Приснопоклоняемую Троицу избавити ны мучения вечнаго, да предстательством Твоим наследуем Царствие Небесное и сподобимся со святыми пети Богу: аллилуиа.

41. Заступнице от враг иноплеменных необоримая Калужския земли и Избавительнице от смертоносныя язвы милостивая! Избави раби Твоя от всяких бед и болезней, с верою и любовию прибегающая к чудотворней иконе Твоей, и спаси души наша.

42. Взбранной Воеводе, Пречистей и Богообрадованней Деве Богородице, огнезрачныя иконы Своея явлением обрадовавшей Церковь Христову и ею от огненнаго запаления защищающей верныя, похвальное возглашаем пение. Ты же, о Богомати, Купина Неопалимая нами именуемая, яко имущая державу непобедимую и милосердие многое, ускори на помощь к нам, требующим Твоего заступления, и от всяких бед свободи зовущих Ти: радуйся, Благодатная, Купина Неопалимая, огненнаго запаления нас избавляющая.

43. О Всепетая Мати, рождшая всех святых Святейшее Слово и Неопалимая Купина от нас недостойных именуемая, вонми гласу молений и пений наших, пред святою иконою Твоею усердно Тебе возносимому, и теплою молитвою Твоею ко Господу огня временнаго и вечнаго избави нас, хвалящих имя Твое и прославляющих чудеса Твоя, Сыну же Твоему и Богу нашему вопиющих: аллилуиа.

44. Избранное и дивное избавление нам даровася — Твой образ честный, Владычице Богородице, яко избавльшеся явлением его от недугов душевных и телесных и скорбных обстояний, благодарственная хваления приносим Ти, Всемилостивая Заступнице. Ты же, Владычице, «Неупиваемою Чашею» нами именуемая, приклонися благоутробно к нашим воздыханиям и воплям сердечным и избавление подаждь страждущим недугом пианства, да с верою воззовем Ти: радуйся, Владычице, Неупиваемая Чаша, духовную жажду нашу утоляющая.

45. О Премилостивая Мати Сладчайшаго Господа нашего Иисуса Христа! Нынешнее наше услыши моление и избави нас от всех недугов, душевных и телесных, наипаче же свободи страждущих недугом пианства рабов Твоих, да не во зле погибнут, но да спасеннии Тобою, присно вопиют Богу: аллилуиа.

46. Днесь притецем, вернии, к Божественному и пречудному образу Пресвятыя Богоматери, напояющей верных сердца небесною Неупиваемою Чашею Своего милосердия и людем верным чудеса показующей. Яже мы видяще и слышаще духовно празднуем и тепле вопием: Владычице премилостивая, исцели наша недуги и страсти, молящи Сына Твоего, Христа Бога нашего, спасти души наша.

47. Избранней от всех родов Божией Матери и Царице, явившейся иногда к человеку беззаконну, во еже отвратити его от пути нечестия, благодарственное пение приносим Ти, Богородительнице: Ты же, яко имущая милосердие неизреченное, от всяких нас бед и грехов свободи, да зовем Ти: радуйся, нечаянную радость верным дарующая.

48. О Всепетая Мати, Невместимаго Бога во чреве вместившая и Радость всему миру родившая! Нынешнее приими пение, вся наша печали на радость преложи и от всякия избави напасти всех и будущия изми муки о Тебе вопиющих: аллилуиа.

49. Днесь, вернии людие, духовно торжествуем, прославляюще Заступницу Усердную рода христианскаго, и, притекающе к пречистому Ея образу, взываем сице: о Премилостивая Владычице Богородице, подаждь нам нечаянную радость, обремененным грехи и скорбьми многими, и избави нас от всякаго зла, молящи Сына Твоего, Христа Бога нашего, спасти души наша.

50. О Всепетая и Всемилостивая Мати, Пречистая Госпоже Богородице! Услыши глас молящихся рабов Твоих и приемши сие малое моление наше избави нас от всяких бед, скорбей и напастей: подаждь нам в жизни руку помощи, враги наша разжени, недуги наша исцели, всякую злобу и вражду отжени от нас, в печалех житейских отраду и утешение даруй и будущия изми муки о Тебе вопиющих: аллилуиа.

51. Избранней Предвечным Царем, превышшей всякаго создания небесе и земли Царице, пришедшей иногда во Влахернскую церковь на молитву, достойное поклонение с благодарением приносяще, яко во тьме сущии, под Твой светящийся омофор с верою и умилением прибегаем. Ты же, яко имущи державу непобедимую, от всяких нас бед свобождай, да зовем Ти: радуйся, Радосте наша, покрый нас от всякаго зла честным Твоим омофором.

52. О Всепетая Мати, Пречистая Госпоже, Дево Богородице! К Тебе возвожду душевныя и телесныя очи, к Тебе простираю разслабленныя руце и из глубины сердца вопию: призри на веру и смирение души моея, покрый мя всемощным омофором Твоим, да избавлюся от всех бед и напастей, и в час кончины моея, о Всеблагая, предстани мне и уготованнаго ради грехов моих избави мучения, да выну поклоняяся зову: аллилуиа.

53. Дева днесь предстоит в церкви и с лики святых невидимо за ны молится Богу, Ангели со архиереи поклоняются, апостоли же со пророки ликовствуют: нас бо ради молит Богородица Превечнаго Бога.

54. Взбранной Воеводе родов христианских и страны нашея известней Избавительнице хвалебныя песни принесем, вернии, на святей горе Ея собравшеся; Ты же, яко имущая милосердие неизреченное, о Владычице Богородице, моления нашего пред чудотворным Твоим образом возносимаго не отвержи, да в умилении сердец зовем Ти: радуйся, Похвало Почаевская и всего мира Надеждо и Утешение.

55. О Всепетая Мати Христа Бога, вся роды христианския любовию Себе всыновившая, достойныя похвалы воспети Тебе недоумеем мы, грешнии, обаче любовию Твоею побеждаемии и к Твоему чудотворному образу очи своя возносяще, молим Тя: в борении и нуждах наших не остави чад Твоих, заступлению Твоему тепле верующих и Сыну Твоему вопиющих: аллилуиа.

56. Взбранной Воеводе, избравшей гору Почаевскую в место селения Своего, похвальная восписуем Ти, раби Твои, Богородице: яко от лет древних прославила еси место сие Богоносное явлением Цельбоносныя Стопы Твоея и Твоего Божественнаго образа чудодействием. Тем-же, яко избавльшая иногда обитель Твою от нашествия агарянскаго, от всяких нас бед и напастей свободи, да всегда Твоею помощию избавляеми, из глубины душевныя вопием Ти: радуйся, похвало Почаевская, надеждо наша и утешение.

57. О Всепетая Мати, Царице неба и земли! Воззри милостивым оком Твоим на ны, предстоящия пред святою иконою Твоею, и на вся люди, Тебе молящиеся, и Твоими Богоматерними молитвами избави нас от всяких бед, напастей и скорбей, да безгрешно, мирно и благочестно поживше в нынешнем веце, и в будущем сподобимся вси небесных и вечных благ от Господа и Спаса и Судии нашего, поюще Ему, прославляющему Тя на святей горе Твоей, и Тобою от святыя иконы Твоея и Стопы Твоея прославляемому во веки: аллилуиа.

58. Предстательство христиан непостыдное, ходатайство ко Творцу непреложное явилася еси воистину, Богородице, в цельбоносней Твоей Стопе и чудотворней Твоей иконе на горе Почаевстей. Не презри убо, Всепетая, грешных молений гласы, но предвари любовию Твоею Матернею на помощь нам, верно зовущим Ти: ускори на молитву и якоже древле явилася еси на скале Почаевстей в столпе огненнем, цельбоносную воду от камене во спасение наше источающи: потщися на умоление и Твоею благостынею покрый и соблюди нас, якоже иногда благопоспешила еси обители Твоей во спасение от нашествия агарянскаго, предстательствующи присно, Богородице, чтущих Тя.

59. К Богородице прилежно ныне притецем, грешнии и смирении, и припадем к дивному образу Ея, иже на горе Почаевстей: к нему же умильно взирающе и моляшеся, Царице Владычице, из глубины душевныя вопием: о Пречудная Дево, Мати Господа Вышняго, oт лет древних избравшая обитель Почаевскую в место селения Своего, землю отечественную нашу в Православии и мире утверди и спаси всех предстоящих и молящихся Тебе умиленною душею и сокрушенным сердцем пред Пречистым Твоим образом со слезами. Не отврати рабы Твоя тщи: Тя бо и едину надежду имамы.

60. Пред святою Твоею иконою, Владычице, молящиеся исцелений сподобляются, веры истинныя познание приемлют и агарянская нашествия отражают. Темже и нам, к Тебе припадающим, грехов оставление испроси, помыслы благочестия сердца наша просвети и к Сыну Твоему молитву вознеси о спасении душ наших.

61. Источник исцелений и веры православныя утверждение Почаевская Твоя икона, Богородице, явися, темже и нас, к ней притекающих, от бед и искушений свободи, лавру Твою невредиму сохрани, Православие во окрест стоящих странах утверди и грехи разреши молитвенник Твоих: елика бо хощеши, можеши.

62. Избранней от всех родов Божией Матери и Царице, скоропослушливо внемлющей молитвам смиренным, и токи целебныя изливающей верным от иконы Своея святыя, благодарственное приносим пение: Ты же, Всемилостивая Заступнице, преклонися благоутробно к гласом нашим хвалебным, и от всяких бед свободи ны, зовущия Ти: радуйся, Всеблагая Скоропослушнице, прошения наша во благо исполняющая.

63. О Всепетая Мати, Скоропослушницею нарекшаяся во святей иконе Твоей, Богородице Марие! Приими милостивно сие малое моление наше, еже от усердия нашего принесохом Ти с верою и любовию, и умоли приснопоклоняемую Троицу избавити ны геенны огненныя, тьмы несветимыя и мучения вечнаго, да предстательством Твоим унаследим Царствие Небесное и сподобимся со святыми пети Богу: аллилуиа.

64. К Богородице притецем, сущии в бедах, и святей иконе Ея ныне припадем, с верою зовуще из глубины души: скоро наше услыши моление, Дево, яко Скоропослушница нарекшаяся, Тебе бо раби Твои в нуждах готовую Помощницу имамы.

65. В мори житейстем обуреваемии, треволнению подпадаем страстей и искушений. Подаждь убо нам, Госпоже, руку помощи, якоже Петрови Сын Твой, и ускори от бед избавити ны, да зовем Ти: радуйся, Всеблагая Скоропослушнице.

66. Избранней от всех родов, небеси и земли Царице, Пресвятей Богородице Одигитрии, яко избавльшеся от вечныя смерти благодатию от Тебе рождшагося Христа Бога нашего и Твоим Матерним пред Ним ходатайством благодарственное пение приносим Ти, раби твои. Ты же, Всемилостивая наша Заступнице, от всяких нас бед и скорбных обстояний свобождай и к Царствию горнему путеводствуй, да зовем Ти: радуйся, Богородице Одигитрие, христиан упование!

67. О Всепетая Мати, Царице Всемилостивая Дево Богородице Одигитрие! Приими малое сие моление наше и принеси е Сыну Твоему, Матерне умоляя Его благость, да помилует нас грешных и недостойных, и Твоего ради всесильнаго ходатайства, избавит нас мучения вечнаго, сподобит Царствие Небесное получити и тамо со Ангелы воспевати Богу: аллилуиа.

68. Избранней от всех родов Божией Матери и Владычице небеси и земли, избавляющей нас от всякия нужды, благодарственное приносим пение. Ты же, Всемилостивая Госпоже Богородице, приими наше усердное моление, сохрани нас от глада и пагубы, даруй земли нашей плодоносие, Питательнице и Спорительнице нив и хлебов наших, да радующеся всегда зовем Ти: радуйся, Благодатная, Господь с Тобою, подаждь и нам, недостойным, росу благодати Твоея и яви милосердие Твое.

69. О Всепетая Мати, рождшая всех святых Святейшее Слово! Нынешнее наше приемши приношение, избави люди, к Тебе прибегающия, от всякия нужды, глада душевнаго и телеснаго, смертоносных болезней и всякаго зла и вечныя изми муки, да с лики ангельскими непрестанно поем Богу: аллилуиа.

70. Пречистая Дево Марие, Мати Царя небеси и земли, благоутробно призираеши на любящих Сына Твоего, Христа Бога нашего, и труждающихся во имя Его вечнаго ради спасения и подаеши им вся обильно к наслаждению. Спорительнице сущи хлебов им, избавляя их всякия нужды и утеснения и устрояя им, рабом Твоим сущим, избавление вечныя муки и жизнь вечную.

71. Избранней от Всевышняго, грешных Споручнице, преклоняющей на милосердие Сына Своего, да спасет яже созда рукою Своею, благодарственное пение приносим Ти, Мати Дево и Владычице, о явлении дивныя Твоея и чудотворныя иконы; Ты же яко предстательство ко Господу имущи, потщися от обстояний многообразных избавити ны и вечное спасение нам соделати, да, воспевающе, вопием Ти: радуйся, грешным Споручнице, всегда о нас руце Свои в поручение Богу приносящая.

72. О Всепетая Мати, Всеблагая Споручнице спасения грешных, Богородице Дево! Приими милостиво и нынешнее наше моление, еже от усердия нашего во благодарение Ти принесохом, и испроси нам у Всещедраго Бога в вере православной непоколебимость, в любви христианской преуспеяние и грехов наших прощение, да предстательством Твоим унаследим Царствие Небесное и сподобимся со всеми святыми пети Богу: аллилуиа.

73. Умолкает ныне всякое уныние и страх отчаяния исчезает, грешницы в скорби сердца обретают утешение и небесною любовию озаряются светло: днесь бо Матерь Божия простирает нам спасающую руку и от Пречистаго образа Своего вещает, глаголя: Аз Споручница грешных к Моему Сыну, Сей дал Мне за них руце слышати Мя выну. Темже, людие, обремененнии грехи многими, припадите к подножию иконы Ея, со слезами вопиюще: Заступнице мира, грешным Споручнице, умоли Матерними Твоими молитвами Избавителя всех, да Божественным всепрощением покрыет грехи наша и светлыя двери райския отверзет нам, Ты бо еси предстательство и спасение рода христианскаго.

74. Тебе, милосердия источнику присно текущему и Споручнице грешных, недостойнии раби Твои, Богородице, припадающе, скорбяще, вопием Ти: спасай нас от бед, Владычице, и Матерним Твоим ходатайством испроси всем нам вечное спасение.

75. Честное жилище бывшее неизреченнаго естества Божественнаго выше слова и паче ума и грешным еси Споручница, подаваеши благодать и исцеление, яко Мати всех Царствующаго: моли Сына Твоего получити нам милость в День Судный.

76. Взбранной Воеводе, Владычице нашей Богородице, благодарственная пения восписуем о явлении чудныя Ея иконы, к Нейже притекающии присно избавляются от враг видимых и невидимых. Ты же, Госпоже Неба и земли, яко милосердная Мати, приими ныне малое сие моление наше и неотступну никогда же сотвори милость Твою от нас и заступление, охраняющи от всех бед и напастей, зовущих Ти: радуйся, Владычице, милостивая о нас пред Богом Заступнице.

77. О Всепетая Мати, рождшая всех святых Святейшее Слово, буди нам покров и защищение в жизни сей от врагов видимых и невидимых, от бед и скорбей, сохрани от искушений и грехопадений и в будущей жизни, на суде Сына Твоего и Бога нашего, буди Заступница и Ходатаица, избавляющи нас от вечнаго осуждения, да спасеннии Тобою, с лики ангельскими вопием Богу: аллилуиа.

78. Взбранной Воеводе, Владычице нашей Богородице, осенившей страну Российскую огнезрачным Своея иконы на Толге явлением, похвальное возглашаем пение; Ты же, о Богомати, яко имущая державу непобедимую, от всяких бед избави нас, зовущих: радуйся, Радосте наша, иконою Твоею нас присно утешающая.

79. О Всепетая Мати, рождшая Радость Вечную — Господа нашего Иисуса Христа, земным и небесным Спасителя! Приими благоутробно молебное пение наше, пред чудотворною иконою Твоею с верою и благоговением Тебе возносимое, и всесильными молитвами Твоими избави нас от временных бед и вечныя муки, сподоби же в благочестии и правоверии пожити зде, в земном житии, таможе, в будущем веце, в радости райстей, со всеми святыми, вечно воспевати Создателю нашему: аллилуиа.

80. Взбранней Воеводе, Богообрадованной Приснодеве Богородице, посетившей Гору Афонскую явлением чудотворным иконы Своея и многия милости Ею дарующей роду христианскому, похвальное возглашаем ныне пение; Ты же, о Богомати, яко имущая державу непобедимую и Матернее о нас попечение, предвари на помощь к нам и от всяких бед избави зовущих Ти: радуйся, Помощнице наша, Троеручною иконою Твоею нам помогающая.

81. О Всепетая Мати Сладчайшаго Искупителя нашего Господа Иисуса Христа! Вонми гласу молебному, Тебе пред святою иконою Твоею нами смиренно возносимому, и Матернею молитвою Твоею к рождшемуся от Тебе святых Святейшему Слову от всякия избави напасти и вечныя муки всех имя Твое молитвенно призывающих и о Тебе благодарно зовущих Богу: аллилуиа.

82. Избранней от всех родов Божией Матери и Царице, восходящей от земли к небеси, благоговейная пения о пречестнем Твоем Успении приносим раби Твои, Богородице. Ты же, яко имущая победу над смертию, от всяких нас смертоносных бед свободи, да зовем Ти: радуйся, Обрадованная, во Успении Твоем нас не оставляющая.

83. О Всепетая Мати Безсмертнаго Царя небесе и земли, Христа Бога нашего, живущая и по смерти, нынешняя приношения о всечестном Твоем Успении от нас приемши, в жизни сей и в смертнем успении нашем от всякия напасти, бед и муки избави и Небеснаго Царствия нас, Царице, сподоби, о Тебе вопиющих: аллилуиа.

84. Взбранное нам и дивное избавление даровася — Твой образ честный, Преблагословенная Дево, Владычице Богородице, яко избавльшеся от злых явлением его и к нему взирающе, восписуем Ти благодарственная раби Твои, Богородице, но яко имущая державу непобедимую, от всяких нас бед свободи, да зовем Ти: радуйся, Радосте наша, избави нас от всякаго зла и утоли наша печали.

85. О Всепетая Мати, Небесная Царице и Владычице, Дево Богородице, рождшая всех святых Святейшее Слово, нынешнее приемши приношение, утоли наша печали и избави нас от всяких напастей, бед, скорбей и вечнаго осуждения и грядущаго изми мучения и сподоби нас, рабов Твоих, в вечных райских селениях водворитися, зовущих: аллилуиа.

86. Утоли болезни многовоздыхающия души моея, Утолившая всяку слезу от лица земли: Ты бо человеком болезни отгоняеши и грешных скорби разрушаеши, Тебе бо вси стяжахом надежду и утверждение, Пресвятая Мати Дево.

87. Взбранней Воеводе, Пренепорочней Деве Богородице, Заступнице нашей и Предстательству христиан непостыдному, явлением чудныя иконы Своея радование подавшей земле Российстей и вся верныя чада Церкве просветившей, благодарение усердно приносим Ти, Богородице, и припадающе пречудному образу Твоему умильно глаголем: спаси, Госпоже, и помилуй рабы Твоя, зовущия: радуйся, Матерь Божия, Предстательнице и Заступнице наша Усердная.

88. О Премилосердая Заступнице наша, великия ради милости Твоея даровавшая отечеству и граду нашему чудотворную икону Твою во освящение, утешение и ограждение наше, нынешнее приемли славословие, от всякаго злаго обстояния избави рабы Твоя и всех нас вечных мук свободи, устнами, душею же и сердцем вопиющих: аллилуиа.

89. Пришествием честныя Твоея иконы, Богоотроковице, обрадованный днесь богохранимый град Кострома, якоже древний Израиль к кивоту Завета, притекает ко изображению лица Твоего и воплотившагося от Тебе Бога нашего, да Твоим Матерним к Нему предстательством присно ходатайствуеши всем, под сень крова Твоего прибегающим, мир и велию милость.

90. Благодарственная приносяще Ти, раби Твои, Богородительнице, о всех, имиже благодеяла еси граду нашему, из глубины души взываем к Тебе: не престани, Владычице, Матерними к Сыну Твоему и Богу нашему молитвами подавати вся благая и спасительная всем, верою и любовию вопиющим Ти: радуйся, Дево, христиан похвало.

91. Избранней от всех родов Божией Матери, небеси и земли Царице, освятившей род человеческий пришествием к нам во всечестнем Рождестве Твоем, благоговейная пения приносим Ти раби Твои, Богородице; Ты же, яко пришедшая на утешение и спасение наше, от всяких нас бед свободи, да зовем Ти: радуйся, Пречистая, весь мир Рождеством Своим возвеселившая.

92. О Всепетая Мати, от неплодове рождшаяся на спасение миру, нынешняя наша о всечестнем Рождестве Твоем приемши приношения, не остави нас во время живота нашего, от всякия напасти и плена вражия избави нас и от неплодства душевнаго разреши всех, о Тебе вопиющих: аллилуиа.

93. Избранней Предвечным Царем от всех родов, Преблагословенней Деве Богородице, рождейся от неплодове на радость всему миру, яко всемощной Заступнице и неусыпаемой Молитвеннице, выну припадающей к Престолу Сына Своего и Бога нашего с Матерним дерзновением за весь род христианский, ныне радостно сошедшеся в Божественнем храме Богоотроковицы, плотию младенствующей во спасение наше, достойное поклонение со благодарением приносим. Ты же, о Всеблагая, призри на моления с верою и любовию вопиющих Ти: радуйся, Радосте наша, спаси нас от вечныя смерти преславным Твоим Рождеством.

94. О Всепетая и Богообрадованная Дево Марие Богородице, рождшаяся на радость и спасение миру, призри милостиво на предстоящих честному образу Твоему, прости нам грехи наша, любвеобильная Мати, и вознеси к Сыну Твоему и Богу нашему теплыя моления за вся люди Твоя, покрый нас ризою Твоею от всякаго зла и настави нас на путь заповедей Христовых, да избавльшеся Тобою от вечныя смерти, радостно вопием Богу: аллилуиа.

95. Избранней Предвечным Царем Богоотроковице Марии, Ангелов и человеков Царице, пришедшей иногда в храм Господень во Святая святых, на обручение девства Своего Жениху Небесному воспитатеся в Божие Жилище, достойное поклонение усердно Тебе приносим; Ты же, яко многомощная Заступница наша, от всяких нас бед и скорбей свободи, да с любовию и умилением Тебе вопием: радуйся, Богоизбранная Отроковице, вхождением во храм двери райския нам отверзающая.

96. О Всепетая Богоотроковице, пришедшая во храм Господень воспитатися во Святая святых в Божие Жилище, нынешнее наше о всечестнем Введении Твоем приемши приношения, избави нас от всякия скорби и напасти и искушений вражеских, очисти ны от всякия скверны плоти и духа и сохрани нас до скончания нашего в целомудрии и чистоте, да освященнии Тобою достойны будем введения во обители райския с мудрыми девами, с нимиже да воспоем о Тебе Богу: аллилуиа.

97. Избранней в Предвечном Совете Богоотроковице Марии послужити велию таинству Боговоплощения, сияющей девственной чистотою паче высшия небесныя чистоты, благоговейныя пения принесем Тебе, Богородице, о всерадостном от Архангела Благовещении Твоем. Ты же, яко обрадованная и радость падшим людем подати могущая, избави нас от всяких бед и греховныя печали и возведи нас к небесней радости, да с Гавриилом вопием Тебе: радуйся, Благодатная, Господь с Тобою.

98. О Всепетая Параклита Невесто, Чистая брака не познавшая Дево! Архангела красотою девства удивившая и Богу Слову плоть нетленно днесь взаимодавшая, нынешняя наша приемши приношения о всерадостном от Гавриила Благовещении Твоем, Христу Богу обрученныя в девстве сохрани, всех же в чистоте укрепи и от бед избави, да свободшеся Тобою от вечных мук, Тобою рай да обрящем, идеже вси да воспоем о Тебе Богу: аллилуиа.

99. Днесь спасения нашего главизна, и еже от века таинства явление: Сын Божий Сын Девы бывает и Гавриил благодать благовествует. Темже и мы с ним Богородице возопиим: радуйся, Благодатная, Господь с Тобою.

100. Возбранных Сил небесных радость и хваление, всего же рода человеча исправление, ублажаем Тя, Пречистая Дево Мати! Ты же наше упование единое, ниспосли душам отраду благодатную, да поем Тебе, образ дивный Твой чтущии: радуйся, Божия Мати, Невесто Нетленная, светлая наша Отрадо.