Общие молитвы, тропари, кондаки и величания Господу, Божией Матери, святым угодникам Божиим и бесплотным небесным силам

Всемогущий Владыко, Премудрый и Всеблагий Господи, Светоначальнаго Сына Пребезначальный Родителю и Животворящаго Духа Твоего вечный, присносущный Самоизводителю, Егоже величество неисчетно, слава несказанна, и милость безмерна. Благодарим Тя, яко воззвал еси нас от небытия и почтил еси драгоценным образом Твоим, яко даровал еси нам, недостойным, не точию познавати и любити Тя, но еже сладостнейше есть, и Отцем своим нарицати Тя.

Благодарим Тя, Боже милосердия и щедрот, яко преступивших заповедь Твою, не оставил еси нас посреде греха и сени смертныя, но благоволил еси Единороднаго Твоего Сына, Имже и веки сотворены суть, послати на землю нашего ради спасения, да, вочеловечением Его и страшными страданьми, мучительства диаволя и тли смертныя свободимся. Благодарим Тя, Боже любве и сил, яко, по вознесении на небо дражайшаго Спасителя нашего, умолен быв Крестом Его, низпослал еси и Духа Твоего Пресвятаго на избранные Его ученики и апостолы, да, силою богодухновенныя проповеди их, озарят весь мир нетленным светом Евангелия Христова. Сам убо, Человеколюбивый Владыко, услыши ныне смиренную молитву недостойных чад Твоих, да якоже создал еси нас за едину Твою благость, искупил еси ны за едино благоутробие Твое, тако и спасеши нас по единому безприкладному милосердию Твоему; зане от дел наших ниже следа спасения имамы, но чаяние праведныя мести и отлучения от Пресветлаго лица Твоего; аще бо и о единем празднем глаголе взыскано будет в день суда и испытания, о неизчетных наших беззакониях, имиже согрешихом пред Тобою, кий, беднии, имамы воздати ответ? Сего ради весьма от дел наших отчаявшеся оправдания, ко Твоей единей, всяк ум и всяко слово превосходящей, прибегаем благости, юже аки твердое основание надежды имуще, молим Тя: согрешихом, очисти, Господи! беззаконновахом, прости, Владыко! прогневахом Тя, примирися, Долготерпеливе, и сохрани прочее: ум, совесть и сердце наше от скверн мирских, избави и спаси ны от многомятежныя бури страстей и грехопадений, вольных же и невольных, ведомых и неведомых, и в тихое управи пристанище веры, любве и упования жизни вечныя. Помяни нас в милости Твоей, Господи, даруй нам вся, яже ко спасению, прошения, паче же чистое и безгрешное житие: сподоби нас любити Тя, и боятися от всего сердца нашего, и творити во всем волю Твою святую, молитвами Пречистыя Владычицы нашея Богородицы и всех святых Твоих, яко Благ и Человеколюбец Бог еси, и Тебе славу и благодарение и поклонение возсылаем, со Единородным Твоим Сыном, и со Пресвятым и Благим и

Животворящим Твоим Духом, ныне и присно и во веки веков. Аминь.

Единородне Сыне и Слове Божий, изволивый нашего ради спасения воплотитися и смерть претерпети, ныне же, и с пречистою плотию Твоею, на небесех на престоле со Отцем седяй и всем миром управляяй, не забуди милосердием Твоим нас, долу сущих и многими напастьми и скорбьми искушаемых, иже аще и весьма нечисти и недостойни есмы, но в Тебя, Спасителя и Господа нашего, веруем и иного Ходатая и надежды спасения не вемы. Подаждь, о Искупителю Всеблагий, да памятуем выну, коликих мучений души и тела Твоего потребно бяше, во еже удовлити за грехи наша вечной правде Отца Твоего, и како даже до ада со Креста низшел еси пречистою душею Твоею, да нас власти и мучительства адова свободиши: памятующе же о сем, да блюдемся от страстей и грехов, бывших виною лютых страданий и смерти Твоея, и да любим правду и добродетель, еже всякаго дара Тебе в нас приятнейше есть. Яко искушенный по всяческим, Сам веси, о Всеблагий, коль велика есть немощь духа и плоти нашея, а враг наш силен и злохитр, яко лев рыкая ходит, иский кого поглотити: не остави убо нас Своею всесильною помощию и буди с нами выну, храня и покрывая, наставляя и укрепляя, радуя и веселя дух наш. Мы же, на лоно любви и милосердия Твоего повергающеся, весь живот наш, временный и вечный, Тебе предаем, нашему Владыце, Искупителю и Господу, моляще из глубины души, да, имиже веси судьбами, сотвориши нам прейти безбедно мрачную жития сего земнаго юдоль и достигнути Богокраснаго чертога Твоего, егоже обещал еси уготовати всем, верующим во имя Твое и последующим Божественным стопам Твоим. Аминь.

Царю Небесный, Утешителю Всеблагий, Душе истины, от Отца предвечно исходяяй и в Сыне выну почиваяй, независтный Источниче дарований Божественных, разделяя их коемуждо, якоже хощеши. Имже и мы, недостойнии, освятихомся и назнаменани есмы в день крещения нашего! Призри на молитву раб Своих, прииди к нам, вселися в ны и очисти души наша, да будем уготовани в жилище Пресвятыя Троицы. Ей, о Всеблагий, не возгнушайся нашея нечистоты и ран греховных, но исцели я всеврачующим помазанием Твоим. Просвети наш ум, да разумеем суету мира и яже в мире, оживи нашу совесть, да неумолчно возвещает нам, яже подобает творити и яже отметати, исправи и обнови сердце, да не источает прочее день и нощь помышлений злых и желаний неподобных, укроти плоть и угаси росоносным дыханием Твоим пламень страстей, имже помрачается в нас драгоценный образ Божий. Духа праздности, уныния, любоначалия и празднословия отжени от нас, подаждь же нам духа любви и терпения, духа кротости и смирения, духа чистоты и правды, да, исправивше разслабленная сердца и колена, неленостно течем по пути заповедей святых, и тако, избегающе всякаго греха и исполняюще всяку правду, сподобимся улучити кончину мирну и непостыдну, внити в Иерусалим Небесный и тамо покланятися Тебе, купно со Отцем и Сыном, поюще во веки веков: Троице Святая, слава Тебе.

Пресвятая Троице, единосущная державо, всех благих вина! Что воздадим Тебе за вся, яже воздала еси нам, грешным и недостойным, прежде, неже на свет произыдохом, за вся, яже воздаеши коемуждо от нас по вся дни и яже уготовала еси всем нам в веце грядущем? Подобаше убо за толикия благодеяния и щедроты благодарити Тя, не словесы точию, но паче делы, храняще и исполняюще заповеди Твоя: мы же, страстем нашим и злым обычаем внемше, в безчисленныя от юности низвергохомся грехи и беззакония. Сего ради, яко нечистым и оскверненным, не точию пред Трисветлое лице Твое безстудно явитися, но ниже имене Твоего Пресвятаго изрещи довлеяше нам, аще бы не Ты Сама благоизволила во отраду нашу возвестити, яко, чистыя и праведныя любящи, и грешники кающияся милуеши и благоутробне приемлеши. Призри убо, о Пребожественная Троице, с высоты святыя славы Твоея на нас, многогрешных, и благое произволение наше вместо благих дел приими, и подаждь нам духа истиннаго покаяния, да возненавидевше всякий грех, в чистоте и правде до конца чистыми помыслы и благими деяньми славим сладчайшее и великолепое имя Твое. Аминь.

Всемогущая и Животворящая Святая Троице, и Светоначальная, яже всякую и премирную тварь за едину благость от не сущих приведый, и промышляя, и содержащи, иже по прочих Твоих неизреченных о земнем роде благодеяниих, и покание нам ради плотскаго неможения до смерти даровавый! Не остави нас, окаянных, в лукавых наших деяниих умрети, ниже злоначальнику и завистцу, и губителю посмешество быти. Зриши бо, Благосерде, елик убо онаго на нас навет и вражда, елико же и наше страстование, и слабость, и небрежение. Но неоскудныя

Твоя благости соделай на нас, молим на всякий день и час прогневающии Тя честных и животворных заповедей преступлением. И вся убо всего прешедшаго живота нашего и до нынешняго часа согрешенная нами в деяниих, или глагол а-ниих, или в помышлениих, остави и прости. Сподоби же нас прочее скончати житие в покаянии и умилении и соблюдении святых Твоих повелений. Аще убо сладостию прельстившеся, многообразне согрешихом, или мерзкими похотьми, неполезными и вредными, обольстившеся препроводихом; аще гневом и яростию подвигшеся безсловесною, кого брата нашего оскорбихом; аще языком неизбежных и стропотных и крепких сетей обязахомся; аще коим чувств наших и всеми, волею или неволею, ведуще или неведуще, от восхищения или поучения безумно поползохомся; аще же лукавыми помыслы и суетными совесть осквернихом; аще ли коим другим образом прегрешихом, от предприятия и обычая томими зело, прости нам и остави вся, Всещедре, Преблаже и Многомилостиве, и даруй нам прочее бодрость и силу, во еже творити волю Твою, благу и благоугодну, и совершенну, да нощнаго и мрачнаго зла световидным покаянием пременьшеся, и яко во дни благообразно ходяще и очищени обявимся человеколюбию Твоему недостойнии, воспевающе Тя и величающе во веки. Аминь.

Господи святый, в вышних живый и на смиренныя призираяй, и всевидящим оком Твоим призираяй на всю тварь! Тебе преклоняем колена душ и телес наших и молимся Тебе: простри десницу Твою невидимую от святаго жилища Твоего, благослови люди Твоя, Тебе молящияся и от Тебе великия и богатыя милости ожидающия, и, яко Благ и Человеколюбец, дела рук наших исправи, даруя нам мирная и премирная благая Твоя. Яко Твое есть еже миловати и спасати нас, и Тебе славу возсылаем, со Безначальным Твоим Отцем и Животворящим Твоим Духом, ныне и присно и во веки веков. Аминь.

Господи щедре и милостиве, долготерпеливе и многомилостиве! Услыши молитву нашу и вонми гласу моления нашего, сотвори с нами знамение во благо, настави нас на путь Твой, еже ходити во истине Твоей, возвесели сердца наша; во еже боятися имене Твоего святаго. Зане велий еси Ты и творяй чудеса, Ты еси Бог един, и несть подобен Тебе в бозех, Господи, силен в милости и благ в крепости, во еже помогати и утешати и спасати вся уповающия на имя святое Твое. Яко Бог милости и щедрот и человеколюбия еси, и Тебе славу возсылаем, со Безначальным Твоим Отцем и с Пресвятым и Благим и Животворящим Твоим Духом, ныне и присно и во веки веков. Аминь.

Благий Человеколюбче, премилосердый Господи, недуги наша понесый и ранами Твоими нас исцеливый! Пред Твоим величеством рабски припадающе, смиренно молимся: призри, Благосерде, на рабы Твоя, и якоже древле исцелил еси разслабленнаго, тридесять осмь лет в недузе своем лежавшаго, тако ныне, Целителю Благий, милостию и щедротами Твоими рабы Твоя посети. Ты убо разслабленному древле рекл еси: востань, возьми одр твой и ходи. Темже и мы, грешнии и недостойнии раби Твои, на Божественныя Твоя словеса сия надеющеся, пред Твоим же Величеством смиренно припадающе, Твое Божественное милосердие и неизреченное человеколюбие умильно просим: отверзи нам двери милости Твоея и прости вся согрешения наша вольная и невольная, имиже Твою благость прогневахом и Твое человеколюбие раздражихом; уврачуй нашу болезнь греховную, недуги наша душевныя и телесныя во здравие претвори, немощи в силу преложи, печали в радость и скорби в утешение премени; отими от нас всякое уныние и забвение, ум наш укрепи и цел соблюди, во еже всегда в заповедех Твоих поучатися; вся уды наша исправи, во еже волю Твою благую и совершенную творити. Ты бо еси Целитель благий, Воздвижение немощным, болящим Врач, недужным Исцеление, здравым здравия Хранитель, и Тебе славу возсылаем, со Безначальным Твоим Отцем и с Пресвятым и Благим и Животворящим Твоим Духом, ныне и присно и во веки веков. Аминь

Владыко Человеколюбче, Господи Иисусе Христе Боже мой, да не в суд ми будут Святая сия, за еже недостойну ми быти; но во очищение и освящение души же и тела, и во обручение будущия жизни и Царствия. Мне же, еже прилеплятися Богу, благо есть, полагати во Господе упование спасения моего. Аминь.

Благодарю Тя, Господи Царю всех, царствующаго небом и землею и преисподнею, благодарю Тя, Безначальне, Всесильне Царю Вседержителю, благодарю Тя, Преблагий Всемилостивый, Наставниче заблуждшим, на землю с небес сошедый и воплотивыйся от Девы Марии, нашего ради спасения, и бывый един Бог и Человек подобен мне, кроме страстей и всякаго греха, не привидением же, но истиною безстрастный неправедно от беззаконник пострадавый, да безстрастие мне осужденному за множество грехов моих подаси. Пою Твое неизреченное долготерпение, Господи; величаю неисповедимое смотрение Твое, славлю Твою безмерную милость, имиже преклонься, мене, осужденнаго, оправдал еси. Покланяюся страстем Твоим, имиже аз безчестнейших пременихся страстей; лобызаю Твой Крест, имже мой грех осудил еси и от смертнаго осуждения мя свободил еси; лобызаю гвозди оныя, имиже клятвы потребил еси запрещение; целую язвы, имиже моего преслушания уврачевашася язвы. Целую трость, еюже подписал еси свобождение и еюже строптиваго змия уязвил еси главу; целую копие, мое рукописание растерзавшее и безсмертия источник отверзшее; целую губу, напоенную оцта и ко пречистым Твоим принесенную устом, еюже преслушания моего горькое во сладкое претворися. О неизмеримая глубино милосердия Твоего, Христе Спасителю наш! Темже смиренно со благодарением Ти припадаем, и Животворящему Твоему кресту, имже нас спасл еси от работы врагу, любезно кланяемся. Исповедуем, яко Ты еси един свят, един крепкий и един жизнодавец, и на всех имаши волю прикладну. Тобою, Господи, дается на диавола и на его воинство крепость, и Тебе славу возсылаем, со Безначальным Твоим Отцем, и с Пресвятым и Благим и Животворящим Твоим Духом, ныне и присно и во веки веков. Аминь.

Владыко Христе Боже, Иже страстьми Своими страсти моя исцеливый и язвами Своими язвы моя уврачевавый! Даруй мне, много Тебе прегрешившему, слезы умиления; сраствори моему телу от обоняния Животворящаго Тела Твоего, и наслади душу мою Твоею Честною Кровию, от горести, еюже мя сопротивник напои; возвыси мой ум к Тебе, долу поникший, и возведи от пропасти погибели: яко не имам покаяния, не имам умиления, не имам слезы утешительныя, возводящая чада ко своему наследию. Омрачихся умом в житейских страстех, не могу воззрети к Тебе в болезни, не могу согретися слезами, яже к Тебе любве. Но, Владыко Господи Иисусе Христе, сокровище благих, даруй мне покаяние всецелое и сердце люботрудное во взыскание Твое, даруй мне благодать Твою и обнови во мне зраки Твоего образа. Оставих Тя, не остави мене; изыди на взыскание мое, возведи к пажити Твоей, и сопричти мя овцам избраннаго Твоего стада, воспитай мя с ними от злака Божественных Твоих Таинств, молитвами Пречистыя Твоея Матере и всех святых Твоих. Аминь.

Господи Иисусе Христе, Боже мой, посещаяй тварь Свою, Емуже явлены страсти моя и немощь естества нашего человеческаго и крепость супостата нашего! Ты

Сам покрый мя от злобы его, зане сила его крепка, естество же наше страстно и сила наша немощна. Ты убо, о Благий, ведый немощь нашу и носяй неудобство безсилия нашего, сохрани мя от смущения помыслов и потопа страстей, и достойна сотвори мя службы Твоея святыя, да не како в страстех моих растлю сладость ея, и обращуся безстуден пред Тобою и дерзостив. Господи, пресладкий мой Иисусе, помилуй и спаси мя. Аминь.

На кресте пригвожденный за ны, Иисусе Христе, Единородный Бога Отца Сыне, милости, любве и щедрот неисчерпаемая бездно! Вем, яко грехов ради моих, от неизреченнаго человеколюбия, кровь Твою пролияти на кресте изволил еси, юже аз, окаянный и неблагодарный, доселе скверными моими делы попирах и нивочтоже вменях. Тем убо из глубины беззакония и нечистоты моея умныма очима на распятаго

Тя на кресте Искупителя моего воззрев, со смирением и верою во глубину язв, Твоего милосердия исполненных, себе повергаю, грехов прощения и сквернаго жития моего исправления прося. Милостив буди мне, Владыко и Судие мой, не отрини мя от лица Твоего, но всесильною Твоею рукою Сам мя к Тебе обрати и на путь истиннаго покаяния настави, да отныне положу спасения моего начало. Божественными страданьми Твоими укроти моя плотския страсти; излиянною Твоею кровию очисти моя душевныя скверны, распятием Твоим распни мя миру с его соблазнами и похотьми; крестом Твоим огради мя от невидимых враг, ловящих душу мою. Прободенными ногами Твоими от всякаго пути лукаваго возбрани ногам моим; прободенными руками Твоими руце мои от всякаго неугоднаго Тебе дела воздержи. Пригвожденный плотию, пригвозди страху Твоему плоть мою, да уклонився от зла, творю благо пред Тобою. Преклонивый главу Твою на кресте, к земли смирения преклони вознесенную мою гордыню; венцем Твоим терновым огради моя ушеса, во еже не слышати неполезнаго; желчь устами вкусивый, положи хранение нечистым устом моим; отверстое копием имеяй сердце, сердце чисто во мне созижди; всеми Твоими язвами, всего мя сладце в любовь Твою уязви, да Тебе, Господа моего, возлюблю всею душею, всем сердцем, всею крепостию и всем помышлением. Даждь ми Себе странна и неимуща где главы поклонити; даждь ми Себе Всеблагаго, избавляющего душу мою от смерти; даждь мне Себе Всесладкаго, услаждающаго мя в скорбех и напастех Своею любовию, да Егоже первее ненавидех, прогневлях, от себе изгонях и ко кресту пригвождах, сего ныне возлюблю, радуяся прииму и сладце крест Его до конца жизни моея понесу. Не даждь отселе, о Всеблагий Искупителю мой, не единой моей воли совершатися, понеже зла есть и непотребна, да не паки впаду в тяжкую работу царствовавшаго во мне греха, но Твоя воля благая, спасти мя хотящая, да совершается во мне всегда, ейже мя вручая, Тебе распятаго Господа моего умным очесем моего сердца представляю и молю из глубины души, да и в разлучении моем от бреннаго моего тела, Тебе единаго на кресте Твоем узрю, в руце мя защищения Своего приемлюща и от воздушных духов злобы храняща, вселяюща же со грешники, покаянием Тебе благоугодившими. Аминь.

Господи Иисусе Христе, Сыне Бога Живаго, Творче неба и земли, Спасителю мира! Се аз, недостойный и паче всех грешнейший, смиренно колена сердца моего пред славою величества Твоего преклонив, воспеваю крест и страдания Твоя, и благодарение Тебе, Царю всех и Богу, приношу, яко благоизволил еси вся труды и всякия беды, напасти и мучения, яко человек понести, да всем нам во всяких печалех, нуждах и озлоблениих состраждущий Помощник и Спаситель будеши. Вем, Всесильне Владыко, яко вся сия Тебе убо не быша потребна, но человеческаго ради спасения, да всех нас искупиши от лютыя работы вражия, крест и страдания претерпел еси. Что убо воздам Тебе Человеколюбче, о всех, яже пострадал еси мене ради грешнаго? Не вем, душа бо и тело и вся благая от Тебе суть, и вся моя Твоя суть, и аз Твой есмь. Точию на безчисленное Твое, Благоутробне Господи, милосердие надеяся, пою Твое неизреченное долготерпение, величаю неисповедимое истощание, славлю Твою безмерную милость, покланяюся пречистым страстем Твоим, и вселюбезно лобызая язвы Твоя, вопию: помилуй мя, грешнаго, и сотвори, да не безплоден будет во мне Крест Твой святый, да причащаяся зде с верою страданием Твоим, сподобилюся видети славу Царствия Твоего на небеси! Аминь.

Слава Тебе, Господи Иисусе Христе, Боже мой, яко паки сподобил мя еси недостойнаго, прешедша поприще святаго поста, поклонитися Божественным страстем Твоим и видети всерадостный день преславнаго из гроба воскресения Твоего, воньже свободил еси сущия во аде от век связанныя души праведных. Тоя божественныя свободы духа и плоти дражайший Спасителю мой, и аз желаю, да разреши мя, связана суща многими грехи, и да сотвориши возсияти живоносному свету воскресения Твоего во мрачней души моей; вижду бо безчисленныя щедроты и неизреченное человеколюбие Твое, яко не точию от небытия в бытие мя привел еси, и образа Твоего подобием украсив, всея дольния твари владыку поставил мя еси, но и посем падша с высоты и врагу поработившася, не оставил еси, но, искупив мя безценною кровию Твоею, благодатию крещения снабдил мя еси, да востеку на первое достояние. Аз же, окаянный, запят быв умом плотским, обратихся вспять и паки раб сотворихся греха и страстей, донележе един по единому погубих вся дары благодати Твоея. И ныне убо, что сотворю, не вем; обаче помянув глаголы пречистых уст Твоих, яко не пришел еси призвати праведники, но грешники в покаяние, и аз, яко един от сих, с верою и смирением прихожду к живоносному гробу Твоему, не ароматы и воню мира носяй (наг бо есмь и пуст благих дел), но паче надежду имый обрести в нем прощение грехом моим и обновление нечистому житию моему. Призри убо на мя кающася и служити Тебе хотяща, и не отрини от благодати воскресения Твоего! Живоносною смертию Твоею и погребением умертви моя лютыя страсти, да, яко мертв и погребен, живу в мире сем. Преславным востанием Твоим воздвигни мою душу, умерщвленную грехи, и оживи совесть, еяже ничтоже в мире нужнейше есть. Вознесением Твоим отторгни мя от суетных и душетленных благ земных, и сотвори мя горняя мудрствовати, яко да не ктому себе живя и угождая, но Тебе, Господу и Богу моему, служа и работая, якоже сподобихся поклонитися воскресению Твоему на земли, тако сподоблен буду видети Тебе, дражайшаго Искупителя моего, и на небеси, за приятие смерти крестныя славою и честию венчана, и став одесную величествия Твоего, со Архангелы и Ангелы, и со всеми искупленными Тобою братиями моими, во веки веков пою Тебе: Аллилуиа. Аминь.

Согреших, беззаконновах и не оправдихся пред Тобою, Преблагий Владыко, преступих спасительныя Твоя заповеди и священныя обеты моя, яже во святом крещении пред святым Твоим жертвенником, пред Ангелы же и человеки сотворих; преобидех честную кровь завета Твоего, еюже освятихся, общение искупления прием: дух благодати обезчестих, страшнаго же и преестественнаго сыноположения небрегох; всякое писание, Божественный закон и учение Богодухновенное, ударения воздуха тщая, и вещания едина токмо деяний пустая во мне вменишася; именем токмо и словесы честное Евангелие истиннаго христианства окаянный содержу; руце имам ко всякому хищению и лихоимству прилежны; нозе же скоро и дерзостно ко всякой неправде зле текущия, готовы часть братнюю восхищати и попирати, снедающе убогих; уста священных молитв и слова Божия орган, всякия нечистоты, суесловия и клятвопреступления, бесом сотворих во орган; очи и вся моя чувства, блужения и всякаго сквернения премножеством исполних; во мне царствующаго ума Божественное благодати семя поправ, и уды Твоя, Христе, блудничи уды сотворив, вместо храма Божия, тли и всякия нечистоты хранилище обретохся.

Сего ради, Преблагий Владыко, многое Твое человеколюбие в стужение претворих окаянный, и многая Твоя благая дарования, в казнь безумно мне преложих; отнюдуже ниже от сущих ми благих, ниже от болезней ближних лучший быв, праведно на мя сам Твоего праведнаго наказания язвы подвигох. Но не яростию Твоею обличи мя, ниже гневом Твоим накажи мя, Господи. Тебе единому согреших, но Тебе единому и покланяюся, и сокрушенным сердцем, яко жертву чистую, исповедание Ти приношу: ослаби, Человеколюбче Владыко, устави праведно наносимую рану, да победит множество щедрот Твоих, грехов моих лукавое собрание, и Твоея безчисленныя благости пучина да покрыет горькое слез моих море. Имам в руках Твоего человеколюбия образ и величество: разбойника, мытаря, блудницу и блуднаго сына, иже вси паче мене в покаянии благоискусствующе, в Небесное Царство предвзыдоша. С ними убо и мене исповедающася и припадающа Ти приими, Владыко; аще же и тех всяческаго обращения и покаяния множества отстою, недоставшее да исполнит безмерная благость Твоя, паче же и все, понеже и всего воистину отстою. Приношу Ти рыдание убогих и гласы младенец, смиренную и препростую, всякаго возраста молящихся часть, достойную щедрот и прощения Твоего. Имаши к сему на милосердие и милость преклоняющия Тя крест и вольную смерть, юже за мя неблагодарнаго претерпел еси, подвиги к тому апостолов, преподобных, постников и мучеников крови; пред всеми же общую всех надежду и спасение, паче слова без семене Рождшую Тя; ихже мольбы человеколюбно приемши, услыши мя, Иисусе Сладчайший, молящаготися, и ниже токмо о мне самом, но и о нихже должен есмь; воинству и всей державе даруй на супостаты победу. Заблуждшия же от Православныя веры еретики и отступники к познанию истины призови, неверныя просвети, да Тя уведят; грешныя к покаянию приведи, девствующим чистоту и воздержание даруй, брачным святыню, вдовицам и сирым буди воспитание, нищим покров, странствующим возвращение, плавающим пристанище, кающимся прощение даруй, плачущим утешение, благим во благости пребывати, средним лучшими быти, согрешающим во исправление приходити. Ей, Иисусе Сладчайший, молютися: даждь грехом моим оставление, ума благопостояние, тела здравие, житию нуждная довольная, мир во днех моих, воздуха благорастворение, земли благоплодие, веры Православныя возращение, и соединение святых Твоих церквей, низложение ересей, советов нечестивых разорение, огнь любве и всякаго благочестия, в молитве чистоту сердечную, в заключении терпение и великодушие, в надежди веселие и всякое душевному моему и телесному здравию и спасению полезное, паче же великолепей Твоей славе подобающее прошение даруй, и исполни по неизмерным щедротам Твоим, избавляя мя належащаго праведнаго прещения, губительства, труса, потопа, огня, меча и всякия смертоносныя язвы; и не хотяй смерти грешника, даруй ми время ко покаянию, яко да и настоящих зол и будущих вечных мук свобождуся, благодатию и человеколюбием Безначальнаго Твоего Отца, с Нимже благословен еси, со Пресвятым, Благим и Животворящим Твоим Духом, ныне и присно и во веки веков. Аминь.

Владыко Господи Иисусе Христе, Боже мой, Иже неизреченнаго ради Твоего человеколюбия, на конец веков во плоть оболкийся от Приснодевы Марии, славлю о мне Твое спасительное промышление раб Твой, Владыко; песнословлю Тя, яко Тебе ради Отца познах, благословлю Тя, Егоже ради и Дух Святый в мир прииде, покланяюся Твоей по плоти Пречистей Матери, таковей страшней тайне послужившей, восхваляю Твоя ангельская ликостояния, яко воспеватели и служители Твоего величествия; ублажаю Предтечу Иоанна, Тебе крестившаго, Господи; почитаю и провозвестившия Тя пророки, прославляю апостолы Твоя святыя; торжествую же и мученики, священники же Твоя славлю; покланяюся преподобным Твоим, и вся Твоя праведники пестунствую. Таковаго и толикаго многаго и неизреченнаго лика божественнаго в молитву привожду Тебе, Всещедрому Богу, раб Твой, и сего ради прошу моим согрешением прощения, еже даруй ми всех Твоих ради святых, изряднее же святых Твоих щедрот, яко благословен еси во веки. Аминь.

Тебе, Господи, единому благому и непамятозлобному, исповедаю грехи моя, Тебе припадаю, вопия, недостойный: согреших, Господи, согреших, и несмь достоин воззрети на высоту небесную, от множества неправд моих. Но, Господи мой, Господи, даруй ми слезы умиления, Единый Блаже и Милостивый, яко да ими Тя умолю очиститися прежде конца от всякаго греха; страшно бо и грозно место имам проити, тела разлучився, и множество мя мрачное и безчеловечное демонов срящет, и никтоже в помощь спутствуяй, или избавляяй. Тем припадаю Твоей благости, не предаждь обидящим мя, ниже да похвалятся о мне врази мои, Благий Господи, ниже да рекут: в руки наша пришел еси и нам предан еси. Ни, Господи, не забуди щедрот Твоих, и не воздаждь ми по беззаконием моим, и не отврати лица Твоего от мене, но Ты, Господи, накажи мя, обаче милостию и щедротами, враг же мой да не возрадуется о мне, но угаси его на мя прещения, и все упраздни его действо, и даждь ми к Тебе путь неукорный, Благий Господи, занеже и согрешив не прибегох к иному врачу и не прострох руки моея к богу чуждему. Не отрини убо моления моего, но услыши мя Твоею благостию, и утверди мое сердце страхом Твоим; и да будет благодать Твоя на мне, Господи, яко огнь попаляяй нечистыя во мне помыслы, Ты бо еси, Господи, свет паче всякаго света; радость, паче всякия радости; упокоение, паче всякаго упокоения; жизнь истинная и спасение пребывающее во веки веков. Аминь.

Господи, согрешихом на небо и пред Тобою! Приими обращение и покаяние наше, приими наше стенание и слезы, приими покаяние нас, грешных, приими рыдание и вопль наш даже до смерти. Приими нас, окаянных, живших безстудно; приими нас, Человеколюбче, зело прогневавших Тя, приими нас, Владыко, проведших всю жизнь в распутстве, во всяком лукавствии и нечистоте, приими нас, Господи Боже, преступивших заповеди Твоя, приими нас, Владыко, недостойных раб Твоих, и не воздай нам по делом рук наших. Исповедаем Тебе, Владыко, яко по грехом нашим несмы достойни даже и жизни; исповедаем, Господи, яко несмы достойни даже воззрети на солнце сие, зане несть таков грех, несть ни едино таково злодеяние, егоже не совершили быхом мы окаяннии. Но приими нас, Господи, якоже блуднаго сына, приими якоже разбойника, приими яко блудницу и мытяря. Господи, обрати нас! Господи, вразуми нас и не прогневайся на нас, но буди милостив ко грехом нашим! Ты еси Бог наш, и и разве Тебе иного не знаем. Господи, исторгни нас от враг наших и не вниди в суд с рабы Твоими. Господи, Ты еси Бог, и мы людие Твои. Согрешихом, содеяхом беззаконие и неправду, сотворихом зло, погрешихом во всем, не послушахом заповедей Твоих, и того ради далече, уклонихомся от Тебе. Но помилуй, Господи, дела рук Твоих; помилуй, Владыко, тыя, иже хитростию змия изгнани быша из рая; помилуй нас и облецы нас в хитон веселия и одежду спасения; помилуй нас, ихже диавол лишил есть помощи Твоея. Милосерде, помилуй тыя, иже оставиша Тя и служах ему; помилуй заблудшия, помилуй не сохранивших заповедей Твоих и последовавших злодеянием демонов; помилуй осквернивших себе грехми, помилуй тыя, иже пребывают под властию диавола, помилуй осквернившихся распутством. Помилуй, Милосерде, помилуй, Блаже, помилуй, Долготерпеливе, зане руки наша совершиша всякое зло, всякое осквернение, любостяжание и неправду. Осквернихом душу, яже создал еси по образу Твоему, осквернихом тело, осквернихом чувство. Язык наш явися якоже мечь остр, направлен противу ближняго, очи наши исторгают пламень, руки наша полны крове, ноги наша скоры на совершение зла, уста наша осквернена злословием, и, кратко рещи, осквернихом и землю и воздух. Воистину неправедная дела наша доидоша даже до небесе, хищения наша превысиша горы, любостяжание превыси облака, пороцы наши достигоша небесе, греси наши суть непростительни, преступления наша не имут извинения, прегрешения наша суть неисправима, и се земля не может понести наших злодеяний. Темже, Господи, нужду имамы в милосердии Твоем. Ты веси немощь естества нашего, помилуй, Господи, творение рук Твоих. Се взываем к милосердию Твоему: не лиши нас помощи Твоея, низпосли нам, недостойным, милость Твою, даруй нам, грешным, заступление Твое, яви нам лице Твое, и спасемся. Аминь.

Благий Человеколюбче, Премилосердый Господи, недуги наша понесый и ранами Твоими нас исцеливый! Пред Твоим величеством рабски припадающе, смиренно молимся: призри, Благосерде, на рабы Твоя, и якоже древле исцелил еси разслабленнаго, тридесять осмь лет в недузе своем лежавшаго, тако и ныне, Целитель Благий, милостию и щедротами Твоими рабы Твоя посети. Ты убо разслабленному древле рекл еси: востани, возьми одр твой и ходи. Темже и мы, грешнии и недостойнии раби Твои, на божественная Твои словеса сия надеющеся, пред Твоим же величеством смиренно припадающе, Твое божественное милосердие и неизреченное человеколюбие умильно просим: отверзи нам двери милости Твоея и прости вся согрешения наша вольная и невольная, имиже Твою благость прогневахом и Твое человеколюбие раздражихом; уврачуй нашу болезнь греховную, недуги наша душевныя и телесныя во здравие претвори, немощи в силу преложи, печали в радость и скорби во утешение премени, отими же от нас всякое уныние и забвение; ум наш укрепи и цел соблюди, во еже всегда в заповедех Твоих поучатися; вся уды наша исправи, во еже волю Твою благую и совершенную творити. Ты бо еси Целитель Благий, воздвижение немощным, болящим врач, недужным исцеление, здравым здравия хранитель, и Тебе славу возсылаем, со Безначальным Твоим Отцем, и с Пресвятым и Благим и Животворящим Твоим Духом, ныне и присно и во веки веков. Аминь.

С вышних призирая, убогия приемля, посети нас, озлобленныя грехи, Владыко Всемилостиве, молитвами Богородицы даруй душам нашим велию милость.

Светильниче солнечный, Всемилостивый Спасе, просвещением сияния Твоего подай и нам слово, да восхвалим чистою совестию Твое пребожественное празднество, Тебе же, Единароднаго Сына, единосущна с Духом, славяще, даруеши бо нам мир и велию милость.

Всякия скверны, Всемилостиве Спасе, аз бых делатель, и во отчаяния ров впадся, но стеню от сердца и вопию к Тебе, Слове: ускори, Щедрый, и потщися на помощь нашу, яко Милостив.

Царю Небесный, Утешителю, Душе истины, Иже везде сый и вся исполняяй, Сокровище благах и жизни Подателю, прииди и вселися в ны, и очисти ны от всякия скверны, и спаси, Блаже, души наша.

Святый Боже, Святый Крепкий, Святый Безсмертный, помилуй нас (читается трижды, с крестным знамением и поясным поклоном).

Пресвятая Троице, помилуй нас; Господи, очисти грехи наша; Владыко, прости беззакония наша; Святый, посети и исцели немощи наша, имене Твоего ради. Господи, помилуй (трижды).

Слава Отцу и Сыну и Святому Духу, и ныне и присно и во веки веков. Аминь.

Отче наш, Иже еси на небесех! Да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго. Аминь.

Верую во единаго Бога Отца, Вседержителя, Творца небу и земли, видимым же всем и невидимым. И во единаго Господа Иисуса Христа, Сына Божия, Единороднаго, Иже от Отца рожденнаго прежде всех век; Света от Света, Бога истинна от Бога истинна, рожденна, несотворенна, единосущна Отцу, Имже вся быша. Нас ради человек и нашего ради спасения сшедшаго с небес и воплотившагося от Духа Свята и Марии Девы, и вочеловечшася. Распятаго же за ны при Понтийстем Пилате, и страдавша, и погребенна. И воскресшаго в третий день по Писанием. И возшедшаго на небеса, и седяща одесную Отца. И паки грядущаго со славою судити живым и мертвым, Егоже Царствию не будет конца. И в Духа Святаго, Господа Животворящаго, Иже от Отца исходящаго, Иже со Отцем и Сыном спокланяема и сславима, глаголавшаго пророки. Во едину Святую, Соборную и Апостольскую Церковь. Исповедую едино крещение во оставление грехов. Чаю воскресения мертвых и жизни будущаго века. Аминь.

Да воскреснет Бог, и расточатся врази Его, и да бежат от лица Его ненавидящий Его. Яко исчезает дым, да исчезнут; яко тает воск от лица огня, тако да погибнут беси от лица любящих Бога и знаменующихся крестным знамением, и в веселии глаголющих: радуйся, Пречестный и Животворящий Кресте Господень, прогоняй бесы силою на тебе пропятаго Господа нашего Иисуса Христа, во ад сшедшаго и поправшаго силу диаволю, и даровавшаго нам тебе Крест Свой Честный на прогнание всякаго супостата. О Пречестный и Животворящий Кресте Господень! Помогай ми со Святою Госпожею Девою Богородицею и со всеми святыми во веки. Аминь.