Владыко Господи Вседержителю, исцеляяй всякий недуг и всякую язю, Сам и сию днесь родившую рабу Твою (имя) исцели, и востави ю от одра, на немже лежит; зане, по пророка Давида словеси, в беззакониих зачахомся, и сквернави вси есмы пред Тобою. Сохрани сию и сего младенца, егоже роди, покрый ю под кровом крилу Твоею, от днешняго дне даже до последняго ея скончания, молитвами Пречистыя Богородицы и всех святых, яко благословен еси во веки веков. Аминь.

Господи Боже наш, благоволивый снити с небесе и родитися от Святыя Богородицы и Приснодевы Марии, спасения ради нас, грешных, ведый немощное человеческаго естества, прости рабе Твоей (имя), днесь родившей, по множеству щедрот Твоих. Ты бо рекл еси Господи: раститеся и умножитеся, и исполните землю, и обладайте ею. Сего ради и мы, раби Твои, молимся, и дерзающе незлобивым Твоим человеколюбием, со страхом вопием к Царствия Твоего святому имени: призри с небеси и виждь немощь нас, осужденных, и прости рабе Твоей сей (имя), и всему дому, в немже родися отроча, и прикоснувшимся ей, и зде обретающимся всем, яко Благ и Человеколюбец Бог прости, яко Един имаши власть оставляти грехи, молитвами Пресвятыя Богородицы и всех святых Твоих. Аминь.

Владыко Господи Боже наш, родившийся от Пречистыя Владычицы нашея Богородицы и Приснодевы Марии, и яко младенец во яслях возлегий, и яко детищь восприемлемь бывый, Сам и сию рабу Твою, днесь родившую сие отроча, помилуй и прости вольная и невольная ея прегрешения, и сохрани ю от всякаго диавольскаго мучительства, и из нея рожденнаго младенца соблюди от всякаго яда, от всякия лютости, от всякия бури сопротивнаго, от духов лукавых, дневных же и нощных. Сию же соблюди под державною рукою Твоею, и даждь ей скорое востание, и от скверны очисти, и болезни исцели, и здравие и благомощие души же и телу даруй, и Ангелы светлыми и сияющими сию огради, и соблюди от всякаго наития невидимых духов, ей, Господи, от недуга и слабости, от ревности и зависти, и от очес призора, и помилуй ю и младенца, по велицей милости Твоей, и очисти ю от телесныя скверны, и различных ей находящих утробных стужений, и изведи ю скорою милостию Твоею во смиренном ея теле во исправление; и из нея рожденнаго младенца сподоби поклонитися земному храму, егоже уготовал еси славословити имени Твоему святому, яко подобает Тебе всякая слава, честь и поклонение, Отцу и Сыну и Святому Духу, ныне и присно и во веки веков. Аминь.