Молитвы перед началом чтения Псалтири

Разу́мно да бу́дет, како подоба́ет осо́бь пе́ти Псалти́рь

А́ще иере́й, глаголет:

Благослове́н Бог наш, всегда́, ны́не и при́сно и во ве́ки веко́в.

А́ще ли ни, глаго́ли умиле́нно:

Моли́твами святы́х оте́ц на́ших, Го́споди Иису́се Христе́ Бо́же наш, поми́луй нас. Ами́нь.

Царю̀ Небе́сный, Уте́шителю, Ду́ше и́стины, И́же вездѐ сы́й и вся̀ исполня́яй, Сокро́вище благи́х и жи́зни Пода́телю, приидѝ и всели́ся в ны̀, и очи́сти ны̀ от вся́кия скве́рны, и спасѝ, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй на́с. (3)

Сла́ва Отцу̀ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй на́с; Го́споди очи́сти грехѝ на́ша; Влады́ко, простѝ беззако́ния на́ша; Святы́й посетѝ и исцелѝ не́мощи на́ша, и́мене Твоего̀ ра́ди.

Го́споди, поми́луй. (3)

Сла́ва Отцу̀ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче на́ш, И́же есѝ на небесе́х! Да святи́тся и́мя Твоѐ, да прии́дет Ца́рствие Твоѐ, да бу́дет во́ля Твоя̀ я́ко на небесѝ и на землѝ. Хле́б на́ш насу́щный да́ждь на́м дне́сь; и оста́ви на́м до́лги на́ша, я́коже и мы̀ оставля́ем должнико́м на́шим; и не введѝ на́с во искуше́ние, но изба́ви на́с от лука́ваго.

Тропари, глас 6

Поми́луй нас, Го́споди, поми́луй нас, вся́каго бо отве́та недоуме́юще, сию́ Ти моли́тву я́ко Влады́це гре́шнии прино́сим: поми́луй нас.

Слава: Честно́е проро́ка Твоего́, Го́споди, торжество́, Не́бо Це́рковь показа́, с челове́ки лику́ют А́нгели. Того́ моли́твами, Христе́ Бо́же, в ми́ре упра́ви живо́т наш, да пое́м Ти: Аллилу́иа.

И ныне: Мно́гая мно́жества мои́х, Богоро́дице, прегреше́ний, к Тебе́ прибего́х, Чи́стая, спасе́ния тре́буя: посети́ немощству́ющую мою́ ду́шу и моли́ Сы́на Твоего́ и Бо́га на́шего да́ти ми оставле́ние, я́же соде́ях лю́тых, Еди́на Благослове́нная.

Го́споди, поми́луй (40). И поклонися елика ти мощно.

Молитва Святей Живоначальней Троице

Всесвята́я Тро́ице, Бо́же и Соде́телю всего́ ми́ра, поспеши́ и напра́ви се́рдце мое́, нача́ти с ра́зумом и конча́ти де́лы благи́ми богодухнове́нныя сия́ кни́ги, я́же Святы́й Дух усты́ Дави́довы отры́гну, и́хже ны́не хощу́ глаго́лати аз, недосто́йный, разуме́я же свое́ неве́жество, припа́дая молю́ся Ти, и е́же от Тебе́ по́мощи прося́: Го́споди, упра́ви ум мой и утверди́ се́рдце мое́, не о глаго́лании усте́н стужа́ти си, но о ра́зуме глаго́лемых весели́тися, и пригото́витися на творе́ние до́брых дел, я́же учу́ся, и глаго́лю: да до́брыми де́лы просвеще́н, на суди́щи десны́я Ти страны́ прича́стник бу́ду со все́ми избра́нными Твои́ми. И ны́не, Влады́ко, благослови́, да, воздохну́в от се́рдца, и язы́ком воспою́, глаго́ля си́це:

Прииди́те, поклони́мся Царе́ви на́шему Бо́гу. Поклон.

Прииди́те, поклони́мся и припаде́м Христу́, Царе́ви на́шему Бо́гу. Поклон.

Прииди́те, поклони́мся и припаде́м Самому́ Христу́, Царе́ви и Бо́гу на́шему. Поклон.

Таже постой мало, дондеже утишатся вся чувства. Тогда сотвори начало не вскоре, без лености, со умилением и сокрушенным сердцем. Рцы сие: «Блаже́н муж…» тихо и разумно, со вниманием, а не борзяся, якоже и умом разумевати глаголемая.

Отправить